Maio

Tepo Jesu a nga ba ari gyanana, a di hatha gu engisa vavelegi vaye.Uye gima kha diga gu engisa vavelegi vaye khu gu khuye a nguti silo nya singi gu va vbindra. Jesu a diri uye gyanana nya koma, si thulago gu khiso a diri ni thumo nya wukhongolo ndrangani. Khu kharato, uye giride satshavbo a nga si kodza gasi gu khathaleya ndranga. Uye dzi garadzede gu hevbula wukarpintero ni Josefa gasi a mana dzitsapawu nyo phasedzeye ndrangani. Vavelegi va Jesu adzina va mu bhulede khu gu velegwa gwaye nyo samadzise ni esi vahavisi va si ganedego maningano naye. (Luka 2:8-19, 25-38) Ganiolu Jesu kha eneledwa basi khesi vavelegi vaye va nga ba va mu bhuleya; a di gu dzi ninga tepo nyo gevisise Milowo khu abune. Ho dziti kharini gu khethu Jesu a diri muhevbuli nya wadi nya Lito la Nungungulu? Khu gu na ngari gyanana, vahevbudzi Jerusalema va di gu “liwuga khu guti gwaye ni dziphindrulo dzakone.” (Luka 2:46, 47) Nigu tepo a nga ba ari ni 12 myaga, Jesu yeyedzide abune gu khuye Jehovha a diri Papayi waye. — Luka 2:42, 43, 49. w20.10 30 ¶13-14

Gukhodwa gu khethu Jesu wusidwe si na hi gira hi khodwa gu khethu ava va fudego va na wuswa. Tepo mupostoli Pawulo a nga lova maningano ni ava va fudego, khumbugide silo siraru nya lisima: 1) “Kristo fude khu kotani nya sighoho sathu.” 2) Uye “dzingidwe.” 3) Uye ‘wusidwe khu litshigu nya wuraru, kha nga yi ganelago Milowo nya Guage.’ (1 Kor. 15:3, 4) Gufa, ni gudzingwa, ni guwuswa ga Jesu sa gu tshamuseya ginani gwathu? Muprofeti Isaya ganede gu khuye Mesiya a di hadzi “duswa tigoni nya vathu nya guvbanye” a bwe a ‘dzingwa gumogo ni va nya guvivbedwa khu myonyo.’ Ganiolu khandri isoso basi Isaya a ganedego, engendzide gambe khuye Mesiya a di hadzi rwala “sighoho sa vathu nya vangi.” Jesu giride isoso khu gu ningeya womi waye kha nga muphaso nya gudzegiswe. (Isa. 53:8, 9, 12; Mat. 20:28; Rom. 5:8) Khu kharato, gufa, gudzingwa, ni guwuswa ga Jesu sa gu hi gira hi tiyisega gu khethu hi na tshudziswa gighohoni ni gufani nigu sigodwa sathu si fudego si na wuswa. w20.12 2-3 ¶4-6; 5 ¶11

Mupostoli Pawulo a di gu oloveya gu tshumayela dzisinagogani nya giJudha. Khu giyeyedzo, omu nya sinagoga ya Tesalonika, “khade gipimo nya dzisabhadho dzitharu na gu ganedzisana [ni maJudha] khu mahungu nya Milowo.” (Mith. 17:1, 2) Khatshi Pawulo a di gu tsakiswa khu gu tshumayela dzisinagogani momo. Uye dandrisidwe kha nga muJudha. (Mith. 26:4, 5) Pawulo a di gu vati gwadi vaJudha, khu kharato a di gu si kodza gu va tshumayela nya mba na gigaradzo. (Filp. 3:5) Tepo valala va nga gurumedza Pawulo gu khuga Tesalonika ni Bhereya, a di hongola Atena. Avba gambe, ‘a di ya bhudzisana [sinagogani] ni vaJudha ni vambe vakhozeli va Nungungulu.’ (Mith. 17:17) Ganiolu tepo Pawulo a nga ba a tshumayela dzibazarini, a di gu tshumayela vathu nyo hambanehambane. Vbakari nya ava va nga ba va mu engiseya gu diri ni vafilozofo ni vambe vanyamayigo va nga ba va wona sihevbudzo sa Pawulo kha nga “siphya.” Va di mu embeya khavo: Wa gu ‘tadza dzindzeve dzathu khu silo hi si sitigo.’— Mith. 17:18-20. w20.04 9 ¶5-6

