ʻOkú Ke Manatuʻi?

Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:

• Ko Kīhená ko ha feituʻu ʻo e afi fakamamahi?

ʻIkai. Ko e foʻi fakakaukau ʻo hono tutu moʻui ʻo e kakaí ʻoku fakalielia ia kia Sihova. ʻIkai ngata aí, ko e fakakaukau ʻo e fakamamahiʻi ʻo e kau maté ʻoku fepaki ia mo e ʻulungaanga ʻofa ʻo e ʻOtuá. Naʻe ngāueʻaki ʻe Sīsū ʻa e foʻi lea ‘Kihená’ ke fakatātaaʻiʻaki ʻa e fakaʻauha fakaʻaufuli tupu mei he fakamaau-tamaki ʻa e ʻOtuá. Ko ‘Kihená’ ʻoku ʻi ai hono ʻuhinga meimei tatau mo e “Anoafi” naʻe lave ki ai he tohi Fakahaá. ʻOkú na fakatātaaʻi fakatouʻosi ʻa e fakaʻauha taʻengata ʻa ia heʻikai malava ai ha toetuʻu.—7/1, peesi 31.

• Ko e hā e ngaahi fakakaukau ʻe niʻihi ki he lotu fakafāmilí?

Kuo ngāueʻaki ʻe he niʻihi ʻa e taimi ko ení ke teuteu ai ki he ngaahi fakataha ʻa e fakatahaʻangá. Ko e niʻihi kuo nau lautohi, fetalanoaʻaki mo fakatātaaʻi ʻe fakamatala Fakatohitapú ke maʻu ʻaonga mei ai ʻa e fānaú. Ko hono maʻu ha ʻatimosifia nongá ʻoku tokoni ia ki ha fetalanoaʻaki fakaueʻiloto mo e felīngiaki ʻo e ngaahi fakakaukaú, ʻa ia ʻoku ʻai ai ʻa e taimi ko iá ke fakangalongataʻa ki he tokotaha kotoa.—8/15, peesi 6, 7

• Naʻe ʻuhinga ki he hā ʻa e ʻOtuá ʻi hono tala ki he kau Līvaí: “Ko au ko ho inaji”?

Ko e ngaahi matakali kehe taki taha ʻo ʻIsilelí naʻa nau maʻu ha konga kelekele, ka ko e kau Līvaí naʻa nau maʻu ʻa Sihova ko honau “inaji.” (Nōm. 18:20, PM) Heʻikai te nau maʻu tukufakaholo ha kelekele, ka naʻa nau maʻu ha monū makehe ʻo e ngāué. Neongo ia, naʻe tokangaʻi ʻe Sihova ʻa ʻenau ngaahi fiemaʻu fakamatelie tefitó. ʻI he ʻahó ni, ko e faʻahinga ko ia ʻoku nau maʻu ʻa e monū ʻo hono fakalahi e ngaahi meʻa ʻo e Puleʻangá ʻoku lava ke nau tuipau ʻe tokonaki mai ʻa e ngaahi meʻa ʻoku fiemaʻu ki he moʻuí.—9/15, peesi 7-8, 13.

• ʻE lava ke mole mei ha meʻamoʻui haohaoa ʻa e haohaoá?

ʻIo. Ko e haohaoa naʻe foaki ʻe he ʻOtuá ki heʻene ngaahi meʻamoʻui ʻatamaiʻiá ʻoku ʻi he tuʻunga fakangatangata. Neongo naʻe fakatupu haohaoa ia, naʻe fiemaʻu ke fakaʻapaʻapaʻi ʻe ʻĀtama ʻa e ngaahi fakangatangata fakaesino naʻe tuku kiate ia ʻe hono Tokotaha-Fakatupú. Ko e fakatātaá, kapau naʻá ne tukunoaʻi ʻa e lao ʻo e kalāvité pea puna mei ha lilifa māʻolunga, ʻe pau ke ne mate pe lavea lahi. ʻI he founga meimei tatau, ʻoku ʻikai ha meʻamoʻui haohaoa—tangata pe ʻāngelo—ʻe lava ke ne fakalaka ʻi he ngaahi fakangatangata fakaeʻulungaanga kuo fokotuʻu ʻe he ʻOtuá ʻo taʻefakaeʻa atu ia tonu ki hono ngaahi nunuʻa koví.—10/1, peesi 6.

• Ko e hā ʻe lava ke ne tokoniʻi ha Kalisitiane ke ne fakapapauʻi pe ʻoku ʻaonga pe ʻikai ha faʻahinga fakafiefia?

ʻI hono fakapapauʻi pe ʻe ʻaonga ha faʻahinga fakafiefia pea hoko ʻo fakahōifua he vakai mai ʻa e ʻOtuá, ʻoku ʻaonga ke ʻeke: Ko e hā ʻoku kau ki aí? Ko fē taimi ʻoku ou tuli ai ki aí? Ko hai hoku ngaahi takangá?—10/15, peesi 9-12.

• Ko e hā ʻoku totonu ke tau fai he taimi ʻoku ʻi ai ai haʻatau fehuʻi fekauʻaki mo ha meʻa ʻoku tau lau he Tohi Tapú pe ʻi he taimi ʻoku tau fiemaʻu ai ha faleʻi fekauʻaki mo ha palopalema fakafoʻituitui?

ʻOku ekinaki mai kia kitautolu ʻa e Palōveepi 2:1-5, ke tau “haʻao” pe fekumi ki he ʻilomeʻá mo e fakahinohinó. ʻOku fakahuʻunga mai heni ʻoku totonu ke tau feinga mālohi ʻi he fekumi ki he ngaahi tali ki heʻetau ngaahi fehuʻi Fakatohitapú pea ki hono maʻu ha ngaahi fakaleleiʻanga ki heʻetau ngaahi palopalema fakafoʻituituí. Kapau ʻoku ʻikai ke tau maʻu ha fakahinohino pe fakaleleiʻanga hili ʻa e fekumí, ʻe lava ke tau lea ki ha kaungātui matuʻotuʻa, mahalo ko ha taha ʻo e kau mātuʻá.—10/15, peesi 32.

• ʻE lava fēfē ke tokoniʻi kitautolu ʻe he fakamatala ʻi he Palōveepi 7:6-23 ke tau fakaʻehiʻehi mei he mamata ʻi he ʻata fakalieliá?

ʻOku fakamatala ʻa e konga tohi ko iá ki ha talavou naʻe ʻeveʻeva ʻi ha feituʻu ʻa ia ne ʻiloa naʻe nofo ai ha fefine ʻulungaanga taʻetaau. Naʻá ne fakataueleʻi ia. ʻI he ʻahó ni, ʻoku lelei ke tau fakaʻehiʻehi mei he ngaahi saiti ʻInitaneti ʻoku ʻi ai e ngaahi ʻata fakatauelé, pea ʻoku mahuʻinga ke kumi ki he tokoni ʻa e ʻOtuá ʻi he lotu ki muʻa ʻi he aʻu ʻo fehangahangai mo e ngaahi ʻīmisi pehē ʻi he ʻInitanetí.—11/15, peesi 9-10.