Dzingilozi dzi tivisa guvelegwa ga Jesu

Sezari Augusto, pfhumu nya Mufumo wa Roma, a di leleteya gu khuye Vajudha vatshavbo va hongola omu va nga velegwedwa umo va lovedwa ya iyo. Khu kharato, Josefa ni Mariya va di endra va hongola Bhetlehema, omu valongo va Josefa va nga velegedwa umo. Ma di gu vboha matshigu nya gu Mariya a hefemula.

Tepo Josefa ni Mariya va nga vboha Bhetlehema, gu diri mwalo wumbe wulanga nya gu va khala avbo, liphandro basi li nga ba li romo. Khumo umomo Mariya a nga velegeya umo gyanana gyaye Jesu. A di mu fumbeya omu nya tshalu nya yadi, a mu ladzisa gwadi omu nya gighowolo.

Ga wulanga nyo khaguri vbafuvbi ni Bhetlehema, gu diri ni vahavisi nyo khaguri va nga ba vari vbavbandze va havisa sifuyo sawe ni wutshigu. Khadukhadu, gu di ta ema ngilozi khavbovbo va randredwa khu gungangameya ga Jehovha. Vahavisi vovo va di pheya gu thava. Ganiolu, ngilozi yi di khiyo: ‘Mu nga thavi. Nyi na ni mahungu nyo tsakise. Muhuno gu velegidwe Mesiya Bhetlehema.’ Khu tepo yoyo, gu di wonega dzingilozi nya dzingi ndzadzini, hidzo khidzo: ‘A na zundzwe Nungungulu ndzadzini. Mafuni gu na manege gurula.’ Dzingilozi dzi di vbedza dzi phalalega. Ginani va nga gira vahavisi?

Va di embedzeyana gu khavo: ‘Hongoleni Bhetlehema olu kamo.’ Va di dzegeya gu hongola khu guvbiredza khavbovbo va ya mana Josefa ni Mariya omu nya liphandro gyanana gyawe na gi ngari gu velegwa.

Vatshavbo va ngapwa esi ngilozi yi nga embeya vahavisi va di hlamala. Mariya a di dundrugeya ngudzu khesi dzingilozi dzi nga ganeya, nigu gima kha si divala. Vahavisi va di bweleya va ya khathaleya sifuyo sawe, na va bonga Jehovha khu satshavbo va si wonidego ni gu sipwa.