Mazu Ngakwamba

Buku ili la Malemba ngo Ngangatiwovya pa Umoyu Widu likuwovyeningi kuti muleki kusuzgika kusaniya malemba ndipuso nkhani za mu Bayibolu zo zingakuwovyani pa suzgu yeyosi yo mwakumana nayu. Likuwovyeningi so kuti musaniyi nkhani yakwenere ya mu Bayibolu yo mungagwiriskiya ntchitu kuti muchiski anyinu kweniso kuŵawovya kuti asankhengi vinthu vo vitumbika Yehova. Sankhani mutu wo mukhumba ndipu gwiriskiyani ntchitu mafumbu kweniso fundu zakudumuwa zo zikonkhoska nkhani za mu Bayibolu. (Wonani bokosi lakuti “Mo Mungagwiriskiya Ntchitu Buku Ili.”) Kukamba uneneska, musaniyengi malemba kweniso ulongozgi wakwenere wo ungakuwovyani. Buku ili likuwovyeningi so kusaniya fundu za mu Bayibolu zo mungagwiriskiya ntchitu pakuwovya anyinu ndi kuŵachiska.

Mo Mungagwiriskiya Ntchitu Buku Ili

Kuti musaniyi mutu wa nkhani yo mukhumba, mungagwiriskiya ntchitu kabosi kakufufuziya, pamwenga mungafufuza nkhani yo pachigaŵa cho yingasanirika. Buku ili la Malemba ngo Ngangatiwovya pa Umoyu Widu lagaŵika vigaŵa 7 vikuluvikulu. Vigaŵa vaki ndi ivi: Masuzgu, Mijalidu, Mpingu, Umoyu Widu wa Zuŵa ndi Zuŵa, Banja, Ubwezi Widu ndi Yehova ndipuso Nkharu Yidu. Vigaŵa vinyaki ve ndi mitu yinandiku. Mwaviyo, mukhumbika waka kusankha chigaŵa chakwenere ndi kusankha mutu wo mukhumba. Kweni asani mutichiziŵa umampha cha chigaŵa cho pe mutu wo mukhumba, mungafufuza pa mundandanda wa mitu Yosi kuti musaniyepu mutu wo ungakoliyana ndi nkhani yo mukhumba. Pamutu wewosi musaniyengepu timitu timanatimana tamalembu ngafipa ukongwa. Tinyaki mwa timitu teniti talembeka nge mafumbu kweni tinyaki ndi viganizu waka. Asani muŵerenga lemba lo le ndi vilembu vifipa ukongwa pasi pa kamutu, muŵanaŵaniyengepu ukongwa ndi kuwona mo limukiya fumbu pamwenga kukoliyana kwaki ndi chiganizu cho. Mitu yinyaki yagaŵika tivigaŵa so tinyaki kuti musaniyengi liŵi nkhani yo mukhumba. Kweniso mumalu nganyaki, muwonengemu malemba nganyaki ngo ngayamba ndi mazu ngakuti “Wonani so.” Malemba ngakusazgiyapu ngenanga, nge ndi fundu zinyaki so zo zikoliyana ndi mutu wo mwajula. Kweniso mumalu nganandi musaniyengemu so kamutu kakuti “Vakuwoniyapu va mu Bayibolu vo Vingakuwovyani.” Pasi pa kamutu kenaka, pe chiganizu cho chikonkhoska mwakudumuwa lemba lo patuliya fundu yo. Asani muŵerenga lemba lenili, mugwiriskiyengi ntchitu chiganizu chenichi kuti chikuwovyeni kuŵanaŵaniyapu.

Pamutu wewosi mubuku ili, paŵikika waka malemba ngamanavi chinanga kuti mu Bayibolu mwe so malemba nganyaki nganandi ngo ngakoliyana ndi nkhani yo. Buku ili likuwovyeningi kusaniya pakwambiya asani mukhumba kufufuza fundu zinyaki. (Nthanthi 2:1-6) Kuti musaniyi so fundu zinyaki zinandi, mungagwiriskiya so ntchitu malemba ngo ngakuŵikika nge malifalensi mudanga lapakati mu Bayibolu la Charu Chifya la Malemba Ngakupaturika ndipuso fundu zaki zakusambiriya. Mugwiriskiyengi so ntchitu Kabuku Kakufufuziya Nkhani ka Akaboni aku Yehova ndipuso Watch Tower Publications Index kuti muziŵi vo lemba lo ling’anamuwa pamwenga mo mungaligwiriskiya ntchitu. Mufufuzengi so mumabuku ngo ngatuzgika pambula kuswera kuti muziŵi mo lemba lo likonkhoskeke munthowa yasonu.

Ndi pemphu lidu kuti buku ili la Malemba ngo Ngangatiwovya pa Umoyu Widu likuwovyeni kusaniya zeru kweniso kuvwisa Malemba Ngakupaturika. Asani muligwiriskiyengi ntchitu buku ili, mufikengi pakusimikiza kuti “mazu ngaku Chiuta ngamoyu ndipuso nganthazi.”—Ahe. 4:12.