Khu mevbi makungo ya Nungungulu khethu?

TEPO u hevbulago jornali, u wona televhizawu, mwendro gu engiseya radhyu, u ngu wona ni gupwa wughevenga nya wungi, dzinyimbi ni terorismo. Yimbe tepo uwe furi u ngu tshaniseka khu madwali mwendro khu gu fedwa khu gigodwa gyago.

Sivbango nya ndranga si engiseyago mahungu omu nya radhyu

Dzi wudzise:

Khiso kamo esi Nungungulu a vbwetago gu khuye si nyi dugeleya gumogo ni valongo vangu?
Nyi nga phaswa khu mani gu emisana ni sigaradzo sangu?
Hi na thuga hi mana gurula kamo?

Bhibhiliya yi ngu phindrula siwudziso soso khu ndziya nyo pwale.

BHIBHILIYA YO HEVBUDZA GU KHIYO NUNGUNGULU A NA GIRA SILO NYO SAMADZISE MAFUNI.

Vathu kha va na ngapwa gambe wuvi, gu gumba, mwendro gufa. — Gutuledwa 21:4
“Silima si na ndragandraga kha nga dzimangwa.” — Isaya 35:6
“Maho nya sikhumu ma na tulega.” — Isaya 35:5
Ava va fudego va na wuswa. — Johane 5:28, 29
Mwalo a na dwalago. — Isaya 33:24
Vathu vatshavbo mafuni va na ba vari ni guhodza nya gungi. — Dzindzimo 72:16

PHASEGA KHESI BHIBHILIYA YI HEVBUDZAGO

Fakazi ya Jehovha yi hevbulago Bhibhiliya ni mwama

Si nga vbevbuga gu pimisa gu khuwe esi u leridego omu nya dzipajina nyo pheye nya livru yeyi miloro basi. Ganiolu Nungungulu tumbiside gu vbindrugedza silo soso mafuni nugunugu, nigu Bhibhiliya yi ngu tshamuseya edzi a na si girago khidzo.

Bhibhiliya yi na ni simbe nyo vbindre isoso. Yo hi embeya esi gu vbwetegago gu hi siti gasi gu mana litsako nya lisine ni gu vbanya womi nya wadi olu kamo olu. Nga dundrugeya khu gitepwana esi si gu garadzago. Silo soso si nga yelana ni dzitsapawu mwendro ndranga yago, mawugelo, ambari gufa nya sigodwa sago. Bhibhiliya yi nga gu phasa gu emisana ni sigaradzo soso, yi bwe yi gu thaveleya khu gu phindrula siwudziso nya nga esi:

Khu ginani hi tshanisekago?
Hi nga emisana kharini ni sigaradzo sathu?
Ina ndranga yathu yi nga mana gutsaka?
Ginani gi hi dugeleyago tepo hi fago?
Ina hi na thuga hi wonana ni sigodwa sathu si fudego?
Khu ginani hi kodzago gu khodwa gu khethu Nungungulu a na gira satshavbo a si tumbisidego?

Olu u lerigo livru yeyi so yeyedza gu khiso u ngu dzina guti esi Bhibhiliya yi si hevbudzago. Livru yeyi yi na gu phasa gu siti. Dzindrimana dzakona dzi na ni siwudziso si na gu phasago gu pwisisa gwadi Bhibhiliya. Vathu nya dzimiliyoni va ngu tsakeya gu bhula khu Bhibhiliya ni Dzifakazi dza Jehovha. Hi ngu tumba gu khethu anuwe. Nungungulu a na kategise gudzigaradza gwago nya gu vbwete guti esi Bhibhiliya yi kodzago gu gu hevbudza!