Gu laya gu ngu phasa sanana gu simama gu gimbiya ndziyani nya yadi
GA VAVELEGI
Nya wu 6: Gulaya
SO THULA GINANI
Lito gulaya li nga thula guthangeya mwendro guhevbudza. Dzimbe dzitepo so thula gu kawuka gyanana gyago ga mavbanyelo nya mba yadi. Ambari ulolo, gu tala nya dzitepo so pata gu hevbudza sanana sago mavbanyelo si na ma phasago gu hunga makungo khu wugengeyi.
KHU GINANI SI GU NA NI LISIMA
Ga matshigu yaya, dzindranga nyo khaguri kha ndzi ngo kawuka sanana sadzo khu gu thava gu khidzo dzi na vbungula lisima si gu nalo. Ambari ulolo, vavelegi nya wugengeyi va gu vega milayo nya gu vbevbuge va bwe va hevbudza sanana sawe gu yi engisa.
“Sanana si yede gu embedwa edzi si khadego khidzo ni esi si yedego gu gira. Sa gu mba laywa si na hunga makungo nya gu vivbe ma na si reseyago mihandro nya mba yadi.” — Pamela.
GINANI U NGA GIRAGO
Tiya ga esi u va hevbudzago. Sanana sago sa gu mba vbanya khesi u si hevbudzago, si embeye handro si na wu manago khu gu mba engisa gwaso. Khala na u dongide gu va zundza khu silo nya sadi va girago.
“Nyi ngu oloveya gu zundza sanana sangu kholu si engisago, ambari olu hi vbanyago ga litigo leli si si vbevbugigo gu engisa. Wa gu zundza sanana sago, si na va vbevbugeya gu dzumeya gu kawukwa.” — Christine.
LITSHINA NYA NAYO NYA BHIBHILIYA: “Esi muthu a yalago khiso a na vbwerago.” — Vagalatiya 6:7.
Ninganiseya. Tepo u layago sanana sago dundrugeya khu tanga yaso, wugengeyi waso ni esi si nga ghoha. Khu giyeyedzo, sa gu mba engisa milayo yi ganeyago khu mathumiselo nya telefoni, u nga si dzegeya telefoni mwendro gu si pimeya tepo si yedego gu yi thumisa khiyo. U nga vbiredzeyi gu zangari khu silo nya gu mba phasa gilo kholu basi si gu gorosago.
“Nyi ngu dzi garadzeya gu tugula gu kheni gyanana gyangu gyi di phazama mwendro gi di mba engisa khu nyagigwenyi, mwendro adzina saye gi di mba dundrugeya khiso. Gu na ni gu hambana nya gu phindra-phindre gu gira silo nya gu vivbe ni gu yeyedza makhalelo ma yedego gu tshukwadziswa.” — Wendell.
Litshina nya nayo nya Bhibhiliya: “Mu nga goroseyi sanana sanu, gasi si si vbeyi tshivba.” — Vakolosi 3:21.
Yeyedza lihaladzo. Sanana si ngu dzumeya gu laywa ni gu engisa, sa guti gu khiso vavelegi va gu si laya kholu va si haladzago.
“Tepo gyanana gyathu gyi nga ba gyi hosisa, hi di gi embeya gu khethu hi ngu dzikhusedza khigyo khu kotani nya silo nya sadi gi hungidego gu gira. Hi di gi tshamuseya gu khethu sihoso kha si ghohi makhalelo yagyo nya yadi kholu gi dzi emisidego gu vbindrugedza esi si vbwetegago nigu anethu hi dzi emisede gu gi phasa.” — Daniel.
Litshina nya nayo nya Bhibhiliya: “Lihaladzo li na ni gulaphisa-monyo.” — 1 Vakorinto 13:4.