U nga dzi ningi nandru wa gu ba u emisana ni gu dzipwa khatsi kha wu phasi gilo. Kha nga olu hatshavbo hi gu sighohi hi ngu vbweta wuwadi wu si hi faneyigo wa Jehovha owu a hi ningago khu gu thumisa muphaso nya dzegiso. (Efes. 1:7; 1 Joh. 4:10) Nigu Vandriyathu libandlani va na hi tiyisa. Avo va nga hi engiseya gwadi tepo hi vbwetago gu bhula va bwe va ganeya malito nyo tiyise. (Mav. 12:25; 1 Tes. 5:14) Joy ndriyathu moyo nya nyamayi wa Nigéria a tshaniswago khu gu vbeya tshivba vari khuye: “Si di hadzi gu nyi garadzeya gu timiseya gigaradzo gegi nya mba phaswa khu vandriyathu. Giphaso egi vandriyathu va nyi ningidego, giyeyedzo nya gu khigyo Jehovha a ngu hlamula milombelo yangu. Avo va nyi phaside gu wona edzi nyi nga tiyisago khidzo vambe va dzipwago na va si phasi gilo.” Gu vbwetega hi dziti gu khethu vandriyathu khandri tepo yatshavbo va dzitigo gu khavo hi ngu vbweta gu tiyiswa. Khu kharato, gu vbwetega hi hidzimeleya maKristo ma vidzidwego hi bwe hi ma embeya gu khethu ha gu vbweta giphaso. w20.12 23-24 ¶7-8

Gutala nya dzitepo, gilo nyo pheye hi girago gasi gu thanga wupari ni muthu nyo khaguri khu gu vbungadza naye. Tepo mu bhulago khesi mu si pimisago ni esi si gomogo myonyoni gwanu, mwa gu khala dzipari. Ganiolu gasi gu khala pari nya yikhongolo ya Jesu dzimbe dzitepo kha si vbevbugi. Kholu kha ha muti Jesu khovbe ni khovbe. Makristo nyo khaguri ya lizana myaga nyo pheye ma emisanide ni gigaradzo nyo fane. Ambari ulolo, mupostoli Pedro a di khuye: “Enu mu ngu mu haladza, ambari mu ngamba mu wona; mu ngu khodwa gwaye, ambari mu si mu wonigo olu.” (1 Ped. 1:8) Khu kharato, si ngu kodzega gu manega ni wupari wa vbafuvbi ni Jesu ambari ha gu mba mu wona khovbe ni khovbe. Nigu, hi mwalo makodzelo nyo bhule ni Jesu. Tepo hi gombeyago, ha gu ganeya ni Jehovha abune. Lisine gu ha gu gombeya khu lina la Jesu ganiolu ho ganeya ni Jehovha. Khu lisine, Jesu kha vbweti gu khuye hi yisa milombelo yathu gwaye. Khu ginani? Kholu nombelo wo gira gipandre nya wukhozeyi wathu nigu khu Jehovha basi a yedego gu khozedwa. (Mat. 4:10) Ambari ulolo, hi nga yeyedza lihaladzo lathu khu Jesu. w20.04 20 ¶1-3

