MAHUNGU NYA YADI GUYA KHESI SI LOVIDWEGO KHU MARKO

1 Maphelo nya mahungu nya yadi guya khu Jesu Kristo, Gyanana gya Nungungulu: 2 Kha nga si lovidwego khu muprofeti Isaya, a nga khuye: “(Nyi ngu rumeya githumi* gyangu mbeli gwago, gasi gu ta gu dongiseleya ndziya yago.) 3 Gu ni lito nya muthu li pwalago giwulani li gu khilo: ‘Dongiseleyani ndziya Jehovha! Lulamisani dziruwa dzaye!’” 4 Johane Mubhabhatisi a di romo giwulani a tshumayela maningano ni gubhabhatiswa kha nga giyeyedzo nya gudzilaye gasi gu divaledwa sighoho. 5 Vathu va Judheya gwatshavbo ni vavbanyi vatshavbo va Jerusalema va di gu hongola gwaye gasi va ya bhabhatiswa* nigu a di gu va bhabhatisa tsongoni wa Joridhani na va gu dawuleya sighoho sawe guagani. 6 Johane a di gu ambala sombo nya mawoya nya dzikamelo ni libhandri nya lidowo giwununi, nigu a di gu hodza khaba ni wulombe nya likhabi. 7 A di gu tshumayela, khuye: “Khu hwane gwangu, gu nguta muthu nya tshivba guvbindra eni; oyu eni nyi si yedwigo khu gu noga nyi tshula dzingodzi nya dzisandaliya dzaye. 8 Eni nyi di mi bhabhatisa khu mati, ganiolu uye a na mi bhabhatisa khu liphuvbo nya guage.”

9 Khu matshigu yale, gu di vboha Jesu wa Nazareta ga Galileya, a ta bhabhatiswa khu Johane, tsongoni wa Joridhani. 10 Khu gitepwana gile, na gu duga khu matini, a di wona ndzadzini na gu tulega ni liphuvbo nya guage na li gu tshiga vbatshani gwaye kha nga gipomba. 11 Gu di pwala lito na li guta khu ndzadzini na li gu khilo: “Uwe u Gyanana gyangu nyi gi haladzago, gi nyi tsakisago ngudzu.”

12 Khu gitepwana gyogyo, liphuvbo la Nungungulu li di mu kutsa gu hongola giwulani. 13 Khu kharato, a di khala giwulani 40 matshigu. Khavbovbo Sathane a di ya mu linga. Umomo gu diri ni sirengo nya likhabi nigu dzingilozi dzi di gu mu thumeya.

14 Khavbovbo, hwane nya gu ba Johane na khothedwe, Jesu a di beya Galileya na gu tshumayela mahungu nya yadi ya Nungungulu, 15 na gu khuye: “Tepo yi vegisidwego yi vbohide nigu Mufumo wa Nungungulu womo vbafuvbi, vbindrugedzani, mu khodwa mahungu nya yadi.”

16 Na gu gimbiya bambe nya yiphwa ya Galileya, a di wona Simoni ni ndriyaye Andreya na va gu thesa dzikhoga dzawe matini kholu va diri vagogi. 17 Khavbovbo, Jesu a di va embeya, khuye: “Nyi landreni, nyi na mi gira vagogi nya vathu.” 18 Avo va di dzegeya gu diga dzikhoga dzawe va mu landreya. 19 Na gimbidenyana, a di wona Jakobe gyanana gya Zebhedhewu ni ndriyaye Johane, na vari ngalavani gwawe na va gu sonedzeya dzikhoga dzawe, 20 a di dzegeya gu va rana. Avo va di tshiya papayi wawe Zebhedhewu ngalavani ni sithumi, va mu landreya. 21 Va di beya Kafarinawume;

guvboha yi nga vboha Sabhadho, uye a di beya sinagogani a pheya gu hevbudza. 22 Vathu va di hlamala ngudzu khu mahevbudzelo yaye kholu a di gu hevbudza mahungu ma nga ba mata khiyo ga Nungungulu,* a di si fani ni valovi. 23 Khu tepo yile, sinagogani gu diri ni muthu a nga ba ari ni liphuvbo nya guvivbe.* Muthu yoyo a di khusedza lito, khuye: 24 “Ginani u gi vbwetago gwathu, Jesu wa Nazareta? Wa gu teya gu ta hi fuvisa? Nyi ngu guti gwadi gu kheni khuwe mani,: U Githumi gi Agidego gya Nungungulu!” 25 Ganiolu, Jesu a li kawuka, khuye: “Degula! Duga ga muthu yoyo!” 26 Hwane nya gu ba liphuvbo lile nya guvivbe na li theside mwama wule vbavbatshi, li mu ndrendremedzisa li bwe li gulumeya khu lito latshavbo, li di duga gwaye.* 27 Vatshavbo va di hlamala ngudzu va pheya gu wudzisana khesi si nga girega, khavo: “Ginani esi? Gihevbudzo nya giphya! Uye na ni tshivba nya gu tutumise maphuvbo nya guvivbe nigu ma ngu mu engisa.” 28 Khavbovbo, ndruma yaye yi di phalalega khu guvbiredza malangani yatshavbo, tigoni gwatshavbo ga Galileya.

29 Tepo va nga duga khu sinagogani va di hongola gaya ga Simoni ni Andreya na vari ni Jakobe ni Johane. 30 Mamayi wa ngadza Simoni a di gu lade, nari ni feveri; va di dzegeya gu embeya Jesu. 31 Jesu a di mu yela a ya mu phara khu libogo, feveri yi di vbindra, a khuga, a pheya gu va thumeya.

32 Vbasiyambotunu, tepo li nga pfola lidambo, vathu va di reseya Jesu vatshavbo vathu va nga ba va dwala ni ava va nga ba vari ni madhimoni. 33 Vathu vatshavbo va dhoropani va di gu tshanganide vbamwanya nya ndranga yile. 34 Khavbovbo, uye a di hawulugisa vathu va nga ba va dwala khu madwali nyo hambane-hambane, a tutumisa madhimoni nya mangi, ganiolu kha nga ba a dzumeleya gu khuye madhimoni ma ganeya kholu ma di gu dziti gu khayo khuye Kristo.*

35 Ni dzimindru ngudzu, na gu nga sivbade, a di wuga a duga vbavbandze a hongola wulanga gasi gu ya khala enga, tepo a nga vboha iyoyo a di pheya gu gombeya. 36 Ganiolu, Simoni ni ava a nga ba ari navo, va di khuga va gimbiya va mu vbweta, 37 tepo va nga mu mana va di mu embeya, khavo: Vatshavbo vo vbwetedzeya uwe.” 38 Ganiolu, uye a di va embeya, khuye: “Hongoleni wumbe wulanga, omu nya madhoropa ya vbafuvbyana momu gasi nyi ya tshumayela niyo, kholu khiso nyi nga si teya.” 39 Uye a di gimbiya Galileya gwatshavbo na gu tshumayela dzisinagogani gwawe ni gu tutumisa madhimoni.

40 A di hidzimeledwa gambe khu muthu a nga ba ari ni sokono a ta mu khidzimeya, a mu lomba, khuye: “Wa gu ba u dzina, nyi hawulugise.” 41 Khu kharato, Jesu a di mu pweya wusiwana, a thawuludza libogo a kuha mwama wule, khuye: “Nyi ngu dzina! Hawuluga.” 42 Sokono yi di dzegeya gu phalalega, mwama wule a tshala na agide. 43 Jesu a di dzegeya gu mu ruma a hongola, ganiolu na mu layide, 44 khuye: “U nga embeyi muthu, ganiolu gimbiya u ya dzi yeyedza ga muprista u bwe u ningeya esi Mosi a leletedego gu khuye si ningedwa gasi gu yeyedza gu khiso u agisidwe gasi si khala wufakazi gwawe.” 45 Tepo a nga khuga khu vbale, mwama wule a di pheya gu huweleya a embeya vatshavbo esi si nga girega. Khu kharato, kha sa nga ba si kodzega gambe gu Jesu a beya omu nya lidhoropa nya mba tugudwa khu vathu. Uye a di gu khala vbavbandze malangani gu nga ba guri mwalo vathu. Ambari ulolo, vathu va malangani gwatshavbo va di gu simama gu hongola gwaye.

2 Hwane nya matshigu nyo khaguri, Jesu a di beya gambe Kafarinawume. Mahungu nya gu pwani womo gaya ma di phalalega. 2 Khavbovbo, gu di tshangana vathu nya vangi nyumbani nyo bwe gu hamugega ni wulanga ni avba nya lidimba, a di pheya gu va embeya mahungu ya Nungungulu. 3 Va di mu reseya gilima gi nga ba gi rwadwe khu 4 vama. 4 Ganiolu, kha nga olu gu nga ba gu tade ngudzu khu vathu, kha va nga ba va kodza gu vboha nagyo ga Jesu, khu kharato, va di ghwawula vbatshani nya nyumba, umo a nga ba a romo Jesu, va gira gihogo, hwane nya gu ba va giride gihogo, va di reledza gikamana* gi nga ba gi lade avbo gilima gile. 5 Tepo Jesu a nga wona gukhodwa va nga ba vari nago a di embeya gilima gile, khuye: “Mwanangu, sighoho sago si divaledwe.” 6 Ganiolu, valovi nyo khaguri va nga ba va romo vbale va di ganeya khu myonyoni gwawe, khavo: 7 “Khu ginani mwama yoyu a ganeyago kharati? A gu valeteya! Khu mani a si kodzago gu divaleya sighoho nasiri Nungungulu basi?” 8 Jesu a di dzegeya gu tugula esi va nga ba va si pimisa myonyoni gwawe, khu kharato a va embeya, khuye: “Khu ginani mu pimisago isoso myonyoni gwanu? 9 Khu sevbi si vbevbugago? Gu embeya gilima gegi gu kheni: ‘Sighoho sago si divaledwe,’ mwendro gu kheni: ‘Wuga u dzega gikamana gyago u gimbiya’? 10 Ganiolu gasi mu feya gu dziti gu khenu Gyanana nya muthu gi ningidwe tshivba nya gu divaleye sighoho mafuni . . .” a di embeya gilima gile, khuye: 11 “Nyi ngu gu embeya gu kheni khuga u ema; dzega gikamana gyago u hongola gaya.” 12 Khavbovbo, a di khuga a ema, a dzega gikamana gyaye a duga, a gimbiya na gu wonwa khu vatshavbo. Khavbovbo, vatshavbo va di hlamala, va dhumisa Nungungulu, khavo: “Gima hi si gu woni silo nya nga esi!”

13 Jesu a di hongola gambe bambe nya yiphwa, vathu vatshavbo va di mu landra, a pheya gu va hevbudza. 14 Na gu gimbiya, a di wona Levhi, gyanana gya Alifewu, na khade wulangani nya gukhupise. A di mu embeya, khuye: “Nyi landreye.” Khavbovbo a di khuga a mu landreya. 15 Khu hwane nya tepo, Jesu na gu hodza nyumbani ga Levhi, vakhupisi nya vangi ni sighohi va di gu hodza ni Jesu ni vapizane vaye, kholu nya vangi va di gu mu landreya. 16 Ganiolu, tepo valovi va Vafarisi va nga wona gu khavo a gu hodza ni sighohi ni vakhupisi, va di wudzisa vapizane vaye, khavo: “Uye a gu hodza ni vakhupisi ni sighohi?” 17 Tepo Jesu a ngapwa isoso, a di va hlamula, khuye: “Ava va si dwaligo kha va vbweti dhogodheya, ganiolu ava va dwalago va ngu mu vbweta. Kha nya teya gu ta rana va nya gululama, ganiolu sighohi.”

18 Vapizane va Johane ni Vafarisi va di gu pfhunga.* Khu kharato, va di hidzimeleya Jesu va ya mu wudzisa gu khavo: “Khu ginani vapizane va Johane ni vapizane va Vafarisi va pfhungago, ganiolu ava vago va si pfhungigo?” 19 Jesu a di hlamula, khuye: “Ina dzipari nya noyivhu dzi na ni gighelo nya gu pfhunge na dzi ngari ni noyivhu vbafuvbi? Dza gu ba dzi ngari ni noyivhu kha dzi yeli gu pfhunga. 20 Ganiolu, ma nguta matshigu va na dzegedwago noyivhu, khu tepo yoyo khavbo va na pfhungago. 21 Mwalo a dzegago mwendra nya wuphya a sona khuwo giziva avba nya mwendra wa gale kholu a gu gira isoso, giziva nya mwendra nya wuphya gi na ndrindra mwendra wa gale wu engedzeya gu pferuga. 22 Khu gufana, mwalo a theyago vhinyu nya yiphya omu nya madowo ya gale, kholu a gu gira isoso, vhinyu yi na pferula madowo, yi vbalaga, madowo* yakona nayo ma pferuga, satshavbo si luza. Khu kharato, vhinyu nya yiphya yo thedwa omu nya madowo nya maphya.”

23 Khu litshigu nya Sabhadho, Jesu a di vbindra khomu nya mathembwe nya trigu, vapizane vaye va di pheya gu vburumuleya trigu na va gu gimbiya. 24 Khu kharato, Vafarisi va di embeya Jesu, khavo: “Nga wona! Khu ginani va girago silo si gu mba dzumedziswa gu girwa khu litshigu nya Sabhadho?” 25 Ganiolu, Jesu a di va hlamula, khuye: “Mu si leri esi Dhavhidhe a giridego tepo a nga hamuga gilo nya gu hodze, apwa ndzala uye ni vama a nga ba ari navo? 26 Kha mwa leri gu pwani, tepo Abhiyatari a nga ba ari muprista nya khongolo, Dhavhidhe bede nyumbani ga Nungungulu a hodza dzipawu dzi nga ba dzi ningedwe ga Nungungulu dzi nga ba dzi si yeli gu hodzwa khu mumbe muthu nasiri khu vaprista basi, a bwe a ninga vama a nga ba ari navo?” 27 Jesu a di ganeya gambe, khuye: “Nungungulu giride Sabhadho khu kotani nya muthu, ganiolu kha gira muthu khu kotani nya Sabhadho. 28 Khu kharato, Gyanana nya muthu, Pfhumu nya Sabhadho gambe.”

3 Jesu a di beya gambe sinagogani, mule gu diri ni mwama a nga ba a haside libogo. 2 Khu kharato, va di mu khedziseya gwadi gasi gu wona gu khavo a na hawulugisa mwama wule khu Sabhadho gani, gasi va mu rwega nandru. 3 Jesu a di embeya mwama wule a nga ba a haside libogo, khuye: “Khuga u ema, uta vbakari.” 4 Khavbovbo, a di va wudzisa, khuye: “Ina si ngu dzumedziswa khu Sabhadho gu gira silo nya sadi mwendro gu gira silo nya guvivbe? Gu vbulugisa womi mwendro gu songa?” Ganiolu, vatshavbo va di simama na va degude. 5 Hwane nya gu ba a khedzide ava va nga ba va mu randrede, na gorogide khu kotani nya guvivbe nya myonyo yawe, a di embeya mwama wule, khuye: “Thawuludza libogo lago.” Mwama wule a di li thawuludza, li hawuluga. 6 Khavbovbo, Vafarisi va di dzegeya gu duga va ya tshangana ni tsawa wa na Herodhi, va luga mano nya gu songe Jesu.

