GUTULEDWA GU NINGIDWEGO JOHANE

1 Ogu gutuledwa ga Jesu Kristo, ogu a ningidwego khu Nungungulu gasi gu yeyedza ga sithumi saye esi si gomogo vbafuvbi ni gu girega. Uye rumede ngilozi yaye, nigu khu gu thumisa iyo yeyedzide gutuledwa gogu ga Johane khu gu thumisa siwoniso, 2 a gu uye a ningedego wufakazi nya malito a embedwego khu Nungungulu ni wufakazi a ningidwego khu Jesu Kristo, wufakazi nya silo satshavbo a nga si wona. 3 A ngu tsaka wule a lerigo malito yaya khu lito nyo khugege ni vale va pwago malito nya giprofeto gegi va bwe va engisa esi si lovidwego gwagyo kholu tepo yi vegisidwego yomo vbafuvbi.

4 Eni Johane nyi ngu loveya malito yaya ga 7 mabandla ma gomogo provhinsya ya Aziya:

Wuwadi nya wukhongolo wa Nungungulu wu na manege ni enu ni gurula gu tago khiyo ga “Wule a gu romo, a nga ba a romo ni wule a tago,” ni ga 7 maphuvbo ma gomogo mbeli nya gikhalo gyaye nya wufumu, 5 ni ogu gu tago khiyo ga Jesu Kristo, “Fakazi nyo Tumbege,” “matewula nya guwuswe khu ga vafudego” ni “Pfhumu nya dzipfhumu nya mafu.”

Oyu a hi haladzago a bwe a hi tshudzisa avba nya sighoho sathu khu gu thumisa novba waye. 6 A hi giride hi khala dzipfhumu ni vaprista gasi hi thumeya Nungungulu, Papayi waye; a na ningwe wudhumo ni tshivba kala gupindruga. Amen.

7 Uye a nguta khu mapfhini, nigu vatshavbo va na mu wona gupata ni vale va nga mu paya, nigu mahundzu yatshavbo ya mafuni ma na dzi veteleya dzikhana khu gu garadzega khu kotani yaye. Amen.

8 Jehovha Nungungulu wari khuye: “Eni kheni Alfa ni Omega,* Wule a gu romo, a nga ba a romo ni wule a tago, wule nya Tshivba Yatshavbo.”

9 Eni ndriyanu Johane, hi tshanekisidego ni gu timiseya hatshavbo, oyu a na manegano nanu ni Jesu mufumoni, nyi di romo gidwani ga Patimosi khu gu ba nyi ganede maningano ni Nungungulu ni gu ningeya wufakazi maningano ni Jesu. 10 Khu gu phaswa khu liphuvbo nya guage nyi wonide silo si na giregago khu litshigu la Pfhumu, nigu nyi pwide lito nya tshivba hwane gwangu nya khatshi i pundru wu wombwago, 11 na li gu khilo: “Lova esi u si wonago avba nya libhuku,* u si rumeya ga 7 mabandla, a gu aya: Esfeso, Esmirina, Pergamo, Tiyatira, Sardhesi, Filadhelifiya ni Lawodhikeya.”

12 Nyi di thendregedza gasi gu wona oyu a nga ba a ganeya ni eni, tepo nyi nga khedza nyi di wona 7 dzikandriya nya oru, 13 vbakari nya dzikandriya, nyi di wona moyo nyo fane ni Gyanana nya muthu a nga ba a ambade sombo nyo laphe kala migondroni ni libhandri nya oru vbakhanatunu. 14 Hungo waye ni ndzudzu waye si di agide kha nga mawoya nya guage, nga hunguva; maho yaye ma di gu ngangameya nga nilo; 15 migondro yaye yi di gu fana ni kobre nya yadi tepo yi ngangameyago niloni, nigu lito laye li di gu fana ni ligwaha nya mati nya mangi. 16 Khu nyamudye a di pharide 7 dzinyeledzi, nigu khu kanani gwaye gu di gu duga xipadha yi lodzidwego eno ni eno, nigu khovbe yaye yi di gu fana ni lidambo li ngangameyago khu tshivba yalo yatshavbo. 17 Tepo nyi nga mu wona, nyi di thega migondroni gwaye nga khatshi nyi difa.

Khavbovbo, uye a di nyi handzega libogo laye la nyamudye, khuye: “U nga thavi! Eni kheni oyu nya Gupheye ni oyu nya Guhegise, 18 ni oyu a vbanyago. Nyi di gu fude, ganiolu olu nyi ngu vbanya kala gupindruga ni gupindruga, nigu nyi na ni dzipfhungulo nya lufu ni Lithowo.* 19 Khu kharato, lova iso u si wonidego, esi si dugeleyago olu ni esi si na dugeleyago hwane nya silo sesi. 20 Owu khuwo sihalo nya guage nya 7 dzinyeledzi u dzi wonidego mandzani gwangu ga nyamudye ni dzikandriya nya oru: 7 dzinyeledzi dzo emeya dzingilozi nya 7 mabandla, nigu 7 dzikandriya dzo emeya 7 mabandla.

2 “Loveya ngilozi ya libandla la Efeso, khuwe: Wule a pharidego 7 dzinyeledzi mandzani gwaye ga nyamudye, a gimbiyago vbakari nya 7 dzikandriya nya oru, wari khuye: 2 ‘Nyi ngu yiti mithumo yago, gudzigaradza gwago ni gutimiseya gwago, nyi ngu dziti gu kheni khu pwanani ni vathu va girago silo nyo vivbe, nigu u lingide vale va dzi embeyago gu khavo vapostoli narigu khandri vapostoli u bwe u tugula gu khuwe va gu lipha. 3 U na ni gutimiseya nigu u emisanide ni silo nya singi khu kotani nya lina langu, ambari ulolo khwa vbeya tshivba. 4 Ganiolu, nyi ngu gu sola kholu u digidego lihaladzo u nga ba u ri nalo gupheyani.

5 “‘Khu kharato, dundruga edzi u nga ba uri idzo na wu si gu thegi, u dzi laya, u bwe u gira esi u nga ba u gira gupheyani. Wa gu mba dzi laya, nyi na gu teya, nyi ta dusa kandriya yago wulangani gwayo. 6 Ganiolu, gyomo gi nyi tsakisago gwago: U ngu nyenya mithumo nya tsawa wa Nikolawu, eyi yayimweyo aneni nyi yi nyenyago. 7 Uye a gu ni dzindzeve a napwe esi liphuvbo li embeyago mabandla: Wule a na palago, nyi na mu dzumeleya gu hodza simbo nya womi wu gomogo omu nya paradhesi ya Nungungulu.’

8 “Loveya ngilozi ya libandla la Esmirina, khuwe: ‘Oyu nya Gupheye ni Guhegisa,’ a ngafa a bwe a wuga, wari khuye: 9 ‘Nyi ngu guti gutshaniseka gwago ni wusiwana wago, ganiolu u ghanyide, nigu nyi ngu dziti gambe edzi va gu valeteyago khidzo vale va dzi embeyago gu khavo Vajudha narigu khu lisine khandri Vajudha, avo sinagoga ya Sathane. 10 U nga thavi gutshaniseka u na tshanganago nago nya mba hweya. Dhiyabhulosi a na simama gu khotheya pasoni vambe vbakari gwanu gasi mu lingwa khu guvbeleya, nigu mu na tshaniseka khu 10 matshigu. Tumbega kala gufani, eni nyi na gu ninga korowa nya womi. 11 Oyu a gu ni dzindzeve a napwe esi liphuvbo li embeyago mabandla: Wule a na palago, gufa nya wuvili kha gu na nga mu gira gilo.’

12 “Loveya ngilozi ya libandla la Pergamo, khuwe: Wule a gu na ni xipadha nyo laphe, yi lodzidwego eno ni eno, wari khuye: 13 ‘Nyi ngu guti omu u vbanyago umo, omu gi gomogo gikhalo nya wufumu gya Sathane, ganiolu u ngu simama gu phareleya avba nya lina langu nigu kha wa bomba gukhodwa u gu nago avba gwangu ambari matshigoni ya Antipa, fakazi yangu nyo tumbege yi fudego bambe gwanu, avba Sathane a vbanyago.

14 “‘Ganiolu, somo silo nyo khaguri nyi si solago avbo gwago. Vbakari gwago vomo va landreyago sihevbudzo sa Bhalahama a gu uye a hevbudzidego Bhalaki gu vega giwindri gasi gu tshunganisa sanana sa Israyeli gasi si hodza silo si phasedwego sithombe ni gu gira wubhayi.* 15 U na ni ava gambe va landreyago sihevbudzo nya tsawa wa Nikolawu. 16 Khu kharato, dzi laye! Nyi nga gu teya khu guvbiredza, nyi ta dwana nago khu xipadha nyo laphe ya kanani gwangu.

17 “‘Uye a gu ni dzindzeve a napwe esi liphuvbo li embeyago mabandla: Wule a na palago nyi na mu ninga mana ma sihidwego, nyi bwe nyi mu ninga gambe giwindri nya gidugwana nyo age; avba nya giwindri gyogyo gu lovidwe lina nya liphya, li si tidwigo khu mumbe muthu, vbavbandze ga wule a gi hakhago.’

18 “Loveya ngilozi ya libandla la Tiyatira, khuwe: Gyanana gya Nungungulu, gile maho yagyo ma fanago ni nilo wu khondrago ni migondro yagyo yi fanago ni kobre yi mburisedwego, gyari khigyo: 19 ‘Nyi ngu yiti mithumo yago, lihaladzo lago, gukhodwa gwago, thumo wago ga Nungungulu ni gutimiseya gwago; nyi ngu dziti gu kheni mithumo yago ya olu yingi ngudzu guvbindra eyi nya gupheye.

20 “‘Ganiolu, gyomo nyi gi solago gwago: Wa gu diga nyamayi wule, Jezabheli, a dzi embeyago gu khuye muprofeti, a hevbudzago ni gu pengisa sithumi sangu a va kutsedzeya gu gira wubhayi* ni gu hodza silo si nga phasedwa sifananiso. 21 Nyi mu ningide tepo gasi a dzi laya, ganiolu uye kha dzini gu dzi laya muwubhayini* gwaye. 22 Khu kharato, nyo vbweta gu mu dwadzisa, nigu avo va girago wubhayi naye va gu mba dzi laya avba nya sigiro sawe va na manega ni tshanisa nya yikhongolo. 23 Nyi na songa sanana saye khu tungo wu songago, gasi mabandla yatshavbo ma dziti gu khayo kheni nyi khedzago mihingigedzo yi sihadego ngudzu ni monyo, nigu nyi na bweledzeya moyo ni moyo guya khu mithumo yaye.

24 “‘Ganiolu, nyi ngu embeya vatshavbo vale va tshadego Tiyatira, vatshavbo vale va si landreyigo nayo wowu, vale va nga mbati sile si ranwago gu pwani ‘silo nyo ete sa Sathane,” kheni: Eni kha nyi mi rwegini wumbe rwalo. 25 Ganiolu, phareleyani ga esi mu gu naso kala nyita. 26 Nigu wule a na palago, a landrisa dzindziya dzangu kala mahegiso, nyi na mu ninga wufumu nyo fumeye mayigo, 27 kha nga nyi hakhidego wufumu khiyo ga Papayi wangu. Nigu a na va fumeya khu ndronga nya simbi, gasi va pandreledwa nga khatshi dzikhali nya libumba. 28 Nigu nyi na va ninga nyeledzi ya vbadzimindrutunu.* 29 Uye a gu ni dzindzeve a napwe esi liphuvbo li embeyago mabandla.

3 “Loveya ngilozi ya libandla la Sardhesi, khuwe: Wule a gu na ni 7 maphuvbo ya Nungungulu ni 7 dzinyeledzi wari khuye: ‘Nyi ngu yiti mithumo yago nigu nyi ngupwa gupwani u na ni ndruma nya gu pwani u ngu vbanya narigu u fude. 2 Khala na wu gengede u bwe u tiyisa esi si tshadego si nga ba siri vbafuvbi ni gufa, kholu kha nya gu wona na wu gu gira satshavbo silo esi Nungungulu wangu a nga ba a vireya gu khuye u gira. 3 Khu kharato, simama gu dundruga esi u si hakhidego ni gu sipwa u bwe u simama gu si vegedza ni gu dzi laya. Khu lisine, wa gu mba khendzuga nyi nata kha nga mbafa nigu khu na nga yiti ora nyi na tago khiyo.

