Kumbi Bayibolu Likambanji pa Nkhani ya Wanangwa Wakusankha? Kumbi Chiuta Wakusankhiya Limu vo Vazakukuchitikiyani?
Vo Bayibolu limuka
Chiuta wakutitumbika ndi wanangwa wakusankha, kung’anamuwa mazaza ngakusankha paku isi tija mumalu mwakuti Chiuta watisankhiyengi pa kekosi. Tiyeni tiwoni vo Bayibolu lisambiza.
Chiuta wakutilenga mu chikozgu chaki. (Genezesi 1:26) Mwakupambana ndi nyama, zo zichita ŵaka vinthu mwakawi, taŵanthu tiyanana ndi Chiuta chifukwa tilongo mijalidu yo iyu wenayu nge chanju kweniso urunji. Mwakuyanana ndi Mlengi widu nasi te ndi wanangwa wakusankha.
Vo tisankha pasonu vingazikwaska vo vazakutichitikiya kunthazi. Bayibolu lititichiska kuti tisankhi ‘umoyu mwakuvwiya mazu ngaku Chiuta’ kweniso mwakusankha kuvwiya marangu ngaki. (Dotoronome 30:19, 20) Asani tengavi wanangwa wakusankha, mwaŵi wenuwu watingi uwengi wambula phindu. Mumalu mwakutichichizga kuti tichiti vo wakamba, Chiuta watitipempha kuti: “Vingaŵa umampha asani ungavwiya marangu ngangu! Mbwenu chimangu chaku chazamuja nge msinji.”—Yesaya 48:18.
Chiuta wakulembe limu cha mo vinthu vazakutiyende kunthazi. Asani tipenja kuti vinthu vitiyende umampha, tikhumbika kuchita phamphu. Bayibolu likamba kuti “Chechosi cho janja laku lasaniya kuti lichiti, uchichiti ndi nthazi zaku zosi.”(Wakutawula 9:10) Likamba so kuti: “Vinthu vo munthu waphamphu waŵanaŵana vichitiska kuti vinthu viyendi umampha.”—Nthanthi 21:5.
Wanangwa wakusankha ndi mphasu yakutuwa kwaku Chiuta, ndipu yititiwovya kuti timuyanjengi ‘ndi mtima widu wosi’.—Mateyu 22:37.
Kumbi Chiuta Wagwiriskiya Ntchitu Nthazi Zaki Pa Chechosi?
Bayibolu lisambiza kuti Chiuta Ngwanthazi zosi, ndipu nthazi zaki zilivi mphaka. (Yobu 37:23; Yesaya 40:26) Chinanga veviyo, ndi peposi cha po Yehova wagwiriskiya ntchitu nthazi zaki. Mwakuyeruzgiyapu, Bayibolu likamba kuti Chiuta ‘wangujiko’ kwanyengu yitali po a Babiloni ŵenga arwani kweniso alimbananga ndi ŵanthu ŵaki. (Yesaya 42:14) Mwakuyanana ŵaka, pasonu panu watiŵawona ŵaka wo agwiriskiya ntchitu uheni wanangwa wawu wakusankha kuti apweteki anyawu. Kweni Chiuta wachitengi venivi mpaka muyaya cha.—Masalimo 37:10, 11.