Naʻe Anga-Fēfē ʻEtau ʻi Hení?

ʻI ha ngaahi lea mahino ngofua mo nounou, ko Sēnesi ʻa e ʻuluaki tohi ʻo e Tohi Tapú, ʻoku fakamatala ai ki he tupuʻanga ʻo e ʻunivēsí: “I he kamataʻanga naʻe fakatupu ʻe he ʻOtua ʻa e ngaahi langi mo mamani.” (Sēnesi 1:1) Hili hono fakatupu ʻe he ʻOtuá ʻa e ʻakaú mo e fanga manú, naʻá ne fakatupu ʻa e ʻuluaki ongo meʻa ʻi he faʻahinga ʻo e tangatá ʻa ʻĀtama mo ʻIvi. Naʻá na kehe mei he fanga manú koeʻuhí ko e tangatá naʻa nau maʻu ha konga ʻo e ngaahi ʻulungaanga ʻo e ʻOtuá tonu, kau ai ʻa e tauʻatāina ke filí. Ko ia ai, naʻe pau ke na fai ʻa e fakamatala ki he meʻa naʻá na faí. Kapau naʻá na talangofua ki he ngaahi fakahinohino ʻa e ʻOtuá, ʻe lava ke na kau ki he taumuʻa ʻa e ʻOtuá ʻi heʻena hoko ko e ʻuluaki ongo mātuʻa ʻo ha fāmili fakamāmani lahi ʻa ia te nau maʻu ʻa e melino mo e moʻui haohaoa ʻi he māmaní ʻo taʻengata.

Kae kehe, ko ha ʻāngelo ʻe taha, pe meʻamoʻui laumālie naʻá ne puke ʻa e faingamālie ko iá ke ngāueʻaki ʻa e tangatá ki ha lelei siokita pē maʻana. Naʻá ne hoko ai ko Sētane, ʻoku ʻuhingá ko e “Tokotaha-Talitekeʻi.” ʻI heʻene lea fakafou ʻi ha ngata, naʻe kākaaʻi ʻe Sētane ʻa ʻIvi, ʻo tala ange ʻe lelei ange kiate ia ke ne liʻaki ʻa e tataki ʻa e ʻOtuá. Naʻe muimui ʻa ʻĀtama mo ʻIvi kia Sētane, ʻo motuhia ai hona haʻi mo hona Tokotaha-Ngaohí. Koeʻuhi ko ʻena fili koví, naʻe mole ai mei heʻetau ʻuluaki ongo mātuʻá ʻa e moʻui taʻehanongataʻangá pea ʻomai ai kia kitautolu kotoa ʻa e angahalá, taʻehaohaoá pea mo e taʻealakalofi ʻo e maté.

Naʻe fanongonongo leva ʻe he ʻOtuá ʻene taumuʻa ke fakaleleiʻi ʻa e tuʻunga fakamamahi ko ení pea ʻoange ki he hako ʻo ʻĀtamá ʻa e founga ke maʻu ai ʻa e moʻui taʻehanongataʻangá. Naʻe tomuʻa tala ʻe he ʻOtuá ʻo pehē ko ha “hako”—ko ha tokotaha mahuʻinga—ʻe faifai atu pē ʻo ne fakaʻauha ʻa Sētane pea toʻo kotoa atu ʻa e faingataʻa naʻe fakatupunga ʻe Sētane, ʻĀtama mo ʻIví. (Sēnesi 3:15) Ko hai ʻe hoko ko e “hako”? ʻE tala ia ʻi he faai atu ʻa e taimí.

ʻI he vahaʻa taimi ko ení, naʻe feinga hokohoko ʻa Sētane ke ne fakafepakiʻi ʻa e taumuʻa lelei ʻa e ʻOtuá. Naʻe mafolalahia vave ai ʻa e angahalá mo e fulikivanú. Naʻe fakapapauʻi ʻe he ʻOtuá ke fakaʻauha ʻa e fulikivanú ʻi ha lōmaki. Naʻá ne fakahinohino ʻa Noa māʻoniʻoni ke faʻu ha ʻaʻake—ko ha fuʻu puha naʻe tētē—ke fakahaofi ai ia mo hono fāmilí fakataha mo e fanga manu naʻe fakahinohino kiate ia ke fakahū ki he ʻaʻaké.

ʻI he hili ʻa e taʻu ʻe taha mei he tō ʻa e Lōmakí, naʻe hū ai ʻa Noa mo hono fāmilí ki tuʻa mei he ʻaʻaké ki ha māmani kuo maʻa. Ka ko e “hako” naʻe teʻeki ai ke hā.

—Makatuʻunga ʻi he Sēnesi vahe 1-11; Sute 6, 14, 15; Fakahā 12:9.