4 “‘Ganiolu, u na ni vambe nyo khaguri Sardhesi va nga mba tsundzisa sombo sawe, avo va na gimbiya gumogo ni eni na va ambade sombo nya gu age kholu va na ni fanelo. 5 Wule a na palago a na ambagiswa sombo nya guage nigu eni gima kha nyi na nga futa* lina laye omu nya libhuku nya womi, ganiolu mbeli ga Papayi wangu ni mbeli ga dzingilozi nyi na kheni nyi ngu liti lina laye. 6 Oyu a gu ni dzindzeve a napwe esi liphuvbo li embeyago mabandla.’

7 “Loveya ngilozi ya libandla la Filadhelifiya, khuwe: Wule a agidego, a gu wa lisine, a gu na ni dzipfhungulo dza Dhavhidhe, wule a tulago khu ndziya nya gu ne moyo a si segi, a bwe a sega khu ndziya nya gu ne moyo a si tuli, wari khuye: 8 ‘Nyi ngu yiti mithumo yago nigu nyi vegide mbeli gwago lidimba li tudwego, eli ne moyo a si kodzigu gu li sega. Nyi ngu dziti gu kheni u na ni tshivba yidugwana ni gu kheni u vegiside lito langu, nigu kha wa diga gu tumbega avba nya lina langu. 9 Nyi na gira gu vale va gu va sinagogani ya Sathane, va dzi embeyago gu khavo Vajudha narigu va gu lipha, va ta mi khidzimeya migondroni gwanu nyi bwe nyi va gira vati gu khavo nyi ngu mi haladza. 10 Kha nga olu u vegisidego malito yangu maningano ni gutimiseya* gwangu, aneni nyi na gu sayisa teponi nya gilingo gi na tago mafuni gwatshavbo gasi gu ta linga vale va vbanyago mafuni. 11 Nyi nguta khu guvbiredza, simama gu phareleya esi u gu naso gasi gu ne moyo a si dzegi korowa yago.

12 “‘Wule a na palago nyi na mu gira pilari nya tempele ya Nungungulu wangu nigu gima kha na nga duga khu momo. Nyi na mu lova lina la Nungungulu wangu ni lina nya lidhoropa la Nungungulu wangu, Jerusalema nya muphya a releyago khu ndzadzini ata khiyo ga Nungungulu wangu, nyi bwe nyi mu lova lina langu nya liphya. 13 Oyu a gu ni dzindzeve a napwe esi liphuvbo li embeyago mabandla.’

14 “Loveya ngilozi ya libandla la Lawodhikeya, khuwe: Amen, fakazi nya gutumbege ni lisine, a gu givangwa nya gupheye gya Nungungulu, wari khuye: 15 ‘Nyi ngu yiti mithumo yago, nigu nyi ngu dziti gukheni kha wu dzidziyi ne kha wu vbisi, gu diri tshukwana nari khatshi u ngu dzidziya mwendro u ngu vbisa. 16 Kha nga olu u furumeyago, nigu kha wu vbisi ne kha wu dzidziyi, nyi na gu gosa khu kanani gwangu. 17 Kholu wari khuwe: “Nyi ghanyide, nyi na ni dzithomba, kha nyi ngo vbweta gilo”, ganiolu kha wu dziti gu khuwe u gitshaniseki, u mwalo wago, u gisiwana, u gikhumu nigu u wumbwiri. 18 Nyi ngu gu kutsa gu renga gwangu oru yi mburisidwego niloni gasi u ghanya; gu renga sombo nya guage gasi u ambala u siha dzitshoni nya wumbwiri wago; gu renga rendre nya maho gasi u todza mahoni u kodza gu wona.

19 “‘Watshavbo wule nyi mu haladzago nyi ngu mu kawuka ni gu mu laya, khu kharato dzi garadze ngudzu u dzi laya. 20 Nyi womo vbamwanya nyi khokhotha lidimba, oyu a pwago lito langu a tula lidimba nyi na beya nyumbani gwaye nyi jantari naye, uye a jantari ni eni. 21 Wule a na palago nyi na mu dzumeleya gu a khala ni eni avba nya gikhalo gyangu nya wufumo kha nga eni nyi padego nyi khala ni Papayi wangu avba nya gikhalo gyaye nya wufumo. 22 Oyu a gu ni dzindzeve a napwe esi liphuvbo li embeyago mabandla.’”

4 Hwane nya isoso, nyi di wona lidimba na li tudwe ndzadzini; lito nyo pheye nyi nga lipwa na li gu ganeya ni eni li di gu gira khatshi i pundru wu wombwago, li di gu khilo: “Gweya u ta eno gwangu, nyi na ta gu yeyedza silo si yedego gu girega.” 2 Khu gitepwana gyogyo, liphuvbo la Nungungulu li di pheya gu thuma avbo gwangu. Nyi di wona gikhalo nya wufumu ndzadzini, nigu avbo nya gikhalo gyogyo gu diri ni muthu a nga ba a khade. 3 Uye a nga ba a khade avba nya gikhalo gyogyo a di gu khendziga nga khatshi giwindri nya jasiperi ni egi nya saridhoniya;* mudzibambe nya gikhalo gyogyo gu diri ni arku-iris* yi nga ba yi fana ni giwindri nya esmeraldha.

4 Gikhalo nya wufumu gi di randredwe khu 24 sikhalo nya wufumu, nigu avbo nya sikhalo soso gu di khade 24 madhota na ma ambade sombo nyo age, na mari ni dzikorowa nya oru hungoni. 5 Avbo nya gikhalo gyogyo nya wufumu gu di gu lasa nigu gu di gu pwala malito ni mabara; khu mbeli nya gikhalo gyogyo nya wufumu gu diri ni 7 dzikandriya dzi nga ba dzi khondra nilo, dzikandriya dzodzo dzi di gu emeya 7 maphuvbo ya Nungungulu. 6 Khu mbeli nya gikhalo gyogyo gu diri ni gilo gi nga ba gi khendziga ngudzu nga khatshi yiphwa nya livhidru.

Khu vbakari ni dzibambe nya gikhalo gyogyo gu diri ni 4 sivangwa nyo vbanye si nga ba siri ni maho nya mangi khu mbeli ni hwane. 7 Givangwa nyo pheye gi di gu fana ni ngala, egi nya wuvili gi di gu fana ni gimombyana, egi nya wuraru gi diri ni khovbe nyo fane ni khovbe nya muthu, egi nya wu 4 gi di gu fana ni lighama li vbuvbago. 8 Gimwegyo ni gimwegyo nya sivangwa sesi nya 4, gi diri ni 6 mambapi ma nga ba ma tade khu maho khu bambe ni vbavbatshi. Wutshigu ni mihani sivangwa sesi sari khiso: “Agide, agide, agide Jehovha Nungungulu nya Tshivba Yatshavbo, oyu a nga ba ari uye, a gu uye ni oyu a tago.”

9 Tepo yatshavbo sivangwa si dhumisago ni gu zundza ni gu bonga Wule a khadego vbagikhalotunu nya wufumu, Oyu a vbanyago kala gupindruga ni gupindruga, 10 madhota yale nya 24 mo khidzima mbeli ga Wule a khadego vbagikhalotunu nya wufumu, ma khozeya Wule a vbanyago kala gupindruga ni gupindruga ma bwe ma vega dzikorowa dzawe mbeli nya gikhalo nya wufumu, na ma gu khayo: 11 “Jehovha Nungungulu wathu, u ngu yedwa khu gu hakha wudhumo, wuzundzo ni tshivba kholu u giride silo satshavbo, nigu khu gugola gwago satshavbo si vangidwe.”

5 Nyi di wona libhuku* li nga ba li lovidwe eno ni eno* na liri mandzani ga nyamudye ga wule a nga ba a khade vbagikhalotunu nya wufumu. Libhuku lolo li di lemidwe khu 7 sifungo. 2 Nyi di wona gambe ngilozi nya tshivba yi nga ba yi huweleya khu lito nyo khugege, khiyo: “Khu mani a gu na ni fanelo nya gu tule libhuku ni gu namula sifungo salo?” 3 Ganiolu, mwalo ni moyo ndzadzini ni mafuni ambari ni vbavbatshi nya mafu, a nga si kodza gu tula libhuku lile, mwendro gu wona esi si lovidwego gwalo. 4 Nyi di liya ngudzu kholu mwalo a nga ba a ninganedwa khu gu tula libhuku lile mwendro gu wona esi si nga ba si lovidwe gwalo. 5 Ganiolu, limwedo nya madhota li di nyi embeya, khilo: “U nga liyi. Ngala nya lihundzu la Judha, yi gu khamba wa Dhavhidhe, yi pade gasi gu tula libhuku lile ni gu namula sifungo salo nya 7.”

6 Khavbovbo, nyi di wona ginvutana gi nga ba gi gira khatshi gi songidwe na gi emide vbakari nya gikhalo nya wufumu, vbakari nya 4 sivangwa nyo vbanye ni vbakari nya madhota. Gi diri ni 7 dzikeho ni 7 maho. Maho ma di gu emeya 7 maphuvbo ya Nungungulu ma rumedwego mafuni gwatshavbo. 7 Gi di dzegeya gu hidzimeya, gi ya dzega libhuku mandzani ga nyamudye ga Wule a nga ba a khade vbagikhalotunu nya wufumu. 8 Tepo gi nga dzega libhuku, sivangwa sile nya 4 nyo vbanye ni 24 madhota, va di khidzima mbeli nya Ginvutana. Moyo ni moyo wawe a di pharide gitendre ni dzitijela nya oru dzi nga ba dzi tade khu libani. (Libani lo emeya milombelo nya va nyo aga.) 9 Va di emba ndzimo nya yiphya, khavo: “U na ni fanelo nyo dzege libhuku u bwe u tula sifungo salo, kholu u songidwe nigu khu novba wago, u rengede vathu Nungungulu, va dugeyago omu nya mahundzu yatshavbo, malimi yatshavbo, mafumbo yatshavbo ni mayigo yatshavbo. 10 U va giride va khala dzipfhumu ni vaprista, gasi va thumeya Nungungulu wathu ni gu avo va na fuma mafuni.”

11 Nyi di khedza, nyi bwe nyipwa lito nya dzingilozi nya dzingi dzi nga ba dzi randrede gikhalo nya wufumu ni sivangwa nyo vbanye ni madhota. Tengo wakone wu diri makhulukhulu ni makhulukhulu ni dzimiliyoni ni dzimiliyoni. 12 Dzi di gu ganeya khu lito nyo khugege, khidzo: “Ginvutana gi songidwego gi ngu yedwa khu gu hakha wufumu, ni thomba, ni wugengeyi, ni tshivba, ni wuzundzu, ni wudhumo ni makategwa.”

13 Nyi dipwa sivangwa satshavbo sa ndzadzini, sivangwa satshavbo sa mafuni, sivangwa satshavbo sa vbavbatshi nya mafu ni sivangwa satshavbo sa matini, na si gu khiso: “Makategwa, ni wuzundzu, ni wudhumo ni wufumu, si na ningwe ga Wule a khadego vbagikhalotunu nya wufumu ni ga Ginvutana kala gupindruga.” 14 Sivangwa sile nya 4 nyo vbanye, si di gu khiso: “Amen!” nigu madhota ma di khidzima ma khozeya Nungungulu.

6 Nyi di wona Ginvutana na gi tula gimwegyo nya 7 sifungo, nyi bwe nyipwa gimwegyo nya sivangwa sile nya 4 nyo vbanye, na gi gu ganeya khu lito nyo dzume nga libara, khigyo: “Delu!” 2 Nyi di wona kavhalu nyo age. Wule a nga ba a yi khilede a diri ni wulaho; a di ningwa korowa, a bwe a duga gasi gu ya pala valala vaye, nigu va pade kamo.

3 Tepo a nga tula gifungo nya wuvili, nyi dipwa givangwa nya wuvili nyo vbanye na gi gu khigyo: “Delu!” 4 Yi di duga yimbe kavhalu nyo fuviye. Wule a nga ba a yi khilede a di dzumeledwa gu dusa gurula mafuni gasi gu vathu va songana khu gyawe, a bwe a ningwa xipadha nya yikhongolo.

5 Tepo a nga tula gifungo nya wuraru, nyi dipwa givangwa nya wuraru nyo vbanye na gi gu khigyo: ”Delu!” Nyi di wona kavhalu nyo sivbale, wule a nga ba a yi khilede a diri ni gikalo* mandzani. 6 Nyi dipwa gilo nyo khatshi lito vbakari nya 4 sivangwa nyo vbanye, na li gu khilo: “Kilu nya trigu dhenaryo* mweyo ni gu dzikilu dziraru nya sevhadha dhenaryo mweyo. U nga haganiseyi mafura nya miolivha ni vhinyu.”

