Lutirizgani Kuja Ndi Chilatu Chakupanga Akusambira
1. Kumbi nchinthu wuli cho chikhumbika kuti ŵanthu azitaskiki?
1 Lipoti la uteŵeti la 2014, lilongo kuti ŵanthu aku Chiuta mba phamphu pa ntchitu yakupharazga uthenga wamampha wa Ufumu. (Mat. 24:14) Sonu tifikiya ŵanthu anandi ndi uthenga wa m’Bayibolu chifukwa chakuti tipharazga kunyumba ndi nyumba, kumalu ngo kusanirika ŵanthu anandi ndipuso tigaŵiya timapepala takupambanapambana. Kweni kuti ŵanthu azitaskiki, tikhumbika kuŵawovya kuti aje akusambira aku Yesu mwakusambira nawu Bayibolu.—1 Tim. 2:4.
2. Kumbi tikhumbika kujifumba mafumbu wuli kuti tijengi akunozgeka kwambisa sambiru la Bayibolu?
2 Nyengu Zosi Mujengi Akunozgeka Kwambisa Sambiru: Asani munthu walongo kuti wakhumba kusambira, kumbi muto nambala yaki ya foni ndi kumumbiya mwaliŵi kuti muyambi kusambira nayu Bayibolu? Kumbi ndi zukwanji po mungwambisa sambiru la Bayibolu pa ulendu wakwamba? Kumbi ndi zukwanji po mungupempha munthu yo mutimugaŵiya magazini kuti muyambi kusambira nayu Bayibolu? Kumbi anyinu wo mugwira nayu ntchitu, wo musambira nawu sukulu, wo muja nawu pafupi, abali ŵinu ndi ŵanthu anyaki wo muziŵana nawu mukuŵalongopu vidiyo yakuti Nchifukwa Wuli Tikhumbika Kusambira Bayibolu? ndi yakuti Kumbi Sambiru la Bayibolu Lichitika Wuli? Asani mupharazga mwakugwiriskiya ntchitu kathebulu pamwenga kashelufu, kumbi mukambiya ŵanthu wo ato mabuku kuti mungayamba kusambira nawu Bayibolu?
3. Kumbi ndi vinthu wuli vo vingatiwovya kuti tisambizengi umampha uneneska?
3 Yehova ndi Yesu Akuwovyeningi: Pa nyengu yo Yesu watumanga akusambira ŵaki kuti ‘akasambizi ŵanthu amitundu yosi kuti aje akusambira,’ wangwamba ndi mazu ngakuti “lutani.” Yapa Yesu walongonga kuti tikhumbika kuyesesa ndipuso kuchitapu kanthu. Kweni iyu wakutileka tija cha. Wangukamba kuti waŵengi nasi. (Mat. 28:19, 20) Yehova watipasa so mzimu waki wakupaturika ndi vidya vakupharazgiya. Kweniso watitisambiza mo tingasambiziya ŵanthu uneneska. (Zek. 4:6; 2 Ŵakor. 4:7) Tingamupempha Chiuta kuti watipaski mtima ‘wakukhumbisiska ndi nthazi’ kuti tigwiri ntchitu yakukhumbika iyi.—Ŵaf. 2:13.
4. Nchifukwa wuli tikhumbika kulutirizga kuja ndi chilatu chakupanga akusambira?
4 Tikondwa asani tipharazga uthenga wamampha. Kweni tikondwa ukongwa asani tasambiza munthu uneneska ndi kumuwovya kuti wayambi kwenda pa “nthowa yakulongozge ku umoyu.” (Mat. 7:14; 1 Ŵat. 2:19, 20) Chakuzirwa ukondwa nchakuti asani tilutirizga kuja ndi chilatu chakupanga akusambira, tikondweska Yehova yo “wakhumba cha kuti yumoza wanangiki, kweni kuti wosi alapi.”—2 Pet. 3:9.