Kumbi Akaboni aku Yehova Atikuwona Wuli Kupatana?
Tilondo ulongozgi wa mu Bayibolu pa nkhani ya nthengwa kweniso kupatana. Chiuta wangwambisa nthengwa kuti munthulumi ndi munthukazi akutolana ajaliyi limoza kwa umoyu wawu wosi. Malemba ngazomereza kuti nthengwa yingamala pijapija asani munyaki wachita ureŵi.—Mateyu 19:5, 6, 9.
Kumbi Akaboni aku Yehova atovya mabanja ngo ngaleka kwenda umampha?
Hinya. Yiwu agwiriskiya ntchitu nthowa izi:
Mabuku. Nyengu zosi mumabuku yanga musanirika fundu zo zingawovya mabanja, chinanga ndi ngo ngawoneka kuti ngawayawaya ukongwa. Mwakuyeruzgiyapu, wonani nkhani yakuti “Khalanibe Okhulupirika Muukwati Wanu,” “Kodi Mungatani Kuti Muzikhululukirana?,” ndipuso yakuti “Zimene Mungachite Kuti Muyambirenso Kukhulupirirana.”
Maunganu. Tisambira ulongozgi wa mu Bayibolu wo ungawovya mabanja. Tichita venivi pa maunganu nga mpingu, ngadera kweniso ngachigaŵa.
Ŵara. Ŵara mumpingu atovya mabanja ndipu agwiriskiya ntchitu fundu za mu malemba, nge lemba la Aefeso 5:22-25.
Kumbi ŵara mumpingu azomereza kuti Kaboni wapatani ndi munthu yo wakutolana nayu?
Awa. Chinanga kuti ŵara angapempheka kuti awovyi banja lo likumana ndi masuzgu, yiwu alivi udindu wakuŵasankhiya vakuchita. (Agalatiya 6:5) Chinanga kuti ve viyo, munthu yo wasankha kupatana ndi munthu yo wakutolana nayu kwambula chifukwa chechosi cha mu Malemba, walivi wanangwa wa mu Malemba wakuto pamwenga kuyirwa so.—1 Timote 3:1, 5, 12.
Kumbi Akaboni atikuwona wuli kupatukana?
Bayibolu lichiska ŵanthu akutolana kuti angapatukananga cha chinanga mphanyengu yo akumana ndi masuzgu. (1 Akorinto 7:10-16) Masuzgu nganandi ngangamala asani ŵanthu akutolana apemphera kutuliya pasi pa mtima, asani agwiriskiya ntchitu fundu za mu Bayibolu kweniso asani alongorana chanju.—1 Akorinto 13:4-8; Agalatiya 5:22.
Chinanga kuti ve viyo, Akhristu anyaki asankha kupatukana ndi munthu yo akutolana nayu pa vifukwa vikuluvikulu ivi:
Asani waleke dala kuphwere banja laki.—1 Timote 5:8.
Asani watimuchitiya nkhaza.—Masalimo 11:5.
Asani watimukaniziya limu kusopa Yehova. Mwakuyeruzgiyapu, munthulumi wangachichizga muwolu waki yo ndi Kaboni kuti waleki kuvwiya marangu ngaku Chiuta. Asani ndimu viliri, munthukazi wangasankha kupatukana nayu mulumu waki kuti walongo kuti ‘wavwiya Chiuta nge wakulamuliya kuluska ŵanthu.’—Machitidu 5:29.