Kumbi Akaboni aku Yehova Asambizika Wuli Kuti Afiski Uteŵeti Wawu?

Nyengu zosi Akaboni aku Yehova asambizika mo angachitiya vinthu nge Akhristu pa umoyu wawu, kweniso mo angapharazgiya ŵanthu. Ntchitu yakupharazga ndi kusambiza ŵanthu uthenga wamampha wa Ufumu waku Chiuta ndiyu Yesu wangulamula akusambira ŵaki kuti agwirengi. (Mateyu 24:14; 28:19, 20) Sabata yeyosi, tisambizika mo tingachitiya uteŵeti wenuwu kuziya pa maunganu nga mpingu, kweniso tija ndi maunganu ngachigaŵa ndipuso ngadera chaka chechosi. Akaboni aku Yehova wo ŵe ndi maudindu mumpingu pamwenga mugulu laku Yehova asambizika so mwapade mumasukulu ngakusambiza Bayibolu.

Vo ve mu nkhani iyi

Kumbi ndi vinthu wuli vo Akaboni aku Yehova asambizika?

Maunganu nga mpingu. Sabata yeyosi tiwungana kaŵi pa malu ngidu ngakusopiyapu ngo ngadanika kuti Nyumba ya Ufumu. Kanandi, unganu unyaki uchitika mukati mwa sabata ndipu unyaki uchitika kukumaliya kwa sabata. Weyosi wangasanilikapu pa maunganu ngenanga ndipu paŵavi kwendesa mbali ya mpasku.

Unganu wa mukati mwa sabata. Tisambira mo tingaŵerenge umampha, kukambiskana umampha ndi ŵanthu, tingalongolore umampha pa gulu kweniso mo tingapharazgiya ndipuso kusambiza umampha. Tisambira venivi kuziya mu nkhani, chigaŵa chakukambiskana, vakuyeruzgiyapu kweniso mavidiyo. Vo tisambira vititiwovya kuti tipharazgengi kweniso kuŵasambiza umampha ŵanthu uthenga wa mu Bayibolu. Weyosi yo wasanilikapu pa maunganu ngenanga wayanduwa. Kuphara vosi, maunganu yanga ngatitiwovya kuti tije ndi chivwanu chakukho mwaku Chiuta ndipuso kuti timuyanjengi ukongwa. Ngatitiwovya so kuti tiyanjanengi ukongwa ndi Akhristu anyidu.
Unganu wa kukumaliya kwa sabata . Unganu uwu uja wa vigaŵa viŵi ndipu utamba ndi nkhani ya mu Bayibolu yo yitovya weyosi. Chigaŵa chachiŵi chija chakukambiskana nkhani yakutuliya mu Chigongwi cha Mlindaa chakusambira. Nkhani zenizi zikonkhoska fundu za mu Bayibolu zo zititiwovya asani tipharazga kweniso pa umoyu widu wa zuŵa ndi zuŵa.

Unganu wadera ndipuso wachigaŵa. Chaka chechosi tija ndi maunganu ngakulungakulu ngatatu ndipu pa maunganu ngenanga paja apharazgi akutuliya mu mipingu yakupambanapambana. Pa nyengu yakukondwesa yeniyi, tivwisiya nkhani za mu Bayibolu, paja vakuyeruzgiyapu, chigaŵa chakufumba ŵanthu anyaki kweniso paja mavidiyo. Nge mo vijaliya ndi maunganu nga mpingu ,maunganu nga dera kweniso nga chigaŵa nangu ngatitiwovya kusambira fundu zinandi za mu Bayibolu kweniso kuja apharazgi amampha alusu a uthenga wamampha. Weyosi ngwakulondereka pa maunganu yanga kweniso paŵavi kwendesa mbali ya mpasku.

Sukulu zakusambiza Bayibolu za Akaboni aku Yehova

Akaboni aku Yehova anyaki adanika ku masukulu ngakupambanapambana ngakusambiza Bayibolu kuti akasambiziki vinandi. Kumbi masukulu ngenanga ndi nanga? Kumbi chilatu chaki ntchakuti wuli ndipu ngato nyengu yitali wuli? Nanga mbayani wo angaluta ku masukulu yanga?

Sukulu ya Apayiniya

Chilatu: Kusambiza ateŵeti a nyengu zosi wo adanika kuti apayiniya,b kuti apharazgengi kweniso asambizengi mwalusu. Pa sukulu iyi paja chigaŵa chakukambiskana, vakuyeruzgiyapu, nkhani kweniso vakuchita vinyaki vo vichitika mumagulu.
Utali: Mazuŵa 6.
Wo Angasere Sukulu Yeniyi: Apayiniya a nyengu zosi wo akwanisa chaka chimoza kutuliya po akwambiya upayiniya. Apayiniya wo akwamba kali ndipu pajumpha vyaka vinkhondi kutuliya po anguselere sukulu, nawu angadanika so.

