Pacharu Chosi Pazamuja Chimangu

Weyosi wakhumbisiska kuja mucharu cho mwe chimangu. Kwa vyaka vinandi, alongozgi a vyaru aja achiyesesa kujalikiska chimangu muvyaru vo muchitika nkhondu. Nyengu zinyaki, kwesesa kwawu kutovya waka kwakanyengu kamanavi. Kweni vachitima kuti asani pajumpha nyengu nkhondu zitamba so muvyaru venivi. Kumbi vingachitika kuti pacharu chosi paje chimangu? Hinya! Ŵanaŵaniyani vo tingasambira kwaku Yesu.

Vo Yesu wazamuchita

Bayibolu lititikambiya vo Yesu wachitengi pambula kuswera kuti pacharu chapasi pazije chimangu.

• “[Yesu] wazamudanika kuti . . . Mulongozgi Wachimangu. Kukuwa kwa ulamuliru waki kweniso chimangu, vazamumala cha.” (Yesaya 9:6, 7) Nge Wakulamuliya wa Ufumu waku Chiuta, Yesu wazamujalikiska chimangu cho chazamumala cha pacharu chosi.

• “Iyu wazamutaska akavu wo apempha chovyu . . . kweniso weyosi yo walivi wakumuwovya.” (Salimo 72:12-14) Yesu wazamugwiriskiya ntchitu mazaza ngaki kuti wazijalikiski chimangu chayichu, wazituzgepu nkhondu, viwawa kweniso kusuzgika kwekosi.

• “Mtundu wazamunyamuwa lipanga cha kuti uyukiyi mtundu unyaki, ndipu ŵanthu azamusambira so nkhondu cha.” (Yesaya 2:4) Mu ulamuliru waku Yesu, ŵanthu wosi azamusambira fundu zo zazakuŵawovya kuja mwachimangu mumalu mwa kusambira nkhondu.

Kuti muziŵi vo Yesu wazamuchita kunthazi kuti pacharu pazije chimangu kweniso vo mungachita kuti namwi muzijemu, woneriyani kachigaŵa ka vidiyo yakuti Kumbi Ufumu Waku Chiuta Ntchinthu Wuli?

Vo Yesu wangusambiza

Vo Yesu wangusambiza vitovya mbwenu ŵanthu anandi mazuŵa nganu kuti ajengi mwachimangu. Pa upharazgi waki wakuziŵika umampha wo uziŵika kuti Upharazgi wa Paphiri, Yesu wangusambiza fundu zo zitovya ŵanthu kuja mwachimangu zuŵa lelosi. Ŵanaŵaniyani fundu izi.

• “Mbakukondwa wo atanja chimangu.” (Mateyu 5:9) Yesu wanguchiska akusambira ŵaki kuti angachitanga nkhondu cha kweniso kuti achitengi vinthu vo vingaŵawovya kuti ajengi mwachimangu.

• “Chakwamba kayanjani ndi mubali waku ndipu pavuli paki ukawe so kuzipereka mphasu yaku.” (Mateyu 5:23, 24) Yesu wanguchiska ŵanthu wo amuvwisiyanga kuti akhumbika kumalisa mphindanu mwaliŵi. Iyu wangukamba kuti kujalikiska chimangu nkhwakukhumbika ukongwa kuti tije pa ubwezi wamampha ndi Chiuta.

• “Lekani kuyeruzga ŵanthu kuti namwi muleki kuyeruzgika.” (Mateyu 7:1) Yesu wakutitcheŵeska kuti tingayeruzganga anyidu mwambula lisungu cha pamwenga mwakwanjiya, chifukwa venivi vingayambisa viwawa. Yesu wangusambiza akusambira ŵaki kuti mumalu mwakuŵasaniriya vifukwa anyawu, akhumbika waka ‘kulutirizga kuŵagowoke.’—Luka 6:37.

Ŵanthu pacharu chosi agwiriskiya ntchitu ulongozgi wo Yesu wangupereka. Chinanga ndi muvyaru vo muchitika viwawa pamwenga ŵanthu agaŵikana, yiwu asambira kumalisa mphindanu mwachimangu, kugowoke anyawu ndipuso kulongo chanju ku ŵanthu wo aŵanangiya.

Kuti muziŵi mo fundu zo Yesu wangusambiza zawovye ŵanthu anyaki kuja mwachimangu, ŵerengani nkhani yakuti “Mungasaniya Chimangu Chinanga Kuti Kuchitika Nkhondu Ndipuso Vinthu Vachiwawa.”