7 Tepo a nga tula gifungo nya wu 4, nyi dipwa lito nya givangwa nya wu 4 nyo vbanye, na li gu khilo: “Delu!” 8 Nyi di wona kavhalu nyo kwalale, wule a nga ba a yi khilede a di gu ranwa pwani Lufu ni gu Lithowo* li di gu mu landreya khu vbafuvbi. Va di ningwa tshivba nya gu songe muthu moyo avba nya 4 vathu* khu xipadha nyo laphe, ndzala, tungo nya gu songe ni sirengo nya likhabi.

9 Tepo a nga tula gifungo nya wu 5, nyi di wona novba vbavbatshi nya alitari wa ava va nga songwa khu kotani nya lito la Nungungulu ni wufakazi va wu ningedego. 10 Va di gu huweleya khu lito nyo khugege, khavo: “Pfhumu nya Gukhugege, nya guage ni lisine, kala lini na wu nga si lamuli ava va vbanyago mafuni, ni gu phodzeya novba wathu va wu vbaladzidego?” 11 Moyo ni moyo wawe a di ningwa sombo nyo laphe ni gu aga, va bwe va embedwa pwani va na hefemule gambe vbadugwana kala gu eneya tengo nya sithumi sikwawe ni vandruyi va nga ba vari vbafuvbi ni gu songwa, nga avo.

12 Nyi di mu wona na gu tula gifungo nya wu 6, nigu gu di manega girevareva nya gikhongolo; lidambo li di sivbala nga mwendra nyo sivbale,* ngima watshavbo wu gira khatshi novba, 13 dzinyeledzi dza ndzadzini dzi di thega vbavbatshi nga nguyu wu thegeleyago dzifigu nya dzimbihu khu gu kutsungwa khu phuvbo nya yikhongolo. 14 Ndzadzini gu di fumbwa nga khatshi i rolu, gu mwalalega. Ni gu sigomo satshavbo ni sidwani satshavbo si di duswa khu malangani yaso. 15 Khavbovbo, dzipfhumu nya mafu, vafumeyi, vakomandante nya masotshwa, sighanyi, va nya tshivba, sithumi satshavbo ni vathu vatshavbo nyo tshulege va di sihala omu nya dziphago ni omu nya sigomo nya siwindri. 16 Va di gu embeya sigomo ni siwindri, khavo: “Hi thegeyeni, mu hi siha ga Wule a khadego vbagikhalotunu nya wufumu ni ga zanga nya Ginvutana, 17 kholu li vbohide litshigu nya likhongolo nya zanga yawe. Khu mani a na li tiyelago?”

7 Hwane nya isoso, nyi di wona 4 dzingilozi na dzi emide omu nya 4 dzikhona nya mafu, na dzi mode gwadi 4 dziphuvbo nya mafu gasi gu ne ni phuvbo mweyo yi si furugedzi mafuni, linene, ambari misimbo. 2 Nyi di wona yimbe ngilozi na yi gweya khu khuga-dambo, na yi pharide gifungo gya Nungungulu a vbanyago. Yi di huweleya khu lito nyo khugege ga edzi dzimbe dzingilozi nya 4 dzi nga ba dzi dzumeledwe gu saseya mafu ni linene, 3 khiyo: “Mu nga saseyi mafu, ne linene, ne misimbo, kala hi funga siwombo nya sithumi sa Nungungulu wathu.”

4 Khavbovbo, nyi dipwa tengo nya ava va fungidwego. Gu diri 144 000, va nga ba va dugeya omu nya mahundzu yatshavbo nya sanana sa Israyeli:

9 Hwane nya isoso, nyi di wona vathu nya vangi ngudzu nya gu mwalo muthu a si kodzago gu va kotari. Va di gu dugeya omu nya mayigo yatshavbo, mahundzu yatshavbo, mafumbo yatshavbo ni malimi yatshavbo. Va di emide mbeli nya gikhalo nya wufumu, ni mbeli nya Ginvutana, na va ambade sombo nyo laphe nya gu age, nigu va di pharide migindru mandzani. 10 Va di gu huweleya khu lito nyo khugege, khavo: “Guvbanyiswa ga guta khiyo ga Nungungulu wathu, a khadego vbagikhalotunu nya wufumu ni ga Ginvutana.”

11 Dzingilozi dzatshavbo dzi di emide, dzi randreya gikhalo nya wufumu, madhota ni 4 sivangwa nyo vbanye. Dzi di khidzima dzi kuha vbavbatshi khu khovbe mbeli nya gikhalo nya wufumu, dzi khozeya Nungungulu, 12 khidzo: “Amen! Rungudzu, ni wudhumu, ni wugengeyi, ni gubonga, ni wuzundzo, ni wufumu ni tshivba sa gu lumba Nungungulu wathu kala gupindruga ni gupindruga. Amen.”

13 Khavbovbo, limwedo nya madhota li di nyi wudzisa, khilo: “Khu vamani ava va ambadego sombo nyo laphe ni gu aga, nigu vo guta khu hayi?” 14 Nyi di dzegeya gu li hlamula, kheni: “Pfhumu yangu, uwe khuwe u dzitigo!” Li di nyi hakha, khilo: “Va gu dugeya khiyo nya tshanisa nya yikhongolo. Va handzide sombo sawe nyo laphe, va si agisa novbani nya Ginvutana. 15 Khiso si va girago va ema mbeli nya gikhalo nya wufumu wa Nungungulu, va gira thumo nya guage wutshigu ni mihani tempeleni gwaye. Wule a khadego avba nya gikhalo nya wufumu a na va vhikeya.* 16 Kha va na ngapwa gambe ndzala ne lidora. Lihani ni guvbisa kha si na nga va tshanisa gambe, 17 kholu Ginvutana gi gomogo vbakari nya gikhalo nya wufumu, gi na va havisa, gi bwe gi va yisa avba nya sifefe nya mati nya womi, ni gu Nungungulu a na bavbula marongo yatshavbo mahoni gwawe.

8 Tepo a nga tula gifungo nya wu 7, ndzadzini gu di gira tsadego* khu gipimo nya metadi nya ora. 2 Khavbovbo, nyi di wona 7 dzingilozi dzi nga ba dzi emide mbeli ga Nungungulu, idzo dzi di ningwa 7 mipundru.

3 Gu di vboha yimbe ngilozi yi nga ba yi pharide gyombo nya oru nya gu vbiseye umo libani, yi ta ema avba nya alitari. Iyo yi di ningwa libani nya lingi gasi gu gira ningelo vbatshani nya alitari nya oru yi nga ba yi romo mbeli nya gikhalo nya wufumu gumogo ni milombelo ya vatshavbo va nya guaga. 4 Khu mandzani nya ngilozi, wutshi nya libani wu di gweya wu hongola ga Nungungulu gumogo ni milombelo ya va nya guaga. 5 Khu kharato, ngilozi yi di dzegeya gu dzega gyombo nya guvbiseye umo libani yi gi tadza khu nilo wa avba nya alitari yi gi rinya mafuni. Khavbovbo, gu di pwala mabara, malito, gulasa ni girevareva. 6 Dzingilozi dzile nya 7 dzi nga ba dziri ni 7 mipundru, dzi di dzi dongiseya gasi gu yi womba.

7 Ngilozi nyo pheye yi di womba pundru wayo, gu manega maralala ni nilo si nga ba si patidwe ni novba si rinywa mafuni. Gipandre nya wuraru nya mafu gi di vbiswa, gipandre nya wuraru nya misimbo gi vbiswa, mwasi watshavbo nyo vbanye wu vbiswa.

8 Ngilozi nya wuvili yi di womba pundru wayo. Gilo nyo khatshi gigomo nya gikhongolo gi nga ba gi khondra gi di rinywa linene. Gipandre nya wuraru nya linene gi di vbindrugedza gi khala novba; 9 gipandre nya wuraru nya sivangwa nyo vbanye sa linene si difa, nigu gipandre nya wuraru nya dzinavhiyu gi di tshungunudwa.

10 Ngilozi nya wuraru yi di womba pundru wayo. Gu thega nyeledzi nya yikhongolo khu ndzadzini, yi nga ba yi khondra nga khatshi mwenge. Iyo yi di thegeya gipandre nya wuraru nya mitsongo ni sifefe nya mati. 11 Lina nya nyeledzi yoyo yi di gu ranwa pwani Simbo nya guvave.* Gipandre nya wuraru nya mati gi di vbindrugedza gi vava; vathu nya vangi va difa khu kotani nya mati kholu ma di gu vava.

12 Ngilozi nya wu 4 yi di womba pundru wayo. Gu di thaphedwa gipandre nya wuraru nya lidambo, gipandre nya wuraru nya ngima ni gipandre nya wuraru nya dzinyeledzi, gasi gipandre nya wuraru nya silo sesi gi sivbala, nigu gipandre nya wuraru nya mihani gi sivbala, ni gipandre nya wuraru nya wutshigu nigyo.

13 Nyi dipwa ni gu wona lighama li nga ba li vbuvba khu vbakari, ndzadzini, na li gu ganeya khu lito nyo khugege, khilo: “Libango, libango, libango ga ava va vbanyago mafuni khu kotani nya mipundru yi tshadego gu wombwa, eyi dzingilozi dziraru dzi gomogo vbafuvbi ni gu yi womba.”

9 Ngilozi nya wu 5 yi di womba pundru. Nyi di wona nyeledzi ya ndzadzini yi nga thega mafuni, yi ningwa pfhungulu nya liphala nya likhongolo ngudzu. 2 Nyeledzi* yeyi yi di tula liphala lile nya likhongolo ngudzu, gu duga wutshi khu phalani mule wu nga ba wu fana ni wutshi nya nilo nya wukhongolo ngudzu, nigu lidambo ni phuvbo aniso si di sivbala khu kotani nya wutshi wu nga ba wu duga khumo nya liphala. 3 Khomu nya wutshi gu di duga khaba, wu phalalega mafuni gwatshavbo. Uwo wu di ningwa tshivba nya nga eyi yi ningidwego dzihume. 4 Uwo wu di embedwa gu pwani wu nga ghoheteyi mwasi, sisimbwana mwendro misimbo nya yikhongolo, ganiolu wu na saseye basi vathu va gu mwalo gifungo gya Nungungulu vbagiwombotunu.

5 Khaba kha wa dzumeledwa gu va songa, ganiolu wu di dzumeledwa gu va tshanisa khu 5 migima. Mahodzelo nya khaba wowo, ma di gu vbisa nga khatshi gu hodzwa khu hume. 6 Matshigoni yoyo, vathu va na vbweta lufu, ganiolu kha va na nga li mana; va na dogoreya ni gufa, ganiolu gufa gu na va tutuma.

7 Khaba wowo wu di gu fana ni dzikavhalu dzi dongisedwego gasi gu hongola nyimbitunu. Hungoni gwawo wu diri ni silo nya khatshi dzikorowa nya oru, dzikhovbe dzawo dzi di gu fana ni dzikhovbe nya vathu, 8 ndzudzu wawo wu di gu fana ni ndzudzu nya vanyamayi, nigu magwaha yawo ma di gu fana ni magwaha nya dzingala. 9 Wu diri ni sivhikelo nya dzikhana nga khatshi sivhikelo nya dzikhana nyo girwe khu simbi. Ligwaha nya mambapi yawo li di gu fana ni ligwaha nya dzikareta tepo dzi tutumago dzi hongola nyimbitunu. 10 Migiya yawo yi di gu fana ni migiya nya dzihume, nigu tshivba yawo nyo saseye vathu khu 5 migima yomo avba nya ngiya wakone. 11 Iyo yi di gu thangedwa khu pfhumu, a gu ngilozi nya liphala nya likhongolo ngudzu. Khu Gihebheru yo ranwa pwani Abhadhoni,* ganiolu khu Gigreki pwani Apollion.*

12 Libango limwedo li vbindride, ganiolu hwane nya eli ma ngo guta gambe mabango mavili.

13 Ngilozi nya wu 6 yi di womba pundru wayo, nyi dipwa lito li nga ba lita khu vbakari nya dzikeho nya altari nya oru yi gomogo mbeli ga Nungungulu, 14 na li gu embeya ngilozi nya wu 6, yi nga ba yiri ni pundru, khilo: “Tshula 4 dzingilozi dzi hungidwego tsongoni nya wukhongolo wa Ewufrate.” 15 Dzingilozi dzile nya 4 dzi nga ba dzi dongisedwe dzi vireya ora, litshigu, ngima ni mwaga dzi di tuledwa gasi gu ya songa muthu moyo avba nya vathu vararu.*

16 Tengo nya masotshwa ma nga ba ma khilede dzikavhalu wu diri 200 dzimiliyoni; nyi wu pwide tengo wakone. 17 Omu nya giwoniso gyangu, dzikavhalu ni vale va nga ba va dzi khilede va diri ni sivhikelo nya dzikhana nyo fuviye nga nilo, nya azul ni nya amarelo; mihungo nya dzikavhalu yi di gu fana ni mihungo nya dzileyawu, nigu khu kanani gwadzo gu di gu duga nilo, wutshi ni exofre. 18 Gipandre nya wuraru* nya vathu gi di songwa khu mitungu yiraru, a gu eyi: Nilo, wutshi ni exofre, si nga ba si duga khu kanani gwadzo. 19 Kholu tshivba nya dzikavhalu dzedzi yomo kanani ni ngiyatunu, kholu migiya yakone yo fana ni nyoga nigu yi na ni mihungo, a gu iso dzi saseyago khiso.