Sukulu ya Apharazgi a Ufumu

Chilatu: Kusambiza ŵanthu wo akwamba kali uteŵeti wa nyengu zosi. Ŵanthu wo asere sukulu yeniyi asazgiyaku malusu ngawu pa nkhani ya kupharazga ndi kusambiza ndipu kwenuku asambira so nkhani za mu Bayibolu mwakukwana. Anandi wo amaliza masambiru ngenanga atumizika kuvigaŵa vo kukhumbika apharazgi anandi.
Utali: Miyezi yiŵi.
Wo Angasere Sukulu Yeniyi: Apayiniya wo afiska vo vikhumbika ndipu angafiska kuchiteŵete kwekosi ko kungakhumbika chovyu.

Sukulu ya Ŵara Mumpingu

Chilatu: Kovya ŵara kuti agwirengi umampha ntchitu yawu ya kusambiza ndi kuliska mumpingu. Yitiŵawovya so kuti amuyanjengi ukongwa Chiuta ndipuso ayanjengi Akhristu anyawu.—1 Peturo 5:2, 3.
Utali: Mazuŵa 5.
Wo Angasere Sukulu Yeniyi: Ŵara wo aŵikika ŵaka sonu kweniso wo akwamba kali ndipu pajumpha vyaka vinkhondi kutuliya po akuserere sukulu yeniyi.

Pa Sukulu ya Ŵara a Mpingu, yumoza wapereka ndemanga.

Sukulu ya Akuwonere Madera ndi Awolu Ŵawu

Chilatu: Kusambiza ateŵeti wo adanika kuti akuwonere madera,c kuti achitengi umampha ntchitu yawu. (1 Timote 5:17) Sukulu yeniyi yitovya so Akhristu ŵenaŵa ndi awolu ŵawu kuti angavwisengi umampha ukongwa Malemba.
Utali: Mwezi umoza.
Wo Angasere Sukulu Yeniyi: Akuwonere madera ndi awolu ŵawu wo akwanisa chaka chimoza kutuliya po akwambiya uteŵeti wawu. Asani pajumpha vyaka vinkhondi vevosi atachisere so sukulu yeniyi.

Sukulu ya Uteŵeti wa Ufumu

Chilatu: Kusambiza ŵara kweniso ateŵeti akovyad mo angafiskiya maudindu ngawu mumpingu. (2 Timote 3:1) Sukulu iyi yichitika asani pajumpha vyaka vimanavi waka.
Utali: Kanandi yichitika zuŵa limoza.
Wo Angasere Sukulu Yeniyi: Akuwonere madera, ŵara kweniso ateŵeti akovya.

Sukulu ya Uteŵeti wa pa Beteli

Chilatu: Kusambiza ŵanthu wo ateŵete pa Betelie kuti agwirengi umampha ntchitu yawu kweniso kuŵawovya kuti amuyanjengi ukongwa Chiuta ndipuso ayanjengi anyawu.
Utali: Mazuŵa 5 ndi hafu.
Wo Angasere Sukulu Yeniyi: Wosi wo ayamba ŵaka sonu kuteŵete pa Beteli. Wo akwamba kali pa Beteli kweni pajumpha vyaka vinkhondi kutuliya po anguserere sukulu yeniyi, angadanika so kuti nawu akasere.

Sukulu Yakusambiza Bayibolu ya Giliyadi

Chilatu: Kovya wo asere sukulu yeniyi kuti angayanjengi kweniso kungavwisa ukongwa Mazu Ngaku Chiuta. Yitiŵawovya so kuti agwiriskiyengi ntchitu vo asambira. (1 Atesalonika 2:13) Akhristu akukhwima mwauzimu wo aluta kuchisambira sukulu yeniyi atovya ukongwa mu gulu laku Yehova kweniso pa ntchitu yakusambiza Bayibolu pacharu chosi. Wo amaliza sukulu iyi angatumizika kuchipharazga pamwenga kuchiteŵete pa ofesi ya nthambi mucharu chawu pamwenga ku charu chinyaki.
Utali: Miyezi yinkhondi.
Wo Angasere Sukulu Yeniyi: Ofesi ya nthambi ndiyu yisankha wo angasere sukulu yeniyi pa gulu la ŵanthu wo achita uteŵeti wa nyengu zosi. Sukulu iyi yichitikiya ku United States, ku Watchtower Educational Center ku Patterson, New York.

Mlangizi wa Sukulu ya Yakusambiza Bayibolu ya Giliyadi, wagwiriskiya ntchitu chithuzi cha nyumba yakusopiyamu ku Yerusalemu pakusambiza ŵana a sukulu.

Sukulu ya Abali a mu Komiti ya Nthambi ndi Awolu Ŵawu

Chilatu: Kusambiza wo ateŵete mu Komiti ya Nthambif kuti awoneriyengi umampha ntchitu yo yichitika pa ofesi ya nthambi. Kweniso asambizika mo angawonere umampha ntchitu ya Akaboni aku Yehova mucharu chawu.
Utali: Miyezi yiŵi.
Wo Angasere Sukulu Yeniyi: Ofesi yikulu ya Akaboni aku Yehova pacharu chosi ndiyu yidana abali a mu Komiti ya Nthambi ndi awolu ŵawu wo asankhika kuti akasere sukulu yeniyi yo yichitikiya ku Watchtower Educational Center, ku Patterson, New York.

