Kumbi Akaboni aku Yehova ku New Zealand Mbachimangu Kweniso Mbakujipereka?

Pa 21 October 1940, ku New Zealand angupharazga kuti Akaboni aku Yehova ndi gulu lakugaruka ndipu liŵika umoyu wa ŵanthu pa ngozi. Chinanga kuti vo boma lingupharazga vinguchitiska kuti vinthu vifiki paheni ukongwa, Akaboni aku Yehova anguwere vuli cha. Mwakuyeruzgiyapu, yiwu angulutirizga kusopa chinanga kuti apolisi aŵafufuzanga kweniso kuŵamanga.

Andy Clarke, yo muwolu waki Mary wenga Kaboni, wanguwona mtima wakukhumbisiska wo muwoli waki wenga nawu pakulutirizga kusanirika pa mawunganu chinanga kuti venga vakofya. Iyu wawopanga kuti muwolu waki wakhoza kumangika asani waluta ku mawunganu. Chinanga kuti wenga wechendalutepu ku mawunganu, Andy wangwamba kuluta ku mawunganu ndi muwolu waki Mary ndipu wangumukambiya kuti: “Asani akumangengi, amangengi so ini!” Kutuwa pa nyengu iyi, Andy wangwamba kusanirika pa mawunganu ngosi. Pati pajumpha nyengu yimanavi, iyu wanguja wangubatizika kuja Kaboni. Chinanga kuti Akaboni atombozgekanga ku New Zealand pa nyengu ya Nkhondu Yachiŵi, Akaboni anandi nge Mary angulutirizga kuja akugomezgeka.

Chinanga Kuti Ŵe Kujeri Alutirizga Mbwenu Kuja Akukondwa

Zuŵa linyaki wapolisi wangumika John Murray wa vyaka 78 po wapharazganga kunyumba ndi nyumba. Khoti lingumusaniya ndi mulandu chifukwa chakuti wachitanga vinthu vakukwaskana ndi gulu la kugaruka. Akaboni anandi angumangika ndipu akhumbikanga kumuka mulandu ku khoti. Anyaki mwa Akaboni ŵenaŵa anguŵalipirisa ndipu anyaki anguŵamanga kwa myezi yitatu.

Akaboni angukana kusere usilikali chifukwa njuŵi yawu yakusambizgika Bayibolu yitiŵazomereza cha. (Yesaya 2:4) Mwaviyo, pa nyengu ya nkhondu anandi angukumana ndi masuzgu ngakulu ŵati akana kusere usikali. Mu malu mwakusere usilikali, Akaboni anyaki 80 anguŵatumiza kumisasa mpaka po nkhondu yingumaliya. Chinanga kuti aŵachitiyanga nkhaza ukongwa kweniso kumalu yanga kwaziziranga ukongwa muchipwepwi, abali yaŵa angulutirizga kusopa Yehova mwalikondwa.

Akaboni wo ŵenga kumisasa yo atombozekiyangaku ŵanthu, nyengu zosi alutirizganga kuchita vinthu vakukwaskana ndi kusopa. Yiwu achitanga mawunganu nyengu zosi nge mpingu ndipuso apharazgiyanga anyawu. Akaboni azomerezekanga kuchita mawunganu nga dera kumisasa yinyaki ndipu mulonda wakuwonere kumisasa ndiyu waŵawoneriyanga. Akayidi anyawu asambiranga uneneska wa mu Bayibolu kumisasa kwenuku ndipu abatizgikanga.

Bruce mwana munthulumi mumana waku Mary ndi Andy wo taŵazumbuwa kukwamba, wanguwona kuti kutombozgeka kumisasa kutimupasa mwaŵi wakusambira vinandi vakukwaskana ndi Bayibolu. Iyu wangukamba kuti: “Kwaku ini, venga nge kuti ndiluta kusukulu chifukwa ndasambiranga vinandi kutuliya kwa abali akukhwima wo ŵenga kumisasa.”

Mu 1944 boma linguŵanaŵana vakutuzga ŵanthu anyaki wo ŵenga kumisasa ya kujeri. Kweni arara asilikali angukana chifukwa anguwona kuti asani Akaboni angatuzgika ndikuti amulutirizga kuŵakambiya ŵanthu vakukwaskana ndi chivwanu chawu. Yiwu angulemba lipoti lakuti: “Chinanga kuti ŵanthu yaŵa alutilizga kuja kujeri kweni venivi viŵaweziyengi vuri cha.”

Mbanthu Akofya Cha

Chifukwa cha vo vingupharazgika vakukwaskana ndi kukanizika kwa ntchitu yidu, ŵanthu anyaki akhumbanga kuziŵa vinandi vakukwaskana ndi Akaboni aku Yehova. Mukanyengu kamanavi ŵanthu anandi anguziŵa kuti Akaboni aku Yehova mbanthu akofya cha. Yiwu anguziŵa kuti Akaboni mbakofya cha ndipuso Mbakhristu achimangu. Mwaviyo, mu 1939 ku New Zealand chiŵerengeru cha Akaboni chenga pa 320 kweni mu 1945 chingukwera kufika pa 536!

Nyengu zinyaki arara a boma a mtima wamampha aziŵanga kuti mburunji cha kukaniza a Kaboni aku Yehova kusopa. Mwakuyeruzgiyapu, wakweruzga munyaki wati wavwa ukaboni wakukwaskana ndi mubali munyaki yo angumutore kukhoti chifukwa cha kupharazga, wangumalisa mulandu. Iyu wangukamba kuti: “Pa vo ini ndigomezga kweniso vo ndiziŵa vakukwaskana ndi dangu mbumampha cha kuwona kuti munthu munyaki ngwakofya chifukwa chakuti wagaŵiyanga Mabayibolu.”

Akaboni ŵati azomerezeka kusopa mwawanangwa nkhondu yati yamala, yiwu ŵenga akukhumbisiska ukongwa kuwovya ŵanthu kuziŵa Ufumu waku Chiuta. Mu 1945 ofesi ya nthambi yingulemba kalata yo yinguluta ku mipingu yosi ya ku New Zealand ndipu yingukamba kuti: “Weyosi waŵanaŵaniyengi anyaki, wayanjengi anyaki ndipuso wachitiyengi lisungu ŵanthu wosi. Mungapindananga ndi ŵanthu cha ndipuso kuchita ndewu. Mukumbukengi kuti ŵanthu wo mukumana nawu agomezga vo chisopa chawu chisambiza ndipu ativilondo. . . . Anandi mwaku yiwu ndi ‘mbereri’ za Ambuya zo titenere kuzilongozge kwaku Yehova ndipuso ku ufumu waki.”

Mazuŵa nganu, Akaboni aku Yehova ku New Zealand alutirizga kupharazga uthenga wa mu Bayibolu ku ŵanthu wo aja muchigaŵa chawu ndipuso ŵanthu akuziwona malu. Zuwa linyaki, kwa maola ngamanavi, Akaboni anayi ku Turangi angukambiskana ndi ŵanthu 67 wo anguza kuziwona malu ndipu angutuliya muvyaru 17!

Kukamba uneneska, ŵanthu a ku New Zealand anguziŵa kuti Akaboni aku Yehova mbanthu achimangu, Mbakhristu akujipereka wo alondo fundu zapachanya zauneneska za mu Bayibolu. Chaka chechosi ŵanthu mahandiredi nganandi abatizika kuja Akaboni aku Yehova. Kufika mu 2019, Akaboni akujumpha 14,000 angukondwa kuteŵete Yehova muchigaŵa chenichi chakumwera.