20 Ganiolu, vathu vale va nga tshalago va si songwi khu mitungo yeyi, kha va dzi laya avba nya mithumo nya mandza yawe; avo kha va diga gu khozeya madhimoni ni sifananiso nyo girwe khu oru, prata, kobre ni misimbo, si si kodzigo gu wona, gupwa, ne gu gimbiya. 21 Avo kha va dzi laya avba nya wughevenga wawe, wuloyi, wubhayi* ni wuvafa.

10 Nyi di wona yimbe ngilozi nya tshivba na yi gu tshiga khu ndzadzini na yi ambade lipfhi, hungoni gwayo gu diri ni arku-iris,* khovbe yaye yi di gu gira khatshi lidambo nigu mawundru yaye ma di gu gira khatshi dzipilari nya nilo, 2 Mandzani gwaye gu diri ni rolu* nya yidugwana yi nga ba yi tudwe. Yi di gandra linene khu ngondro wa nyamudye, ganiolu owu wa nyambade yi gandra mafu. 3 Yi di huweleya khu lito nyo khugege nga khatshi ngala yi ngurangurago. Tepo yi nga rana, malito nya 7 mabara ma di ganeya.

4 Tepo 7 mabara ma nga ganeya, eni nyi di gu vbweta gu lova, ganiolu nyi dipwa lito na li guta khu ndzadzini, khilo: “Vegedza kha nga sihalo silo sesi si nga ganedwa khu 7 mabara, u nga si lovi.” 5 Ngilozi nyi nga yi wona na yi emide yi gandra linene ni mafuni yi di khusedza vbatshani* libogo la nyamudye, 6 yi di bwe yi sambanya khu Wule a vbanyago kala gupindruga ni gupindruga, a giridego ndzadzi ni satshavbo si gomogo ndzadzini, a gira mafu ni satshavbo si gomogo mafuni a bwe a gira linene ni satshavbo si gomogo omu nya linene, khiyo: “Tepo nya gu vireye yi vbede. 7 Ganiolu, matshigoni aya ngilozi nya wu 7 yi na vbwetago gu womba pundru wayo, khu lisine gu na tadzisega sihalo nya guage, owu Nungungulu a wu huweledego nga mahungu nya yadi ga sithumi saye, a gu vaprofeti.”

8 Nyi dipwa lito na li guta khu ndzadzini na li gu nyi embeya gambe, khilo: “Gimbiya u ya dzega rolu yi tudwego yi gomogo mandzani nya ngilozi yi emidego yi gandra linene ni mafu.” 9 Nyi di hongola ga ngilozi yile, nyi ya yi embeya gu kheni yi nyi ninga rolu yile nya yidugwana. Iyo yi di nyi hakha, khiyo: “Dzega u hodza, yi na gira gu ndrani* gwago gu vava, ganiolu kanani gwago yi na lovbeya nga wulombe.” 10 Nyi di dzega rolu yile nya yidugwana mandzani nya ngilozi nyi hodza, kanani gwangu yi di lovbeya nga wulombe, ganiolu tepo nyi nga vbedza gu hodza ndrani gwangu gu di vava. 11 Khavbovbo, va di nyi embeya gambe, khavo: “U yede gu profeta gambe maningano ni vathu, mayigo, malimi ni dzipfhumu nya dzingi.”

11 Nyi di ningwa tshava nya gu fane ni ndronga, na nyipwa lito na li gu khilo: “Khuga u pima wulanga nya guage ngudzu tempeleni ya Nungungulu ni alitari ni ava va khozeyago mule. 2 Ganiolu, vbavbandze nya wulanga nyo age nya tempele u nga gu pimi kholu gu ningedwe ga vanyamayigo, nigu avo va na gandredzeya lidhoropa nyo age khu 42 migima. 3 Nyi na gira gu dzifakazi dzangu nya dzimbili dzi profeta khu 1260 matshigu na dzi ambade dzisaku.” 4 Idzo dza gu emedwa khu mioliva mivili ni dzikandriya dzimbili, nigu dzi emide mbeli ga Pfhumu nya mafu.

5 Uye a na vbwetago gu bayisa dzikafazi dzedzi gu na duga nilo khu kanani gwadzo wu vbisa valala vadzo. A na songwa kharato uye a na vbwetago gu bayisa dzifakazi dzedzi. 6 Idzo dzi na ni tshivba nya gu sege ndzadzini gasi gu siwi ndzadzi ndrani nya matshigu dzi na profetago, nigu dzi na ni tshivba nya gu vbindrugedze mati ma khala novba ni gu bayisa litigo khu mitungu yatshavbo khedzi dzi dzinago khidzo.

7 Tepo dzi na vbedzago gu ningeya wufakazi wadzo, girengo nya likhabi gi na duga khu phalani nya gukhongolo ngudzu gi ta dwana nadzo gi dzi pala, gi bwe gi dzi songa. 8 Sirumbi sadzo si na khala tshandzala omu nya ruwa nya yikhongolo ya dhoropani nya gukhongolo, ilo khu liphuvboni li ranwago pwani Sodhoma ni Egipto, a gu iyo Pfhumu yawe niyo yi songidwego avba nya simbo. 9 Sirumbi sawe si na wonwa khu vathu, mahundzu, malimi ni mayigo ndrani nya 3 matshigu, nigu kha va na nga dzumeledwa gu khavo sirumbi sawe si dzingwa. 10 Vavbanyi va mafuni va na tsaka khu kotani yadzo, nigu va na kulungeya va rumeyana sihiwa kholu vaprofeti vava va vavili va di gu tshanisa vavbanyi va mafuni.

11 Hwane nya matshigu yoyo ya mararu ni metadi, liphuvbo nya womi litago khiyo ga Nungungulu li di beya gwawe, nigu avo va di khuga va ema. Avo va nga va wona va di thava ngudzu. 12 Va dipwa lito nyo khugege na li guta khu ndzadzini, khilo: “Gweyani muta eno.” Va di gweya ndzadzini khu lipfhi, nigu valala vawe va va wonide. 13 Gu di manega girevareva nya gikhongolo, gu thega gipandre nya wu 10 nya lidhoropa; 7000 vathu va di songwa khu girevareva, ava vambe va nga tshala va di thava ngudzu, va dhumisa Nungungulu wa ndzadzini.

14 Libango nya wuvili li vbindride, ganiolu ilo nya wuraru li nguta khu guvbiredza.

15 Ngilozi nya wu 7 yi di womba pundru wayo. Gu di pwala malito nyo khugege khu ndzadzini, na ma gu khayo: “Mufumo nya litigo wu khade Mufumo wa Pfhumu yathu ni Kristo waye, nigu uye a na fuma kala gupindruga ni gupindruga.”

16 Madhota yale nya 24 ma nga ba ma khade omu nya sikhalo sawe nya wufumu mbeli ga Nungungulu, ma di khidzima ma kuha vbavbatshi khu dzikhovbe, ma khozeya Nungungulu, 17 na ma gu khayo: “Hi ngu gu bonga Jehovha Nungungulu, oyu nya Tshivba Yatshavbo, wule a gu romo, a nga ba a romo, kholu u dzegide tshivba yago nya yikhongolo u bwe u pheya gu fuma. 18 Ganiolu, mayigo ma di goroga, yita zanga yago yi bwe yita tepo yi emisidwego gasi gu lamula ava va fudego, gu tshatshazeya sithumi sago, a gu vaprofeti, va nyo aga, ni ava va ningago githawo lina lago, ava nya vadugwana ni ava nya vakhongolo, ni gu tshungunula ava va tshungunulago mafu.”

19 Khavbovbo, gu di tudwa wulanga nyo age nya tempele ya Nungungulu* eyi yi gomogo ndzadzini, gu wonega arka nya pwanano waye yi nga ba yi romo wulangani nyo age nya tempele yaye. Gu di lasa, gu pwala malito, mabara, girevareva ni maralala nya makhongolo.

12 Gu di wonega giwoniso nya gikhongolo ndzadzini: Nyamayi moyo a di ambade lidambo, nigu ngima wu di romo vbavbatshi nya migondro yaye, nigu hungoni gwaye gu diri ni korowa nya 12 dzinyeledzi. 2 Uye a diri ni mimba, nigu a di gu keta khu gu lumwa kholu a diri vbafuvbi ni gu hefemula.

3 Gu di wonega gimbe giwoniso ndzadzini; nyoga nya yikhongolo nyo fuviye,* yi nga ba yiri ni 7 mihungo ni 10 dzikeho, nigu omu nya mihungo yayo gu diri ni 7 dzikorowa. 4 Ngiya wayo wu di vbiyela gipandre nya wuraru nya dzinyeledzi dza ndzadzini wu dzi rinya vbavbatshi mafuni. Nyoga wowo nya wukhongolo wu di ema mbeli ga nyamayi a nga ba ari vbafuvbi ni gu velega gasi wu hodza gyanana gyaye o gara a hefemula.

5 Uye a di velega gyanana nya gikhwathana, gi na fumeyago* mayigo yatshavbo khu ndronga nya simbi. Gyanana gyaye gi di dzegeya gu ta dzegwa* gi yiswa ga Nungungulu ni ga gikhalo gyaye nya wufumu. 6 Nyamayi a di tutuma a hongola giwulani, umo gu gu na ni wulanga wu dongisedwego khu Nungungulu, avbo a nga hadzi hodziswa khu 1260 matshigu.

7 Khavbovbo, gu di wuga litunga nya likhongolo ndzadzini: Migeli* ni dzingilozi dzaye va di dwana ni nyoga nya yikhongolo eyi niyo yi nga ba yiri ni dzingilozi dzayo. 8 Ganiolu, nyoga nya yikhongolo ni dzingilozi dzayo kha va pala,* nigu kha va dzumeledwa gambe gu khala ndzadzini. 9 Khu kharato, nyoga nya yikhongolo,* a gu nyoga nya guhegule yi ranwago pwani Dhiyabhulosi ni Sathane, yi sengedzeyago vathu vatshavbo mafuni yi di rinywa vbavbatshi mafuni, nigu dzingilodzi dzayo dzi di rinywa vbavbatshi gumogo nayo. 10 Nyi dipwa lito ndzadzini na li gu huweleya khu tshivba ni tshivba, khilo:

“Olu, gu vbohide guvbanyiswa, ni tshivba, ni Mufumo wa Nungungulu wathu ni wufumu wa Kristo waye, kholu musingedzi nya vandriyathu a va singedzago wutshigu ni mihani mbeli ga Nungungulu wathu rinyidwe vbavbatshi. 11 Avo va mu pade khu kotani nya novba nya Ginvutana ni kotani nya wufakazi wawe, nigu avo kha va feleya womi* wawe ambari tepo si nga lomba gu va emisana ni gufa. 12 Khu gighelo gyogyo, tsakani enu ndzadzini ni enu mu vbanyago umo. Ganiolu, libango gwanu enu mafu ni linene, kholu Dhiyabhulosi tshigide gwanu nari ni zanga nya yikhongolo, kholu a ngu dziti gu khuye tepo a tshaledwego khiyo yidugwana.”