7 Jesu ni vapizane vaye va di hongola yiphwatunu, a landrwa khu gitshungu nya gikhongolo gya Galileya ni Judheya. 8 Nigu gambe, gitshungu nya gikhongolo gya Jerusalema, gya Idhumeya, gya gumbe tshatugo ga Joridhani ni egi gya dzibambe ga Tiro ni Sidhoni, tepo gi ngapwa satshavbo esi Jesu a nga ba a gira, gi di hongola nigyo iyo gwaye. 9 Uye a di embeya vapizane vaye gu khuye va mu dongiseya gingalavana gasi a si gundrwi khu vathu. 10 Kha nga olu a nga ba a hawulugisa vathu nya vangi, vatshavbo va nga ba vari ni madwali nya makhongolo va di gu mu randreya, gasi gu mu kuha. 11 Maphuvbo nya guvivbe* nayo tepo yatshavbo ma nga ba ma mu wona, ma di gu mu khidzimeya ma khusedza lito, khayo: “Uwe u Gyanana gya Nungungulu.” 12 Ganiolu, gutala nya dzitepo uye a di gu ma laya gasi ma si embeyi muthu gu khayo khuye mani.

13 A di gweya gigomoni, a rana vambe nya vapizane vaye a hongola navo. 14 A di wumba tsawa nya 12 vathu, a va rana gu khuye vapostoli. Avo va di yede gu gimbiya-gimbiya naye a bwe a va rumeya gasi gu gimbiya va tshumayela 15 ni gu va ninga tshivba nya gu tutumise madhimoni.

16 Avba nya tsawa nya ava nya 12 a wumbidego, gu diri ni Simoni wule a nga mu riya lina nyo khuye khu Pedro, 17 Jakobe gyanana gya Zebhedhewu, Johane ndriye wa Jakobe (ava a nga va riya gu khuye khavo Bhowanerige, si tshamuseyago gu pwani: “Sanana nya Libara”), 18 Andreya, Filipi, Bharitolomewu, Matewu, Tomasi, Jakobe gyanana gya Alifewu, Tadhewu, Simoni Mukhanani 19 ni Judha Sikariyoti, oyu khu gu gimbiya nya tepo a nga mu ningeya.

Khavbovbo, Jesu a di beya nyumbani. 20 Vathu va di tshangana gambe, gu tala, avba nya gu a si kodzi ni gu hodza. 21 Ganiolu, tepo valongo vaye va ngapwa esi si nga ba si girega, va di khuga va mu landra, kholu va di gu khavo: “Handrugide.” 22 Valovi navo va nga ba vata khu Jerusalema, va di gu khavo: “Mwama yoyu mbakidwe khu Bhelizebhu* nigu a gu tutumisa madhimoni khu tshivba ya pfhumu nya madhimoni.” 23 Khavbovbo, hwane nya gu ba a va ranide, a di ganeya navo khu gu thumisa sipimaniso, khuye: “Si nga kodzega kharini gu Sathane a tutumisa Sathane? 24 Mufumo wu na thega vathu vawo va gu dwana khu gyawe; 25 nigu ndranga ya gu kabanega kha yi na nga si kodza gu tiya. 26 Nigu gambe Sathane a gu dzi wugeya khu abune nigu vathu vaye va kabanega, uye kha na nga tiya, a na thega. 27 Khu lisine, mwalo a kodzago gu beya nyumbani nya mwama nya tshivba aba dzithomba dzaye nya mba pheya khu gu mu hunga. Hwane nya gu mu hunge khavbo a na si kodzago gu mu beya. 28 Khu lisine nyi ngu mi embeya gu kheni: Vathu va na divaledwa sighoho satshavbo va girago, ambari nari gighoho nya gu khale kharini mwendro ni gevbini givalo va ganeyago. 29 Ganiolu, ni wevbini a valago liphuvbo nya guage kha na nga divaledwa, ganiolu gighoho gyaye gi na simama kala gupindruga.” 30 Jesu a di ganeya isoso kholu va di gu khavo: “Na ni liphuvbo nya gu vivbe.”*

31 Khu gulandreya, mamayi waye ni vandriyaye va di vboha, va ta ema khu vbavbandze va rumeya muthu gasi a ya mu rana. 32 Kha nga olu a nga ba a randredwe khu vathu nya vangi, va di mu embeya, khavo: “U ngu vbwetwa khu mamayi wago ni vandriyago, vomo vbavbandze.” 33 Ganiolu, a di va hlamula, khuye: “Khu mani mamayi wangu ni vandriyangu?” 34 Khavbovbo, uye a di khedza ava va nga ba va khade va mu randreya, khuye: “Mamayi wangu ni vandriyangu kha mu va woni ava! 35 Kholu ni wevbini a girago gugola ga Nungungulu, uyoyo khuye ndriyangu nya mwama, ndriyangu nya nyamayi nigu khuye a gu mamayi wangu.”

4 Jesu a di pheya gambe gu hevbudza vbafuvbi ni yiphwa. Vathu nya vangi va di tshangana vbafuvbi gwaye. Khu kharato, a di beya ngalavani, a ya khala, a hidzimeya hwindzwana, ganiolu vathu vatshavbo va di emide funguni. 2 Uye a di pheya gu va hevbudza silo nya singi khu gu thumisa sipimaniso, na gu khuye: 3 “Nga engisani! Muyali a di duga gasi gu ya yala dzimbewu dzaye. 4 Tepo a nga ba a yala, dzimbe dzimbewu dzi di thegeya bambe nya ndziya, sita sinyoni si ta rotheya. 5 Dzimbe dzi di thegeya musiwindrini gu nga ba guri mwalo mafu nya mangi; dzi di dzegeya gu buga kholu kha ga nga ba gu etide. 6 Ganiolu, tepo li nga vbisa lihani, dzi divbya, dzi wuna, kholu dzi diri mwalo mikhamba. 7 Dzimbe dzimbewu dzi di thegeya mibani, miba yi dandra, yi dzi midza, dzi si theyi mihandro. 8 Ganiolu, dzimbe dzi di thegeya mafuni nya yadi; hwane nya gu ba dzi bugide, dzi dandra, dzi di pheya gu theya mihandro, dzi velega 30, ni 60, ni 100 guvbindra esi si nga ba si yadwe.” 9 A di bwe gambe, khuye: “Uye a gu ni dzindzeve gasi gupwa, a napwe.”

10 Khavbovbo, tepo a nga tshala enga, ava va nga ba va mu randrede ni ava nya 12, va di mu hidzimeleya, va pheya gu mu gira siwudziso maningano ni sipimaniso sesi. 11 A di va embeya, khuye: “Enu mu ningidwe sihalo nya guage nya Mufumo wa Nungungulu. Ganiolu, ava va vbavbandze, va gu embedwa satshavbo khu sipimaniso, 12 gasi va khedza, ganiolu va si woni gilo; va sipwa, ganiolu va si si pwisisi. Avo gima kha va na nga vbindrugedza gasi va divaledwa.” 13 A di bwe a va wudzisa, khuye: “Mwa gu mba pwisisa gipimaniso gegi, mu na pwisisa kharini esi simbe sipimaniso?

14 “Muyali a gu yala mahungu nya Mufumo. 15 Dzimbewu dzile dzi nga thegeya bambe nya ndziya ya avba gu nga yadwa mahungu nya Mufumo, ga gu thudwa vale vapwago mahungu nya Mufumo, ganiolu a dzegeya guta Sathane a ta dusa mahungu nya Mufumo ma yadwego gwawe. 16 Khu gu fana, dzile dzi nga thegeya musiwindrini, ga gu thudwa vale vapwago mahungu nya Mufumo va dzegeya gu ma dzumeya khu gutsaka. 17 Ganiolu, kha va tsitsi mikhamba, va gu simama khu tepo nyo khaguri. Ga gu dugeleya sigaradzo mwendro gu tshaniswa khu kotani nya mahungu nya Mufumo, va gu diga gukhodwa gwawe.* 18 Gu ni dzimbe dzi nga yadwa mibani. Edzi go thudwa vale vapwago mahungu nya Mufumo, 19 ganiolu sigaradzo nya mafu* yaya, ni gu landriseya dzithomba, ni gu dogoreya silo satshavbo si midza mahungu ma si theyi mihandro. 20 Khu guhegisa, dzile dzi yadwego mafuni nya yadi, go thudwa vale vapwago mahungu nya Mufumo va ma dzumeya, va theya mihandro: 30, ni 60, ni 100 guvbindra esi si nga ba si yadwe.”

21 A di va embeya gambe, khuye: “Ina kandriya yi ngu fenengedzwa khu rava* mwendro gu vegwa vbavbatshi nya kama? Khandri ya gu handzegwa vbatshani nya gilo? 22 Kholu gimwalo gi sihidwego gi na gu mba wonegiswa. Gimwalo gi sihidwego gwadi gi na gu mba tugudwa. 23 Oyu a gu ni dzindzeve gasi gupwa, a napwe.”

24 A di va embeya gambe, khuye: “Engisani gwadi esi mu si pwago. Pimo mu pimago khuwo, khuwo wu na thumiswago gwanu nigu gambe mu na engedzedwa. 25 Kholu oyu a gu naso a na engedzedwa, ganiolu wule a gu mwalo naso ambari esi a gu naso a na dzegedwa.”

26 A di bwe khuye: “Khu kharato, Mufumo wa Nungungulu, wa gu fana ni muthu a swayago dzimbewu mafuni. 27 Wutshigu a gu lala, a wuga na gu gide, ganiolu dzimbewu dza gu buga dzi bwe dzi dandra ambari a gu mba dziti gu khuye sa gu girega kharini. 28 Mafu khu yabune ma gu velega mihandro khu vbadugwana-vbadugwana: Go pheya khu litshina, gu landreya makonva,* khu gu hegisa makonva ma dusa dzimbewu dzi vidzidwego. 29 Ganiolu, tepo dzimbewu dzi vidzwago, a gu hongola a ya pileleya kholu yi vbohide nango nya guvbwere.

30 A di bwe, khuye: “Mufumo wa Nungungulu hi nga wu fananisa ni ginani? Mwendro gipimaniso muni hi na wu tshamuseyago khigyo? 31 Wa gu fana ni mbewu nya ginapi,* yi yadwago na yiri yidugwana ga dzimbewu dzatshavbo mafuni. 32 Ganiolu, tepo yi yadwago ya gu dandra yi vbindra mitongwe yatshavbo, yi velega matamo nya makhongolo nyo bwe sinyoni si ya zumba mutsani gwawo.”

33 Khu gu thumisa sipimaniso nya singi nya nga esi, Jesu a di gu va embeya mahungu nya Mufumo kala avba va nga ba va si kodza gu ma pwisisa. 34 Khu lisine, gimwalo a nga ba a va embeya nya mba thumisa sipimaniso, ganiolu a di gu tshamuseya vapizane vaye satshavbo khu phuvbo.

35 Khu litshigu lile, tepo li nga pfola, a di va embeya, khuye: “Hongoleni hi tshatuga hi hongola yimbe bambe nya yiphwa.” 36 Hwane nya gu ba vapizane va tshadzisanide ni gitshungo, va di mu dzega khu ngalava va hongola naye gumbe tshatugo; dzimbe dzingalava dzi di hongola nidzo gumogo naye. 37 Gu di pheya gingulu, mavimbi ma veta ngalava nyo bwe yi pheya gu tala khu mati. 38 Ganiolu, Jesu a di lade khu hwane* nya ngalava, avba nya gikhuledzo, khavbovbo va di mu wusa, khavo: “Muhevbudzi, kha wu si woni gu khuwe hi ngufa?” 39 Khavbovbo, a di wuga a kawuka phuvbo, a embeya yiphwa, khuye: “Degula! Rula!” Phuvbo yi di ema, gu manega malenga nya makhongolo. 40 A di va embeya, khuye: “Khu ginani mu thavago ngudzu? Mu ngari mwalo ne gukhodwa nya gudugwana?” 41 Avo va di simama gu thava ngudzu, va wudzisana khu gyawe, khavo: “Gasi khu mani mwama yoyu gwadi-gwadi? Gu dzega ni phuvbo ni yiphwa si mu engisa.”

5 Khu kharato, va di vboha yimbe bambe nya yiphwa, gipandreni gya Vagerazi. 2 Jesu na ngari gu duga khu ngalavani, mwama nyo khaguri a nga ba a mbakidwe khu liphuvbo nya guvivbe* a di duga khu vbakari nya dzisimitero a mu yela. 3 Uye a di gu vbanya vbakari nya dzisimitero nigu kala ga tepo yile mwalo a nga ba a si kodzide gu mu hunga ambari khu dzikorenti. 4 A di gu khaleya gu hungwa mawundru ni mawogo khu dzikorenti, ganiolu a di gu phinula dzikorenti dza mawogoni a bwe a phinuleya edzi dza mawundruni nigu mwalo a nga ba ari ni tshivba nya gu mu pale. 5 Tepo yatshavbo, wutshigu ni mihani, a di gu wombedzeya dzihuwa nari omu nya dzisimitero ni musigomoni a bwe a dzi hendreleya khu siwindri. 6 Ganiolu, tepo a nga wona Jesu na romo hwindzwana, a di tutuma a ya mu khidzimeya. 7 Khavbovbo, a di khusedza lito a ganeya, khuye: “Ginani u gi vbwetago gwangu, Jesu, Gyanana gya Nungungulu a khugegidego ngudzu? Nyi tumbise mbeli ga Nungungulu gu khuwe khu na nga nyi tsayisa.” 8 Kholu Jesu a di gu li embede, khuye: “Duga ga mwama yoyo, liphuvbo wewe nyo vivbe.”* 9 Ganiolu, Jesu a di li wudzisa, khuye: “Khuwe mani?” Ilo li hlamula, khilo: “Kheni Gikwata, kholu hi vangi.” 10 Nigu li di lomba Jesu gu khilo a si tutumisi maphuvbo yale khu tigoni mule.

11 Gu diri ni dzikhumba nya dzingi dzi nga ba dzi haviswa gigomoni. 12 Khu kharato, maphuvbo yale ma di lomba Jesu, khayo: “Hi rumeye hi ya beya omu nya dzikhumba dzile.” 13 Uye a di ma dzumeleya, khavbovbo maphuvbo yale nya guvivbe ma di duga ma ya beya omu nya dzikhumba, idzo dzi di tutuma dzi ya ndraga dzi thegeya matini; tanga nya 2000 nya idzo dzifa matini. 14 Vahavisi nya dzikhumba va di tutuma va ya embeya ava va nga ba va khala dhoropani ni ava va nga ba va khala bambe nya lidhoropa esi si nga girega, vathu va dita gasi gu ta wona esi si nga dugeleya. 15 Khu kharato, va di hidzimeya avba a nga ba a romo Jesu, va wona mwama wule a nga ba ari ni gikwata, na ambade sombo, na dzi khotha gwadi; va pheya gu thava. 16 Khavbovbo, ava va nga si wona va di va embedzeya esi si nga girega ga mwama wule a nga ba ari ni madhimoni ni esi si nga giregeya dzikhumba. 17 Khavbovbo, va di pheya gu lomba Jesu gu khavo a na duge khu gipandreni mule.

18 Tepo Jesu a nga beya ngalavani, mwama wule a nga ba ari ni madhimoni a di mu lomba gu hongola naye. 19 Ganiolu, Jesu kha dzumeya gu hongola naye, a di mu embeya, khuye: “Gimbiya gaya ga valongo vago u ya va embeya satshavbo esi Jehovha a gu giredego ni wuhindzi a gu yeyedzidego.” 20 Khavbovbo, mwama wule a di khuga a hongola a ya huweleya gipandreni gya Dhekapoli* satshavbo esi Jesu a mu giredego, vatshavbo va di hlamala.

