Jehovha a vhikeya Jesu

Khu khuga-dambo ga Jerusalema, gu diri ni vathu va nga ba va khodwa gu khavo dzinyeledzi dzi ngu kodza gu yeyedza ndziya muthu. Ga wutshigu nyo khaguri, vama va Khuga-dambo va di wona gilo nyo fane ni nyeledzi, khavbovbo va pheya gu gi landriseya. Gilo gyogyo nyo khatshi i nyeledzi gi di va yisa Jerusalema. Va di gu dziti gu khavo khiyo gu gu na ni gyanana gegi gi nga hadzi khala pfhumu nya Vajudha. Khu kharato, va di wudziseya vathu khavo: ‘Gyomo hayi gyanana gi na khalago pfhumu ya Vajudha? Hi tede gu ta gi khidzimeya.’

Tepo Herodhi, pfhumu ya Jerusalema, a ngapwa vathu na va ganeya khu pfhumu nya yiphya, a di garadzega ngudzu. A di wudzisa vapristi nya vakhongolo khuye: ‘Va di pwani yi na velegedwa hayini pfhumu yakona?’ Va di hlamula khavo: ‘Vaprofeti va di khavo yi na velegedwa Bhetlehema.’ Khu kharato, Herodhi a di ranisa vama vale va Khuga-dambo a ta va embeya khuye: ‘Gimbiyani Bhetlehema, mu ya vbwetedzeya gyanana gyogyo. Mo gi mana, wuyani mu ta nyi embeya, aneni nyo vbweta gu ya gi khidzimeya.’ Ganiolu, a di gu lipha.

Gilo gyogyo nyo khatshi i nyeledzi gi di pheledza gu gimbiya gambe. Vama wowo, va di gi landriseya kala Bhetlehema. Gilo gyogyo nyo khatshi i nyeledzi gi di ya ema vbatshani nya nyumba nyo khaguri. Vama vale va di beya ndrangani momo, va ya mana Jesu ni mamayi waye Mariya. Va di mu khidzimeya, khavbovbo va mu ninga prata, ni silo nyo nungeye ni mira. Nari Jehovha a nga rumeya vama vava va hongola ga Jesu? Ahihi.

Ga wutshigu wowo, Jehovha a di embeya Josefa khomu nya loro khuye: ‘Herodhi o vbweta gu songa Jesu. Dzega mwangadzi wago ni gyanana mu tutuma mu hongola Egipto. Gimbiyani mu ya khala iyo kala nyi mi embeyani gu kheni gu rude khavbo mu na wuyago.’ Josefa ni mwangadzi waye ni gyanana gyawe va di dzegeya gu hongola Egipto.

Jehovha a di embeya vama vale va Khuga-dambo gu khuye va nga bweleyi ga Herodhi. Tepo Herodhi a nga tugula gu khuye kha va na nga wuya, a di goroga ngudzu. Kha nga olu a nga wona gu khuye kha na nga mu mana Jesu, a di leleteya gu khuye gu songwa sanana satshavbo nya tanga ya Jesu Bhetlehema. Ganiolu, Jesu a di romo gurulani, hwindzo ngudzu ni Egipto.

Khu gu gimbiya nya tepo, Herodhi a difa. Jehovha a di embeya Josefa khuye: ‘Olu gu rude, bweleyani.’ Josefa, Mariya ni Jesu va di bweleya Jerusalema, va ya vbaha ndranga yawe Nazareta.