Vo Akuŵerenga Afumba
Kumbi ndi ‘maŵanaŵanu’ wuli ngo Yehova wazamuŵika mumitima ya maboma nga ŵanthu kunthazi?
Pakukonkhoska vakukwaskana ndi mo chisuzgu chikulu chazamukwambiya, lemba la Chivumbuzi 17:16, 17 likamba kuti: “Ndipu masengwi 10 ngo unguwona ndipuso chinyama chakofya, vazamutinkha huli lo, ndipu vazakulisakaza ndi kulileka le nkhuli. Vazamukurya mnofu waki ndi kuliwotche limu ndi motu. Pakuti Chiuta waŵika venivi mumitima yawu kuti ngachiti vo iyu waŵanaŵana, kuti ngafiski maŵanaŵanu ngawu ngamoza mwakupereka ufumu wawu ku chinyama chakofya.” Kali, mabuku ngidu ngakonkhoskanga kuti fundu yakuti Yehova wazamuŵika ‘maŵanaŵanu’ mumitima ya maboma nga ŵanthu, ying’anamuwa kuti Yehova wazamuchitiska kuti maboma yanga ngazinangi visopa vaboza.
Kweni yapa pakhumbika kusintha. Fundu yakuti Yehova wazamuŵika ‘maŵanaŵanu’ mumitima ya maboma nga ŵanthu, ying’anamuwa kuti maboma ngenanga ngazamupereka “ufumu wawu ku chinyama chakofya.” Kuti tivwisi mo venivi vazamufiskikiya, tiyeni tikambiskani mafumbu yanga:
Kumbi vinthu vo vizumbulika mu uchimi wenuwu vimiyanji? “Huli” lo lidanika so kuti “Babiloni Mukulu,” limiya visopa vosi vaboza pacharu chosi. “Chinyama chakofya chiyera ukongwa” chimiya wupu wa United Nations wo ungwamba kugwira ntchitu mu 1919 kuti uwovyi kuti pacharu paje chimangu ndipu waziŵikanga kuti League of Nations. (Chivu. 17:3-5) “Masengwi 10” ngamiya maboma ngosi ngo ngatovya chinyama chakofya chenichi.
Kumbi pe kukoliyana wuli pakati pa huli ndi chinyama chakofya chiyera ukongwa? Uchimi uwu ukamba kuti huli ili ‘laja’ pachanya pa chinyama chakofya. Venivi ving’anamuwa kuti huli ili litichiwovya chinyama ichi kweniso nyengu zinyaki litichilamuliya.
Kumbi ntchinthu wuli cho chazamuchitikiya huli? Chinyama chakofya kweniso masengwi 10 ngo ngatichiwovya, “vazamutinkha huli lo.” Chifukwa cha ukali, vazamuphanga chuma chaki kweniso vazamulongo pakweru kuti huli ili lichita vinthu viheni ukongwa. Pavuli paki, vazakulinangiya limu huli lo ndipu venivi ndivu Yehova wangukamba kuti vazamuchitika. (Chivu. 17:1; 18:8) Umu ndimu visopa vosi vaboza vazamumaliya. Kweni ivi vechendachitiki, Yehova wazamuchitiska maboma nga ŵanthu kuti ngachiti chinthu chinyaki cho chiwiyi chechendachitikepu.
Kumbi Yehova wazamuchitiska kuti maboma ngachitenji? Yehova wazamuŵika “vo iyu waŵanaŵana” mumtima mwa masengwi 10 pamwenga kuti maboma. Ndipu vo iyu waŵanaŵana ndi ivi: Iyu wakhumba kuti maboma yanga ‘ngazipereki nthazi zaki kweniso mazaza ngaki ku chinyama chakofya chiyera ukongwa’ cho chimiya wupu wa United Nations. (Chivu. 17:13) Kumbi venivi ving’anamuwanji? Kumbi maboma nga ŵanthu ngazamuŵanaŵana ŵaka ngija kuti ngapereki nthazi kweniso mazaza ngaki ku chinyama chakofya? Awa! Uchimi wenuwu ulongo kuti Chiuta mweneku ndiyu wazamuchitiska kuti ngachiti venivi. (Nthanthi 21:1; yeruzgiyani ndi Yesaya 44:28.) Nanga kumbi maboma ngazamuperekanga nthazi ndi mazaza ngawu kamanakamana? Awa! Viwoneka kuti vinthu vazamusintha mwamabuchibuchi. Pavuli paki, chinyama chakofya cho panyengu iyi chazamuja kuti chapaskika nthazi, chazamunangiya limu visopa vosi vaboza. Ndipu venivi ndivu Yehova wakhumba!
Kumbi tikhumbika kulindizganji? Tikhumbika cha kulindizga kuti tivwengi nkhani zakulongo kuti kamana ndi kamana maboma ngayamba kuwovya ukongwa wupu wa United Nations. Kweni titenere kulindiza ivi: Mwamabuchibuchi, Yehova wazamuŵika maŵanaŵanu mumitima ya maboma nga ŵanthu kuti ngapereki nthazi ku chinyama chakofya. Asani venivi vazichitika, tazamuziŵa kuti chisuzgu chikulu che pafupi kwamba. Kweni pasonu panu, tiyeni “tije masu ndipu tilutirizgi kuŵanaŵana umampha” chifukwa pambula kuswera yapa, vinthu visinthengi mwaliŵi ukongwa!—1 Ate. 5:6.