VO MUNGACHITA PO MITENGU YA VINTHU YILUTIRIZGA KUKWERA

Mugomezgengi Kuti Vinthu Visinthengi

Kumbi vinthu mucharu chinu vakwera ukongwa mwakuti ndalama zo musaniya zipereŵere pa vinthu vo mukhumbikiya pa umoyu? Kumbi mufipa mtima kuti muŵaphweriyengi wuli ŵanthu a mubanja linu? Asani ndi viyo, mungayamba kufipiya mtima vinthu vamunthazi. Kweni chinanga kuti vinthu vingasuzga wuli, kugomezga kuti vinthu viŵengi umampha kungakuwovyani ukongwa.

NTCHIFUKWA WULI KUGOMEZGA KUTI VINTHU VISINTHENGI KUNTHAZI NKHWAKOVYA?

Ŵanthu wo agomezga kuti vinthu vijengi umampha kunthazi ajapu ŵaka cheti cha ndi kulindizga kuti vinthu visinthengi. Kweni chilindizga chitiŵawovya kuti achitengepu kanthu kuti vinthu viŵayendiyengi umampha. Mwakuyeruzgiyapu, kafukufuku walongo kuti ŵanthu wo ŵe ndi chilindizga . . .

akunthiyapu asani akumana ndi masuzgu
aja akunozgeka kusintha asani vinthu vasintha
asankha vinthu mwazeru vo vitiŵawovya kuti aje ndi umoyu wamampha

VO MUNGACHITA

Chakwamba, muŵanaŵaniyengi mo Bayibolu lingakuwovyiyani mazuŵa nganu. Mu Bayibolu mwe masachizgu ngo ngangakuwovyani kuti mukunthiyengepu po vinthu vilutirizga kukwera mitengu. Masachizgu ngenanga ngangakuwovyani kuziŵa vo mungachita sonu kweniso kunthazi po vinthu vilutirizga kukwera mitengu.

“Lusu la kuŵanaŵana lijengi mulonda waku, ndipu kuwamu kukuvikiliyengi.”—Nthanthi 2:11.

Chachiŵi, muŵanaŵaniyengi vo Bayibolu likamba kuti vazamuchitika kunthazi. Asani muwona kuti fundu za mu Bayibolu zakuzirwa ukongwa, zikuwovyeningi kuti mugomezgengi ukongwa vo vazamuchitika kunthazi. Mwakuyeruzgiyapu, muziŵengi kuti Chiuta wakhumba kuti “vinthu vizikuyendiyeni umampha kunthazi kweniso kuti muje ndi chilindizga chamampha.” (Yeremiya 29:11) Ndipu titenere cha kukayikiya venivi chifukwa iyu wakujalikiska Ufumu waku Chiuta wo wazamufiska venivi.

KUMBI UFUMU WAKU CHIUTA NTCHINTHU WULI, NANGA NDI VINTHU WULI VO WAZAMUCHITA?

Ufumu waku Chiuta ndi boma lo lazamulamuliya charu chosi chapasi. (Daniyeli 2:44; Mateyu 6:10) Boma lenili lazamulamuliya le kuchanya ndipu lazamumalisa masuzgu ngosi kweniso ukavu. Lazamuchitiska so kuti pacharu chosi paje chimangu kweniso weyosi wazamuja ndi vinthu vinandi vamampha nge mo malemba ngo nge mumphata umu ngalongore.

“Ukondwengi kweniso usekeriyengi ndi vinthu vinandi.”—Salimo 128:2.

“Yiwu [wo azamulamulika ndi Ufumu waku Chiuta] azamugwira ntchitu paŵaka cha.”—Yesaya 65:23.

“Pacharu chapasi pazamuja chakurya chinandi.”—Salimo 72:16.

Ŵanthu mamiliyoni nganandi agomezga malayizgu ngenanga ndipu asimikiza kuti Chiuta “wangapusika cha.” (Tito 1:2) Mwaviyo mungachita umampha kufufuza mwija malayizgu ngenanga kutuliya mu Bayibolu. Vo mungasaniya vingakuwovyani kuti mukunthiyengepu masuzgu nga ndalama kweniso mugomezgengi kuti vinthu vijengi umampha kunthazi.