Vatutumi nya mapalisana nya vaGreki va di yede gu timiseya sigaradzo nya nga gugarala ni gupwa guvbisa sivbango. Ganiolu va di gu tumba tshivba yawe ni gu trenari. Gufana ni vatutumi vovo anethu hi ngu hakha sihevbudzo nya edzi hi nga tutumago khidzo ndrani nya mapalisana hi gomogo gwawo. Ganiolu ethu hi na ni lithomo guvbindra vatutumi vovo. Ethu hi nga mana tshivba nya mba vbeya ga Jehovha nigu uye kha hi pimeyi tshivba yoyo. Ha gu tumba Jehovha, uye a ngu tumbisa gu hi hevbudza ni gu hi gira hi tiya. Mupostoli Pawulo a di yede gu emisana ni sigaradzo nya singi. Vbavbandze nyo vadwe ni gu tshaniswa khu vambe, dzimbe dzitepo a di gu dzipwa na vbede tshivba nigu a di yede gu timiseya egi uye mune a nga gi rana khuye “muba givilini.” (2 Kor. 12:7) Wulangani nyo wone sigaradzo soso kha nga gighelo nyo dige gu thumeya Jehovha, uye a di si wona kha nga lithomo nyo tumbe Jehovha. (2 Kor. 12:9, 10) Kha nga olu Pawulo a nga ba a dzi emisede gu gira isoso, Jehovha a mu phaside gu timiseya silingo satshavbo. w20.04 29 ¶13-14

Hi na ni giningwa nya mba wonega nyo khale “vaphasedzeli va Nungungulu,” va Jesu ni dzingilozi. (2 Kor. 6:1) Ho va phasedzeya tepo yatshavbo hi girago thumo nya gutshumayele. Na gu ganeya khuye ni vale va girago thumo wowu, Pawulo ganede esi: “Ethu hi sithumi hi thumago gumogo ni Nungungulu.” (1 Kor. 3:9) Tepo hi tshumayelago ho thuma gumogo ni Jesu gambe. Dundruga gu khuwe tepo Jesu a nga ninga gileletelo valandreyi vaye nya gu ‘gimbile va hevbudza mayigo yatshavbo,’ vbedzide khuye: “Nyi na bani nyiri nanu.” (Mat. 28:19, 20) Ahati dzingilozi ke? Hi ngu bonga ngudzu kholu dzingilozi dzi hi thangeyago tepo hi gimbiyago hi hevbudza “mahungu nya yadi nya gupindruge . . . vathu va vbanyago mafuni”! (Gutu. 14:6) Giphaso gyogyo gi tago khu ndzadzini gya gu hi phasa gu tadzisa ginani? Tepo hi tshumayelago mahungu nya mufumo dzimbe dzimbewu dzi ngu thega myonyoni nya yadi dzi buga. (Mat. 13:18, 23) Khu mani a girago gu dzimbewu dzodzo nya lisine dzi dandra dzi bwe dzi ninga mihandro? Jesu tshamusede avba nya lowo wa muhuno. w20.05 30 ¶14-15

Muhuno gu na ni dzindranga nya dzingi edzi mwama ni ngadzi va tshudego mutshadho. Ambari dzindranga edzi vatshavbo va vbanyago ndranga mweyo kha vari dzipari. Singalagadzi nyo khaguri nya dzindranga, wari khuye: “Mamayi, papayi ni sanana, va mwalo tepo nyo bhule vatshavbo kholu va gu vbedza tepo nya yingi avba nya dzikomputadhori dzawe, dzithabhileti, dzitelefoni mwendro gu jogari dzivhidhiyu ghemi. Ambari olu va vbanyago ndranga mweyo avo kha va tivani gwadi.” Ethu kha hi vbweti gu landriseya mavbanyelo nya litigo leli nya mba na lihaladzo. Wulangani nya isoso, ethu gu vbwetega hi hevbuleya gu haladza sivbango nya ndranga yathu hi bwe hi haladza vandriyathu libandlani. (Rom. 12:10) Ginani lihaladzo nya wundruye? Lihaladzo eli sivbango nya ndranga si yeyedzanago. Ilolo khilo lihaladzo hi yedego gu li yeyedza ga vandriyathu libandlani. Ha gu yeyedza lihaladzo nya wundruye hi na phasa vatshavbo gu thumeya Jehovha na va tsakide. — Mik. 2:12. w21.01 20 ¶1-2