13 Tepo nyoga nya yikhongolo yi nga wona gu khiyo yi rinyidwe vbavbatshi mafuni, yi di tshanisa nyamayi wule a nga velega gyanana nya gikhwathana. 14 Ganiolu, nyamayi wule a di ningwa mambapi mavili nya lighama nya likhongolo gasi a vbuvba a hongola giwulani, wulanga waye, iyo a nga hadzi hodziswa khu tepo, dzitepo ni metadi nya tepo* nari hwindzo ni nyoga yile.

15 Nyoga yi di gosa mati kha nga tsongo hwane ga nyamayi, gasi nyamayi a dzama umo nya tsongo wowo. 16 Ganiolu, mafu ma dita ma ta phasedzeya nyamayi, ayo ma di tula likana ma midza tsongo wule wu nga goswago khu nyoga yile nya yikhongolo. 17 Khavbovbo, nyoga yile nya yikhongolo yi di zangareya nyamayi wule, yi khuga yi ya dwana ni sanana* saye si nga ba si tshade, a gu ava va engisago milayo ya Nungungulu, a gu avo va gu na ni thumo nyo ningeye wufakazi maningano ni Jesu.

13 Uye* a di ema funguni.

Khavbovbo, nyi di wona girengo nya likhabi na gi gu duga khu matini. Girengo gyogyo gi diri ni 10 dzikeho ni 7 mihungo, nigu omu nya dzikeho dzagyo gu diri ni 10 dzikorowa, ganiolu omu nya mihungo yagyo gu diri ni malina ma nga ba ma valeteya. 2 Girengo nya likhabi nyi nga gi wona gi di gu fana ni leyopardho, ganiolu migondro yagyo yi di gu fana ni migondro nya ursu, nigu likana lagyo li di gu fana ni likana nya ngala. Nyoga nya yikhongolo yi di ninga girengo gyogyo nya likhabi tshivba, gikhalo gyagyo nya wufumu ni wufumu nya wukhongolo.

3 Nyi di wona moyo nya mihungo yayo na wu bayisidwe ngudzu, ganiolu gilondra gyogyo nya gikhongolo gi di hawulugiswa; nigu mafu yatshavbo ma di gu landreya girengo gegi nya gikhongolo na ma gu hlamala. 4 Avo va di gu khozeya nyoga nya yikhongolo kholu yi di ningide wufumu girengo gile nya likhabi, nigu va di gu khozeya girengo nya likhabi, khavo: “Khu mani a fanago ni girengo nya likhabi, nigu khu mani a nga si kodzago gu dwana nagyo?” 5 Girengo nya likhabi gi di ningwa likana li nga ba li ganeya silo nyo dzi khusedze ni gu valeteya, gi di ningwa gambe wufumu gasi gu fuma khu 42 migima. 6 Igyo gi di tula likana gasi gu vala Nungungulu, gi di vala lina laye, gi vala avbo a khalago avbo gi bwe gi vala ava va vbanyago ndzadzini. 7 Gi di dzumeledwa gu dwana ni va nya guaga gi bwe gi va pala, nigu gi ningidwe wufumu nya gu fumeye mahundzu yatshavbo, vathu vatshavbo, malimi yatshavbo ni mayigo yatshavbo. 8 Vatshavbo ava va vbanyago mafuni va na gi khozeya. Gukhugeya guvangwani nya litigo mwalo ni moyo wawe gu lovidwego lina laye omu nya libhuku* nya womi la Ginvutana gi songidwego.

9 Oyu a gu na ni dzindzeve a napwe. 10 Oyu si lombago gu a hongola wugumbini, a na hongola wugumbini. Oyu a na songago khu xipadha, anuye a na songwa khu xipadha. Va nya guaga gu vbwetega va yeyedza gutimiseya ni gukhodwa.

11 Khavbovbo, nyi di wona gimbe girengo nya likhabi na gi gu duga khu mafuni, igyo gi diri ni dzikeho dzimbili nyo fane ni dzikeho nya ginvutana, ganiolu gi di pheya gu ganeya ni nyoga nya yikhongolo. 12 Igyo gyo thumisa tshivba yatshavbo nya girengo nyo pheye nya likhabi na giri mbeli gwagyo. Gyo gira gu mafu ni ava va vbanyago mafuni va khozeya girengo nyo pheye nya likhabi, egi gi hawulugisidwego gilondra gyagyo nya gikhongolo. 13 Nigu gi ngu gira siwoniso nya sikhongolo, gi ngu kodza gambe gu tshisa nilo khu ndzadzini na gi gu wonwa khu vathu.

14 Igyo gi ngu kanganyisa ava va vbanyago mafuni khu kotani nya silewugiso gi dzumeledwego gu gira na gi gu wonwa khu girengo nya likhabi, na gi embeya ava va vbanyago mafuni gu khigyo va gira gifananiso nya girengo nya likhabi gi nga bayiswa khu xipadha gi bwe gi hawuluga. 15 Igyo gi dzumeledwe gu ninga gifananiso nya girengo nya likhabi makodzelo nya gu gi vbanya, gasi gifananiso nya girengo nya likhabi gi ganeya gi bwe gi gira gu vatshavbo va bombago gu gi khozeya va songwa.

16 Igyo gyo gurumedza vathu vatshavbo, nya vadugwana ni ava nya vakhongolo, ava va ghanyidego ni sisiwana, ava va tshulegidego ni dzigumbi gu hakha gifungo mandzani gwawe ga nyamudye mwendro vbagiwombotunu, 17 gasi ne moyo a si rengi mwendro gu rengisa, vbavbandze ga wule a gu na ni gifungo, si thulago lina nya girengo nya likhabi mwendro numeru nya lina lagyo. 18 Esi so vbweta wugengeyi: Uye a gengedego a na tugule numeru nya girengo nya likhabi, kholu numeru nya muthu; numeru yagyo 666.

14 Khavbovbo, nyi di wona Ginvutana na gi emide Gigomoni gya Siyoni, na giri ni 144 000 vathu, ava va lovidwego lina nya Ginvutana ni la Papayi wagyo siwomboni sawe. 2 Nyi dipwa ligwaha na li guta khu ndzadzini nga khatshi ligwaha nya mati nya mangi li bwe gambe khatshi libara nya likhongolo; ligwaha nyi nga lipwa li di gu gira khatshi khya vaembeleyi va embago ni gu womba sitendre sawe. 3 Va di gu emba ndzimo nyo khatshi ndzimo nya yiphya na va emide mbeli nya gikhalo nya wufumu ni mbeli nya 4 sivangwa nyo vbanye ni madhota. Mwalo a nga ba a si kodza gu hevbuleya ndzimo yoyo vbavbandze basi nya ava nya 144 000 va rengidwego mafuni. 4 Ava khavo va nga mba dzi nyenyezisa khu vanyamayi. Khu lisine, avo va agide.* Va gu landreya Ginvutana ni hayini gi hongolago. Avo va rengidwe vbakari nya vathu kha nga mihandro nyo pheye ga Nungungulu ni ga Ginvutana. 5 Kanani gwawe kha gwa manwa wukanganyisi, nigu gimwalo gi sodwago gwawe.

6 Nyi di wona yimbe ngilozi na yi gu vbuvba vbatshani na yiri ni mahungu nya yadi nya gupindruge gasi gu huweleya ga ava va vbanyago mafuni, ga mayigo yatshavbo, ga mahundzu yatshavbo, ga malimi yatshavbo ni ga vathu vatshavbo. 7 Yi di gu ganeya khu lito nyo khugege, khiyo: “Ningani githawo Nungungulu mu bwe mu mu ningani wudhumo kholu yi vbohide tepo nya gulamule gwaye. Khu kharato, khozeyani wule a giridego ndzadzi, mafu, linene ni sifefe nya mati.”

8 Khu gulandreya, yi dita ngilozi nya wuvili na yi gu khiyo: “Thegide! Thegide Bhabhiloni nya khongolo a nga ba a gira gu mayigo ma seya vhinyu nya gu dogoreye* nya wubhayi* waye.”

9 Gu di landreya ngilozi nya wuraru na yi gu ganeya khu lito nyo khugege, khiyo: “O gara muthu a khozeya girengo nya likhabi ni gifananiso gyagyo a bwe a hakha gifungo giwomboni ni mandzani, 10 a na seya nuye vhinyu nya zanga ya Nungungulu yi nga vbaladzwa, yi nga mba futungedzwa* koponi nya zanga Yaye a bwe a tshaniswa khu nilo ni enxofre na gu wonwa khu ndzingilozi nyo age ni Ginvutana. 11 Wutshi nya tshanisa* yaye wu na gweya kala gupindruga ni gupindruga. Avo va khozeyago girengo nya likhabi ni gifananiso gyagyo ni ava va hakhago gifungo nya lina lagyo kha va na nga hefemula wutshigu ni mihani. 12 Khu kharato, va nyo aga, a gu ava va sayisago sileletelo sa Nungungulu ni gu phareleya si tiya avba nya gukhodwe ga Jesu, va yede gu timiseya.”

13 Khu kharato, nyi dipwa lito na li guta khu ndzadzini, na li gu khilo: “Lova gu khuwe: Gukhugeya olu kala mbeli, va ngu tsaka ava va fago na va gu pwanana ni Pfhumu. Liphuvbo nya guage lari khilo va na hefemule mithumoni yawe nya gudzigaradze, kholu mithumo yawe yi ngu va landreya.”*

14 Nyi di wona gambe lipfhi nyo age, vbatshani nya lipfhi lolo, gu di khade moyo nyo fane ni gyanana nya muthu, na ambade korowa nya oru hungoni nigu a di pharide sikela* nyo vbire mandzani.

15 Yimbe ngilozi yi di duga khu wulanga nyo age ngudzu wa tempeleni, yi khusedza lito yi ganeya ni wule a khadego avba nya lipfhi, khiyo: “Dzega sikela yago u vbwera, yi vbohide tepo nyo vbwere kholu dzimbewu dza mafuni dzi vidzidwe.” 16 Oyu a nga ba a khade avba nya lipfhi, a di reledza givbwero gyaye mafuni, khavbovbo dzimbewu dza mafuni dzi di vbwerwa.

17 Gu di duga yimbe ngilozi khu wulanga nyo age nya tempele yi gomogo ndzadzini, nigu aniyo yi di pharide sikela nyo vbire.

18 Gu di duga yimbe ngilozi khavba nya alitari. Iyo yi diri ni makodzelo nyo rumeye nilo ni hayini yi gu vbwetago. Yi di khusedza lito, yi embeya uye a nga ba a pharide sikela nyo vbire, khiyo: “Dzega sikela yago nyo vbire u pileleya sitsatsa nya dziuvha dza mafuni kholu dzi vidzidwe.” 19 Ngilozi yi di reledza sikela yayo mafuni, yi vbwera dziuvha dza mafuni yi bwe yi dzi theya omu nya gigholowo* nya gikhongolo nya zanga ya Nungungulu. 20 Dziuvha dzi di sugedwa vbavbandze nya lidhoropa, gu duga novba khomu nya gigholowo wu maneya matomu nya dzikavhalu khu pfhuka nya gipimo nya 296 dzikilometro.*

15 Nyi di wona gimbe giwoniso nya gikhongolo nya gu samadzise ndzadzini, 7 dzingilozi dzi nga ba dziri ni 7 mabango. Aya khayo mabango nya guhegise nigu tepo ma na vbeyago, zanga ya Nungungulu niyo yi na vbeya.

2 Nyi di wona gilo nya gu fane ni yiphwa nya livhidru nyo patwe ni nilo, ava va padego girengo ni gifananiso gyagyo ni numeri yagyo, va di emide bambe nya yiphwa nya livhidru na va pharide sitendre sa Nungungulu. 3 Va di gu embeleya ndzimo ya Mosi, githumi gya Nungungulu, ni ndzimo nya Ginvutana, khavo:

“Jehovha Nungungulu nya Tshivba Yatshavbo, sigiro sago sikhongolo nigu si ngu samadzisa. Dzindziya dzago dzi lulamide, dzi na ni lisine, uwe Pfhumu nya gupindruge ni gupindruga. 4 Khu mani a gu mba gu ninga githawo uwe Jehovha, a si dhumisi lina lago? Kholu khuwe wenga u tumbegidego. Mayigo yatshavbo ma nata ma ta gu khozeya, kholu milayo yago nya gu lulame yi tivegisidwe gwawe.”

