Angupereka Vinthu Vamampha Ukongwa

Nkhondu yachiŵi yapacharu chosi yati yamala mu 1945, vinthu vingunangika ukongwa ku Germany. Matawuni ngangunangika, mumasukulu mwengavi chechosi, vipatala vagwiranga ntchitu cha ndipuso mabomba ngambula kuphulika ngenga peposi. Kusazgiyapu yapa, chakurya chenga chimana. Venivi vinguchitiska kuti mtengu wakuguliya chakurya ukweri ukongwa. Mwakuyeruzgiyapu, kumsika hafu kilogilamu ya sitoku mtengu waki wenga wamalipiru nga masabata 6!

Pa ŵanthu anandi wo angukwaskika, penga so Akaboni aku Yehova mahandiredi wo anguja vyaka vinandi mujeri ndipuso mumisasa yakutombozgiyaku ŵanthu chifukwa cha chivwanu chawu. Mu 1945, angutuzgika ndi vakuvwala va mujeri pe vo avwalanga. Akaboni anyaki angutaya katundu wawu. Anyaki angusuzgika ukongwa ndi nja mwakuti akomokanga maunganu nge mukati.

Akaboni a Muvyaru Vinyaki Anguwovya Mwaliŵi

Akaboni aku Yehova a muvyaru vinyaki angutumiza mwaliŵi chakurya ndipuso vakuvwala. Abali ku likulu lapacharu chosi ku United States angupempha ofesi ya nthambi ya ku Switzerland kuti yiwovyi abali ku Germany. Nathan H. Knorr, wakumiya likulu lapacharu chosi wanguluta ku Europe kuti wakawonesesi kuti abali yaŵa awovyeka mwaliŵi.

Akaboni ku Switzerland ŵenga ndi mtima wakupaska ndipu angupereka chakurya, vakuvwala ndipuso ndalama. Vinthu vo angugula ŵechendaluti navu ku Germany, anguluta navu dankha ku Bern kuti akavipakiri. Akaboni a muvyaru vinyaki nge ku Sweden, Canada ndi ku United States, anguwovya so abali wo akhumbikanga chovyu. Ndipu a nguwovya ŵanthu aku Germany pe cha kweni anguwovya so muvyaru vinyaki mo mwenga nkhondu ku Europe ndi ku Asia.

Vinthu vakukondwesa vo vinguchitika

Kwa myezi yimanavi waka, ofesi ya nthambi ya ku Switzerland yingutumiza khofi, mkaka, shuga, masiliyozi, vipasu, mphangwi kweniso nyama ndi somba za muvithini. Yiwu angupereka so ndalama.

Kusazgiyapu yapa, Akaboni a ku Switzerland angutumiza matani ngankhondi nga vakuvwala kusazgapu vakuvwala va mphepu, malaya ngachinthukazi ndi masuti ngachinthulumi. Chigongwi cha Alinda cha January 15, 1946, chingukamba kuti: “Abali angupereka vinthu viheni cha kweni angupereka vo venga vamampha ukongwa. Abali angupereka vinthu vamampha ukongwa kuti awovyi abali ŵawu ku Germany.”

Akaboni ku Switzerland angupereka so sapatu pafufupi 1,000 ndipu ŵechendazitumizi anguziwona dankha kuti asimikiziyi asani zamampha. Abali ndi azichi ku Wiesbaden ku Germany, wo angulondere katundu mwenuyu anguzizwa kuwona mo wawonekiyanga umampha. Kaboni munyaki wangukamba kuti: “Ku Germany kulivi masitolu ngo nge ndi malaya ngamampha kweniso sapatu zakutowa viyo.”

Abali angulutirizga kovya anyawu ku Germany mpaka mu August 1948. Vinthu vosi vo abali a ku Switzerland angutumiza kwa abali ŵawu ku Germany vingukwana matani 25. Nge mo takambiya, mbakaboni a ku Switzerland pe cha wo atumizanga chovyu. Kweni yiwu ŵenga mugulu la vyaru vo vatumizanga vinthu vimanavi. Tikamba viyo chifukwa pa nyengu yo ku Switzerland kwenga Akaboni 1,600 pe!

“Muyanjanengi”

Yesu Khristu wangukamba kuti: “Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.” (Yohane 13:34, 35) Chanju chinguchitiska ŵanthu aku Yehova kuti aperekengi vinthu vamampha ukongwa. (2 Akorinto 8:1-4) Kalata yo yingutuliya ku Zurich yingukamba kuti “abali anandi wo ŵengavi chechosi kweni akhumbisiskanga kuwovyaku, angupereka waka ndalama zawu.”

Ŵanthu aku Yehova ku Germany anguswera cha kumalana ndi masuzgu ngo angukumana nangu chifukwa chakutombozgeka kweniso nkhondu. Chinthu chikulu cho chinguŵawovya ndi ndondomeku yamampha yo abali angunozga ndipuso mzimu wakupaska. Ndipu abali ŵenaŵa angulongo chanju chakutuliya pasi pa mtima.