Mafumbu ngo Bayibolu Limuka / Kukondwesa Chiuta / Kumbi Mkhristu Wangalonde Chovyu cha Munkhwala?

Vo Bayibolu Limuka

Hinya, wangalonde. Yesu wangulongo kuti akusambira ŵaki angalonde chovyu cha munkhwala ndipu wangukamba kuti, “ŵanthu ambula kutama akhumba dokotala cha, kweni wo atama ndiwu.” (Mateyu 9:12) Chinanga kuti Bayibolu ndi buku la munkhwala cha, kweni le ndi ulongozgi wo ungawovya ŵanthu wo akhumba kukondwesa Chiuta.

Mafumbu ngo mungajifumba

1. Kumbi nditiwuziŵa umampha munkhwala wo ndilondiyengi? Bayibolu lititipaska ulongozgi wakuti titenere kufufuza fundu zakugomezgeka, mumalu ‘mwakugomezga waka mazu ngengosi.’—Nthanthi 14:15.

2. Kumbi ndingafumbaku madokotala nganyaki vakukwaskana ndi munkhwala wo ngwakwenere? Kufumbaku “ŵanthu anandi akupereka ulongozgi” kungakuwovyani, ukongwa asani mwatama ukongwa.—Nthanthi 15:22.

3. Kumbi munkhwala wo ndingalonde ungandichitisa kuswa dangu la mu Bayibolu lakuti ‘ndikani . . . ndopa”?—Machitidu 15:20.

4. Kumbi chovyu cho ndilondiyengi chisazgapu kuchita vamasenga? Bayibolu likaniza “kuchita vamizimu.” (Agalatiya 5:19-21) Kuti muziŵi asani chovyu cho mulondiyengi chisazgapu vamizimu, ŵanaŵaniyani mafumbu yanga:

• Kumbi munthu yo wandipasengi munkhwala uwu wachita vamizimu?

• Kumbi ndilondiyengi chovyu ichi chifukwa chakugomezga kuti munthu watama chifukwa chakukwiyisa a chiuta pamwenga so chifukwa chakuloweka ndi ŵanthu wo achita vaufwiti?

• Kumbi aperekanga sembi pamwenga kuchita vinthu vinyaki vamizimu pakunozga munkhwala wenuwu?

5. Kumbi ndayamba kufipa mtima ukongwa ndi umoyu wangu? Bayibolu lititikambiya kuti: “Ŵanthu wosi aziŵi kuti mwe akoloŵa.” (Afilipi 4:5) Kuja akoloŵa kukuwovyeningi kuti muŵikengi mtima winu pa “vinthu vakukhumbika ukongwa,” nge vinthu vauzimu.—Afilipi 1:10; Mateyu 5:3.