Esi siyensiya yi si kodzigo gu tshamuseya
So wonegisa gu khatshi vasiyentista va huvbude silo nya singi maningano khu mafu ni ndzadzi. Ambari ulolo, gu na ni siwudziso nya singi va si kodzigo gu si hlamula.
Ina siyensiya yi ngu si kodza gu tshamuseya edzi mafu, ndzadzi ni womi si phedego khidzo? Ne vbadugwana! Vambe vo ganeya gu khavo vasiyentista va givisisago silo maningano khu mafu ni ndzadzi, va nga hi tshamuseya edzi si vangidwego khidzo. Ambari ulolo, Marcelo Gleiser, muhevbudzi wa univherisidhadhi ya Dartmouth, a gu mba khodwa ga Nungungulu o ganeya gu khuye: “Kala olu, ethu vagivisisi nya mafu ni ndzadzi, hi si kodzi gu tshamuseya edzi si vangidwego khidzo.”
Revhista nyo khaguri ya vasiyentista yo ganeya esi maningano khu guvangwa nya womi: “Si ngu hi garadzeya gu tshamuseya edzi womi wu phedego khidzo mafuni nigu sirengo nya singi mwendro sikongolo nya vathu si nga hadzi yeyedza esi si girigidego tepo womi wu nga pheya mafuni si mwalo gambe.” Esi siyensiya yi si ganeyago, so yeyedza gu khiso yi si kodzi gu hlamula giwudziso gi gu khigyo: “Mafu, ndzadzi ni womi si phede kharini?”
Ganiolu, uwe adzina u ngu dzi wudzisa gu khuwe: “A ba ri gu mafu ni ndzadzi si di vangwa, khu mani a si vangidego?” Nigu adzina u nga pimisa gu khuwe, abari gu womo muvangi a gu na ni guti ni lihaladzo, khu ginani a dzumeleyago gu khuye vathu va tshaniseka? Khu ginani a dzumeleyago gu khuye gu manega wukhozeyi nya gu hambane-hambane? Khu ginani a digago vathu nya vangi va dzi embeyago gu khavo va ngu mu khozeya va gira silo nya singi nya gu vivbe?
Siyensiya, kha yi si kodzi gu ninga mihlamulo nya siwudziso sesi. Ganiolu, isoso kha si thuli gu khiso kha wu na nga si kodza gu mana mihlamulo ya kona. Khu lisine, vathu nya vangi va manide mihlamulo omu nya Bhibhiliya.
Abari gu u ngu vbweta guti gu khuwe khu ginani vasiyentista nya vangi va dzi ningidego tepo gasi gu hevbula Bhibhiliya va bwe va khodwa ga Muvangi, beya omu nya site jw.org u vbwetedzeya sipandre nya dzivhidhyu si ganeyago khu mahungu ma gu khayo: “Origem da vida.”