Esi si lovidwego khu Matewu
1 Libhuku nya matimu ya Jesu Kristo,* gyanana gya Dhavhidhe, gyanana gya Abrahama:
2 Abrahama a di velega Isaki;
Isaki a di velega Jakobe;
Jakobe a di velega Judha ni vandriyaye;
3 Judha ni Tamari va di velega Peresi ni Zera;
Peresi a di velega Esirome;
Esirome a di velega Aramu;
4 Aramu a di velega Aminadhabhi;
Aminadhabhi a di velega Nasoni;
Nasoni a di velega Salimoni;
5 Salimoni ni Rahabhi va di velega Bhowazi;
Bhowazi ni Rute va di velega Obhedhi;
Obhedhi a di velega Jese;
6 Jese a di velega pfhumu Dhavhidhe;
Dhavhidhe ni ngadza Uriya va di velega Solomoni;
7 Solomoni a di velega Robhowamo;
Robhowamo a di velega Abhiya;
Abhiya a di velega Asa;
8 Asa a di velega Josafati;
Josafati a di velega Joramo;
Joramo a di velega Oziya;
9 Oziya a di velega Jothamo;
Jothamo a di velega Akazi;
Akazi a di velega Ezekhiya;
10 Ezekhiya a di velega Manasi;
Manasi a di velega Amoni;
Amoni a di velega Josiya;
11 Josiya a di velega Jekoniya ni vandriyaye, tepo Vaisrayeli va nga ba vari vbafuvbi ni gu yiswa Bhabhiloni.
12 Hwane nya gu ba va yisidwe Bhabhiloni, Jekoniya a di velega Salatiyeli;
Salatiyeli a di velega Zorobhabheli;
13 Zorobhabheli a di velega Abhiyudhi;
Abhiyudhi a di velega Eliyakimi;
Eliyakimi a di velega Azore;
14 Azore a di velega Sadhoki;
Sadhoki a di velega Akhime;
Akhime a di velega Eliyudhe;
15 Eliyudhe a di velega Eliyazari;
Eliyazari a di velega Matani;
Matani a di velega Jakobe;
16 Jakobe a di velega Josefa, mwama wa Mariya, a gu uye a nga velega Jesu a ranwago pwani khu Kristo.
17 Khu kharato, gukhugeya ga Abrahama kala ga Dhavhidhe, gu vbindride 14 situgulwana; gukhugeya ga Dhavhidhe kala tepo Vaisrayeli va nga yiswa Bhabhiloni, gu vbindride 14 situgulwana; gukhugeya tepo va nga yiswa Bhabhiloni kala ga Kristo, gu vbindride 14 situgulwana.
18 Guvelegwa ga Jesu Kristo gu giregide kharati: Tepo Josefa a nga ba a tumbiside Mariya gu tshadha naye, Mariya a di khura mimba khu liphuvbo nya guage,* na va si gu tshadhi. 19 Ganiolu, kha nga olu mwama waye, Josefa, a nga ba ari muthu nyo lulame, kha nga ba a vbweta gu mu tshonegisa vathuni, khu kharato, a di hunga gu hambana naye gusihalani. 20 Na nga gu dundrugeya khu isoso, ngilozi ya Jehovha* yi di ganeya naye khomu nya loro, khiyo: “Josefa, gyanana gya Dhavhidhe, u nga thavi gu dzega mwangadzi wago Mariya u hongola naye gaya kholu mimba a gu nayo a di yi mana khu liphuvbo nya guage. 21 Uye a na velega gyanana nya gikhwathana, u na gi riya gu khuwe khigyo Jesu,* kholu a na vbulugisa vathu vaye sighohoni sawe.” 22 Satshavbo sesi si giregide gasi gu tadzisa esi Jehovha a si ganedego khu gu thumisa muprofeti waye, a nga khuye: 23 “Mu ngu wona, mbiri yi na khura mimba, yi velega gyanana nya gikhwathana gi na ridwago lina nyo pwani khu Emanuweli,” si thulago gu khiso “Nungungulu na ni ethu.”
24 Khavbovbo, Josefa a di khendzuga khu muligovbeni, a gira satshavbo a nga embedwa khu ngilozi ya Jehovha, a dzega mwangadzi waye a hongola naye gaya. 25 Khu kharato, kha hengeya naye malawu kala a hefemula gyanana, egi Josefa a nga gi riya gu khuye khigyo Jesu.