Kumbi Mungamalana Wuli ndi Mantha Ngakopa Nyifwa?

Vo Bayibolu limuka

Taŵanthu titopa nyifwa chifukwa ndi murwani ndipu titesesa kukhwecha vinthu vo vingaŵika umoyu widu pangozi. (1 Akorinto 15:26) Ndipu ŵanthu anyaki atopa kufwa chifukwa cha visambizu vaboza mwaviyo aja pa “ukapolu wa kopa nyifwa, kwa umoyu wawu wosi.” (Aheberi 2:15) Kuziŵa uneneska kutitiwovya kuti tifwatuliki ku mantha ngakopa nyifwa ngo ngangachitiska kuti tilekengi kukondwa ndi umoyu.—Yohane 8:32.

Uneneska wakukwaskana ndi nyifwa

• Akufwa aziŵa chechosi cha. (Salimo 146:4) Mukhumbika cha kopa kuti mwazamukuvwa urwirwi pamwenga kutombozgeka asani mwafwa chifukwa Bayibolu liyeruzgiya nyifwa ndi tulu.—Salimo 13:3; Yohane 11:11-14.

• Akufwa angatipweteka cha. Chinanga mbanthu wo ŵenga achiwawa angachita chechosi cha asani ŵafwa. (Nthanthi 21:16) Bayibolu likamba kuti “kutinkha kwawu ndipuso sanji yawu vamala kali.”—Wakutawula 9:6.

• Asani munthu wafwa wangazija so ndi umoyu, chifukwa Chiuta wazamuyuska ŵanthu akufwa.—Yohane 5:28, 29; Machitidu 24:15.

• Chiuta wakulayizga kuti “nyifwa yazamuŵaku so cha.” (Chivumbuzi 21:4) Ndipu Bayibolu likamba kuti: “Ŵanthu arunji azamulonde charu chapasi ndipu azamuja mwenimo kwamuyaya,” kwambula mantha ngakopa nyifwa.—Salimo 37:29.