Agalatiya 6:9—“Tingavukanga cha Kuchita Vamampha”

“Tingavukanga cha kuchita vamampha, pakuti pa nyengu yaki tazamuvuna asani taleka kuvuka.”—Agalatiya 6:9, Bayibolu la Charu Chifya.

“Ndipo tingavuka cha pakuchita cho nchamampha: chifukwa pa nyengo yake yiyo tikavunanga, pakureka kulopwa.”—Agalatiya 6:9, Mazu Ghaku Chiuta.

Vo Lemba la Agalatiya 6:9 Ling’anamuwa

Wakutumika Paulo wanguchiska Akhristu kuti alutirizgengi kuchita cho ntchamampha, pamwenga kuti cho ntchamampha pamasu paku Chiuta. Asani achita venivi, angasimikiza ndi mtima wosi kuti Chiuta wazakuŵatumbika.

“Tingavukanga cha.” Mazu ngenanga ngangafwatulikiya kuti “tingalakatukanga cha.” Ndipu mwakukoliyana ndi mazu chayingu ngakwambiriya, mazu yanga ngangang’anamuwa so kuleka kuguŵa pamwenga kuwere vuli. Wachikamba mazu yanga, wakutumika Paulo wangujisazgamu mweneku, venivi vilongo kuti wazomerezanga kuti nayu so nyengu zinyaki waguŵanga.—Aroma 7:21-24.

“Vamampha,” visazgapu vinthu vosi vo Mkhristu watenere kuchita pakuteŵete Chiuta. Visazgapu so ntchitu zamampha zo munthu wachitiya Akhristu anyaki kweniso ŵanthu anyaki.—Agalatiya 6:10.

“Pa nyengu yaki tazamuvuna asani taleka kuvuka.” Paulo wangukumbusa Akhristu anyaki kuti pangato nyengu kuti vipasu va ntchitu zawu zamampha viwoneki nge mo vijaliya ndi mbewu zo munthu wangapanda. Pakukamba mazu ngakuti kuvuna, Paulo wangulongo kukoliyana kwa vesi ili ndi uneneska wo usanirika mu vesi 7, lo likamba kuti: “Chechosi cho munthu wamija, ndichu so wazamuvuna.” Mumazu nganyaki tingakamba kuti, asani Mkhristu wachita cho ntchamampha mumasu mwaku Chiuta, wazamulonde mphotu yikulu ukongwa kusazgapu umoyu wamuyaya.—Aroma 2:6, 7; Agalatiya 6:8.

Nkhani ya pa Agalatiya 6:9

Wakutumika Paulo wangulembe Akhristu wo ajanga ku Agalatiya kalata iyi, cha mu ma 50-52 C.E. Iyu wanguchita venivi kuti waŵatcheŵeske limu va ŵanthu anyaki wo ajidananga kuti Akhristu kweni atimbanyizganga uthenga wauneneska wakukwaskana ndi Yesu. (Agalatiya 1:6, 7) Asambizi aboza ŵenaŵa asambizanga kuti Akhristu akhumbika kuvwiya Dangu lo Chiuta wangupereka kwa Ayisirayeli akali kuziya mwaku Mozesi. (Agalatiya 2:15, 16) Mwaviyo, Paulo wangukonkhoska kuti Dangu likufiska kali chilatu chaki ndipu pasonu panu ŵanthu wo asopa Chiuta ŵepasi pa Dangu so cha.—Aroma 10:4; Agalatiya 3:23-25.

Pa nyengu yo Paulo wachiskanga Akhristu anyaki kuti alutirizgi “kuchita vamampha,” wang’anamuwanga kuti avwiyengi Dangu laku Mozesi cha. Mumalu mwaki, waŵachiskanga kuti ‘afiskengi dangu laku Khristu,’ lo lisazgapu kuchita vosi vo Yesu wasambizanga vakukwaskana ndi kuchitiya vamampha ŵanthu anyaki.—Agalatiya 6:2; Mateyu 7:12; Yohane 13:34.

Woneriyani kavidiyo kafupi yaka kuti muwoni vo ve mubuku la Agalatiya.