21 Hwane nya gu ba Jesu a bwelede gambe wumbe tshatugo khu ngalava, a di randredwa khu vathu nya vangi; uye a di romo bambe nya yiphwa. 22 Gu di vboha moyo nya vathangeyi nya sinagoga nyo pwani khu Jayiro, tepo a nga wona Jesu, a di mu khidzimeya migondroni. 23 A di mu lomba khu guphindra-phindra, khuye: “Gyanana gyangu nya gyagadzyana gi ngu dwala ngudzu, nyi gireye wuhindzi u ta gi handzega mandza gasi gi hawuluga, gi vbanya.” 24 Khu kharato, Jesu a di hongola naye, a landrwa khu gitshungu nya gikhongolo nigu gi di gu mu gundra.

25 Gu diri ni nyamayi moyo a nga ba ari ni madwali nya gu dugeleye novba khu 12 myaga. 26 Uye a di gu tshanisekide ngudzu* mandzani nya vadhogodheya nya vangi a bwe a gastari dzitsapawu dzaye dzatshavbo, ganiolu kha hawuluga. Wulangani nya isoso, madwali ma di engedzeya. 27 Tepo a ngapwa esi vathu va nga ba va ganeya maningano ni Jesu, a di mu hidzimeleya khu hwane, vbakari nya gitshungu, a ya kuha sombo saye, 28 kholu a di gu dzi embeya, khuye: “Nya gu kuha basi sombo saye, nyi na hawuluga.” 29 Novba wu di dzegeya gu ema, apwa givili gyaye gu khuye a hawulugide madwali yale nyo garadze.

30 Jesu a di dzegeya gu tugula gu khuye gu dugide tshivba khavbo gwaye, khavbovbo a di thendregedza a wudzisa gitshungo, khuye: “Khu mani a nga kuha sombo sangu?” 31 Vapizane vaye va di mu embeya, khavo: “U ngu wona gu khuwe vathu nya vangi va gu gundrago, u nga gu wudzisa gu khuwe: ‘Khu mani a nga nyi khuha’”? 32 Ganiolu, Jesu a di gu khedza eno ni eno gasi gu wona gu khuye khu mani a nga mu kuha. 33 Nyamayi wule na gu ndrendremeya khu hwanga khu guti satshavbo si nga mu dugeleya, a di hidzimeleya Jesu, a ya mu khidzimeya a mu embeya lisine latshavbo. 34 Jesu a di mu embeya, khuye: “Mwanangu, gukhodwa gwago gu gu vbanyiside. Gimbiya khu gurula, u hawuluga madwali yoyo ma nga ba ma gu tshanisa.”

35 Na nga gu ganeya, gu di vboha vama nyo khaguri va nga ba vata khu gaya ga muthangeyi nya sinagoga, va ta khavo: “Gyanana gyago gi fude, khu ginani u nga gu garadzago Muhevbudzi?” 36 Jesu a dipwa esi va nga ba va ganeya, a embeya muthangeyi nya sinagoga, khuye: “U nga thavi, khodwa basi.” 37 Kha dzumeya gu khuye mumbe muthu a hongola naye; a di hongola basi ni Pedro, Jakobe ni Johane ndriye wa Jakobe.

38 Tepo va nga vboha ndrangani ga muthangeyi nya sinagoga, a di wona vathu na va gu gira ligwaha, vambe na va gu liya, vambe na va gu wombedzeya dzihuwa. 39 Tepo a nga beya a di va embeya, khuye: “Khu ginani mu liyago ni gu giredzeya ligwaha? Gyanana kha gyafa, gi di lala.” 40 Khu kharato, avo va di pheya gu mu hega. Ganiolu, hwane nya gu ba na rumide vatshavbo va duga, a di dzega papayi wa gyanana gile ni mamayi wagyo ni ava a nga ba ari navo, va beya omu gi nga ba gi romo gyanana gile. 41 Khavbovbo, a di phara libogo la gyanana gile a gi embeya, khuye: “Talita kumi,” si tshamuseyago gu khiso: “Nyamahegyane, nyi ngu gu embeya gu kheni: ‘Wuga!’” 42 Nyamahegyane wule a di dzegeya gu wuga a gimbiya. (Uye a diri ni 12 myaga.) Khu kharato, avo kha va kodza ni gu dzi phara khu gutsaka. 43 A di va laya khu guphindra-phindra khuye va nga ganeyi esi si nga girega a bwe a va ruma gu khuye va ninga guhodza nyamahegyane wule.

6 Jesu a di khuga khu vbale a hongola dhoropani gwaye nya mavelego, vapizane vaye va di mu landra. 2 Tepo yi nga vboha Sabhadho, a di pheya gu hevbudza sinagogani. Nya vangi va nga ba va mupwa, va di hlamala, khavo: “Mwama yoyu si hevbude hayi silo sesi? Khu ginani a nga ningwa guti gwatshavbo gogu nigu khu ginani a girago sisamadziso satshavbo sesi khu mandza yaye? 3 Ina khandruye oyu karipintero, gyanana gya Mariya, ndriye wa Jakobe, ni Josefa, ni Judha, ni Simoni? Vandriyaye nya vanyamayi khandravo hi gu navo avba?” Khu kharato, va di pheya gu tshunganeya* khu kotani yaye. 4 Khu kharato, Jesu a di va embeya, khuye: “Muprofeti a ngu zundzwa ni hayini, ganiolu kha zundzwi tigoni gwaye khu valongo vaye ni vandrangani gwaye.” 5 Khu kharato, uye kha gira gilewugiso ne gimwegyo, a di handzega basi mandza ga vadwali vadugwana, a va hawulugisa. 6 A di hlamala khu gu ba vathu vale va sa yeyedza gukhodwa. Uye a di gimbiya-gimbiya omu nya dzialidheya dza vbafuvbyana mule, a hevbudza.

7 A di rana ava nya 12,* a va rumeya vavili vavili, a va ninga tshivba nya gu tutumise madhimoni. 8 A di va embeya gu khuye va nga dongi gilo, va na donge basi ndronga; va nga dongi pawu, ne pasta nya dzimbuva, ne dzitsapawu, ne libhandri, 9 ganiolu, a di va embeya gu khuye va na ambale dzisandaliya nigu va nga dzegi sombo nya gu ya vbindrugedze. 10 A di va embeya gambe, khuye: “Ni yevbini ndranga mu na beyago, khalani avbovbo kala mu duga khu gipandreni gyogyo. 11 Nigu ni hayini mu na beyago va si mi hakhini mwendro gu mi engiseyani, tepo mu dugago, phuphuthani kudzudzwane migondroni gwanu, gasi si khala wufakazi gwawe.” 12 Khavbovbo, va di khuga va hongola. Va di gimbiya va tshumayela gu khavo vathu va yede gu vbindrugedza, 13 va tutumisa madhimoni nya mangi, va bwe va todza mafura vathu va nga ba va dwala, va va hawulugisa.

14 Pfhumu Herodhi a dipwa isoso, kholu vathu malangani yatshavbo va di gu ganeya khu Jesu, khavo: “Johane mubhabhatisi wusidwe khu gufani, khiso si mu girago a gira silewugiso nya sikhongolo.” 15 Ganiolu, vambe va di gu khavo: “Khu Eliya.” Nigu vambe gambe va di gu khavo: “Muprofeti a fanago ni moyo nya vaprofeti va gale.” 16 Tepo Herodhi a nga sipwa, a di khuye: “Johane, oyu nyi nga mu piya hungo, wusidwe.” 17 Kholu khuye a nga ruma gu khuye Johane a modwa, a hungeledwa pasoni, khu kotani ya Herodhiya, mwangadzi wa ndriyaye Filipi, kholu Herodhi a di tshadhide ni Herodhiya. 18 Johane a di gu embeya Herodhi, khuye: “Kha wu yeli gu dzega mwangadzi wa ndriyago.” 19 Khu kharato, Herodhiya a di gu mu vegede giviti nigu a di gu vbweta ndziya nya gu mu songe khiyo ganiolu a di gu yi hamuga. 20 Herodhi a diri ni githawo khu Johane, kholu a di gu dziti gu khuye muthu nya gululame a khozeyago Nungungulu, khu kharato a di gu mu vhikeya. Herodhi a di gu tsaka khu gu engiseya Johane, avba nya gu a gu mupwa na gu ganeya a di si giti ni gilo nya gu gire.

21 Ganiolu, li di vboha litshigu Herodhiya a nga tulegedwa khu ndziya. Tepo Herodhi a nga ba a tshanganisa myaga, a di gireya festa nya yikhongolo sithumi saye nya lisima, vathangeyi vaye nya masotshwa ni dzipfhumwana dzatshavbo dza Galileya. 22 Khavbovbo, gyanana nya gyagadzyana gya Herodhiya, gi di beya, gi pheya gu hana, gi tsakisa Herodhi ni vale va nga ba va hodza naye. Pfhumu Herodhi a di gi embeya, khuye: “Nyi lombe ni gevbini u gi vbwetago, nyi na gu ninga.” 23 Uye a di sambanya, khuye: “Ni gevbini u na nyi lombago nyi na gu ninga ambari wa gu lomba metadu nya mufumo wangu.” 24 Khavbovbo, gyagadzyana gile gi di duga gi ya wudzisa mamayi wagyo, khigyo: “Nyi lomba ginani?” Uye a di gi embeya, khuye: “Lomba hungo wa Johane mubhabhatisi.” 25 Gi di dzegeya gu duga gi tutuma gi hongola ga pfhumu Herodhi, gi ya khigyo: “Nyo vbweta gu kheni u nyi ninga hungo wa Johane mubhabhatisi, olu kamo, omu nya bhandeja.” 26 Ambari olu pfhumu Herodhi a nga garadzega ngudzu khu isoso, uye kha si kodza gu bomba gilombo gyaye, khu kotani nya sisambanyo saye ni vathu a nga ba a va ranide. 27 Khavbovbo, pfhumu Herodhi a di rumeya moyo nya lisotshwa nya ghadhi yaye, gasi li mu reseya hungo wa Johane. Li di hongola li ya mu piya hungo pasoni, 28 li resa hungo khomu nya bhandeja, li ta ningeya gyagadzyana, gyagadzyana gi ya ningeya mamayi wagyo. 29 Tepo vapizane va Johane va ngapwa isoso, va di ya dzega girumbi gyaye va ya gi dzinga thowoni.

30 Tepo vapostoli va nga wuya va di ta embeya Jesu satshavbo va nga gira ni esi va nga hevbudza. 31 Jesu a di va embeya, khuye: “Deluni, hongoleni wulanga gu gu mwalo muthu gasi hiya hefemula vbadugwana.” Kholu gu diri ni vathu nya vangi va nga ba va hongola ni gu wuya, khu kharato Jesu ni vapizane vaye va diri mwalo ne ni tepo nya gu hodze. 32 Khu kharato, va di khuga khu ngalava va hongola wulanga gu nga ba guri mwalo muthu gasi va ya khala vonga. 33 Ganiolu vathu va va wonide na va hongola nigu vathu nya vangi va dzitide. Va di duga khu madhoropani yatshavbo, va hongola iyoyo khu mawundru, va pheya khavo va vboha. 34 Tepo a nga ba a tshiga khu ngalavani, Jesu a di wona gitshungu nya gikhongolo, a gi pweya wusiwana, kholu gi di gu fana ni dzinvuta nya mba na muhavisi. A pheya gu gi hevbudza silo nya singi.

35 Tepo li nga pfola, vapizane vaye va di mu hidzimeleya, va ta mu embeya, khavo: “Wulanga wowu giwula nigu lipfode. 36 Va tshule va hongola dzimerkadhu va ya dzi rengeya gilo nyo hodze.” 37 Jesu a di va hlamula, khuye: “Va ningeni enu gilo nya gu hodze.” Va di mu wudzisa, khavo: “Hi ya renga dzipawu nya 200 dzidhenaryo* gasi hi ta ninga vathu va hodza?” 38 A di va wudzisa, khuye: “Dzipawu dzingani mu gu nadzo? Gimbiyani mu ya khedza!” Hwane nya gu ba va khedzide va di khavo: “Gu ni 5 dzipawu ni dzindzandzi dzimbili.” 39 A di ruma gu khuye vathu vatshavbo va khala khu mitsawa mwasini. 40 Khu kharato, avo va di khala khu mitsawa nya 100 ni 50. 41 Khavbovbo, a di dzega 5 dzipawu ni dzindzandzi dzimbili, a khedza ndzadzini a si kategisa. Khu hwane, a di pileleya dzipawu, a ninga vapizane vaye va kabaniseya vathu, a vbedza a kabaniseya dzindzadzi dzile dza dzimbili vatshavbo. 42 Vathu vatshavbo va di hodza va khura. 43 Va di hengeledzeya sipandre nya dzipawu si nga tshala va tadza 12 mirava, nya mba pata ni dzindzandzi. 44 Avo va nga hodza dzipawu gu diri 5000 vama.

45 Khavbovbo, nya mba hweya, uye a di ruma vapizane vaye va beya omu nya ngalava va ba va thanga va hongola wumbe tshatugo, khu ndziya yi hongolago Bhetisayidha, uye na ngo tshadzisana ni gitshungu. 46 Ganiolu, hwane nya gu tshadzisane navo, a di hongola gigomoni gasi guya gombeya. 47 Tepo li nga pfola ngalava yi diri vbakari nya mati, ganiolu Jesu a diri enga funguni. 48 Tepo a nga wona gu khuye si di gu va garadzeya gu dzuwa makasiya khu kotani nya phuvbo, a di va yela khu mambagugya,* na gu gimbiya khu vbatshani nya mati. Ganiolu, a di gira khatshi o hadzi gu va vbindra. 49 Tepo va nga mu wona na gu gimbiya khu vbatshani nya mati va di khavo: “Gikono!” Va womba dzihuwa. 50 Kholu tepo va nga mu wona vatshavbo va di thava. Ganiolu, uye a di dzegeya gu va embeya, khuye: “Tiyani hwambo! Mu nga thavi; kheni!” 51 A di beya ngalavani va nga ba va romo, phuvbo yi ema. Khu kharato, va di hlamala ngudzu 52 kholu kha va nga ba va wu pwisiside tshamuselo nya dzipawu a nga kabaniseya; mapimo yawe ma di ngo segegide.

53 Tepo va nga tshatuga, va di vboha Genezare; va rikisa avbo ngalava. 54 Ganiolu, gu duga va nga duga khomu nya ngalava, vathu va di dzegeya gu muti Jesu. 55 Va di gimbiya va embedzeya vathu va gipandreni mule, khavbovbo avo va di rwala vadwali khomu nya sikamana* va va vbwegedza ni hayini a nga ba a romo Jesu. 56 Gwatshavbo a nga ba a beya, gani khomu nya dzialidheya, gani madhoropani, mwendro vbavbandze nya madhoropa, va di gu vega vadwali omu nya dzimerkadhu, va lomba gu khavo va kuha matshakafula nya sombo sa Jesu. Vatshavbo va nga ba va si kuha va di gu hawuluga.