5 Khu hwane nya isoso, nyi di wona wulanga nya guage ngudzu nya tempele nya wufakazi na gu tudwe ndzadzini, 6 khu wulanga wule nya guage gu di duga 7 dzingilozi dzile dzi nga ba dziri ni 7 mabango, na dzi ambade sombo nya linyu nya yadi, nyo khendzige ni mabhandri nya oru vbakhanatunu. 7 Gimwegyo nya sivangwa sile nya gu vbanye nya 4 gi di ningeya 7 dzitijela nya oru ga 7 dzingilozi na dzi tade khu zanga ya Nungungulu, oyu a vbanyago kala gupindruga ni gupindruga. 8 Wulanga wule nyo age ngudzu wa tempeleni wu di tala khu wutshi khu kotani nya wudhumo wa Nungungulu ni wufumu waye nigu mwalo a nga ba a si kodza gu beya ga wulanga wule nya guage, kala gu vbeya 7 mabango nya 7 dzingilozi.

16 Nyi dipwa lito nya gu khugege ngudzu, na li gu duga khu wulangani nya guage, li embeya dzingilozi dzile nya 7, khilo: “Gimbiyani mu ya vbaladza mafuni 7 dzitijela nya zanga ya Nungungulu.”

2 Ngilozi nyo pheye yi di ya vbaladza tijela yayo mafuni. Vathu vale va nga ba vari ni gifungo nya girengo nya likhabi ni gu khozeya gifananiso gyagyo, va di beledwa khu silondra nya guvbise ni gu thisa ngudzu.

3 Ngilozi nya wuvili yi di guhula tijela yayo linene. Linene li di vbindrugedza li khala novba nya khatshi khya muthu nya gufe, gufa sivangwa satshavbo nya guvbanye si nga ba si romo linene.

4 Ngilozi nya wuraru yi di guhula tijela yayo omu nya mitsongo ni omu nya sifefe nya mati, si vbindrugedza si khala novba. 5 Nyi dipwa ngilozi yi woneleyago mati na yi gu khiyo: “Uwe, wule a gu romo, a nga ba a romo, u tumbegidego, u lulamide, kholu u reside gulamula gogu, 6 kholu va vbaladzide novba wa va nya guaga ni owu nya vaprofeti, nigu uwe u va ningide novba gasi gu seya, isoso si ngu va yela.” 7 Nyi dipwa lito na li gu duga khavbo nya alitari, na li gu khilo: “Khu lisine, Jehovha Nungungulu, oyu nya Tshivba Yatshavbo, gulamula gwago khwa lisine nigu gululamide.”

8 Ngilozi nya wu 4 yi di guhula tijela yayo vbatshani nya lidambo. Lidambo li di dzumeledwa guvbisa vathu khu nilo. 9 Vathu va di hahudwa khu lihani nya likhongolo, ganiolu va vala lina la Nungungulu, oyu a gu na ni tshivba nya gu rumeye mitungu yeyi, nigu kha va dzi laya, ne kha va mu dhumisa.

10 Ngilozi nya wu 5 yi di guhula tijela yayo vbatshani nya gikhalo nya wufumu nya girengo nya likhabi. Mufumo wakone wu di khala gidema, vathu va dzi hodza lidimi khu gupwa guvbisa. 11 Avo va di vala Nungungulu wa ndzadzini khu kotani nya olu va nga ba vapwa guvbisa ni gupwa silondra, ganiolu kha va dzi laya avba nya mithumo yawe.

12 Ngilozi nya wu 6 yi di guhula tijela yayo tsongoni nya wukhongolo wa Ewufrate, mati nya tsongo ma di banga, gasi gu dongiseleya ndziya dzipfhumu dza khuga-dambu.

13 Nyi di wona malito mararu nya mba handzega,* nya gu fane ni vanyakhele na ma gu duga khu kanani nya nyoga nya yikhongolo ni kanani nya girengo nya likhabhi ni kanani nya muprofeti nya malipha. 14 Khu lisine, ayoyo malito ma tago khiyo nya madhimoni ma girago siwoniso. Ayo ma gu hongola ga dzipfhumu nya mafu yatshavbo, ma ya dzi tshanganisa gasi gu dwana nyimbi nya litshigu nya likhongolo la Nungungulu, oyu nya Tshivba Yatshavbo.

15 “Nyi nguta kha nga mbafa. A ngu tsaka wule a khalago na dongide, a khala ni sombo saye vbafuvbi, gasi gu a si gimbiyi wumbwiri vathu va wona dzitsoni dzaye.”

16 Malito yoyo nya mba handzega ma di tshanganisa dzipfhumu ga wulanga khu Gihebheru wu ramwago pwani Arimagedhoni.*

17 Ngilozi nya wu 7 yi di guhula tijela yayo ndrengelengeni. Khavbovbo, gu duga lito nya likhongolo khu wulangani nya guage, gukhugeya gikhalotunu nya wufumu, na li gu khilo: “Si tadzisegide!” 18 Gu di lasa gu pwala malito ni mabara, gu manega girevareva nya gikhongolo nya guhambane ni satshavbo si nga tshuka si girega gukhugeya guvangwani nya vathu. Gu diri girevareva nya gikhongolo ngudzu. 19 Lidhoropa nya likhongolo li di pandrega khu sipandre siraru, madhoropa nya mayigo ma thega, Nungungulu a dundruga Bhabhiloni nya Khongolo gasi gu mu ninga kopo nya vhinyu nya zanga yaye. 20 Sidwani satshavbo si di tutuma, sigomo si mwalalega. 21 Khu ndzadzini gu di thega maralala nya makhongolo, ma thegeya vathu. Limwedo ni limwedo li di gu peza gipimo nya 20 dzikilo.* Vathu va di vala Nungungulu khu kotani nya tungu nya maralala, kholu tungu wowu wu diri wukhongolo ngudzu.

17 Mweyo nya 7 dzingilozi dzi nga ba dziri ni 7 dzitijela, yi di nyi teya yi ta nyi embeya, khiyo: “Delu, nyi ta gu yeyedza gulamudwa ga liphuphulu nya likhongolo li khadego vbatshani nya mati nya mangi. 2 Dzipfhumu nya mafu dzi giride wubhayi* nalo, nigu vavbanyi va mafuni va levide khu vhinyu nya wubhayi* walo.

3 Yi di nyi dzega yi nyi yisa giwulani khu tshivba nya liphuvbo. Nyi di wona nyamayi a nga ba a khade vbatshani nya girengo nya likhabi nyo fuviye, gi nga ba gi tade khu malina ma nga ba ma valeteya, gi nga ba giri ni 7 mihungo ni 10 dzikeho. 4 Nyamayi yoyo, a di ambade sombo nyo dhure ngudzu nyo fuviye, a di dzi mburisede khu oru, siwindri nya lisima ni dziperola. Mandzani gwaye a di pharide kopo nya oru yi nga ba yi tade khu silo nya gu nyenyeze ni silo nya gu mba handzega nya wubhayi* waye. 5 Vbagiwombotunu gwaye gu di lovidwe lina nya sihalo nyo pwani: “Bhabhiloni nya Khongolo, mamayi nya maphuphulo ni silo nya gu nyenyeze sa mafuni.” 6 Nyi di wona gu kheni nyamayi a di levide khu novba wa va nya guaga ni novba wa dzifakazi dza Jesu.

Tepo nyi nga mu wona, nyi di hlamala ngudzu. 7 Khavbovbo, ngilozi yi di nyi wudzisa khiyo: “Khu ginani u hlamalago? Nyi na gu embeya sihalo wa nyamayi yoyu ni wa girengo nya likhabi a gi khiledego, gi gu na ni 7 mihungo ni 10 dzikeho: 8 Girengo nya likhabi u nga gi wona gi di romo, ganiolu gimwalo gambe, nya mba hweya gi na duga khu phalani nya gukhongolo ngudzu gi hongola gufuviswatunu nigu vavbanyi va mafuni, vale nya gu gukhugeya guvangwani nya litigo malina yawe kha ma lowa libhukuni nya womi, va na hlamala tepo va na wonago gu khavo girengo nya likhabi gi nga ba gi romo, gi mwalo gambe, ganiolu gi na wuya.

9 “Esi khiso si vbwetago wugengeyi ni guti: 7 mihungo yo emeya 7 sigomo avbo a khadego nyamayi. 10 Gu na ni 7 dzipfhumu: 5 dzi thegide, mweyo yi ngo gu fuma, nigu yimbe yi nga si vbohi, ganiolu tepo yi na vbohago, yi na fuma khu gitepwana. 11 Nigu girengo nya likhabi gi nga ba gi romo, ganiolu gi gu mwalo gambe, khiyo pfhumu nya wu 8, ganiolu gya gu dugeya ga edzi nya 7, nigu gya gu hongola gu fuviswatunu.

12 “10 dzikeho u dzi wonidego, dza gu emeya 10 dzipfhumu dzi si gu hakhigo mufumo, ganiolu dzi na hakha wufumu nya gu fume khu ora mweyo gumogo ni girengo nya likhabi. 13 Vatshavbo va na ni mapimo ya mamowo, avo va gu ninga tshivba ni wufumu wawe ga girengo nya likhabi. 14 Avo va na dwana ni Ginvutana, ganiolu kha nga olu igyo gi gu Pfhumu nya dzipfhumu ni Mufumeli nya vafumeli, gi na va pala. Nigu ava va gu nagyo, va ranidwego, va hathidwego va bwe va tumbega, anavo va na pala.”

15 Ngilozi yi di nyi embeya, khiyo: “Mati u ma wonidego avba li khadego liphuphulo, ma gu emeya vathu, gitshungu, mayigo ni malimi. 16 10 dzikeho u dzi wonidego ni girengo nya likhabi, si na nyenya liphuphulu. Avo va na li wugeya va li tshiya wumbwiri, va hodza nyama yalo va bwe va li vbisa khu guvbeleya niloni. 17 Kholu Nungungulu thede myonyoni gwawe gudogoreya nyo gire gugola gwaye, gu gu gupwanana khu gyawe, gasi gu ninga girengo nya likhabi mufumo wawe, kala gu tadzisega malito ya Nungungulu. 18 Nyamayi u nga mu wona, a gu emeya lidhoropa nya likhongolo, li gu na ni mufumo wu fumeyago dzipfhumu nya mafu.”

18 Hwane nya isoso, nyi di wona yimbe ngilozi na yi gu tshiga khu ndzadzini, na yiri ni tshivba nya yikhongolo, nigu mafu ma di wenengedzwa khu wudhumo wayo. 2 Yi di huweleya khu lito nya likhongolo, khiyo: “Thegide! Thegide Bhabhiloni nya Khongolo, nigu vbindrugedzide a khala ndranga nya madhimoni ni wulanga nyo sihale avbo maphuvbo yatshavbo nya gu vivbe* ni sinyoni satshavbo nya gu vivbe* si nyenywago, 3 kholu mayigo yatshavbo ma sede vhinyu nya gudogoreye* nya wubhayi* waye, nigu dzipfhumu dza mafuni dzi giride wubhayi* naye, nigu va nya dzi nogosi va mafuni va ghanyide khu kotani nya dzithomba dzaye nya dzingi.”

4 Nyi dipwa limbe lito na li guta khu ndzadzini, khilo: “Dugani gwaye, enu vathu vangu, mwa gu mba vbweta gu dzi pata naye avbo nya sighoho saye ni gu mba vbweta gu hakha gipandre nya mitungu yaye. 5 Kholu sighoho saye si tade ngudzu kala ndzadzini, nigu Nungungulu dundrugide mithumo yaye nya mba lulama. 6 Mu bweledzeyeni guvili guya khu guvivba a giredego vambe; omu nya kopo a nga mu theleyani wadwa anenu mu theleyeni mipimo mivili. 7 Mu ningeni gutshaniseka ni wuvi nyo ningane edzi a nga dzi khusedza khidzo khu gughanya gwaye, olu a gu mwalo dzitshoni khu kotani nyo hengeledzeye dzithomba. Kholu monyoni gwaye wari khuye: ‘Nyi khade nga pfhumu, kha nyiri noni,* nigu gima kha nyi na nga liya.’ 8 Khu kharato, khu litshigu limwedo yi nata mitungu yaye, a gu gufa, guliya ni ndzala, nigu uye a na tsagamiswa khu nilo kholu Jehovha Nungungulu a lamulago na ni tshivba.

