Mabelelo

Libhuko Milowo nya Bhibhiliya yi hi phasago gu vbanya kha nga Makristo, li na gu phasa gu mana khu ndziya nyo vbiredze, mavhesi ni matimu nya Bhibhiliya ma na gu phasago gu emisana ni sigaradzo u tshanganago naso. Li na gu phasa gambe gu mana malito nya yadi nya Bhibhiliya u nga ma thumisago gasi gu tiyisa vambe ni gu hunga makungo ma ningago wuzundzu Jehovha. Hatha hungo nya mahungu u wu vbwetago. Hungo ni hungo nya mahungu wu na ni siwudziso nya lisima ni siyeyedzo nya Bhibhiliya si na gu phasago (Wona kwadru “U nga li thumisa kharini libhuku leli?”) U na dzegeya gu mana milowo yi na gu ningago wusingalagadzi ni guthaveleya u gu vbwetago. U na mana gambe dzithomba nya lisima u nga bhuleyago vambe ni mavhesi nya Bhibhiliya ma na gu girago u dandra khu liphuvboni, nigu u na mana matshina nya milayo nya Bhibhiliya u nga ma thumisago gasi gu phasa ni gu tiyisa vambe.

U nga li thumisa kharini libhuku leli?

Gasi gu mana hungo nya mahungu nyo khaguri, u nga beya avba va nga pwani peskizari mwendro gu beya omu nya gipandre ni gipandre. Libhuku Milowo nya Bhibhiliya yi hi phasago gu vbanya kha nga Makristo li kabanisidwe khu 7 sipandre: Sigaradzo, Mavbanyelo, Libandla, Womi wa tshigu ni tshigu, Ndranga, Guvidzwa khu liphuvboni ni Makhalelo nya yadi ni aya nya mba yadi. U na mana mihungo nya mahungu nya yingi ga gipandre ni gipandre. Hatha gipandre u gi vbwetago, khu hwane u vbwetedzeya hungo nya mahungu u wu vbwetago. Abari gu kha wu giti gipandre gi gu na ni hungo nya mahungu u wu vbwetago, beya avba va nga pwani Yatshavbo, khu gu landreya u vbwetedzeya hungo nya mahungu u wu vbwetago kala u wu mana. Ga hungo ni hungo nya mahungu, u na mana malito ma nga sivbadziswa. Simbe siwudziso, ganiolu simbe khandri siwudziso. Tepo u lerigo mavhesi ma nga sivbadziswa, ma gomogo khu vbavbatshi nya malito nyo khaguri, dundrugeya khedzi ma nga gu phasago khidzo gu lhamula siwudziso mwendro gu seketeya mahungu nyo khaguri. Ga dzimbe dzitepo, hungo nya mahungu wu na kabaniswa khu sihungwana nya mahungu si na gu phasago gu mana dzipontu u vbwetago gu dzi peskizari. Hi nga mana gambe dzindrimana nya Bhibhiliya dzi gomogo avba nya “wona gambe.” Mavhesi yoyo ma na ni mahungu ma pwananago ni hungo nya mahungu. Gu tala nya dzitepo, u na mana gambe kwadru yi gu khiyo “Siyeyedzo nya Bhibhiliya si na gu phasago.” Malito nyo khaguri ma gu tshamuseya ponto nya litshina mwendro gihevbudzo hi gi manago omu nya lowo wu khumbugidwego. Malito yoyo ma na gu phasa guti esi u yedego gu dundrugeya khiso tepo u lerigo mavhesi ma khumbugidwego.

Libhuku leli kha li sasamedzi yatshavbo mavhesi ga hungo ni hungo nya mahungu. Ganiolu, maphelo nya yadi gasi u gira wugevesisi wago. (Mav 2:1-6) Gasi u kodza gu gira wugevesisi nya wadi, thumisa dzireferensiya ni mitshamuselo ya vbavbatshi nya mavhesi nya Bhibhiliya nya Tradução do Novo Mundo da Biblia Sagrada. Thumisa gambe Libhuku nyo peskizari khilo nya Dzifakazi dza Jehovha mwendro libhuku Índice das Publicações da Torre de Vigia, gasi u hevbula nya singi khu tshamuselo nya livhesi nyo khaguri mwendro edzi u nga li thumisago khidzo. Wona mahungu nya maphya ma dusidwego gasi uti mapwisiselo nya maphya nya lisine nya bhibhiliya.

Ho vireya gu khethu libhuku Milowo nya Bhibhiliya yi hi phasago gu vbanya kha nga Makristo li gu phasa gu mana guti ni mapwisiselo ma gomogo omu nya Milowo nya Guage. Tepo u thumisago libhuku leli, u na tiyisega gu khuwe “lito la Nungungulu li ngu vbanya nigu li na ni tshivba.” — Heb 4:12