7 Vafarisi nyo khaguri ni valovi va nga ba vata khu Jerusalema va di ya mu randreya. 2 Avo va di wona vapizane vaye nyo khaguri na va gu hodza khu mandza nya mba handzega, si thulago gu khiso nya mba hamba mandza.* 3 (Kholu Vafarisi ni Vajudha vatshavbo kha va nga ba va hodza nya mba hamba mandza kala omu nya dzikhingimidzi dza mawogoni, khu gulandreya giolovedzo gya vakokwe vawe. 4 Nigu tepo va wuyago khu merkadhu kha va hodzi na va si gu dzi agisi khu mati. Gu na ni simbe siolovedzo sa gale va simamago gu si landrisa, nya nga gu pheya khu gu nega* matini sombo nya nga dzikopo, dzijaru ni sombo nya kobre, na va si gu si thumisi.) 5 Khu kharato, Vafarisi vale ni valovi va di mu wudzisa, khavo: “Khu ginani vapizane vago va si landrisigo tumbunugo wa gale, ganiolu va hodza khu mandza nya mba handzega?” 6 Jesu a di va embeya, khuye: “Isaya a di gu profeta maningano ni enu, vapfhadzedzeyi nenu, kha nga si lovidwego gu pwani: ‘Vathu vava va gu nyi ninga githawo khu likana basi, ganiolu myonyo yawe yomo hwindzo ngudzu ni eni. 7 Kha si phasi gilo gu va simama va nyi khozeya kholu milayo va hevbudzago khya vathu.’ 8 Mwa gu diga gu landra milayo ya Nungungulu, mu landrisa siolovedzo nya vathu.”

9 A bwe a va embeya, khuye: “Mu ngu kodza gwadi gu vega nayo wa Nungungulu khu phuvbo, gasi mu feya gu landrisa siolovedzo sanu. 10 Khu giyeyedzo, Mosi a di khuye: ‘Ninga githawo papayi wago ni mamayi wago’ nigu ‘oyu a ganeyago guvivba* khu papayi waye ni mamayi waye, yede gu songwa.’ 11 Ganiolu, enu mwari khenu: ‘Oyu a embeyago papayi waye ni mamayi waye, khuye: “Satshavbo nyi gu naso nyi nga ba nyi yede gu mi phasa khiso: korobani, (si thulago gu khiso giningwa nyi gi ningedego ga Nungungulu),”’ 12 kha mu mu dzumeleyi gambe gu a gireya ne gilo nya gidugwana papayi waye mwendro mamayi waye. 13 Khu kharato, enu mwa gu tshipisa lito la Nungungulu khu kotani nya tumbunugo wanu nigu mu ngu gira silo nya singi nya nga esi.” 14 Khavbovbo a di rana gambe gitshungu a gi embeya, khuye: “Engisani enu mwatshavbo, mu bwe mu pwisisa gwadi esi: 15 gimwalo gi beyago ndrani nya muthu gi mu nyenyezisago, ganiolu esi si dugago khu ndrani nya muthu khiso si mu nyenyezisago.” 16 *——

17 Tepo a nga hambana ni gitshungu a beya ndrangani, vapizane vaye va di pheya gu mu gira siwudziso maningano ni gipimaniso. 18 Khavbovbo, a di va wudzisa, khuye: “Anenu mu si gu si pwisisi nga avo? Kha mu dziti gu khenu gimwalo gi beyago ndrani nya muthu gi kodzago gu mu nyenyezisa, 19 kholu kha gi beyi monyoni gwaye ganiolu gya gu beya ndrani, gi hegisa gi hongola gikoti?” Khu kharato, a di khuye satshavbo silo nya gu hodze si agide. 20 Khavbovbo, a di khuye: “Egi gi dugago khu ndrani nya muthu khigyo gi mu nyeyezisago. 21 Kholu khu myonyoni nya vathu gu ngu duga mihingigedzo nya guvivbe: Wubhayi,* wuvafa, wughevenga, 22 gu mba tumbega ga mwangadzi wago mwendro ga mwama wago,* wudogodogo, mithumo nyo vivbe, wukanganyisi, mavbanyelo nya dzitshoni,* lidiwo,* guvaleteya, gudzikhusedza ni wupumbu. 23 Silo satshavbo sesi nya guvivbe sa gu duga khu ndrani nigu khiso si nyenyezisago muthu.”

24 A di khuga khu vbale a hongola Tiro ni Sidhoni, tepo a nga vboha iyoyo a di ya beya ndrangani nyo khaguri. Kha nga ba a vbweta gu khuye a tidwa khu muthu, ganiolu kha sa kodzega gu mba tugudwa. 25 Khu gitepwana gile, nyamayi moyo a nga ba ari ni gyanana nya gyagadzyana gi nga ba giri ni liphuvbo nya guvivbe,* a dipwa na gu ganedwa khu Jesu, khu kharato a di hongola a ya mu khidzimeya migondroni gwaye. 26 Nyamayi yoyu a diri Mugreki wa Fenisiya ga Siriya nigu uye a di gu lomba Jesu khu guphindra-phindra gasi a tutumisa lidhimoni li nga ba li romo ga gyanana gyaye. 27 Ganiolu, uye a di mu embeya, khuye: “Diga sanana si khura gupheya, kholu kha gu yeli gu dzega guhodza nya sanana gu ningwa simbwana.” 28 Ganiolu, nyamayi wule a di mu hakha, khuye: “Ina Pfhumu, ganiolu simbwana si ngu roledzeya guhodza gu thesedwago khu sanana vbavbatshi nya meza.” 29 Khu kharato, Jesu a di mu hlamula, khuye: “Khu kotani nya esi u nga hlamula, gimbiya; lidhimoni li dugide ga gyanana gyago.” 30 Khavbovbo, nyamayi wule a di khuga a hongola gaya, a ya mana gyanana gyaye na gi lade vbakamatunu, lidhimoni na li dugide.

31 Tepo Jesu a nga wuya khu Tiro, a di vbindra khu Sidhoni, a hongola yiphwani ya Galileya a vbindra khu Dhekapoli.* 32 Iyoyo va di mu reseya mwama a nga ba ari givbwiri ni gu mba kodza gu ganeya gwadi, va lomba Jesu gu khavo a mu handzega mandza. 33 Khavbovbo, a di dzega mwama wule, a khuga naye khu vbakari nya vathu, a ya bedza dzinyala dzaye omu nya dzindzeve dza mwama wule, a hetsha a vbedza a mu kuha lidimi, 34 a khedza ndzadzini a hefemula khu tshivba a mu embeya, khuye: “Efatá,” si thulago gu khiso “tulega.” 35 Khu gitepwana gyogyo, dzindzeve dzaye dzi di tulega, gigaradzo gyaye, nya gu mba kodza gu ganeya gwadi, gi vbindra, a pheya gu ganeya gwadi. 36 Khavbovbo, a di va laya gasi va si embeyi muthu esi si nga girega, ganiolu tepo a nga ba a va laya khu guphindra-phindra gasi va si ganeyi, avo va di gu engedzeya gu huweleya esi si nga girega. 37 Khu lisine, avo va di hlamala ngudzu, va ganeya, khavo: “Uye a ngu gira gwadi silo satshavbo. A gu gira ni sivbwiri sipwa ni sidudu si ganeya.”

8 Matshigoni yale, gu di tshangana gambe gitshungu nigu gi diri mwalo gilo nya gu hodze. Khu kharato, a di tshanganisa vapizane vaye a va embeya, khuye: 2 “Nyi ngu va pweya vathu vava, kholu va na ni matshigu mararu na vari ni eni nigu va mwalo gilo nya gu hodze. 3 Nya gu va diga va hongola gaya ni ndzala, va na thega khu ndziya nigu vambe vakone va guta khu hwindzo.” 4 Ganiolu, vapizane vaye va di mu wudzisa, khavo: “Hi na dzi mana hayi dzipawu nyo khurise vathu vatshavbo vava giwulani momu?” 5 Khu kharato, a di va wudzisa gu khuye: “Dzipawu dzingani mu gu nadzo?” Va di mu hlamula, khavo: “Hi na ni 7 nya idzo.” 6 A di ruma gu khuye vathu vatshavbo va khala vbavbatshi. Khavbovbo, a di dzega dzipawu dzile nya 7, a bonga, a dzi pileleya, a dzi ningeya ga vapizane vaye, avo va di dzega va kabaniseya vathu. 7 Gu diri ni sindzandzyana gambe. Hwane nya gu bonge a di ruma gambe gu khuye va si kabaniseya. 8 Khu kharato, vatshavbo va di hodza va khura, va roledzeya esi si nga ba si tshade va tadza 7 mirava* nya yikhongolo. 9 Gu diri ni tanga nya 4000 vama. Khavbovbo a di va diga va hongola.

10 Uye a di dzegeya gu beya ngalavani ni vapizane vaye, va hongola gipandreni gya Dhalimanuta. 11 Iyoyo va di vboha Vafarisi, va ta pheya gu ganedzisana naye, va mu linga khu gu khavo a na va yeyedze giwoniso gya ndzadzini. 12 Khu kharato, a di garadzega ngudzu monyoni, a va embeya, khuye: “Khu ginani gitugulwana gegi gi vbwetago giwoniso? Khu lisine nyi ngu mi embeya, kheni: Gimwalo giwoniso gi na ningwago gitugulwana gegi.” 13 Khavbovbo, a di va tshiya, a beya ngalavani a hongola gumbe tshatugo.

14 Ganiolu, vapizane va di divade gu dzega dzipawu nigu va diri mwalo gimbe gilo ngalavani, va diri ni pawu mweyo basi. 15 Jesu a di va embeya, khuye: “Gengeyani! Dzi woneyeni ni livhirina nya Vafarisi ni ya Herodhi.” 16 Khavbovbo, va di pheya gu ganedzisana khu gyawe kholu va nga ba vari mwalo dzipawu. 17 Tepo a nga va tugula, Jesu a di va embeya, khuye: “Khu ginani mu ganedzisanago khu kotani nya olu mu gu mwalo dzipawu? Mu si gu si pwisisi esi nyi vbwetago gu mi embeya? Ina myonyo yanu yi nga si tulegi, gasi gu si pwisisa? 18 ‘Ambari olu mu gu na ni maho, kha mu woni; mu na ni dzindzeve ganiolu kha mupwi?’ Kha mu dundrugi gu khenu 19 mirava mingani mu nga tadza khu sipandre si nga tshala tepo nyi nga kabanisa 5 dzipawu gasi gu ninga 5000 vama?” Avo va di khavo: “Hi tadzide 12 nya iyo.” 20 “Ahati tepo nyi nga kabaniseya 7 dzipawu gasi gu ninga 4000 vama, mirava* yingani nya yikhongolo yi nga tala khu sipandre mu nga roleya?” Avo va di khavo: “Hi tadzide 7 nya iyo.” 21 Khavbovbo a di va wudzisa, khuye: “Mu si gu si pwisisi?”

22 Khavbovbo, va di vboha Bhetisayidha, avbovbo va di mu reseya gikhumu, va mu lomba gu khavo a gi kuha. 23 Uye a di phara gikhumu gile khu libogo a duga nagyo vbavbandze nya alidheya. Hwane nya gu mu hetsheye mahoni, a di mu handzega mandza a mu wudzisa, khuye: “U ngu wona gilogyo?” 24 Mwama wule a di khedza vbatshani, khuye: “Nyo wona vathu na va gu khatshi misimbo yi gimbiyago.” 25 A di mu kuha gambe maho khu mandza yaye, mwama wule a hawuluga. Gigaradzo gyaye nya maho gi di vbindra, a pheya gu wona gwadi. 26 Khavbovbo, a di mu ruma gu hongola gaya, a bwe a mu embeya, khuye: “U nga beyi omu nya alidheya.”

27 Jesu ni vapizane vaye va di khuga khu vbale va hongola Sezareya ga Filipi. Ganiolu ndziyani a di wudzisa vapizane vaye, khuye: “Vathu vari khavo kheni mani?” 28 Va di mu hlamula, khavo: “Vomo va gu khavo khuwe Johane Mubhabhatisi, ganiolu vambe vari khavo khuwe Eliya, vambe gambe vari khavo u moyo nya vaprofeti.” 29 Uye a di va wudzisa, khuye: “Enu ke, mwari khenu kheni mani?” Pedro a di mu hlamula, khuye: “Uwe khuwe Kristo.” 30 Khu kharato, a di va laya khuye va nga embeyi muthu isoso. 31 A di pheya gambe gu va hevbudza gu khuye Gyanana nya muthu gi yede gu tshaniswa ngudzu, gi nyenywa khu madhota ni vaprista nya vakhongolo ni valovi nigu gi yede gu songwa, gi wuswa hwane nya matshigu mararu. 32 Uye a di ganeya isoso na pwidwa khu vatshavbo. Ganiolu, Pedro a di duga naye khu phuvbo a ya mu kawuka. 33 Khu kharato, a di dzuluwuga a khedza vapizane, a kawuka Pedro, khuye: “Khuga khavba, Sathane! Kholu mapimo yago khandri ya Nungungulu ganiolu khya vathu.”

34 Jesu a di rana gitshungu gumogo ni vapizane vaye, a va embeya, khuye: “Oyu a vbwetago gu nyi landreya, a na dzi dige, a rwala simbo waye nya tshanisa* a simama gu nyi landreya. 35 Kholu oyu a vbwetago gu vbulugisa womi waye a na wu luza, ganiolu ni wevbini a luzago womi waye khu kotani yangu ni mahungu nya yadi, a na wu mana. 36 So phasa ginani gu muthu a mana litigo latshavbo, ganiolu a luza womi waye? 37 Ginani egi muthu a na gi ningeyago gasi gu vbulugisa womi waye? 38 Kholu ni wevbini a khalago dzitshoni khu gu khala mupizane wangu ni gu khodwa mahungu yangu vbakari nya vathu vava nya gu mba tumbega ni sighohi, Gyanana nya muthu nigyo gi na ta mu khaleya dzitshoni tepo gi na tago khu wudhumo wa Papayi wagyo ni dzingilozi nya guage.”

9 A di va embeya gambe, khuye: “Khu lisine nyi ngu mi embeya gu kheni: Vomo va gomogo avba va na gu mba linga gufa na va si gu woni Mufumo wa Nungungulu na wuta khu tshivba.” 2 Hwane nya 6 matshigu, Jesu a di rana Pedro, Jakobe ni Johane a hongola navo gigomoni nya gulaphe. Uye a di vbindrugedza mahoni gwawe. 3 Sombo saye si di pheya gu khedziga* nya gu mwalo muthu mafuni a handzago sombo a nga hadzi gu si kodza gu si agisa khu ndziya yoyo. 4 Gu di wonega Eliya ni Mosi nigu avo va di gu bhula ni Jesu. 5 Khavbovbo, Pedro a di embeya Jesu, khuye: “Rabi, si ngu tsakisa gu khala avba. Hongoleni hi tsitsa matendra mararu, limwedo lago, limwedo la Mosi ni limbe la Eliya.” 6 Khu lisine, kha nga ba a giti gilo nyo gire, kholu va di gu thava ngudzu. 7 Gu di duga lipfhi li va fenengedza, gu pwala lito khomu nya lipfhi na li gu khilo: “Egi Gyanana gyangu nyi gi haladzago, gi engiseni.” 8 Khavbovbo, va di khedza dzibambe, kha va wona mumbe muthu, va di wona Jesu basi.

9 Tepo va nga ba va tshiga khu gigomoni, Jesu a di va embeya gu khuye va nga embeyi muthu esi va si wonidego, kala Gyanana nya muthu gi wuswa khu ga vafudego. 10 Va di engisa malito yaye,* ganiolu va di gu wudzisana khu gyawe gu khavo so thula ginani gu uye a wuswa khu ga vafudego. 11 Va bwe va mu wudzisa gu khavo: “Khu ginani valovi va ganeyago gu khavo Eliya yede gu pheya khuye ata?” 12 Uye a di va embeya, khuye: “Eliya a na pheya khuye ata nigu a nata wusedza silo satshavbo. Ganiolu, khu ginani gu lovidwego gu pwani: Gyanana nya muthu gi yede gu tshaniseka khu dzindziya nya dzingi gi bwe gi nyenywa. 13 Ganiolu, nyi ngu mi embeya gu kheni: Khu lisine, Eliya dzude nigu va mu giride ni gevbini va nga gi vbweta kha nga si lovidwego maningano naye.”