9 “Dzipfhumu nya mafu edzi dzi giridego wubhayi* naye, dzi vbanyidego naye omu nya dzithomba dzaye nya dzingi, tepo dzi na wonago wutshi nya guvbiswe gwaye dzi na liya dzi bwe dzi dzi veteleya dzikhana khu gu garadzega khu kotani yaye. 10 Idzo dzi na ema khu hwindzo khu gu thava gutshaniseka gwaye, khidzo: ‘Libango! Libango lago uwe lidhoropa nya likhongolo, Bhabhiloni, lidhoropa nya gu tiye kholu gulamudwa gwago gu vbohide khu githugedza.’

11 “Va nya dzi nogosi va mafuni anavo va na liya ni gu garadzega khu kotani yaye, kholu gu na ba guri mwalo gambe muthu a na rengago silo sawe satshavbo va rengisago, 12 oru, prata, siwindri nya lisima, dziperola, myendra nya linyu, sombo nyo dhure, nya sedha ni esi nyo fuviye, ni satshavbo silo nyo girwe khu madhera nyo nungeye, satshavbo silo nyo girwe khu magwaha nya dzindzofu,* khu madhera nya lisima, nyo girwe khu kobre, nyo girwe khu dzisimbi ni marmore; 13 ni kanela, dzitemperu dza Indiya, libani, mafura nyo nungeye, olibhano, vhinyu, mafura nya miolivha, pupu, trigu, dzimombe, dzinvuta, dzikavhalu, dzikareta, dzigumbi ni vathu. 14 Mihandro nyo vidzwe u nga ba u yi gola yi gu thavide, guhodza gwago gwatshavbo nyo tshambe ni siphathiphathi si dzimede, nigu gima kha si na nga manwa gambe.

15 “Varengisi nya silo sesi va ghanyidego khu kotani yaye, va na ema khu hwindzo khu gu thava gutshaniswa gwaye, va liya khu gu garadzega, 16 khavo: “Libago! Libango gwago uwe lidhoropa nya likhongolo, u ambagisidwego myendra nya linyu, sombo nyo dhure ni gufuviya, u mburisidwego khu oru, siwindri nya lisima ni dziperola, 17 kholu khu githugedza dzithomba dzodzo dzi tshungunudwe!’

“Vakapitawu vatshavbo nya dzinavhiyu, vatshavbo va endrago khu dzinavhiyu, vamarinyero ni vatshavbo va vbanyago khu phwani va na ema khu hwindzo; 18 nigu tepo va na wonago wutshi nya guvbiswe gwaye, va na huweleya, khavo: ‘Khu levbini limbe lidhoropa li fanago ni lidhoropa leli nya likhongolo?’ 19 Va na dzi thedzeya nguma hungoni na va gu huweleya ni gu liya khu gugaradzega, khavo: ‘Libango! Libango gwago uwe lidhoropa nya likhongolo, uwe dzithomba dzago dzi ghanyisidego vatshavbo va nga ba vari ni dzinavhiyu, kholu u tshungunudwe khu githugedza.’

20 “Tsakani Uwe ndzadzi, ni enu va nyo aga, vapostoli ni vaprofeti kholu Nungungulu lamude lidhoropa leli khu kotani yanu.”

21 Khavbovbo, ngilozi nya tshivba yi di khusa giwindri nyo fane ni giwindri nya gikhongolo nya gitshindru yi gi rinya linene, na yi gu khiyo: “Bhabhiloni lidhoropa nya likhongolo, anuwe u na rinywa vbavbatshi kharati khu guvbiredza, u si manegi gambe. 22 Iyo gwago Bhabhiloni kha gu na nga pwala gambe ligwaha nya vaembeleyi na va gu womba sitendre sawe, ne kha gu na nga pwala gambe ligwaha nya vawombi, ne ligwaha nya vawombi nya dziflawuta* ne ligwaha nya vawombi nya mipundru. Gima kha gu na nga manega gambe meseri nya ni wevbini thumo, nigu kha gu na nga pwidwa gambe ligwaha nya giwindri nya gitshindru. 23 Wenengedzo nya kandriya gima kha wu na nga wenengedza gambe iyo gwago, nigu gima kha gu na nga pwidwa gambe ligwaha nya noyivhu ni noyivha kholu varengisi vago va diri vakhongolo nya litigo, nigu u kanganyiside mayigo yatshavbo khu wuloyi wago. 24 Iyo gwago, gu manidwe novba nya vaprofeti, wa va nyo aga, ni wa vatshavbo va songidwego mafuni.”

19 Hwane nya isoso, nyi dipwa lito nyo khugege ngudzu nya khatshi khya vathu nya vangi na li guta khu ndzadzini, na li gu khilo: “Dhumisani Jah!* Guvbulugisa ni wudhumu ni tshivba sa gu lumba Nungungulu wathu, 2 kholu gulamula gwaye khwa lisine nigu gu lulamide. Uye lamude liphuphulo nya likhongolo li nga ba li pengisa litigo khu wubhayi* walo, a bwe a phodzeya novba nya sithumi saye. 3 Hwane nya isoso, va di ganeya nya wuvili, khavo: “Dhumisani Jah!* Wutshi walo wu di simama gu gweya kala gupindruga.”

4 Madhota yale nya 24, ni 4 sivangwa nyo vbanye, va di khidzima va khozeya Nungungulu a khadego vbagikhalotunu nya wufumu, khavo: “Amen! Dhumisani Jah!”*

5 Gu di pwala gambe lito na li gu duga khu vbagikhalotunu nya wufumu, khilo: “Dhumisani Nungungulu wathu, enu mwatshavbo, vadugwana ni vakhongolo, mu gu sithumi saye, mu mu ningago githawo.”

6 Nyi dipwa gilo nya khatshi lito nya vathu nya vangi, gi bwe khatshi ligwaha nya mati nya mangi ni gu bwe khatshi ligwaha nya mabara nya makhongolo, na gi gu khigyo: “Dhumisani Jah,* kholu Jehovha Nungungulu wathu, oyu nya Tshivba Yatshavbo, phede gu fuma! 7 Hongoleni hi tsaka ngudzu hi bwe hi mu dhumisa, kholu wu vbohide mutshadho nya Ginvutana, nigu mwangadzi wagyo a dzi dongisede, 8 nigu dzumeledwe gu ambala sombo nya linyu nya gu khendzige, si agidego, kholu linyu ya gu emeya mithumo nyo lulame ya va nyo aga.”

9 Yi di nyi embeya, khiyo: “Lova gu khuwe: Va ngu tsaka ava va ranedwego festa nya mutshadho nya Ginvutana.” Yi bwe gambe, khiyo: “Aya malito nya lisine ya Nungungulu.” 10 Khavbovbo, nyi di khidzima migondroni gwayo gasi gu yi khozeya. Ganiolu, yi di nyi embeya, khiyo: “Ne! U nga giri isoso. Eni nyi githumi nga uwe ni vandriyago, gi gu na ni thumo nya gu ningeye wufakazi maningano ni Jesu. Khozeya Nungungulu! Kholu makungo nya wuprofeti gu ningeya wufakazi maningano ni Jesu.”

11 Nyi di wona ndzadzini na gu tulegide, gu wonega kavhalu nyo age. Wule a nga ba a yi khilede a di gu ranwa gu pwani khoyu nya Gutumbege ni Lisine, ni gu a ngu lamula ni gu dwana nyimbi khu gululama. 12 Maho yaye myenge yi khondrago nigu hungoni gwaye gu na ni dzikorowa nya dzingi. Lovidwe lina li tidwago khuye enga basi. 13 Ambade sombo si nga tsundziswa* khu novba nigu a gu ranwa pwani Lito la Nungungulu. 14 Ni gu gambe, a di gu landredwa khu mabutho ya ndzadzini na ma gu khilede dzikavhalu nyo age ni gu ma di gu ambade sombo nya linyu, nyo age ngudzu. 15 Khu kanani gwaye, gu di duga xipadha nya yikhongolo nyo vbire, gasi gu paya khiyo mayigo. Uye a na ma fumeya khu ndronga nya simbi. Ni gu gambe, a na gandra gigholowo nya gu sugeye umo dziuvha gi lumbago Nungungulu nya Tshivba Yatshavbo, gi emeyago zanga Yaye nya yikhongolo. 16 Avba nya sombo saye, khu mugiwununi, gu na ni lina li nga lowago pwani: Pfhumu nya dzipfhumu ni Mufumeyi nya vafumeyi.

17 Nyi di wona ngilozi yi nga ba yi emide vbatshani nya lidambo. Yi di khusedza lito, yi embeya sinyoni satshavbo si nga ba si vbuvba ndrengelengeni, khiyo: “Deluni mu ta tshangana festatunu nya yikhongolo ya Nungungulu, 18 gasi mu ta hodza nyama nya dzipfhumu, nyama nya vakomandante nya masotshwa, nyama nya vathu nya tshivba, nyama nya dzikavhalu, nyama nya vakhileyi vadzo, ni nyama nya vatshavbo, vama, va nya gutshulega, dzigumbi, vadugwana ni vakhongolo.”

19 Nyi di wona girengo nya likhabi ni dzipfhumu nya mafu ni mabuthu yadzo na va tshanganide gasi gu dwana nyimbi, va wugeya wule a nga khileya kavhalu ni mabuthu yaye. 20 Girengo nya likhabi gi di modwa gumogo ni muprofeti nya malipha, a nga ba a gira siwoniso na gi gu mu wona, a nga ba a pengisa khiso vale va nga hakha gifungo nya girengo nya likhabi ni ava va nga ba va khozeya gifananiso gyagyo. Vatshavbo va di rinywa niloni nya enxofre na va nga gu vbanya. 21 Ganiolu, ava vambe va di songwa khu xipadha nyo laphe yi nga ba yi duga khu kanani ga wule a nga ba a khilede kavhalu. Sinyoni satshavbo si di khura khu nyama yawe.

20 Nyi di wona ngilozi na yi gu tshiga khu ndzadzini na yiri ni pfhungulo nya liphala nya likhongolo, na yi pharide korenti nya yikhongolo mandzani. 2 Yi di mola nyoga ya yikhongolo, nyoga ya gale, a gu Dhiyabhulosi ni Sathane, yi yi hungeleya khu 1000 myaga. 3 Yi di yi rinya umo nya liphala nya likhongolo ngudzu, yi li sega yi bwe yi funga vbatshani gwalo, gasi a si simami gambe gu pengisa mayigo, kala gu eneya 1000 myaga. Hwane nya myaga yoyo, yi na tshudwa khu gitepwana.

4 Nyi di wona sikhalo nya wufumu nigu ava va nga ba va khade avba nya sikhalo soso, va di ningwa wufumu nyo lamule. Nyi di wona vale va nga songwa khu kotani nya olu va nga ningeya wufakazi maningano ni Jesu ni gu ba va ganede maningano ni Nungungulu. Ni gu gambe, nyi di wona vale va nga mba khozeya girengo nya likhabi ni gifananiso gyagyo, vale va nga mba hakha gifungo musiwomboni ni mandzani; va di wuga va vbanya gambe, va bwe va fuma ni Kristo khu 1000 myaga. 5 Ogu guwuswa nyo pheye. (Vambe vafi kha va wuswa, kala gu eneya 1000 myaga.) 6 Va ngu tsaka nigu va agide vatshavbo va pategago avba nya guwuswe nyo pheye. Avbo gwawe, gufa nya wuvili gu mwalo tshivba, ganiolu va na khala vaprista va Nungungulu ni Kristo, nigu va na fuma ni Kristo khu 1000 myaga.

7 Tepo yi na vbeyago 1000 myaga, Sathane a na tuledwa khu pasoni. 8 A na duga gasi gu ta pengisa Ghoghe wa Maghoghe, a gu mayigo nya 4 dzikhona nya mafu, a ma tshanganisa gasi gu dwana nyimbi. Tengo yawo, wa gu fana ni fungu wa phwani. 9 Mayigo yoyo ma na phalalega mafuni gwatshavbo, ma randreya lizumbo la va nyo aga ni lidhoropa nyo golege. Ganiolu, wu di tshiga nilo khu ndzadzini, wu ta va vbisa havo bhi. 10 Dhiyabhulosi, a nga ba a ma pengisa, rinyidwe omu nya litsiva nya nilo nya enxofre, omu gi nga ba gi romo girengo nya likhabi gumogo ni muprofeti nya malipha. Avo va na tshaniswa* wutshigu ni mihani kala gupindruga ni gupindruga.

