Uthenga Wakutuliya mu Mazu Ngaku Chiuta—Vo Chiuta Walayizga Ŵanthu wo Akuthaŵa Kwawu

Chaka chechosi ŵanthu mamiliyoni nganandi achichizgika kuthaŵa kwawu kuti avikiliriki. Kumbi namwi mukumana ndi suzgu yeniyi? Asani ndi viyo, ziŵani kuti pe munthu munyaki yo wangakuwovyani pa suzgu yeniyi. Chiuta watikulayizgani umoyu wamampha ndipu mungasambira vinandi va umoyu wenuwu mu Malemba Ngakupaturika.

Munthu munyaki wakumiya wupu wa European Union,a zina laki Christos Stylianides wangukamba kuti: “Ŵanthu wo akuthaŵa kwawu kweniso wo akusama munyumba zawu akhumbika kuŵawovya waka mwaliŵi cha, kweni akhumbika so . . . kuŵapaska chilindizga chamampha.”b Ŵanthu wo ŵe ndi chilindizga aja ndi chifukwa chamampha chakulindizgiya kuti vinthu visinthengi pa umoyu wawu kunthazi. Kweni kusazgiyapu pakuja ndi chilindizga, ŵanthu wo akuthaŵa kwawu akhumbika so kuchiskika kuti afiski kukunthiyapu masuzgu ngo akumana nangu.

“Vingundiŵaŵa ukongwa mumtima pa nyengu yo ndathaŵanga kwidu kweniso kulekana ndi achibali ŵangu. Ndajivwanga kuti nde ndija, ndachitanga mantha, ndenga ndi chitima kweniso ndafipanga mtima ukongwa.”—Emmanuel, Haiti.

Kumbi vo vinguchitikiya Emmanuel ndivu namwi vitikuchitikiyani? Asani mukuthaŵa kwinu, mungakhumbikiya munthu munyaki kuti wakupembuzgeni kweniso kukuwovyani kuja ndi chilindizga. Kumbi Bayibolu lo ndi Mazu ngaku Chiuta lingakuwovyani wuli?

Mazu ngaku Chiuta ngangakupembuzgani

Bayibolu likamba kuti: “Yehovac . . . watanja mulendu.”—Dotoronome 10:17, 18.

Bayibolu likamba kuti: “Yehova we pafupi ndi wosi wo atimudana.”—Salimo 145:18.

Bayibolu likamba kuti: “Chiuta wauneneska wangachita cha vinthu viheni . . . Ndipu Wanthazizosi wabendezga urunji cha.”—Yobu 34:10, 12.

Venivi ving’anamuwa kuti ndi Chiuta cha yo wachitiska kuti musuzgikengi. Ndiyu cha yo wachitiska kuti mukumani ndi masuzgu nge kuti watikulangani pamwenga kukuyesani.

Mazu ngaku Chiuta ngangakupaskani chilindizga

Bayibolu lititikonkhoske vo Chiuta watichitiyengi kunthazi. Wonani mo chilindizga chenichi chiwovye ŵanthu wo akuthaŵa kwawu.

Bayibolu likamba kuti: “[Chiuta] wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi.”—Chivumbuzi 21:4.

Venivi ving’anamuwa kuti masuzgu ngosi ngo tikumana nangu pasonu panu ngazamumala. Chiuta wakulayizga kuti wazamumalisa masuzgu ngosi ngo tikumana nangu.

“Pambula kuswera yapa, Chiuta wamalisengi vinthu vosi viheni kweniso vambula urunji vo vichitika mucharu ichi. Kuziŵa venivi kutindiwovya kuti ndiŵanaŵaniyengi ukongwa zuŵa lo masuzgu ngenanga ngazamumaliya.”—Karla, El Salvador.

Bayibolu likamba kuti: “Vinthu vakali vazamukumbukika so cha, ndipu vazamuseremu so cha mumtima.”—Yesaya 65:17.

Venivi ving’anamuwa kuti tazamusuzgika so cha mumtima chifukwa cha kukumbuka vinthu vakupweteka vo vingutichitikiya. Chiuta wazamuwonesesa kuti musuzgika so maŵanaŵanu cha chifukwa cha kukumbuka vinthu viheni vo vingukuchitikiyani.

“Bayibolu lilayizga kuti tazamukumbukanga so cha vinthu viheni vo vingutichitikiya pamwenga vo tikutaya. Chilindizga chenichi chitindiwovya kukunthiyapu masuzgu ngo banja langu likumana nangu pasonu panu chifukwa ndiziŵa kuti pambula kuswera yapa ngamalengi.”—Natalia, Ukraine.

Bayibolu likamba kuti: “Chiuta wakuchanya wazamujalikiska ufumu wo . . . wazamuphwanya ndi kutuzgapu maufumu ngosi ngenanga.”—Daniyeli 2:44.

Venivi ving’anamuwa kuti boma lakufikapu lakuchanya ndilu lazamulamuliya charu chosi. Pambula kuswera yapa, Chiuta wazamutuzgapu maboma ngosi nga ŵanthu pacharu ndipu wazamujalikiska boma lakuchanya. Boma lenili ndilu lazamuzisa chimangu chayichu kweniso kuvikilirika, ndipu weyosi vinthu vazakumuyende umampha chifukwa boma ili lazamuja laurunji.—Mika 4:3, 4.

“Ndichiskika ukongwa kuziŵa kuti masuzgu ngo tikumana nangu nge kukandirizgana, kutombozgeka, kukayikiyana kweniso sankhu vakanyengu kamanavi waka. Pambula kuswera yapa Ufumu waku Yehova utuzgengepu masuzgu ngosi ngenanga.”—Mustafa, Middle East.