14 Tepo va nga vboha avbo va nga ba va romo vapizane, va di wona vathu nya vangi na va va randrede ni valovi va nga ba va ganedzisana navo. 15 Tepo vathu vale va nga wona Jesu, va di hlamala va tutuma va mu yela gasi gu ya mu losa. 16 Khavbovbo, a di va wudzisa, khuye: “Ginani mu ganedzisanago khigyo navo?” 17 Moyo nya vathu vale a di mu hakha, khuye: “Muhevbudzi, nyi di va reseya gyanana gyangu nya gikhwathana kholu gi na ni liphuvbo li gi girago gi si ganeyi. 18 Ni hayini li gi manago, la gu gi thesa vbavbatshi, gi pupuma liguvi khu kanani, gi khukhuruseya magwaha gi bwe gi vbeya tshivba. Nyi lombide vapizane vago gasi va tutumisa liphuvbo leli, ganiolu kha va li kodza.” 19 Uye a di va hakha, khuye: “Enu gitugulwana nya mba khodwa, nyi na khala nanu kala lini? Nyi na mi timiseya kala lini? Gi reseni eno.” 20 Khu kharato, va di gi yisa gwaye. Tepo liphuvbo lile li nga wona Jesu, li di thesa gikhwathana gile vbavbatshi khu gitshira, gi kuya na gi gu pupuma liguvi khu kanani. 21 Khu kharato, Jesu a di wudzisa papayi wagyo, khuye: “Si mu phede lini esi?” Papayi wakona a di hlamula, khuye: “Gu khugeya wananani waye, 22 nigu gutala nya dzitepo liphuvbo leli la gu mu thesa niloni ni matini gasi gu mu songa. Wa gu si kodza gu gira gilogyo, hi pweye wusiwana u hi phasa.” 23 Jesu a di mu hakha, khuye: “Wari khuwe wa gu si kodza? Satshavbo si ngu kodzega ga wule a gu na ni gukhodwa.” 24 Papayi wa gikhwathana gile a di dzegeya gu khuye: “Nyi ngu khodwa! Nyi phase gu engedzeya gukhodwa gwangu!”

25 Tepo Jesu a nga wona gu khuye gu ngu vboha vathu nya vangi khu guvbiredza, a di kawuka liphuvbo lile nya gu vivbe,* khuye: “Liphuvbo wewe nya gidudu ni givbwiri, nyi ngu gu ruma gu kheni: Duga khu ga gikhwathana gyogyo nigu u nga wuyi gambe u ta beya gwagyo!” 26 Hwane nya gu na li wombide huwa ni gu thesa gikhwathana gile khu gitshira, liphuvbo lile li di duga, gikhwathana gile gi gira khatshi gi difa nyo bwe vathu nya vangi va ganeya, khavo: “Gi fude!” 27 Ganiolu, Jesu a di gi phara khu libogo a gi wusa gi khuga gi ema. 28 Khavbovbo, hwane nya gu ba Jesu na bede nyumbani, vapizane va di mu wudzisa na vari vonga, khavo: “Khu ginani ethu hi nga tandrega gu li tutumisa?” 29 Jesu a di va hlamula, khuye: “Liphuvbo nya lifumbo leli, lo duga basi khu nombelo.”

30 Va di khuga khu vbale va hongola Galileya, ganiolu kha nga ba a vbweta gu khuye si tidwa khu muthu, 31 kholu a di gu hevbudza vapizane vaye nigu a di gu va embeya gu khuye: “Gyanana nya muthu gi na ningedwa mandzani nya vathu nigu avo va na gi songa, ganiolu ambari olu gi na songwago gi na wuswa hwane nya matshigu mararu.” 32 Ganiolu kha va nga ba va si pwisisa esi a nga ba a ganeya nigu va di gu thava gu mu wudzisa.

33 Va di vboha Kafarinawume, tepo va nga ba va romo nyumbani a di va wudzisa gu khuye: “Mu di gu ganedzisana khu ginani ndziyani?” 34 Avo va di degula kholu ndziyani va di gu ganedzisana khu gu khavo khu mani a gu khongolo vbakari gwawe. 35 Khavbovbo a di khala, a rana ava nya 12 a va embeya, khuye: “Oyu a vbwetago gu khala nya gu pheye yede gu khala nya gu hegisa ga vatshavbo a bwe a thumeya vatshavbo.” 36 A di dzega gyanana a gi vega vbakari gwawe, a gi wugareya a va embeya, khuye: 37 “Oyu a hakhago gimwegyo nya sanana sesi khu lina langu, a ngu nyi hakha neni nigu oyu a nyi hakhago, kha hakhi eni basi, ganiolu a gu hakha ni Wule a nyi rumedego.”

38 Johane a di mu embeya, khuye: “Muhevbudzi, hi wonide muthu na gu tutumisa madhimoni khu lina lago, hi zama gu mu himbedzeya kholu kha nga ba a gimbiya-gimbiya ni ethu.” 39 Ganiolu, Jesu a di khuye: “Mu nga zami gu mu himbedzeya kholu mwalo a girago silewugiso* khu lina langu a vbedza a dzegeya gu ganeya guvivba kheni. 40 Kholu oyu a si hi wugeyigo a gu ema ni ethu. 41 Nigu khu lisine nyi ngu mi embeya gu kheni: Ni wevbini a na mi ningago kopo nya mati gasi gu seya khu gu ba mu lumba Kristo, gima kha na nga dzimeledwa khu tshatshazelo waye. 42 Ganiolu, oyu a tshunganisago moyo nya ava nya vadugwana va gu ni gukhodwa, gu diri tshukwana gu a hungeledwa giwindri* nya gikhongolo thamoni gwaye a rikiswa linene.

43 “Libogo lago la gu tshuka li gu tshunganisa, li piye, kholu tshukwana gu beya womini na wuri gilima guvbindra gu beya Gehena* niloni si si kodzegigo gu wu tshima na wuri ni mawogo yago ya mavili. 44 *—— 45 Nigu la gu tshuka litundru lago li gu tshunganisa, li piye, kholu tshukwana gu beya womini na wu gu ndzodola guvbindra gu rinywa Gehena ni mawundru yago ya mavili. 46 *—— 47 Nigu liso lago la gu tshuka li gu tshunganisa, li duse u li dzudzuga hwindzo kholu tshukwana gu beya Mufumoni wa Nungungulu ni liso limwedo guvbindra gu rinywa Gehena* ni maho yago ya mavili, 48 omu siwungu si si figo; nilo wu si tshimegigo.

49 “Kholu muthu watshavbo yede gu lungwa khu munyu wu fanago ni nilo. 50 Munyu khwadi, ganiolu wa gu pusa si na kodzega kharini gu bwe wu pwala gambe? Manegani ni munyu, mu vbanya khu gurula ni vambe.”

10 Jesu a di khuga khu vbale a hongola mivbinganoni ya Judheya, khu gumbe tshatugo ga Joridhani. A di randredwa gambe khu vathu nya vangi. Kha nga giolovedzo gyaye, a di pheya gambe gu va hevbudza. 2 Vafarisi nyo khaguri va di mu hidzimeleya na va vbweta gu mu linga, va mu wudzisa gu khavo si ngu dzumeledwa gu mwama a tshula mutshadho ni mwangadzi waye gani? 3 Uye a di va hakha, khuye: “Mosi a di khuye ginani?” 4 Avo va di khavo: “Mosi dzumelede gu khuye mwama a lova lidangaliya nya gu tshule mutshadho ni mwangadzi waye, a bwe a mu tutumisa.” 5 Ganiolu, Jesu a di va embeya, khuye: “Mosi a mi ningide nayo wowo khu kotani nya gu lemeye nya myonyo yanu. 6 Kholu gukhugeya gupheyani nya gu vangwe nya silo ‘Uye a di va gira mwama ni nyamayi. 7 Khu gighelo gyogyo, mwama a na tshiya papayi waye ni mamayi waye, 8 nigu va vavili va na khala nyama mweyo,’ kha vari vavili gambe, ganiolu nyama mweyo. 9 Khu kharato, esi Nungungulu a si hungidego, si nga tshudwi khu muthu.” 10 Tepo va nga ba va romo gambe nyumbani, vapizane va di mu gira siwudziso maningano ni isoso. 11 Uye a di va embeya khuye: “Ni wevbini a tshulago mutshadho ni mwangadzi waye a tshadha ni mumbe nyamayi, a gu gira wubhayi, a ghoheya mwangadzi waye, 12 nigu nyamayi a gu diga mwama waye a ya tshadha ni mumbe mwama, a gu gira wubhayi.”

13 Vathu va di pheya gu mu reseya sanana gasi a ta si handzega mandza a si kategisa, ganiolu vapizane va di pheya gu va kawuka. 14 Tepo Jesu a nga wona isoso, kha sa mu tsakisa. Khu kharato, a di va embeya, khuye: “Digani sanana sita gwangu, mu nga zami gu si himbedzeya, kholu Mufumo wa Nungungulu wa gu lumba vathu nya gu fane naso. 15 Khu lisine nyi ngu mi embeya gu kheni: Oyu a si hakhigo Mufumo wa Nungungulu nga gyanana, kha na nga beya gwawo.” 16 A di dzega sanana a si wugareya, a si handzega mandza a si kategisa.

17 Tepo a nga ba a hongola, gu dita mwama moyo na gu tutuma a ta mu khidzimeya, a mu wudzisa, khuye: “Muhevbudzi nya wadi, ginani nyi yedego gu gira gasi nyi mana womi nya gupindruge?” 18 Jesu a di mu hlamula, khuye: “Khu ginani u nyi ranago nya wadi? Uye a gu wadi khu Nungungulu basi. 19 U ngu yiti milayo yeyi: ‘U nga songi, u nga giri wubhayi, u ngabi, u nga ningeyi wufakazi nya malipha, u nga kanganyisi, ninga githawo papayi wago ni mamayi wago.’” 20 Mwama wule a di embeya Jesu, khuye: “Muhevbudzi, eni nyi ngu gira satshavbo soso gukhugeya wuphyani wangu.” 21 Jesu a di mu khedza, a tsakiswa khuye, a mu embeya, khuye: “Wa gu keneledwa khu gilo gimwegyo basi: Gimbiya u ya rengisa satshavbo u gu naso, u dzega dzitsapawu dzakone u ninga sisiwana, u na mana thomba ndzadzini, khavbovbo delu u ta nyi landreya.” 22 Ganiolu, uye kha tsakiswa khu hlamulo a nga ningwa. A di khuga a hongola na swihade, kholu a diri ni dzithomba nya dzingi.

23 Hwane nya gu khedze eno ni eno, Jesu a di embeya vapizane vaye, khuye: “Edzi si na garadzago khidzo gu ava va gu ni dzitsapawu va beya Mufumoni wa Nungungulu!” 24 Ganiolu, vapizane va di hlamala ngudzu khu malito yaye, khu kharato, Jesu a di va embeya, khuye: “Vanavangu, si ngu garadza gu beya Mufumoni wa Nungungulu! 25 Si ngu vbevbuga gu kamelo yi vbindra khu vbagihogotunu nya tshingano guvbindra gu muthu nya gu ghanye a beya Mufumoni wa Nungungulu.” 26 Avo va di engedzeya gu hlamala, va mu wudzisa,* khavo: “Khu mani a na vbulugiswago?” 27 Jesu a di va khedza, a va embeya, khuye: “Ga vathu kha si kodzegi, ganiolu ga Nungungulu si ngu kodzega, kholu ga Nungungulu satshavbo si ngu kodzega.” 28 Pedro a di mu embeya, khuye: “U ngu wona, hi digide satshavbo hi gu landreya.” 29 Jesu a di va hakha, khuye: “Khu lisine nyi ngu mi embeya gu kheni: Mwalo a nga diga ndranga, vandriyaye nya vama, vandriyaye nya vanyamayi, mamayi, papayi, sanana ni mathembwe khu kotani yangu ni mahungu nya yadi 30 a na gu mba hakha guvbindra 100 dzitepo olu, dzinyumba, vandriye nya vama ni vandriye nya vanyamayi, vamamayi, sanana ni mathembwe gumogo ni dzitshanisa ni womi nya gupindruge tepo yi tago. 31 Ganiolu, nya vangi va gu va nya gu pheya va na khala vamahegiseya, ava va gu vamahegiseya va na khala va nya gu pheya.”

32 Tepo va nga ba va romo ndziyani na va gu hongola Jerusalema, Jesu a di gu thangide mbeli gwawe nigu avo va di gu hlamala, ganiolu ava va nga ba va va landreya va di gu thava. A di rana gambe ava nya 12 khu phuvbo a pheya gu va embeya esi si nga hadzi gu mu dugeleya, khuye: 33 “Mu ngu wona, olu ha gu hongola Jerusalema, iyoyo Gyanana nya muthu gi na ya ningedwa ga vaprista ni valovi. Avo va na ya khavo a na songwe nigu va na mu ningeya ga vanyamayigo. 34 Avo va na ya mu poyila, va mu hetsheya, va mu kwamula va mu songa, ganiolu hwane nya matshigu mararu a na wuswa.”

35 Jakobe ni Johane, sanana sa Zebhedhewu, va di mu hidzimeleya, va ya khavo: “Muhevbudzi, ha gu vbweta gu khethu u hi gireya esi hi na gu lombago.” 36 Jesu a di va wudzisa gu khuye: “Ginani mu vbwetago gu khenu nyi mi gireya?” 37 Avo va di mu hlamula, khavo: “Hi dzumeleye gu khuwe moyo a khala nyamudye gwago mumbe a khala khu nyambade gwago, wudhumoni gwago.” 38 Ganiolu, Jesu a di va embeya, khuye: “Kha mu giti egi mu gi lombago. Ina mu na si kodza gu seya kopo nyi seyago mwendro gu bhabhatiswa khu bhabhatiso nyi bhabhatiswago khuwo?” 39 Va di mu hakha, khavo: “Ina.” Khu kharato, Jesu a di va embeya, khuye: “Khu lisine mu na seya kopo nyi seyago ni gu bhabhatiswa khu bhabhatiso nyi bhabhatiswago khuwo. 40 Ganiolu, kha si lumbi eni gu mi dzumeleya gu khala nyamudye gwangu mwendro nyambade gwangu, malanga yaya ma gu lumba vale va dongisedwego ayo.”

41 Tepo vale nya 10 va ngapwa isoso, va di sola Jakobe ni Johane. 42 Ganiolu, Jesu a di va rana a va embeya, khuye: “Mu ngu dziti gu khenu vale va wonegago nga khatshi dzipfhumu nya mayigo va ngu lemedziseya giemo vale va va fumeyago nigu vakhongolo vawe va gu va fuma. 43 Enu mu nga girini kharato, ganiolu oyu a vbwetago gu khala khongolo vbakari gwanu a na khale githumi gyanu. 44 Nigu oyu a vbwetago gu khala nya gupheye vbakari gwanu, a na khale gumbi ya vatshavbo. 45 Kholu ambari Gyanana nya muthu kha gya teya gu ta thumedwa, ganiolu gu ta thumeya ni gu ningeya womi wagyo gasi gu dzegisa nya vangi.”