Kumbi vo Akaboni aku Yehova asambizika vituliya pani?

Nyengu zosi, vo Akaboni aku Yehova asambira vituliya mu Bayibolu. Tigomezga kuti Bayibolu ndi mazu ngakukambirika ndi Chiuta kweniso le ndi ulongozgi wamampha ndipuso wakovya ukongwa pa umoyu wa Mkhristu weyosi.—2 Timote 3:16, 17.

Kumbi Akaboni aku Yehova akhumbika kulipira ndalama kuti asambiziki?

Awa. Masambiru yanga ngawezi. Ndalama zo ŵanthu apereka mwakukhumba kwawu ndivu vitovya pa ntchitu ya Akaboni aku Yehova.—2 Akorinto 9:7.

a Pa webusayiti yidu ya jw.org pasanirika Bayibolu, mabuku ngo ngakonkhoska Bayibolu kweniso mavidiyo.

b Mpayiniya ndi Kaboni wakubatizika, kwali wangaŵa munthulumi pamwenga munthukazi, wachakuwoniyapu chamampha ndipu watijipereka kuti wapharazgengi uthenga wamampha wa mu Bayibolu kwa maola ngakuŵikika mwezi wewosi.

c Wakuwonere dera ndi mteŵeti wanyengu zosi yo watende mipingu yakupambanapambana mudera laki ndipu sabata yeyosi wacheze mpingu umoza. Iyu wachiska abali ndi azichi kuziya mu nkhani za mu Bayibolu zo wakamba ndipu watenda nawu mu uteŵeti.

d Ateŵeti akovya agwira ntchitu zakupambanapambana kuti awovyi abali ndi azichi mumpingu. Venivi vitovya kuti ŵara ajengi ndi nyengu yakukwana yakuchitiya maulendu ngauliska kweniso kusambiza.

e Beteli ndi zina lo maofesi nga Akaboni aku Yehova ngaziŵika nalu. Ateŵeti a nyengu zosi wo ateŵete ku maofesi ngenanga, atovya ukongwa kulutisa panthazi ntchitu ya Akaboni aku Yehova muchigaŵa cha nthambi yawu.

f Komiti ya Nthambi yija ndi anthulumi atatu pamwenga kujumpha wo mbakukhwima mwauzimu.

Kumbi Akaboni aku Yehova ayanduwa wuli ndi vo asambira?

“Chifukwa chakuti nde wasoni, ndasuzgikanga ukongwa kwamba kukambiskana nkhani za mu Bayibolu ndi ŵanthu ambula kuŵaziŵa. Kweni vo ndisambira pa maunganu nga mkati mwa sabata vitindiwovya kuti ndije ndi chiganga kweniso kuti ndisambizengi mwalusu. Pasonu panu, ndilongoro umampha ndi ŵanthu mumpingu ndipuso anyangu wo ndigwira nawu ntchitu.”—Natasha, United States.
“Sukulu ya Apharazgi a Ufumu yikundiwovya ukongwa kuti ndije ndi mijalidu yaku Chiuta nge chanju, kuzikira kweniso lisungu. Mijalidu yeniyi yandiwovya kuti ndije Mkhristu wamampha, mubwezi wamampha ku ŵanthu ndipuso kuti ndije neba wamampha. Sukulu iyi yikundisambiza so mo ndingafufuziya nkhani za mu Bayibolu kweniso mo ndingakonkhoske ŵanthu fundu zo mwakuŵafika pamtima.”—Stephen, Nigeria.
“Sukulu ya Ŵara Mumpingu yandiwovya kuti ndije wakujiyuyuwa ndi chilatu chakuti ndije mura wamampha. Nkhani zo tingusambira ku sukulu yeniyi, zingundichiska ukongwa kuti ndikhumbika kuyezga chakuwoniyapu chaku Yesu.”—Luca, Italy.
“Sukulu ya Uteŵeti wa Ufumu yikundisambiza kuzirwa kwa kuja wakufwatuka, walisungu ndipuso waubwezi pakuchita vinthu ndi ŵanthu. Ndikusambira kuti asani ndikhumba kuchitiya lisungu ŵanthu, ndikhumbika kuchita venivi chifukwa chakulondo waka dangu cha, kweni chifukwa chakuŵayanja.”—Samuel, United Kingdom.
“Sukulu ya Giliyadi yikutiwovya ukongwa kuti tijifufuzi mwakugwiriskiya ntchitu gilasi la Mazu ngaku Chiuta. (Yakobe 1:22-25) Mwaviyo tichisambira, tachitanga kuwona po takhumbikanga kusintha kwali mphakuchita uteŵeti widu kwaku Yehova kweniso umunthu widu. Tingusambira so kuti tikhumbika kuŵanaŵaniya anyidu kuphara mo titijiŵanaŵaniya taŵesi kweniso tizomerezengi kuti chanju ndichu chitilongozgengi mu vosi vo tichita kweniso kulongoro.”—Elnathan and Princess, Philippines.