Zeru zakovya zo zisanirika mu Mazu ngaku Chiuta

Zeru zakovya zo zisanirika mu Bayibolu zingakuwovyani kukunthiyapu masuzgu ngo mukumana nangu. Zingakuwovyani so kuti mukunthiyengepu asani mwakumana ndi vinthu vamabuchibuchi nge kunangika kwa vinthu pamwenga kusoŵa ndalama. Wonani mo fundu zo ze mumphata zitovye ŵanthu anyaki wo akuthaŵa kwawu:

Bayibolu likamba kuti: “Chinanga munthu wangaŵa ndi vinthu vinandi, umoyu waki utuliya mu vinthu vo we navu cha.”—Luka 12:15.

Mo mazu ngazeru ngenanga ngangakuwovyiyani kuti mukunthiyengepu: Mutenere kuti mutimbanyizgika maŵanaŵanu kweniso kuguŵa ndi vo vikukuchitikiyani chifukwa mukuleka vinthu vinu vinandi. Kweni asani mungaja dankha phee ndi kuŵanaŵaniya kuti umoyu winu ngwakuzirwa ukongwa, vingakuwovyani kuti muwonengi vinthu vo mukutaya mwakwenere.

“Umoyu ngwakukhumbika ukongwa kuphara vinthu vakuliŵavu. Pa vakuchitika vinyaki, chuma pamwenga ndalama vingakuwovyani cha.”—Natalia, Ukraine.

Bayibolu likamba kuti: “Ungakambanga cha kuti, ‘Ntchifukwa wuli vinthu vayendanga umampha mu mazuŵa ngakali kuluska mazuŵa nganu?’”—Wakutawula 7:10.

Mo mazu ngazeru ngenanga ngangakuwovyiyani kuti mukunthiyengepu: Vingachitika kuti pasonu panu musuzgika ukongwa, kweni mungayeruzgiyanga cha mo vinthu viliri pasonu panu ndi mo venge kali, chifukwa vingakuchitiskani kuti mujaliyengi waka kuguŵa.

“Kuzomereza mo vinthu viliri pasonu panu kwandiwovya ukongwa kuti ndiwonengi vinthu mwakwenere.”—Eli, Rwanda.

Bayibolu likamba kuti: “Asani te ndi chakurya ndi vakuvwala, tije akukhorwa ndi vinthu venivi.”—1 Timote 6:8.

Mo mazu ngazeru ngenanga ngangakuwovyiyani kuti mukunthiyengepu: Muyesesengi kukhorwa ndi vinthu vakukhumbika pa umoyu vo mwenavu. Asani mungachita viyo, mupanikizikengi cha ndipu venivi vikuwovyeningi kuti mulekengi kudandawula ukongwa.

“Bayibolu litindiwovya ukongwa kuti ndiwonengi vinthu mwakwenere mumalu mwakujaliya waka kuŵanaŵaniya vinthu vo tikusiya kwidu. Ini ndi muwolu wangu tikondwa kuti te ndi umoyu ndipuso te akuvikilirika.”—Ivan, Ukraine.

Bayibolu likamba kuti: “Vinthu vosi vo mukhumba kuti ŵanthu akuchitiyeni, namwi muŵachitiyi venivo.”—Mateyu 7:12.

Mo mazu ngazeru ngenanga ngangakuwovyiyani kuti mukunthiyengepu: Mungayamba kukoliyana ndi ŵanthu anyaki asani mutesesa kuchita nawu vinthu mwakuzikira kweniso mwalisungu. Venivi vingakuwovyani kuti muchezengi ndi weyosi kweniso kuti muleki kuja ndi sankhu.

“Ŵanthu anandi akondwa asani uchita nawu vinthu mwaulemu, mwalisungu kweniso mwachanju. Venivi vitovya kuti mukoliyanengi ndi ŵanthu wo muja nawu pafupi.”—Angelo, Sri Lanka.

Bayibolu likamba kuti: “Vo mupempha viziŵiki kwaku Chiuta ndipu chimangu chaku Chiuta . . . chivikiliyengi mitima yinu ndi maŵanaŵanu nginu kuporote mwaku Khristu Yesu.”—Afilipi 4:6, 7.

Mo mazu ngazeru ngenanga ngangakuwovyiyani kuti mukunthiyengepu: Mumukambiyengi Yehova mo muvwiya, vinthu vo mukhumba, vo vitikuchitiskani mantha kweniso vo vitikufipiskani mtima. Kuchita venivi kungakuwovyani kuti mulekengi kufipa mtima ukongwa kweniso kuti mulekengi kupanikizika chifukwa cha masuzgu ngo mukumana nangu.

“Nyengu zosi asani ndakumana ndi suzgu, ndipemphera kwaku Chiuta ndipu watindimuka. Vo ndasambira mu Bayibolu vandiwovya kuti ndijengi ndi chimangu chamumtima.”—Yol, South Sudan.

“Ulongozgi wazeru wo usanirika mu Bayibolu utindiwovya kuti ndijengi ndi chimangu chayichu cho ndikhumbika kuti ndifiski kukunthiyapu masuzgu ngo ndikumana nangu.”—Valentina, Ukraine.

“Ndinguchiskika ukongwa ndati ndaziŵa kuti Yehova Chiuta wakulayizga kuti wazakutipasa umoyu wamampha.”—Emmanuel, Haiti

Kumbi mungayanja kuziŵa malayizgu ngakuchiska kweniso ngakupaska chilindizga ngo ngasanirika mu Bayibolu kweniso chifukwa cho mungangagomezge? Pemphani Akaboni aku Yehova kuti akuwovyeni kwawezi.