46 Khu kharato, avo va di beya Jeriko, ganiolu tepo uye ni vapizane vaye ni gitshungu nya gikhongolo ngudzu va nga duga khu Jeriko, Bharitimewu, gyanana gya Timewu, gisiwana* gi nga ba giri gikhumu, a di khade bambe nya ruwa. 47 Tepo a ngapwa gu pwani khu Jesu wa Nazareta, a di khusedza lito a ganeya, khuye: “Jesu, Gyanana gya Dhavhidhe, nyi pweye wusiwana!” 48 Vathu nya vangi va di pheya gu mu kawuka, va ganeya gu khavo a na degule, ganiolu uye a di engedzeya gu khusedza lito, khuye: “Gyanana gya Dhavhidhe, nyi gireye wuhindzi!” 49 Khavbovbo, Jesu a di ema a ganeya, khuye: “Mu raneni.” Avo va di rana gikhumu gile va gi embeya, khavo: “U nga thavi! Khuga u ema, uye a ngu gu rana.” 50 A di dzudzuga gifenengelo gyaye, a khuga a ema khu guvbiredza, a hongola ga Jesu. 51 Khavbovbo, Jesu a di mu wudzisa, khuye: “Wa gu vbweta gu khuwe nyi gu gireya ginani?” Gikhumu gile gi di mu hlamula, khigyo: “Raboni,* nyi hawulugise maho.” 52 Jesu a di mu embeya, khuye: “Gimbiya. Gukhodwa gwago gu gu vbanyiside.” Uye a di dzegeya gu pheya gu wona, khavbovbo a patana ni gitshungu a landreya Jesu.

11 Na vari Gigomoni nya Miolivha, gipandreni gya Bhetifage ni Bhetaniya, vbafuvbi ni gu vboha Jerusalema, Jesu a di rumeya vapizane vaye vavili, 2 a va embeya, khuye: “Gimbiyani omu nya alidheya mu yi wonago khavba, mu na ya mana giburwana na gi hungidwe, gi si gu khiledwigo khu muthu. Gi tshuleni muta nagyo. 3 A gu tshuka muthu nyo khaguri a mi wudzisa gu khuye: ‘Khu ginani mu girago isoso?’ ganeyani gu khenu: ‘Pfhumu ya gu gi vbweta, yi na gi resa nya mba hweya.’” 4 Va di khuga va hongola, va ya mana giburwana gi nga ba gi hungidwe vbalidimbatunu nya nyumba yi nga ba yi romo vbafuvbi ni ruwa, va gi tshula. 5 Ganiolu, vambe va nga ba va romo vbale va di va wudzisa, khavo: “Ginani mu girago? Khu ginani mu tshulago giburwana?” 6 Va di va embeya esi Jesu a nga va ruma gu va embeya. Avo va di va diga va hongola.

7 Va di resa giburwana gile ga Jesu, va dzega sombo sawe va ladzeleya vbatshani gwagyo, Jesu a khileya. 8 Vambe va di ladzeleya sombo sawe ndziyani, vambe va fanya migindru. 9 Avo va nga ba va thangide ni ava va nga ba va tshade khu hwane va di gu khusedza lito, khavo: “Nungungulu hi ngu gu lomba, vbulugisa Gyanana gya Dhavhidhe! Kategide wule a tago khu lina la Jehovha! 10 Wu kategide Mufumo wu tago wa papayi wathu Dhavhidhe! Nungungulu, hi ngu lomba, mu vbulugise, uwe u gomogo vbatshani ndzadzini!” 11 A di vboha Jerusalema, a hongola tempeleni, a khedza satshavbo si nga ba si romo umo. Ganiolu, li di gu pfode, khu kharato a di hongola Bhetaniya ni ava nya 12.

12 Khu litshigu li nga landreya, tepo va nga ba va khuga khu Bhetaniya, a dipwa ndzala. 13 Na romo khu hwindzo a di wona nguyu* wu nga ba wuri ni mahagani, a wu yela na pimisa gu khuye a na ya mana gilogyo. Ganiolu, tepo a nga vboha khu vbafuvbi a di wona gu khuye wu mwalo gilo, wu diri ni mahagane basi kholu gu di siri nango nya dzifigu. 14 Khavbovbo, a di wu embeya, khuye: “Mwalo gambe a na hodzago mihandro yago.” Vapizane va di gu sipwa.

15 Va di vboha Jerusalema. Jesu a di beya tempeleni, a tutumisa vatshavbo va nga ba va rengisa ni gu renga tempeleni, a tshungunuleya dzimeza dza vatrokarisi nya dzitsapawu ni dzikadera dza vale va nga ba va rengisa sipomba. 16 Nigu kha dzumeleya muthu gu tsemakanya khu tempeleni na rwade gilogyo. 17 A di gu va hevbudza, na va embeya gu khuye: “Ina kha ga lowa gu pwani: ‘Nyumba yangu yi na ranwa gu pwani nyumba nya nombelo nya vathu vatshavbo?’ Ganiolu, enu mu yi giride gisakha nya dzimbafa.” 18 Tepo vaprista nya vakhongolo ni valovi va ngapwa isoso, va di vbwetedzeya dzindziya nya gu mu songe khidzo, kholu va di gu mu thava khu kotani nya olu gitshungu gi nga ba gi hlamadziswa khu mahevbudzelo yaye.

19 Tepo li nga pfola, va di duga khu dhoropani. 20 Ni dzimindru, tepo va nga ba va vbindra khu vbafuvbi nya nguyu* wule, va di wona gu khavo wu di gu bangide gukhugeya mikhambani. 21 Pedro a di wu dundruga, a ganeya, khuye: “Rabi, nga wona! Nguyu wule u nga wu vala wu bangide.” 22 Jesu a di hakha, khuye: “Khodwani ga Nungungulu. 23 Khu lisine nyi ngu mi embeya gu kheni oyu a na embeyago gigomo gegi, khuye: ‘Siguga khavba u dzi rinya linene,’ a si kanakani monyoni gwaye ganiolu a khodwa gu khuye esi a ganedego si na girega, khu lisine si na girega. 24 Khu kharato, nyi ngu mi embeya gu kheni: Satshavbo esi mu lombago khu nombelo, khodwani gu khenu mu si hakhide nigu mu na ningwa. 25 Nigu mwa gu ba mu emide na mu gombeya, divaleyani sihoso satshavbo mu giredwego khu vathu gasi gu Papayi wanu a gomogo ndzadzini, anuye a mi divaleya sihoso sanu.” 26 *——

27 Va di vboha gambe Jerusalema. Tepo a nga ba a gimbiya-gimbiya tempeleni, vaprista nya vakhongolo, ni valovi, ni madhota, va di mu hidzimeleya 28 va mu wudzisa, khavo: “Wa gu yi mana hayi tshivba nya gu gire satshavbo sesi? Khu mani a nga gu ninga tshivba nya gu gire silo sesi?” 29 Jesu a di va hlamula, khuye: “Nyi na mi gira neni giwudziso. Mwa gu nyi hlamula, nyi na mi embeya gu kheni nya gu yi mana hayi tshivba nya gu gire silo sesi. 30 Gubhabhatiswa ga Johane gu dzude khu ndzadzini mwendro khu ga vathu? Nyi hlamuleni.” 31 Khavbovbo, avo va di pheya gu ganedzisana khu gyawe, khavo: “Ha gu khethu: ‘Khu ndzadzini,’ a na khuye: ‘Khu ginani mu nga ne khodwa gwaye?’ 32 Ganiolu, ha gu khethu: ‘Khu ga vathu, ginani gi na hi dugeleyago’?” Avo va di gu thava gitshungu, kholu vatshavbo va di gu khodwa gu khavo khu lisine Johane a diri muprofeti. 33 Khu kharato, va di hlamula Jesu, khavo: “Kha hi dziti.” Jesu a di va embeya, khuye: “Aneni kha nyi mi embeyi omu nyi yi manago tshivba nya gu gire silo sesi.”

12 Khu kharato, uye a di pheya gu ganeya navo khu gu thumisa sipimaniso, khuye: “Mwama moyo a di yala miuvha omu nya lithembwe laye, a li bhiya, a gira wulanga nya gu sugeye avbo dziuvha gasi gu gira vhinyu a bwe a vbaha nyumba nya gu laphe.* Khavbovbo, a tshiyedza lithembwe lile ga valimi, a endra a hongola limbe litigo. 2 Khu tepo yakona, a di rumeya gimwegyo nya sithumi saye ga valimi vale gasi gu ya hakha mihandro yaye. 3 Ganiolu, avo va di gi mola, va gi veta va bwe va gi tutumisa nya mba na gilo. 4 A di rumeya gimbe githumi, avo va di ya gi veta, va gi bayisa hungoni va bwe va gi poyila. 5 Khavbovbo, a di rumeya gimbe, avo va di ya gi songa. A rumeya simbe nya singi, simbe va si veta, simbe va si songa. 6 Uye a diri ni moyo gambe, gi nga ba giri gyanana gyaye nya gu gi haladze. A di gi rumeya gwawe, na gu khuye: ‘Va na ya ninga githawo gyanana gyangu.’ 7 Ganiolu, valimi vale va di bhula khu gyawe, khavo: ‘Khuye oyu a na tshalago ni thomba, hongoleni hi mu songa gasi hi tshala ni thomba yaye.’ 8 Khu kharato, avo va di gi mola va gi songa, va gi rinya vbavbandze nya lithembwe nya miuvha. 9 Ginani egi a na ta girago mune nya lithembwe? A na ta songa valimi vale, a ningeya lithembwe ga vambe. 10 Ina mu si gu leri omu nya milowo gu pwani: ‘Giwindri* gi nga nyenywa khu vavbahi khigyo gi khadego giwindri nya litshina gya vbakhonatunu. 11 Esi sa guta khiyo ga Jehovha nigu si lulamide mahoni gwathu’?”

12 Avo va di gu vbweta gu mu mola khu kotani nya isoso kholu va di gu dziti gu khavo a di gu thula avo tepo a nga ganeya gipimaniso gile. Khu kharato va di mu diga va hongola.

13 Khavbovbo, va di mu rumeleya Vafarisi nyo khaguri ni tsawa wa na Herodhi, gasi va ya mu mola khu malito yaye. 14 Tepo va nga vboha, va di mu embeya, khavo: “Muhevbudzi, hi ngu dziti gu khethu u na ni lisine ni gu khu dwaneyi gu tsakedwa khu vathu kholu khu khedzi guya khu khovbe, ganiolu wa gu hevbudza ndziya ya Nungungulu guya khu lisine. Ina si ngu khala gu livba khupo ga Sezari mwendro ne? 15 Hi yede gu livba mwendro ne?” Tepo a nga tugula mano yawe, a di va wudzisa, khuye: “Khu ginani mu nyi lingago?” Nyi reseyeni dhenaryo* mweyo gasi nyi yi wona.” 16 Va di mu reseya dhenaryo mweyo, a va wudzisa, khuye: “Githombe gegi ni lina leli khya mani?” Va di mu hlamula, khavo: “Khya Sezari.” 17 Khavbovbo, Jesu a di va embeya, khuye: “Livbani ga Sezari esi si gu sa Sezari, ganiolu ga Nungungulu esi si gu sa Nungungulu.” Avo va di hlamadziswa ngudzu khuye.

18 Khu kharato, Vasadhusi va gu khavo gu mwalo guwuswa ga vale va fudego, va di mu hidzimeleya va mu wudzisa, khavo: 19 “Muhevbudzi, Mosi lovide gu khuye a gufa mwama nya mba tshiya sanana, ndriyaye yede gu dzegana ni noni yile gasi a velegeya sanana ndriyaye. 20 Gu diri ni 7 vama va nga ba vari va na ndriye ni ndriye. Oyu nyo pheye a di tshadha ganiolu afa nya mba tshiya sanana. 21 Oyu nya wuvili a di tshala a tshadha ni noni yile, ganiolu anuye a difa nya mba tshiya sanana. Sasimweso si di giregeya oyu nya wuraru. 22 Ga vatshavbo nya 7, mwalo a nga tshiya sanana. Khu gu hegisa, nyamayi wule nuye a difa. 23 Guwuswani ga vale va fudego, nyamayi yoyu a na khala mwangadzi wa mani ga ava nya 7? Kholu khade mwangadzi wa vatshavbo.” 24 Jesu a di va embeya, khuye: “Ina khandri mwa gu dzi pemba khu gu mba tini Milowo ni tshivba ya Nungungulu? 25 Kholu guwuswani ga vale va fudego, vama kha va na nga dzega, ne vanyamayi navo kha va na nga dzegwa, avo va na fana ni dzingilozi ndzadzini. 26 Maningano ni guwuswa ga vale va fudego, kha mwa leri omu nya libhuku la Mosi, omu nya matimo ma ganeyago khu gipopwana gi nga ba gi khondra, avba Nungungulu a nga embeya Mosi, khuye: ‘Eni nyi Nungungulu wa Abrahama, Nungungulu wa Isaki ni Nungungulu wa Jakobe’? 27 Uye khandri Nungungulu wa vale va fudego, ganiolu Nungungulu wa ava va vbanyago. Enu mu dzi pembide ngudzu.”

28 Moyo nya valovi a nga ba a romo vbale, a nga vapwa na va ganedzisana, tepo a nga wona gu khuye Jesu a mu hlamude gwadi, a di mu wudzisa, khuye: “Khu wevbi nayo nya gupheye* ga yatshavbo?” 29 Jesu a di hlamula, khuye: “Owu nya gu pheye khowu: ‘Gupwa Israyeli, Jehovha Nungungulu wathu, Jehovha moyo basi. 30 Haladza Jehovha Nungungulu wago khu monyo wago watshavbo, khu hefemulo* wago watshavbo ni mapimo yago yatshavbo ni tshivba yago yatshavbo.’ 31 Nya wuvili khowu: ‘Haladza muthu-kwanu nga edzi u dzi haladzago khidzo.’ Wu mwalo wumbe nayo nya wukhongolo guvbindra eyi.” 32 Mulovi wule a di mu embeya, khuye: “Muhevbudzi, u ganede lisine: ‘Nungungulu moyo basi nigu mwalo mumbe vbavbandze gwaye’; 33 nigu gu mu haladza khu monyo watshavbo, mapimo yatshavbo ni tshivba yatshavbo ni gu haladza muthu-kwanu nga edzi u dzi haladzago khidzo, si na ni lisima guvbindra miphaso yatshavbo nya guvbiswe.” 34 Khu kharato, tepo Jesu a nga wona gu khuye mulovi wule hlamude khu ndziya nya guti, a di mu embeya, khuye: “U mwalo hwindzo ni Mufumo wa Nungungulu.” Ganiolu, mwalo gambe a nga tiya gu mu gira simbe siwudziso.

35 Tepo Jesu a nga ba a simama gu hevbudza tempeleni, a di khuye: “So kodzega kharini gu valovi va ganeya gu khavo Kristo gyanana gya Dhavhidhe? 36 Uye abune Dhavhidhe na gu thumiswa khu liphuvbo nya guage ganede, khuye: ‘Jehovha a di embeya Pfhumu yangu, khuye: “Khala khu nyamudye gwangu kala nyi vega valala vago vbavbatshi nya migondro yago.”’ 37 Dhavhidhe abune a gu mu rana Pfhumu, khu kharato sa gu kodzega kharini gu bwe a khala gyanana gyaye?”

Gitshungu gi di gu mu engiseya na gi tsakide. 38 Nigu a di gu va hevbudza, khuye: “Dzi woneyeni ni valovi va golago gu gimbiya na va ambade sombo nya gu laphe ni gu loswa omu gu tadego vathu,* 39 ni gu khaleya dzikadera nya gupheye dzisinagogani ni gu khala malangani nya lisima omu nya dzifesta. 40 Avo va gu phanga dzindranga nya dzinoni* va bwe va gira milombelo nya gu laphe gasi va dzi yeyedza. Avo va na lamudwa khu ndziya nya gulemeye ngudzu.”

