Fakautuutu ʻa e Nounou Fakameʻatokoni ʻi Māmani Lahí Koeʻuhi ko e Taú mo e Feliuliuaki ʻa e ʻEá​—Ko e Hā ʻa e Lau ʻa e Tohi Tapú?

Ko e tau ʻi ʻIukalainé fakataha mo e ngaahi uesia ʻoku fakatupunga ʻe he feliuliuaki ʻa e ʻeá, ʻoku hokohoko atu ʻene uesia ʻa e maʻuʻanga meʻatokoni ʻi māmani lahí. ʻOku tautefito ʻene hoko ení ki he ngaahi fonua langalanga haké, ʻa ia ko e tokolahi ʻoku nau fāinga ke maʻu ha meʻakai feʻunga.

• “Ko e ngaohi mo hono maʻu ʻa e meʻakaí ʻoku uesia ia ʻe he taú, feliuliuaki ʻa e ʻeá, totongi ʻa e maʻuʻanga iví mo e hā fua.”​—António Guterres, sekelitali seniale ʻa e Ngaahi Puleʻanga Fakatahatahá, Siulai 17, 2023.

• “ʻOku tomuʻa tala ʻe he kau mataotao tokolahi ko e fakafisi ko ia ʻa Lūsia mei he aleapau fefakatauʻaki atu ki tuʻa ʻa e uité, te ne fakalahi ai ʻa e nounou fakameʻatokoni ʻi māmani lahí pea taki atu ki he hikihiki ʻa e mahuʻinga ʻo e meʻakaí ʻi he ngaahi fonua ʻoku māʻulalo ʻenau paʻanga hū maí, tautefito ʻi ʻAfilika Tokelau mo e Hahake Lotolotó.”​—Atalayar.com, Siulai 23, 2023.

Fakakaukau ki he meʻa ʻoku leaʻaki ʻe he Tohi Tapú ʻo fekauʻaki mo e nounou fakameʻatokoní pea mo e kahaʻú.

Naʻe tomuʻa tala ʻe he Tohi Tapú ha nounou fakameʻatokoni

• Naʻe kikiteʻi ʻe Sīsū: “ʻE tuʻu ʻa e fonua ki he fonua mo e puleʻanga ki he puleʻanga, pea ʻe ʻi ai ʻa e ngaahi nounou fakameʻatokoni.”​—Mātiu 24:7.

• Ko e tohi Tohi Tapu ʻa Fakahaá ʻoku fakamatala ai ki ha kau tangata heka hoosi fakaefakatātā ʻe toko fā. Ko e taha ʻi he kau tangata heka hoosi ko iá ʻokú ne fakafofongaʻi ʻa e taú. ʻOku muimui atu ʻiate ia ha tangata ʻe taha ʻokú ne fakafofongaʻi ʻa e hongé, ko ha taimi ʻa ia ʻe faingataʻa ke maʻu ha meʻakai feʻunga pea ʻe totongi mamafa. “Naʻá ku mamata, pea vakai, tā ko ha hoosi ʻuliʻuli, pea ko e tokotaha naʻe heka aí naʻá ne toʻo ha meʻafua fua mamafa ʻi hono nimá. Pea naʻá ku fanongo ki he meʻa naʻe ongo mai ʻo hangē ha leʻo . . . ʻOku pehē: ʻKo ha kuata uite ki ha tēnali ʻe taha, pea ko e kuata paʻale ʻe tolu ki ha tēnali ʻe taha.’”​—Fakahā 6:5, 6.

Ko e ngaahi kikite Fakatohitapu ko eni fekauʻaki mo e nounou fakameʻatokoní ʻoku lolotonga fakahoko ia ʻi he taimí ni ʻi he taimi ʻoku ui ʻe he Tohi Tapú ko e “ngaahi ʻaho fakaʻosí.” (2 Tīmote 3:1) Ke ako lahi ange fekauʻaki mo e “ngaahi ʻaho fakaʻosí” pea mo e kau tangata heka hoosi ʻe toko fā ʻi he Fakahaá, sio ʻi he vitiō Kuo Liliu ʻa e Māmaní Talu mei he 1914 pea lau ʻa e kupu “Kau Tangata Heka Hoosi ʻe Toko Faá​—Ko Hai Kinautolu?”

Founga ʻe lava ke tokoni ai ʻa e Tohi Tapú

• ʻI he Tohi Tapú ʻoku maʻu ai ha faleʻi ʻaonga ʻe lava ke ne tokoniʻi kitautolu ke fekuki mo e ngaahi tuʻunga faingataʻá, ʻo kau ai ʻa e hikihiki ʻa e totongi ʻo e meʻakaí pe naʻa mo e nounou fakameʻatokoní. Sio ki ha ngaahi fakatātā ʻe niʻihi ʻi he kupu “Founga ke Moʻui Ai ʻi ha Meʻa Siʻi.”

• ʻI he Tohi Tapú ʻoku toe ʻomai ai ʻa e ʻamanaki kiate kitautolu ʻe toe lelei ange ʻa e ngaahi meʻá. ʻOku talaʻofa mai ai ha taimi ʻa ia “ʻe lahi fau ʻa e uité ʻi he māmaní” pea ʻe maʻu ʻe he taha kotoa ʻa e meʻakai hulu fau ke kai. (Saame 72:16) Ke ako lahi ange fekauʻaki mo e ʻamanaki ʻi he Tohi Tapú ki he kahaʻú pea mo e ʻuhinga ʻe lava ke ke falala ai ki aí, lau ʻa e kupu “Ko ha ʻAmanaki Moʻoni ki ha Kahaʻu Lelei Ange.”