11 Nyi di wona gikhalo nya wufumu nya gikhongolo nyo age ni Wule a nga ba a khade vbatshani gwagyo. Mafu ni ndzadzi si di mu tutuma nigu kha sa manwa gambe. 12 Nyi di wona vafi, vakhongolo ni vadugwana, na va emide mbeli nya gikhalo nya wufumu nigu gu di tudwa mabhuku. Gu di tudwa limbe libhuku;* gu diri libhuku nya womi. Vafi va di lamudwa guya khesi si lovidwego omu nya mabhuku, guya khu mithumo yawe. 13 Linene li di dusa vafi va nga ba va romo gwalo, lufu ni Lithowo* si dusa vafi va nga ba va romo gwaso. Muthu ni muthu a di lamudwa guya khu mithumo yaye. 14 Lufu ni Lithowo* si di rinywa omu nya litsiva nya nilo. Litsiva nya nilo la gu emeya gufa nya wuvili. 15 Ni gu gambe, uye lina laye li nga mba lowa omu nya libhuku nya womi, a di rinywa omu nya litsiva nya nilo.

21 Nyi di wona ndzadzi nya yiphya ni mafu nya maphya, kholu ndzadzi ya gale ni mafu ya gale si di vbindride nigu linene li diri mwalo gambe. 2 Nyi di wona gambe lidhoropa nya guage, Jerusalema nya muphya, na gu tshiga khu ndzadzini na guta khiyo ga Nungungulu, a di gu dongisedwe kha nga noivha yi nga mburisedwa mwama wayo. 3 Khavbovbo, nyi dipwa lito nyo khugege na li guta khu gikhalotunu nya wufumu, khilo: “Tabhernakeli ya Nungungulu yi na ni vathu, uye a na khala navo nigu avo va na khala vathu vaye. Nungungulu a na ba ari ni avo. 4 Uye a na bavbula marongo yatshavbo mahoni gwawe, kha gu na nga manega gambe gufa, ne gugaradzega, ne guliya, ne guvbisa; silo sa gale si vbindride.”

5 Wule a nga ba a khade vbagikhalotunu nya wufumu a di khuye: “Nyi na gira satshavbo silo si khala siphya.” A di bwe khuye: “Lova, kholu malito yaya ma tumbegide nigu khya lisine. 6 Uye a di nyi embeya, khuye: “Si tadzisegide, eni kheni Alfa ni Omega,* oyu nya gupheye ni oyu nya guhegise. Ni wevbini wule a pwago lidora, nyi na mu ninga mahala mati nya gifefe nya womi. 7 Oyu a na palago a na hakha silo sesi nigu eni nyi na khala Nungungulu waye nigu uye a na khala gyanana gyangu. 8 Ganiolu, va nya hwanga, avo va gu mwalo gukhodwa, va nya mba aga, ava va girago silo nya gunyenyeze, sighevenga, avo va girago wubhayi,* ava va girago wuloyi, ava va khozeyago sifananiso ni vatshavbo va nya malipha va na ba vari ni wulanga wawe tsivani gu vbisago khu nilo ni enxofre. Isoso so thula gufa nya wuvili.”

9 Mweyo nya dzingilozi dzile nya 7 dzi nga ba dziri ni 7 dzitijela dzi nga ba dzi tade khu mabango yale nya 7 nyo hegise, yi di nyi teya yi ta nyi embeya, khiyo: “Delu! Nyi na gu yeyedza noivha, mwangadzi wa Ginvutana. 10 Khavbovbo, a di nyi dzega khu gu thumisa tshivba nya liphuvbo, a nyi yisa gigomoni nya gikhongolo nyo laphe, a ya nyi yeyedza lidhoropa nyo age la Jerusalema na li gu tshiga khu ndzadzini, na li guta khiyo ga Nungungulu, 11 na liri ni wudhumo wa Nungungulu. Gukhendziga gwalo gu di gu fana ni gukhendziga nya giwindri nya gu dhure ngudzu, kha nga giwindri nya jaspe nyo ketige nga livhidru. 12 Li diri ni muru nya wukhongolo nya gu laphe, wu nga ba wuri ni 12 myanya nigu omu nya myanya yoyo gu diri ni 12 dzingilozi nigu omu nya myanya yoyo gu di gu lovidwe malina nya 12 mahundzu nya sanana sa Israyeli. 13 Khu khuga-dambo gu diri ni myanya miraru, khu norte gu diri ni myanya miraru, khu sul gu diri ni myanya miraru nigu khu pfola-dambo gu diri ni myanya miraru. 14 Muru nya lidhoropa wu di vbahidwe vbatshani nya 12 siwindri nya sisekelo* nigu avba nya siwindri soso gu di lovidwe malina nya 12 vapostoli va Ginvutana.

15 Wule a nga ba a ganeya ni eni a di gu pharide ndronga nya oru, gasi gu pima khiyo lidhoropa, myanya yakone ni muru. 16 Maphuvbo yatshavbo nya lidhoropa ma diri ni pimo moyo, gulapha gwalo gu di gu fana ni gugula gwalo, uye a di pima lidhoropa khu ndronga, ilo li di gu ningana pfhuka nya 2220 dzikilometro.* Maphuvbo yatshavbo nya lidhoropa ma diri ni pimo moyo. 17 A di pima gambe muru, uwo wu di gu ningana gipimo nya 64 dzimetro,* guya khu mapimelo nya vathu a gu mapimelo nya dzingilozi gambe. 18 Muru wakona wu di gu giridwe khu jaspe, nigu lidhoropa li di gu giridwe khu oru yi mburisedwego yi fanago ni livhidru nyo ketigeye. 19 Siseketelo nya muru nya lidhoropa si di gu giridwe khu siwindri nyo hambane-hambane nya lisima: giseketelo nyo pheye gi di gu giridwe khu jaspe, egi nya wuvili gi di gu giridwe khu safira, egi nya wuraru gi di gu girdwe khu kalsedhoni nigu egi nya wu 4 di gu giridwe khu esmeraldha, 20 egi nya wu 5 gi di gu giridwe khu saridhoniya, egi nya wu 6 gi di gu giridwe khu sardhiyu, egi nya wu 7 gi di gu giridwe khu krizolito, egi nya wu 8 gi di gu giridwe khu bherilo, egi ya wu 9 gi di gu giridwe khu topaziyo, egi nya wu 10 gi di gu giridwe khu krizoprazo, egi nya wu 11 gi di gu giridwe khu jasintu, egi ya wu 12 gi di gu giridwe khu ametista. 21 Nigu 12 myanya yi diri ni 12 dziperola, mwanya ni mwanya wu di gu giridwe khu perola mweyo, nigu rua nya yikhongolo nya lidhoropa yi di gu giridwe khu oru yi mburisedwego, nya guwonegeye kha nga livhidru.

22 Dhoropani gwatshavbo kha nya wona tempele, kholu Jehovha Nungungulu oyu nya Tshivba Yatshavbo ni Ginvutana, khavo va gu tempele yalo. 23 Lidhoropa lakona kha li vbweti lidambo ne ngima gasi gu wenengedzwa, kholu li ngu wenengedzwa khu wudhumo wa Nungungulu nigu Ginvutana khigyo kandriya yakone. 24 Mayigo ma na gimbiya khu guwonegeya gwalo nigu dzipfhumu nya mafu dzi na li reseya wudhumo wadzo. 25 Malimba yalo gima kha ma na nga segwa mihani, kholu gima kha gu na nga khala gambe wutshigu. 26 Va na resa gwalo wudhumo ni wuzundzo nya mayigo. 27 Ganiolu, dhoropani gakona gima kha gu na nga beya gilo nya gu mba handzega, nigu gima kha gu na nga beya vathu va girago silo nya gunyenyeze ni wukanganyisi. Gu na beya basi vale gu lovidwego malina yawe avba nya libhuku* nya womi la Ginvutana.

22 Khavbovbo, ngilozi yi di nyi yeyedza tsongo nya mati nya womi, uwo wu di gu khendziga nga kristali. Tsongo wowo wu di gu duga khu vbagikhalotunu nya wufumu gya Nungungulu ni gya Ginvutana. 2 Wu di gu vbindra khu vbakari nya ruwa nya yikhongolo ya dhoropani. Khu mudzibambe nya tsongo wowo gu diri ni misimbo nya womi, iyo yi di gu velega 12 mafumbo nya mihandro, nigu yi di gu velega ngima ni ngima. Mahagane nya misimbo yeyi ma di gu thumiswa gasi gu hawulugisa mayigo.

3 Gima kha gu na nga manega gambe givalo dhoropani momo. Ganiolu, gikhalo nya wufumu gya Nungungulu ni gya Ginvutana si na ba siri dhoropani momo, nigu sithumi saye si na mu thumeya; 4 si na wona khovbe yaye, nigu lina laye li na lowa siwomboni sawe. 5 Nigu gambe, gima kha gu na nga manega wutshigu, avo kha va na nga vbweta gambe guwonegeya nya dzikandriya, ne guwonegeya nya lidambo, kholu Jehovha Nungungulu a na va rumeleya guwonegeya nigu avo va na fuma kala gupindruga ni gupindruga.

6 Iyo yi di nyi embeya, khiyo: “Malito yaya ma tumbegide nigu khya lisine; Jehovha, Nungungulu a nga ganeya khu gu thumisa vaprofeti, rumede ngilozi yaye gasi gu ta yeyedza sithumi saye silo si yedego gu girega nya mba hweya. 7 Nyi nguta khu guvbiredza. Va ngu tsaka vatshavbo va engisago malito nya wuprofeti nya libhuku* leli.

8 Eni Johane, kheni nyi ngapwa ni gu wona silo sesi. Tepo nyi nga sipwa ni gu si wona, nyi di khidzima migondroni nya ngilozi yi nga ta nyi yeyedza silo sesi gasi gu yi khozeya. 9 Iyo yi di nyi embeya, khiyo: “Ne! U nga giri isoso. Eni nyi githumi nga uwe ni vandriyago, vaprofeti ni ava va engisago malito nya libhuku* leli. Khozeya Nungungulu.”

10 Yi di nyi embeya gambe khiyo: “U nga lemi malito nya wuprofeti nya libhuku* leli, kholu tepo yi vegisidwego yomo vbafuvbi. 11 Uye a girago silo nya mba lulama a na simame gu gira silo nya mba lulama, uye a girago silo nyo nyenyeze a na simame gu gira silo nyo nyenyeze; ganiolu, oyu nyo lulame a na simame gu gira gululama, nigu oyu nya guage a na simame gu gira silo nyo age.

12 “‘Nyi nguta khu guvbiredza, nigu tshatshazelo nyi na gu ningago wu na ni eni, gasi gu bweledzeya moyo ni moyo guya khu mithumo yaye. 13 Eni kheni Alfa ni Omega,* oyu nya gupheye ni oyu nya guhegise, maphelo ni mahegiso. 14 Va ngu tsaka ava va handzago sombo sawe nyo age, gasi va mana fanelo nyo hodze misimbo nya womi ni gu bwe va beya omu nya lidhoropa khu myanya yalo. 15 Vbavbandze gu na ni dzimbwa,* dzindroyi, avo va girago wubhayi,* sighevenga, avo va khozeyago sifananiso ni vatshavbo va golago malipha ni gu lipha.’

16 “‘Eni Jesu, nyi mi rumede ngilozi yangu gasi yi ta mi ninga wufakazi nya silo sesi gasi gu mabandla ma phasega. Eni nyi khamba, nyi gitugulwana gya Dhavhidhe, nigu nyi nyeledzi ya vbadzimindrutunu* yi ketigago ngudzu.’”

17 Liphuvbo ni noyivha vari khavo: “Delu!” Oyu a sipwago a na ganeye, khuye: “Delu!” Uye a gu na ni lidora a nate; oyu a dzinago a na seye mati nya womi mahala.

18 “Nyi ngu embeya watshavbo wule a pwago malito nya giprofeto nya libhuku leli, kheni: Uye a na engedzeyago gilogyo avba nya silo sesi, Nungungulu a na mu engedzeya mitungu yi lovidwego omu nya libhuku* leli; 19 nigu a gu tshuka muthu a dusa gilogyo avba nya malito nya libhuku leli nya wuprofeti, Nungungulu a na dusa gipandre gyaye gi lovidwego omu nya libhuku* leli, kha na nga mu diga a hodza misimbo nya womi ambari gu beya dhoropani nya guage.

20 “Oyu a ningeyago wufakazi nya silo sesi wari khuye: ‘Nyi nguta khu guvbiredza.’”

“Amen! Delu, Pfhumu Jesu.”

21 Wuwadi nya wukhongolo wa Pfhumu Jesu wu na manege ni va nyo aga.