41 Uye a di khala vbafuvbi ni dzikaxa nya miningelo, a pheya gu wona edzi gitshungu gi nga ba gi theya khidzo dzitsapawu omu nya dzikaxa nya miningelo; sighanyi si di gu theya singerengere nya singi. 42 Khavbovbo, gu dita noni nya gisiwana, yi ta theya singerengere sivili nya tengo wa vbavbatshi ngudzu.* 43 Khu kharato, uye a di rana vapizane vaye a va embeya, khuye: “Khu lisine nyi ngu mi embeya gu kheni: Noni yeyi nya gisiwana, yi thede omu nya kaxa nya miningelo dzitsapawu nya dzingi guvbindra vathu vatshavbo. 44 Kholu vatshavbo va di theya esi si nga va tshaleya, ganiolu uye wusiwanani gwaye, a di theya satshavbo a nga ba ari naso gasi gu dzi vbanyisa khiso.”

13 Tepo Jesu a nga ba a duga khomu nya tempele, moyo nya vapizane vaye, a di khuye: “Muhevbudzi, nga wona gumbura ni wukhongolo nya siwindri sesi ni dzinyumba nya tempele.” 2 Ganiolu, Jesu a di mu embeya, khuye: “U ngu dzi wona dzinyumba dzedzi nya dzikhongolo? Kha gu na nga tshala giwindri vbatshani nya gimbe giwindri; satshavbo si na khungumudwa.”

3 Tepo a nga ba a khade Gigomoni nya Miolivha, khu wulanga gu nga ba gu wonega tempele, Pedro, ni Jakobe, ni Johane, ni Andreya, va di mu wudzisa na vari vonga, khavo: 4 “Nga hi embeya, lini si na giregago silo sesi nigu giwoniso muni gi na yeyedzago gu khigyo satshavbo sesi somo vbafuvbi ni gu vboha mahegiso?” 5 Khu kharato, Jesu a di va embeya, khuye: “Dzi woneyeni gasi mu si pengiswi khu muthu. 6 Nya vangi va nata khu lina langu, va ta khavo: ‘Kheni uye,’ nigu va na pengisa nya vangi. 7 Nigu mwa gupwa na gu ganedwa khu dzinyimbi ni mahungu nya dzinyimbi, mu nga thurugi; silo sesi si yede gu girega, ganiolu khandri mahegiso.

8 “Kholu litigo li na wugeya litigo, mufumo wu na wugeya mufumo; gu na manega sirevareva malangani nyo hambane-hambane; nigu gu na manega dzindzala. Silo sesi gupheya nya dzitshanisa.

9 “Ganiolu, enu dzi woneyeni. Vathu va na mi yisa dzitribhunali nigu mu na kwamudwa dzisinagogani, mu na emiswa mbeli nya vaghovhernadhori ni dzipfhumu khu kotani yangu gasi mu va ninga wufakazi. 10 Nigu mahungu nya yadi ma yede gu tshumayedwa mafuni gwatshavbo gu pheya. 11 Va gu mi ningeya, mu nga garadzegi khesi mu na ganeyago, ganiolu ganeyani esi mu na ningwago khu tepo yoyo, kholu khandrenu mu ganeyago, ganiolu liphuvbo nya guage. 12 Nigu ndriye a na ningeya ndriyaye gasi a songwa, papayi a ningeya gyanana gyaye nigu sanana si na wugeya vavelegi vaso si va songisa. 13 Enu mu na nyenywani khu vatshavbo khu kotani nya lina langu. Ganiolu, oyu a na timiseyago kala mahegiso a na vbulugiswa.

14 “Mwa gu wona gilo nya gunyenyeze gi ghoheteyago silo satshavbo na gi emide wulangani gi si yeligo gu ema (muleri a na zame gu si pwisisa), ava va gomogo Judheya, va na tutume va hongola sigomoni. 15 Uye a na gu bani a romo vbatshani nya nyumba a nga tshigi gasi gu ta dzega esi si gomogo nyumbani gwaye; 16 uye a na gu ba a romo thembweni, a nga bweleyi gasi gu ya dzega ngandzu yaye. 17 Va tshanisekide vanyamayi va na ta manwago khu matshigu yoyo na vari ni dzimimba, ni ava va na ta manwago na va mamisa! 18 Simamani gu gombeleya gasi gu silo soso si si dugeleyi nangoni nya girame; 19 kholu matshigu yoyo ma na ba mari matshigu nya tshanisa nya gu gima yi si gu manegi, gukhugeya tepo Nungungulu a nga vanga litigo kala muhuno nigu kha yi na nga manega gambe. 20 Khu lisine, nari khatshi Jehovha kha nga rodzisa matshigu yoyo, mwalo a nga hadzi vbuluga, ganiolu khu kotani nya ava a va hathidego, uye ma rodziside.

21 “Khu kharato, a gu tshuka muthu nyo khaguri, khuye: ‘Oyu avba Kristo,’ mwendro, khuye: ‘Wule eyi,’ mu nga khodwi. 22 Kholu gu na dugeleya Vakristo nya malipha ni vaprofeti nya malipha, va na girago siwoniso ni silewugiso gasi gu pengisa ni vale va hathidwego so kodzega. 23 Khu kharato, khalani na mu virede. Eni nyi mi embedeni satshavbo na yi ngo romo tepo.

24 “Ganiolu, matshigoni yoyo, na gu vbindride tshanisa yile, lidambo li na sivbala, ngima kha wu na nga wenengedza. 25 Dzinyeledzi dzi na thega khu ndzadzini, dzitshivba dza ndzadzini dzi na kutsungwa. 26 Khavbovbo, mu na wona Gyanana nya muthu na gita khu mapfhini ni tshivba ni wudhumo nya wukhongolo. 27 Nigu a na rumeya dzingilozi dzi ta tshanganisa sihathwa saye sa dzikhonani dzatshavbo nya mafu,* gukhugeya maphelo nya mafu kala mahegiso nya ndzadzi.

28 “Hevbulani khu gipimaniso gegi nya nguyu: Tepo sitamwana si pheyago gu thunga mahagani nya maphya, mu ngu dziti gu khenu nango nya guvbise yomo vbafuvbi. 29 Khu gufana, mwa gu wona silo sesi na si gu dugeleya, dzitini gu khenu Gyanana nya muthu gyomo vbafuvbi, gyomo vbamwanya. 30 Khu lisine nyi ngu mi embeya gu kheni: Gitugulwana gegi kha gi na nga vbindra silo sesi satshavbo na si nga si giregi. 31 Ndzadzi ni mafu si na vbindra, ganiolu malito yangu kha ma na nga vbindra.

32 “Maningano khu litshigu lolo ni ora, mwalo a sitigo, ne dzingilozi ndzadzini ne Gyanana, ganiolu sa gu tidwa khu Papayi basi. 33 Khalani na mu dongide mu bwe mu khala na mu gengede, kholu kha mu yiti tepo yi emisidwego. 34 Sa gu fana ni muthu a nga endra a tshiyedza ndranga yaye sithumi. Githumi ni githumi a gi ninga thumo wagyo a bwe a laya mughadhi nya lidimba gasi a khala na virede. 35 Khu kharato, khalani na mu virede, kholu kha mu dziti gu khenu mune ndranga a nata khu tepo muni, gani siyambo, gani vbakari nya wutshigu, gani mambagugya, mwendro dzimindrudzile. 36 Gasi gu a guta nya mba mi tivisa, a siti mi mana na mu lade. 37 Khu kharato, esi nyi mi embeyago, nyi ngu embeya vatshavbo, kheni: Khalani na mu virede.”

14 Na gu ngo tshade matshigu mavili gasi gu gira Phasika ni Festa nya Dzipawu nya mba thedwa Livhirina,* vaprista nya vakhongolo ni valovi, va di gu vbweta mano nya gu mole khayo Jesu ni gu mu songa; 2 kholu va di gu khavo: “Hi nga mu moli festatunu, kholu vathu va nga tshuka va wusa ligwaha.”

3 Tepo a nga ba a romo Bhetaniya na gu hodza ndrangani ga Simoni, oyu nya sokono, a di hidzimeledwa khu nyamayi a nga ba ari ni liboteri nya alabhastru, li nga ba liri ni mafura nyo nungeye nyo dhure ngudzu, ma nga ba ma giridwe khu nardhu* nya yadi, nya mba patedzedwa ni simbe silo. Khavbovbo, a di tula, a ma guhula hungoni ga Jesu. 4 Khu kharato, tepo vambe va nga si wona, va di sola, khavo: “Khu ginani ma haganisedwago mafura yale? 5 Kholu mafura yale ma di hadzi rengiswa khu tengo nyo vbindre 300 dzidhenaryo,* dzi dzegwa dzitsapawu dzodzo dzi ningedwa ga sisiwana.” Khu kharato, avo va di goroga ngudzu khesi si nga girwa khu nyamayi wule. 6 Ganiolu, Jesu a di hakha, khuye: “Mu digeni. Khu ginani mu garadzago nyamayi yoyu? Uye nyi girede silo nya sadi ngudzu. 7 Kholu, sisiwana mu naso tepo yatshavbo nigu mu nga si gireya silo nya sadi ni yevbini tepo mu dzinago, ganiolu khandri tepo yatshavbo mu na gu ba muri ni eni. 8 Uye giride esi a nga si kodza; todzide mafura nyo nungeye givili gyangu, a gi dongiseya gu ya dzingwa. 9 Khu lisine nyi ngu mi embeya, kheni: Ni hayini omu gu na tshumayedwago mahungu nya yadi mafuni gwatshavbo, esi si nga girwa khu nyamayi yoyu si na ganedwa, gasi gu mu dundruga.”

10 Khavbovbo, Judha Sikariyoti, moyo nya vale nya 12, a di hongola ga vaprista nya vakhongolo, gasi gu ya mu ningeya. 11 Tepo va ngapwa isoso, va di tsaka ngudzu, va tumbisa gu mu ninga dzitsapawu nya prata. Gukhugeya avbovbo a di pheya gu vbwetedzeya ndziya nya gu mu ningeye khiyo.

12 Khu litshigu nyo pheye nya Festa nya Dzipawu nya mba thedwa Livhirina,* a gu tepo va nga ba va oloveya gu ningeya muphaso nya Phasika, vapizane va di mu wudzisa, khavo: “Wo vbweta gu khuwe hi dongiseya hayi Phasika?” 13 Khu kharato, a di ruma vapizane vaye vavili, a va embeya, khuye: “Gimbiyani dhoropani, mu na manana ni mwama moyo a rwadego khali yi gu na ni mati. Mu landreni, 14 nigu avba a na beyago avbo, embeyani mune ndranga, khenu: ‘Muhevbudzi a di khuye: “Yomo hayi sala nya vapfhumba gasi nyi ta hodzeya umo Phasika ni vapizane vangu?”’ 15 Uye a na mi yeyedza sala nya yikhongolo yi gomogo vbatshani, yi dongisedwego gwadi. Dongiseyani umomo Phasika.” 16 Khu kharato, vapizane vale va di hongola va ya beya dhoropani, va ya mana satshavbo kha nga edzi a va embedego khidzo, va dongiseya Phasika.

17 Tepo li nga pfola a di vboha ni vapizane vaye nya 12. 18 Tepo va nga ba va khade vbamezatunu na va hodza, Jesu a di va embeya, khuye: “Khu lisine nyi ngu mi embeya kheni moyo wanu, oyu a hodzago ni eni, a na nyi ningeya.” 19 Avo va di pheya gu garadzega, moyo ni moyo wawe a mu wudzisa, khuye: “Kheni gani Pfhumu?” 20 A di hlamula, khuye: “Moyo nya enu nya 12; oyu nyi bedzago naye libogo mbiyani. 21 Gyanana nya muthu gi ngu hongola, kha nga si lovidwego maningano nagyo, ganiolu libango ga wule a rengisago Gyanana nya muthu. Gu diri tshukwana nari khatshi kha velegwa muthu yoyo.”

22 Tepo va nga ba va hodza, Jesu a di dzega pawu, a yi kategisa, a yi piya, a ninga vapizane vaye, khuye: “Dzegani; iyo ya gu emeya givili gyangu.” 23 Khavbovbo, a di dzega kopo nya vhinyu a bonga Nungungulu, a ninga vapizane vaye, vatshavbo va seya khiyo. 24 A di va embeya, khuye: “Vhinyu yeyi ya gu emeya ‘novba wangu nya pwanano,’ wu na vbaladzwago gasi gu divaleya sighoho nya vathu nya vangi. 25 Khu lisine nyi ngu mi embeya, kheni: Gima kha nyi na nga seya gambe vhinyu, kala litshigu nyi na seyago vhinyu nya yiphya Mufumoni wa Nungungulu.” 26 Khu guhegisa, hwane nya gu embeleye dzindzimo nya gu dhumise Nungungulu, va di hongola Gigomoni nya Miolivha.

27 Jesu a di va embeya, khuye: “Mwatshavbo mu na nyi diga, kholu gu lovidwe gu pwani: ‘Nyi na bayisa muhavisi, nigu dzinvuta dzatshavbo dzi na phalalega.’ 28 Ganiolu, hwane nya gu ba nyi wusidwe khu ga vafudego, mu na ta nyi mana Galileya.” 29 Ganiolu, Pedro a di khuye: “Ambari vatshavbo va gu gu diga, eni kha nyi na nga gu diga.” 30 Khu kharato, Jesu a di mu embeya, khuye: “Khu lisine nyi ngu gu embeya, kheni: Muhuno, wutshigu wa muhuno kamo, khonge na wu nga si embi guvili, u na nyi danga guraru.” 31 Ganiolu, Pedro a di simama, khuye: “Ambari sa gu lomba gufa nago, eni gima kha nyi na nga gu danga.” Vapizane vatshavbo va di ganeya navo sasimweso.

32 Khavbovbo, va di vboha wulanga wu ranwago pwani Getsemani. Uye a di embeya vapizane vaye, khuye: “Khalani avba, nyi ngu ya gombeya.” 33 A di dzega Pedro, ni Jakobe, ni Johane, a hongola navo. A pheya gu garadzega ngudzu, 34 a va embeya, khuye: “Nyi ngu garadzega ngudzu nyo bwe khatshi nyi nafa. Khalani avba, mu vireya.” 35 A di hongolanyana mbeli, a ya khidzima a tsitsa khovbe a pheya gu gombeya a lomba gu khuye sa gu kodzega, ora yile yi na gimbileye hwindzo naye. 36 A ganeya, khuye: “Abba,* Papayi, satshavbo gwago si ngu kodzega, ndreyisa kopo yeyi gwangu. Ganiolu, si nga giregi guya khu gugola gwangu, ganiolu guya khu gugola gwago.” 37 A di wuya, a ta va mana na va lade, a embeya Pedro, khuye: “Simoni, wa gu lala? U di tandrega gu khala na wu khendzugide khu ora mweyo basi? 38 Khalani na mu virede, mu gombeya tepo yatshavbo, gasi mu si thegeyi gulingwani. Khu lisine, monyo wu ngu dzina, ganiolu givili gi garade.” 39 Jesu a di bweleya gambe a ya gombeya, a ganeya sasimweso. 40 A di wuya gambe a ta va mana na va lade, maho yawe ma di gu lemeya khu ligovbe, khu kharato va di si giti ni gilo nyo mu hakhe. 41 A di wuya gambe nya wuraru a ta va embeya, khuye: “Ga tepo nya nga eyi enu mwa gu lala, mu hefemula! Mu nga lalini gambe! Yi vbohide ora, Gyanana nya muthu gi na ningedwa mandzani nya sighohi. 42 Khugani hi hongola! Oyu a nyi ningeyago a ngu vboha.”

