VO MUNGACHITA PO MITENGU YA VINTHU YILUTIRIZGA KUKWERA

Jani Akupaska

Pakuti vinthu vikwera mitengu, mungaŵanaŵana kuti vingaŵa vakusuzga kuti mupaskengeku anyinu vinthu. Kweni uneneska ngwakuti kupaskaku anyinu vinthu kungakuwovyani ukongwa. Mungakwanisa kugwiriskiya ntchitu ndalama zimanavi kweniso kuja akupaska pa nyengu yimoza.

NTCHIFUKWA WULI KUJA NDI MTIMA WAKUPASKA NKHWAKOVYA?

Tikondwa ukongwa asani tipaskaku anyidu vinthu chinanga vingaŵa vimanavi. Kafukufuku walongo kuti asani munthu ngwakupaska, watamatama cha kweniso wasuzgika maŵanaŵanu cha. Mwakuyeruzgiyapu, kupaska kutovya kuti munthu walekengi kufipa mtima, kusuzgika maŵanaŵanu, kutama BP, liŵavu laki liphwanyaphwanya cha kweniso kutimuwovya kuti walekengi kusoŵa tulu.

“Kupaska kuchitiska kuti munthu wakondwengi ukongwa kuluska kulonde.”—Machitidu 20:35.

Asani titovya anyidu mwakuŵapaska ndalama pamwenga vinthu vinyaki, vititiwovya kuti nasi tizilekengi kusuzgika kuzomera kulonde chovyu. Howard yo waja ku England wangukamba kuti: “Chifukwa chakuti ini ndi muwolu wangu titesesa kovya anyidu, ndisuzgika maŵanaŵanu cha asani anyangu atindiwovya pa suzgu lo nde nalu.” Mbuneneska kuti ŵanthu wo apaska ndi mtima wosi akhaza kuti anyawu aŵaweze cha. Kweni chifukwa cha jalidu lawu lakupaska asaniya mabwezi chayingu ngo ngaja ngakunozgeka kuŵawovya asani nawu akumana ndi suzgu.

“Mupaskengi ndipu ŵanthu akupaskeningi.”—Luka 6:38.

VO MUNGACHITA

Mupaskengeku anyinu vo mwenavu. Chinanga kuti mungaŵa ndi vinthu vimanavi, namwi mungaŵapaskaku anyinu. Mwakuyeruzgiyapu, mungaŵapaskaku chakurya. Duncan ndi banja laki wo aja ku Uganda mbakavu ukongwa, kweni ŵe ndi mtima wakupaska. Duncan wangukamba kuti: “Kanandi pa Sabata, ini ndi muwolu wangu tidana munthu kuti tiziryi nayu chakurya. Tikondwa ukongwa kucheza ndi anyidu.”

Kweni asani mukhumba kupaska vinthu anyinu, mutenere kuziŵa vinthu vo mungafiska nadi. Mutenere cha kujipanisa mwakupereka vinthu vo vingachitiska kuti banja linu lisuzgiki.—Yobu 17:5.

Yesani kuchita ivi: Mungadaniyaku munthu munyaki chakurya pamwenga mungamuguliyaku ŵaka dirinki. Asani mwe ndi vinthu vinyaki vo mutivigwiriskiya ntchitu cha, mungapaska anyinu wo angachivigwiriskiya ntchitu.

Mungalongo mtima wakupaska munthowa zinyaki. Mphasu zinyaki zo mungapaska ŵanthu zikhumbika ndalama cha. Mwakuyeruzgiyapu, mungapereka nyengu kweniso nthazi zinu mwakugwira ntchitu kuti muwovyi ŵanthu anyaki. Kweniso nyengu zinyaki, mazu ngakukambika pa nyengu yamampha ngatuŵa ngamampha ukongwa! Mwaviyo, muŵawongengi anyinu pa vinthu vo achita umampha kweniso muŵakambiyengi kuti mutiŵayanja.

Yesani kuchita ivi: Mungawovyaku anyinu ntchitu za pakhomu, mungawovyaku kunozga vinthu pamwenga mungaŵawovyaku ntchitu zinyaki. Mungalembe munyinu kakadi pamwenga mungamutumiziya meseji chinanga yingaŵa meseji yakukamba ŵaka kuti ndakhumbanga ŵaka kukutawuzgani.

Asani mutesesa kuja akupaska, mutijijuliya khomu la vitumbiku.

“Mungaluwanga cha kuchita vamampha ndi kugaŵiyaku anyinu vinthu vo mwe navu.”—Aheberi 13:16.

Banja linyaki lipeya pabwalu panyumba ya munthukazi munyaki wakukota. Munthukazi wakukota watiŵapaska ti po awunjika vimalala.