Tsawa nyo khaguri nya vahagani wu pwanago si ngu vbevbuga gu dugeleya gu vbindra owu wu gu mba pwana. Si nga kodzega gu monyo wago wu fana ni tsawa owu vahagani vakone va pwanago abari gu esi u si pimisago, esi u si vbwetago ni edzi u dzipwago khidzo si ngu pwanana ni gu thumeya Jehovha. Dundruga gu khuwe Sathane a ngu vbweta ngudzu gu kabanisa monyo wago. O vbweta gu khuye mapimo yago, gudogoreya gwago ni edzi u dzipwago khidzo si dwanisana ni milayo ya Jehovha. Ganiolu uwe wo vbweta gu khuwe monyo wago wu khala moyo gasi u si kodza gu thumeya Jehovha. (Mat. 22:36-38) Gima u nga dzumeleyi gu khuwe Sathane a kabanisa monyo wago! Gombeya u lomba esi ga Jehovha nga Dhavhidhe: Nyi ninge monyo moyo gasi nyi kodza gu ninga githawo lina lago. Dzi garadzeye gu vbanya guya khesi u si gombeyago. Tshigu ni tshigu, ga satshavbo u girago gani sikhongolo gani sidugwana si yede gu yeyedza gu khiso u ngu ninga githawo nya gikhongolo lina li agidego la Jehovha. Wo gira isoso, u na ninga wuzundzo lina leli kha nga Fakazi ya Jehovha. (Mav. 27:11) Nigu hatshavbo hi na si kodza gu ganeya esi si ganedwego khu muprofeti Mikeya, a nga khuye: “Ethu hi na landra lina la [Jehovha], khavbo gu si vbeligo.” — Mik. 4:5. w20.06 13 ¶17-18

Tepo pfhumu ya wuronga ni yimbe mifumo va na wugeyago sithumi sa Nungungulu, isoso si na gorosa ngudzu Nungungulu nya Tshivba Yatshavbo khavbovbo yi pheya Harimagedhoni. (Gutu. 16:14, 16) Khu tepo yoyo, pfhumu ya wuronga gumogo ni yimbe mifumo yi wumbago Gogi wa Magogi yi na tshungunudwa nigu kha va na nga ‘mana muthu nya gu va lamulele.’ (Dhan. 11:45) Livhesi li landreyago avba nya matimo ya Dhaniyeli li ngu hi ninga mambe mahungu maningano ni edzi pfhumu ya wuronga ni vaphasedzeyi vaye va na tshungunudwago khidzo ni edzi hi na vbulugiswago khidzo. (Dhan. 12:1) Livhesi leli lo thula ginani? Migeli limbe lina la Pfhumu yathu, Jesu Kristo. Uye a ngu “emela vathu” va Nungungulu gukhugeya tepo Mufumo waye wu emisidwego ndzadzini khu 1914. Nugunugu uye a na “dugelela” mwendro a na tshungunula valala vaye nyimbini nya Harimagedhoni. Nyimbi yeyi khiyo gilo nyo hegise egi Dhaniyeli a nga khuye “gikhati nya gusaniseke” matimuni nya vathu. —  Gutu. 6:2; 7:14. w20.05 15-16 ¶15-17