43 Na nga gu ganeya, a di vboha Judha, moyo nya ava nya 12 nari ni gitshungu nya gikhongolo, na giri ni dzispadha ni mighomba, avo va di gu rumedwe khu vaprista nya vakhongolo ni valovi ni madhota. 44 Oyu a nga mu ningeya a di gu va ningide giyeyedzo nya gu khuye: “Oyu nyi na mu bhejarigu, khuye kamo yoyo, mu moleni mu hongola naye na mu mu woneleya gwadi, a nga tutuma.” 45 Khavbovbo, a di yela Jesu. Tepo a nga vboha vbafuvbi gwaye, a di khuye: “Rabi!” a mu bhejari. 46 Khu kharato, va di mu mola va hongola naye. 47 Ganiolu, moyo nya ava va nga ba vari vbale a di homola xipadha, a dhumeya githumi gya muprista nya khongolo ngudzu, a gi piya ndzeve. 48 Ganiolu, Jesu a di va hakha khuye: “Mwa gu ta ni dzispadha ni mighomba gasi gu ta nyi mola nga khatshi nyi mbafa? 49 Nyi diri nanu tempeleni tshigu ni tshigu na nyi gu hevbudza, ganiolu enu kha mwa nyi mola. Esi sa gu girega gasi gu tadzisega milowo.”

50 Khavbovbo, vapizane va di mu diga va tutuma. 51 Ganiolu, lidzaha limwedo li nga ba li ambade basi sombo nya linyu* li di pheya gu mu landreya, va zama gu li mola, 52 ganiolu li di tshetemula, li tshiya sombo sile nya linyu, li tutuma wumbwiri.*

53 Va di dzega Jesu, va mu yisa ga muprista nya khongolo ngudzu; vaprista vatshavbo nya vakhongolo ni madhota ni valovi va di tshanganide avbovbo. 54 Ganiolu, Pedro a di landriseya khu hwindzo kala ndrangani ga muprista nya khongolo ngudzu, a ya khala ni sithumi a wora nilo. 55 Vaprista nya vakhongolo ni Tribhunali yatshavbo nya Yikhongolo nya Gijudha, va di gu vbwetedzeya wufakazi nya malipha gasi gu singedza Jesu, va kodza gu mu songa, ganiolu ne wufakazi mowo kha va wu mana. 56 Khu lisine, nya vangi va di gu ningeya wufakazi nya malipha khuye, ganiolu esi va nga ba va fakaza kha sa nga ba si pwanana. 57 Vambe va di gu khuga va mu singedza, khavo: 58 “Hi mu pwide na gu khuye: ‘Nyi na khungumula tempele yeyi yi nga girwa khu mandza nya vathu nigu ndrani nya matshigu mararu nyi na vbaha yimbe nya mba vbahwa khu mandza nya vathu.’” 59 Ganiolu, ne ga esi kha va nga ba va pwanana.

60 Khavbovbo, muprista nya khongolo ngudzu a di khuga a wudzisa Jesu, khuye: “Kha wu hakhi gilo? U ngu khuwe ginani khesi vama vava va ganeyago khuwe?” 61 Ganiolu, Jesu a di simama gu degula a si hakhi gilo. Muprista nya khongolo ngudzu a di mu wudzisa gambe, khuye: “Uwe khuwe Kristo, Gyanana gya Nungungulu a Agidego?” 62 Jesu a di hlamula, khuye: “Ina! Nigu mu na wona Gyanana nya muthu na gi khade nyamudye ga Oyu nya tshivba na gi guta ni mapfhi ya ndzadzini.” 63 Khavbovbo, muprista nya khongolo ngudzu a di pferula ngandzu yaye, khuye: “Hi nga gu vbweteya gambe ginani dzifakazi? 64 Mu mu pwide na valeteya. Mu ngu khenu ginani?” Vatshavbo va di ganeya gu khavo a na songwe. 65 Vambe va di mu hetsheya, va mu fenengedza khovbe, va mu veta sibhakeya na va gu khavo: “Profeta na!” Hwane nya gu mu vete dzipama, dzighadhi dza tribhunali dzi di mu dzega.

66 Tepo Pedro a nga ba a khade vbavbandze, gu di vboha gimwegyo nya githumi nya nyamayi gya muprista nya khongolo ngudzu. 67 Tepo githumi gile gi nga wona Pedro na gu wora nilo, gi di mu khedza gwadi, khigyo: “Uwe nuwe u diri ni Jesu, Munazarenu.” 68 Ganiolu, Pedro a di bomba, khuye: “Kha nyi muti! Ne kha nyi siti esi u ganeyago.” A khuga a hongola vbamwanya nya ndranga. 69 Tepo a nga ba a romo vbamwanya nya ndranga, githumi gile gi di mu wona gi embeya gambe ava va nga ba va romo vbale, khigyo: “Oyu nuye moyo wawe.” 70 Uye a di bomba gambe. Khu hwane nya tepo, avo navo va nga ba va romo vbale, va di embeya Pedro, khavo: “Khu lisine, uwe u moyo wawe kholu u Mugalilewu.” 71 Pedro a di bomba gambe khu lito nyo khugege* na gu sambanya, khuye: “Kha nyi muti mwama yoyo mu ganeyago khuye.” 72 Khu gitepwana gyogyo, khonge wu di emba nya wuvili. Pedro a di dundruga esi Jesu a nga ba a ganede, nyo khuye: “Khonge na wu nga si embi guvili, u na nyi danga guraru.” Khavbovbo, a di garadzega ngudzu, a pheya gu liya.

15 Na gu ngari dzimindru, vaprista nya vakhongolo, ni madhota, ni valovi; a gu ava va nga ba va wumba Tribhunali yatshavbo nya Yikhongolo nya Gijudha, va di tshangana gasi gu hunga gu khavo va na gira ginani khu Jesu; khavbovbo, va di hunga Jesu, va mu dzega va ya mu ningeya ga Pilato. 2 Pilato a di wudzisa Jesu, khuye: “Uwe u Pfhumu nya Vajudha?” Jesu a di hlamula, khuye: “Khiso u ganeyago.” 3 Ganiolu, vaprista nya vakhongolo va di gu mu singedza silo nya singi. 4 Khavbovbo, Pilato a di mu wudzisa, khuye: “Kha wu ganeyi gilo? Kha wu sipwi esi va gu ketsarigo khiso?” 5 Ganiolu Jesu kha mu hlamula gilo. Khu kharato Pilato a di hlamala.

6 Ga festa ni festa nya Phasika, Pilato a di gu oloveya gu tshula gibotshwa gimwegyo gi nga ba gi hathwa khu gitshungu. 7 Khu tepo yoyo, gu diri ni mwama moyo nyo pwani khu Bharabhasi a nga ba a khothedwe pasoni gumogo ni vambe vathu va nga wugeya mufumo va bwe va songa vathu. 8 Khavbovbo, vathu va di hongola ga Pilato va ya mu lomba gu khavo a gira esi a nga ba a oloveya gu gira. 9 Pilato a di va wudzisa, khuye: “Mo vbweta gu khenu nyi tshula Pfhumu nya Vajudha?” 10 Pilato a di gu dziti gu khuye vaprista nya vakhongolo va di mu ningeya khu lidiwo. 11 Ganiolu, vaprista nya vakhongolo va di kutsedzeya gitshungu gasi gi lomba gu khigyo gu tshudwa Bharabhasi. 12 Pilato a di va wudzisa gambe, khuye: “Mo vbweta gu khenu nyi rini khu wule mu mu ranago gu khenu Pfhumu nya Vajudha?” 13 Va di ganeya gambe khu lito nyo khugege, khavo: “A na khokhotedwe vbasimbotunu!” 14 Ganiolu, Pilato a di va wudzisa, khuye: “Khu ginani? Ginani a nga ghoha?” Avo va di engedzeya gu khusedza lito, khavo: “A na khokhotedwe vbasimbotunu!” 15 Pilato khu gu vbweta gu tsakisa gitshungu, a di tshula Bharabhasi, ni gu hwane nya gu rume gu khuye Jesu a kwamudwa, a di mu ningeya gasi a ya songwa vbasimbotunu.

16 Masotshwa ma di mu dzega, ma mu yisa gaya ga ghovhernadhori, ma bwe ma ya tshanganisa masotshwa yatshavbo. 17 Va di mu ambagisa mwendra nyo fuviye, va bwe va luga korowa khu miba, va mu handzega, 18 va bwe khavo: “Sewe, Pfhumu nya Vajudha!” 19 Va di bwe va mu veta hungoni khu tshava, va mu hetsheya ni gu mu khidzimeya. 20 Hwane nya gu ba va vbedzide gu hagana khuye, va di mu tshula mwendra wule nyo fuviye, va mu ambagisa gambe sombo saye, khavbovbo va duga naye gasi a ya khokhotedwa vbasimbotunu. 21 Avo va di bwe va gurumedza mwama moyo nyo pwani khu Simoni wa Sirene, papayi wa Alexandre ni Rufu, gu rwala simbo nya tshanisa.* Uye a di gu vbindra khu vbale na gu wuya khu vbavbandze nya lidhoropa.

22 Khavbovbo, va di dzega Jesu va hongola naye wulanga wu ranwago pwani Goligota, si thulago gu khiso: “Wulanga nya Girwarwa.” 23 Va di zama gu mu ninga vhinyu yi nga ba yi patidwe ni droga nyo pwani i mira, ganiolu a di bomba gu seya. 24 Va di mu khokhotheya avba nya simbo, va bwe va kabana sombo saye khu gu thumisa dzisolo gasi gu wona gu khavo khu mani a na dzegago ginani. 25 Va mu khokhotede avba nya simbo omu nya dzi 9 ora.* 26 Milowo nya nandru va nga ba va mu singedza, yi di gu khiyo: “Pfhumu nya Vajudha.” 27 Nigu gambe gu diri ni dzimbafa dzimbili dzi nga ba dzi khokhotedwe, mweyo khu nyamudye yimbe khu nyambade gwaye. 28 *—— 29 Avo va nga ba va vbindra khu vbale, va di gu mu vala na va gu kutsunga mihungo, khavo: “Ha! Uwe u nga ba u vbweta gu tshungunula tempele u bwe u yi vbaha khu matshigu mararu, 30 dzi vbulugise khu gu tshiga khu vbasimbotunu nya tshanisa.”* 31 Khu gufana, vaprista nya vakhongolo ni valovi, va di pheya navo gu mu poyileya, khavo: “Uye vbulugiside vambe, ganiolu kha kodzi gu dzi vbulugisa abune! 32 Uye Kristo, Pfhumu ya Israyeli, a na tshige olu kamo khu vbasimbotunu nya tshanisa,* gasi hi si wona, hi kodza gu khodwa.” Ambari ava va nga ba va khokhotedwe dzibambe gwaye, va di gu mu vala navo.

33 Gukhugeya khu dzi 12 ora* kala dzi 15 ora,* gu di khala gidema tigoni mule gwatshavbo. 34 Omu nya dzi 15 ora* Jesu a di khusedza lito, khuye: “Eli, Eli, lama sabhaktani?” Si thulago gu khiso: “Nungungulu wangu, Nungungulu wangu, khu ginani u nga nyi diga?” 35 Tepo va ngapwa isoso, vambe va nga ba va romo vbale, va di khavo: “A gu rana Eliya.” 36 Moyo wawe a di tutuma a ya dzega xiponja a yi nega omu nya vhinyu nyo dunge a yi tshomega avba nya tshava, a mu ninga gasi a seya, na gu khuye: “Mu digeni! Ho vbweta gu wona gu khethu Eliya a na ta mu dusa khu vbale gani.” 37 Ganiolu, Jesu a di womba huwa nya yikhongolo afa. 38 Kortina ya wulanga nyo age wa tempeleni, yi di pferuga khu vbakari ni vbakari gu khugeya vbatshani kala vbavbatshi. 39 Tepo muthangeyi nya masotshwa a nga ba a romo vbale a nga wona esi si nga girega tepo Jesu a ngafa, a di khuye: “Khu lisine, mwama yoyu a diri Gyanana gya Nungungulu.”

40 Gu diri ni vanyamayi va nga ba va khedziseya na va emide khu hwindzo. Vbakari gwawe gu diri ni Mariya Madhalene, Mariya mamayi wa Jakobe oyu nya Mudugwana, ni Juze, ni Salome. 41 Vanyamayi vale va di gu landrisede Jesu ni gu mu thumeya tepo a nga ba a romo Galileya. Ni gu gambe, gu diri ni vanyamayi nya vangi va nga ba va hongode naye Jerusalema.

42 Kha nga olu li nga ba li pfode, nigu gu diri litshigu nya gu Dongiseye Sabhadho yi nga hadzi vboha khu mindru gakone, 43 gu di vboha Josefa wa Arimateya, givbango nya guthavisege nya Tribhunali nya Yikhongolo nya Gijudha, a nga ba a vireya nuye Mufumo wa Nungungulu. Uye a di tiya hwambo, a hongola ga Pilato, a ya lomba girumbi gya Jesu. 44 Ganiolu, Pilato a di si tiyisegi gu khuye Jesu fude mwendro ne. Khu kharato, a di rana muthangeyi nya masotshwa a ta mu wudzisa gu khuye Jesu fude gani. 45 Hwane nya gu ba Pilato na embedwe khu muthangeyi nya masotshwa gukhuye Jesu fude, a di ningeya girumbi gya Jesu ga Josefa. 46 Josefa a di renga mwendra nya lisima nya linyu, a bwe a ya tshisa girumbi gya Jesu khavba nya simbo a gi fumbeya omu nya mwendra wule, a gi bedza omu nya lithowo li nga ba li podwe avba nya giwindri a vbedza a wumbuluseya giwindri a tshika khigyo vbamwanya nya lithowo. 47 Ganiolu, Mariya Madhalene ni Mariya mamayi wa Juze va di simama vbale, va khedziseya avba a nga ba a dzingidwe avbo Jesu.

16 Khavbovbo, na yi vbindride Sabhadho, Mariya Madhalene, Mariya mamayi wa Jakobe, ni Salome va di renga mafura nya gu nungeye gasi va ya todza girumbi gya Jesu. 2 Ni dzimindru ngudzu, khu litshigu nya gu pheye nya semana, na li khugide lidambo, va di vboha lithowotunu. 3 Va di gu wudzisana gu khavo: “Khu mani a na ya hi duseyago giwindri vbamwanya nya lithowo?” 4 Ganiolu, tepo va nga khusa maho va khedza, va di wona gu khavo giwindri gi di dusidwe ambari olu gi nga ba giri gikhongolo ngudzu. 5 Tepo va nga beya omu nya lithowo, va di wona lidzaha li nga ba li khade khu nyamudye na li ambade sombo nyo age; va hlamala. 6 Li di va embeya, khilo: “Mu nga hlamali; mwa gu vbweta Jesu, wa Nazareta, oyu a songidwego vbasimbotunu. Uye wusidwe khu ga vafudego. Mwalo avba. Mu ngu wona, avba khavbo a nga ba a ladzisidwe. 7 Olu gimbiyani mu ya embeya vapizane vaye ni Pedro, khenu: ‘Uye womo ndziyani nya gu hongole Galileya, khiyo mu na gu ya mu wona iyo, kha nga a mi embedego.’” 8 Khavbovbo, avo va di duga khu thowoni, va tutuma na va ndrendremeya ni gu hlamala. Kha va embeya gilo muthu kholu va di gu thava.