Kumbi Akaboni aku Yehova Agomezganji pa Nkhani ya Mwambu wa Maliru?
Titesesa kulondo fundu za mu Bayibolu pa nkhani ya mwambu wa maliru. Zinyaki mwa fundu zenizi ndi izi:
Nkhunanga cha kuliya asani mubali widu wafwa. Akusambira aku Yesu nawu aliyanga asani munthu yo amuyanjanga wafwa. (Yohane 11:33-35, 38; Machitidu 8:2; 9:39) Mwaviyo, tiwona kuti nyengu ya maliru njalikondwa cha. (Wakutaula 3:1, 4; 7:1-4) Mumalu mwaki, tiwona kuti ndi nyengu yakuchitiya chitima anyidu.—Aroma 12:15.
Akufwa aziŵa chechosi cha. Chinanga kuti isi Akaboni tituliya muvyaru vakupambanapambana, kweni tichitaku cha midawuku yo yileka kukoliyana ndi fundu za mu Malemba. Tigomezga cha kuti ŵanthu akufwa aziŵa chechosi cho chichitika ndipuso kuti angachita vinthu vo vingakwaska ŵanthu amoyu. (Wakutaula 9:5, 6, 10) Tichitaku cha midawuku nge kuchereza pa maliru, kuchita phwandu la maliru, kukumbuka zuŵa lo munthu wangufwiya, kupereka sembi ku munthu wakufwa, kulongoro ndi kupempha chovyu ku ŵanthu akufwa kweniso kuhara choko. Tichitaku cha midawuku yeniyi chifukwa tivwiya dangu la mu Bayibolu lakuti: “Tuwanipu pakati pawu, . . . kweniso lekani kukwaska chinthu chakufipiskika.”—2 Akorinto 6:17.
Akufwa azamuyuka. Bayibolu lisambiza kuti kwazamuja chiyuka kweniso kuti nyifwa yazamuŵaku so cha. (Machitidu 24:15; Chivumbuzi 21:4) Chifukwa chakuti tigomezga kuti akufwa azamuyuka, tiliya mwakutaluliya cha. Akhristu akwambiriya nawu agomezganga venivi ndipu achitanga nge mo nasi tichitiya.—1 Atesalonika 4:13.
Bayibolu likamba kuti tijiyuyuwengi. (Nthanthi 11:2) Tiwona kuti nyengu ya maliru ‘njakujiwonese’ cha ndi chuma cho munthu we nachu pamwenga udindu wo we nawu. (1 Yohane 2:16) Tichitaku cha midawuku yakukhumba ŵaka kukondwesa ŵanthu pamwenga kugula mabokosi ngakudula kweniso kuvwala vakuvwala vapade ndi chilatu chakuti ŵanthu atiwoni.
Tichichizga ŵanthu cha kuti alondongi vo isi tigomezga pa nkhani ya mwambu wa maliru. Pa nkhani iyi, tilondo fundu yakuti: “Weyosi waku isi, wazamumuka yija kwaku Chiuta.” (Aroma 14:12). Kweni asani ŵanthu atifumba vo tigomezga, titesesa kuŵamuka “mwakuzika kweniso ndi ulemu ukulu.”—1 Peturo 3:15.
Kumbi pa Maliru nga Akaboni pachitikanji?
Malu: Asani banja lo kwachitika maliru lasankha kuti paje mwambu wa maliru, yiwu ndiwu asankha malu ngo kwamuchitikiya mwambu wenuwu. Yiwu angasankha kuchichitiya ku Nyumba ya Ufumu, kunyumba ya maliru, muholu yo abuka, kumalu ngo atotchiyaku ŵanthu wo afwa pamwenga kumasanu.
Mwambu wa maliru: Pa mwambu wenuwu pakambika nkhani yo yipembuzga banja lo mubali wawu watayika. Nkhani yeniyi yikonkhoska vo Bayibolu likamba pa nkhani ya maliru ndipuso kuti akufwa azamuyuka. (Yohane 11:25; Aroma 5:12; 2 Peturo 3:13) Wakukamba nkhani wangakonkhoska so mijalidu yamampha ya munthu yo wafwa kweniso vo ŵanthu angasambirapu.—2 Samuele 1:17-27.
Pa mwambu uwu pangambika so sumu yakutuliya mu Malemba. (Akolose 3:16) Ndipu mwambu uwu umala ndi pempheru lakupembuzga.—Afilipi 4:6, 7.
Malipiru pamwenga mpasu: Ŵanthu wo tisopa nawu limoza titiŵatchaja ndalama cha pa chakuchitika chechosi chakukwaskana ndi kusopa, kusazga mwambu wa maliru. Kweniso pa maunganu ngidu titendesa mbali ya mpasu cha.—Mateyu 10:8.
Ŵanthu wo atenere kusanirikapu: Nge mo vichitikiya ndi maunganu ngidu, ŵanthu wosi kusazgapu wo mbakaboni cha mbakulondereka kumwambu wa maliru wo wamuchitiya ku Nyumba ya Ufumu.
Kumbi Akaboni aluta ku mwambu wa maliru wa visopa vinyaki?
Kaboni weyosi wasankha yija vakuchita pa nkhani iyi, mwakukoliyana ndi vo wakusambira mu Bayibolu. (1 Timote 1:19) Chinanga kuti ve viyo, tichitaku cha midawuku yeyosi yo tiziŵa kuti yikoliyana cha ndi vo Bayibolu likamba.—2 Akorinto 6:14-17.