Nya wu 10: Gutumbega

SO THULA GINANI

Vathu nya gutumbege va gu tumbwa khu vavelegi vawe, dzipari dzawe ni vapatrawu vawe. Va ngu engisa milayo, va tadzisa esi va si tumbisidego ni gu tepo yatshavbo va gu ganeya lisine.

KHU GINANI SI GU NA NI LISIMA

Ga dzitepo nya dzingi, gutshulega ogu muthu a ningwago gwa gu gimbileyana ngudzu ni edzi a tumbegidego khidzo khu tepo nyo khaguri.

“Ndziya nya yadi nya gu gire vavelegi vago va gu tumba, gu va yeyedza gu khuwe u ni mapimo nya yadi ni gu wa gu gira esi u embedwago, na siri basi ga tepo eyi u gu navo ganiolu, na wuri wenga gambe.” — Sarahi

LITSHINA NYA NAYO NYA BHIBHILIYA: “Simamani gu dzi khedzani gwadi gasi mu wona gu khenu mu vathu nyo khale kharini.” — 2 Vakorinto 13:5.

GINANI U NGA GIRAGO

Dzindziya dzi landreyago dzi na gu phasa wa gu ba u vbweta gu tumbwa khu vambe.

Ganeya lisine. Vathu kha va na nga gu tumba wa gu ba u gola gu lipha. Tepo mu bhulago u nga zami gu siha wuthu wago ngundzungudzu sihoso sago, kholu isoso si na gira gu va gu tumba.

“Abari gu silo si ngu hi gimbileya gwadi si ngu vbevbuga gutumbega, ganiolu wa gu bhula khu silo nya gu vivbe u giridego isoso si na gira vambe va engedzeya gu gu tumba.” — Caiman.

LITSHINA NYA NAYO NYA BHIBHILIYA: “Olu hi dzi garadzeyago gu tumbega siloni satshavbo.” — Vahebheru 13:18.

Gutumbega. Guya khu wugevisisi nyo khaguri wu giridwego Estados Unidos gu tugudwe gu vapatrawu va gu thola vathu nya gutumbege. Gu hevbula gutumbega si na gu phasa tepo u dandrago.

“Vavelegi vangu va ngu nyi wona tepo nyi dzi garadzeyago gu gira esi va si vireyago avba gwangu na si si hungi gu va nyi khedziseya, tepo nyi girago isoso va gu engedzeya gu nyi tumba.” — Sarah.

LITSHINA NYA NAYO NYA BHIBHILIYA: “Nyi ngu tumba gu kheni u na dzumeya gilombo gyangu . . . kholu nyi ngu dziti kheni u na gira silo nyo vbindre esi nyi gu lombago.” — Filemoni 21.

Laphisa monyo. Ambari olu si vbevbugago gu vambe va wona vaphya na va gu lapha ni gu manega ni tshivba, si ngu dzega tepo nya yingi gasi va tugula gu khavo va vidzidwe. Khu kharato, vaphya va yede gu laphisa monyo.

“Gasi gu vavelegi vago ni vambe va gu tumba si nga dzega tepo nigu so vbweta gu dzigaradza. Ganiolu, u nga pimisi gu khuwe va na gu tumba khu gu ba na wu giride gilo gimwego basi nya gyadi, u yede gu simama gu dzigaradza gu gira simbe.” — Brandon.

LITSHINA NYA NAYO NYA BHIBHILIYA: “Ambalani . . . gu laphisa monyo.” — Vakolosi 3:12.