Ntchifukwa Wuli Ŵanthu Anandi Atumbikana Cha?—Kumbi Bayibolu Likambanji?

Mazuwa nganu wanthu anandi atumbikana cha. Mwakuyeruzgiyapu, munthu yo watama wakalipiya dokotala; makasitomala ngakalipiya akugwira ntchitu wo apereke vakurya mu resitilanti, ŵanthu wo akwera ndegi anyoza akuwonere ŵanthu wo akwera mu ndegi, ŵana asukulu amutafu anyoza, kuwofyeza ndipuso kupuma asambizi wawu ndipuso andali anyaki aserezeka mu nkhani zakukwasana ndi kuswa marangu ndipu achitisa ŵanthu wo akuŵasankha kutimbanyizikanga maŵanaŵanu.

Bayibolu ndilu lendi ulongozgi wakuthembeka wo ungatiwovya kuja ndi nkharu yamampha. Likonkhoska so chifukwa cho ŵanthu anandi aleke kutumbika anyawu mazuŵa nganu.

Kumbi vinthu ve wuli pa nkhani yakutumbikana?

Kutumbikana lo ndi jalidu lakukhumbika ukongwa kweniso lakuzomerezeka, kusowa ukongwa pa charu chosi.

• Kafukufuku munyaki yo wanguchitika pambula kuswera ku America, walongo kuti mijalidu yamampha yasika ukongwa ku United States pakuyeruzgiya ndi vyaka 22 vo vajumpha.

• Kafukufuku munyaki so yo anguchita kufumba ŵanthu akujumpha 32,000 akutuliya mu vyaru 28, ŵanthu 65 pa ŵanthu 100 wewosi angukamba kuti mazuwa nganu kuleka kutumbikana kwafika paheni ukongwa chijaliyi.

Bayibolu lingukambiya limu venivi.

• “Mu mazuŵa ngakumaliya, kuŵengi nyengu zakusuzga ukongwa. Ŵanthu azamuja akujiyanja, akujikuzga, akujiŵikamu; akunyoza, ambula kuvwiya apapi, ambula kuwonga, . . . ambula lisungu, [ndipuso] akofya.”—2 Timote 3:1-3.

Kuti muziŵi vinandi pa mo uchimi uwu ufiskikiya mazuŵa nganu, ŵerengani nkhani yamutu wakuti “Kumbi Bayibolu Lingukambiya Limu Vakukwaskana ndi Maŵanaŵanu Kweniso Vakuchita va Ŵanthu Mazuŵa Nganu?”

Ulongozgi wo ungakuwovyani kuti muchitengi vinthu mwaulemu

Mu charu ichi cho kuleka kutumbikana kwaluta panthazi ukongwa, ŵanthu mamiliyoni nganadi asaniya kuti Bayibolu pe ndilu lingawovya munthu kuja ndi nkharu yamampha. Ulongozgi waki pa nkhani ya mijalidu yamampha, ‘ngwakugomezgeka nyengu zosi, kutuwa sonu mpaka muyaya.’ (Masalimo 111:8) Wonani vakuyeruzgiyapu ivi:

• Vo Bayibolu likamba: “Vinthu vosi vo mukhumba kuti ŵanthu akuchitiyeni, namwi muŵachitiyi venivo.”—Mateyu 7:12.

  Vo lemba ili ling‵anamuwa: Tichitengi vinthu mwalisungu ndipuso mwaulemu ndi wanthu nge mo tikhumbiya kuti nasi atichitiyi.

• Vo Bayibolu likamba: “Sonu pakuti mwataya boza, weyosi waku yimwi walongorongi uneneska ndi munyaki.”—Aefeso 4:25.

  Vo lemba ili ling‵anamuwa: Tichitengi vinthu mwauneneska pa vosi vo tikamba ndi kuchita.

Kuti muziŵi vinandi pa nkhani iyi, werengani:

• Nkhani ya mu Chigongwi cha Mlinda, yamutu wakuti: “Vo Vingatiwovya Kuziŵa Chamampha Ndi Chiheni.”

• Ndipuso nkhani ya mutu wakuti “Tolerance—How the Bible Can Help.”