Kha nga olu Josefa a nga ba ari gumbi nigu khu gimbiya nya tepo a khala gibotshwa, uye a diri mwalo makodzelo nyo vbindrugedze giemo gyaye. Khu kharato, a si kodzide kharini gu ninganiseya silo? Vbavbandze nyo vege gupima avba nya esi a nga ba a si si kodzi gu gira, uye a di gu dzi garadzeya gu gira mithumo a nga ba a ningwa. Josefa a di gu vega gupima avba nya edzi a nga tsakisago khidzo Jehovha. Khu kharato, Jehovha a di gu gira gu satshavbo esi Josefa a nga ba a gira si dugeleya. (Gen. 39:21-23) Matimo ya Josefa ma gu yeyedza edzi litigo li vivbidego khidzo ni edzi vathu va hi pharago khidzo khu ndziya nya mba yadi. Ambari ndriyathu kamo a nga hi gandra ginyalana. Ha gu wona Jehovha kha nga wuthavelo wathu, kha hi na nga vbeya tshivba nigu kha hi na nga ema gu mu thumeya. (Ndzi. 62:6, 7; 1 Ped. 5:10) Dundruga gu khuwe Josefa a diri ni tanga nya 17 myaga tepo Jehovha a nga gira gu a manega ni miloro nyo hathege. Somo guagani gu khiso Jehovha a ngu va tumba vaphya va mu thumeyago. Vaphya nya vangi muhuno va ngu tumbega kha nga Josefa. Vambe va kona va ngu khothedwa nya mba na nandru khu gu vbweta gu simama va tumbega ga Nungungulu. — Ndzi. 110:3. w20.12 16-18 ¶3, 5, 7

Mupostoli Pedro ni mupostoli Johane va di gu si wona kha nga wuzundzo gu tshaniswa khu kotani nyo landreye Jesu ni gu hevbudza vambe esi Jesu a va hevbudzidego. (Mith. 4:18-21; 5:27-29, 41, 42) Vapizane va diri mwalo gighelo nyo khale dzitshoni. Ambari olu maKristo nyo pheye ma nga ba ma si ningwi githawo khu vathu va gipandreni mule ayo ma dzi garadzede ngudzu gu phasa vambe. Khu giyeyedzo, mabhuku nya Bhibhiliya ma lovidwego khu maKristo nyo khaguri teponi yile ma ngo simama gu phasa ni gu ninga gutumba dzimiliyoni nya vathu muhuno. Nigu Mufumo va nga ba va wu huweleya, olu wu ngu fuma ndzadzini nigu nya mba hweya wu na fumeya vathu vatshavbo. (Mat. 24:14) Ganiolu mufumo wa gale wa vaRoma wu tshanisidego maKristo kha wa simama khu myaga nya yingi. Nigu vapizane vovo nyo tumbege, olu dzipfhumu ndzadzini. Ganiolu valala vawe ke? Va fude nigu ambari va gu wuswa avo va na fumedwa khu Mufumo wu huweledwego khu maKristo va nga ba va ma nyenya.— Gutu. 5:10. w20.07 15 ¶4

Abrahama kha nga ba a kanakana gu khuye esi Jehovha a si tumbisidego si na girega. Khu kharato, uye a di gu gira nga khatshi a gu wona Mesiya, Oyu a nga hadzi khala Pfhumu nya Mufumo wa Nungungulu. Khu kotani nya gighelo gyogyo, Jesu a di embeya maJudha khuye: “Babe wanu Abrahama tsakide khu gu lirela gu wona litshigu langu; na li wone a di nengela.” (Joh. 8:56) Khu lisine, Abrahama a di gu dziti gu khuye simbe nya situgulwana saye si di hadzi gira gipandre nya Mufumo wu nga hadzi emiswa khu Jehovha ni gu uye a di gu dzi emisede gu vireya kala gu tadzisega gitumbiso gyogyo. Abrahama yeyedzide kharini gu khuye a di gu vireya “lidhoropa,” li emisidwego khu Nungungulu? Nyo pheye, Abrahama kha gira gipandre nya mifumo nya vathu. Uye a di simama gu vbanya omu nya matendra nigu gima kha seketeya mifumo nya vathu. Abrahama kha zama gu dzi gireya mufumo waye. Wulangani nya isoso, uye a di simama gu engisa Jehovha, na gu vireya gu khuye situmbiso esi Jehovha a giridego si tadzisega. Khu gu ba a giride isoso, Abrahama yeyedzide gukhodwa nyo tiye ga Jehovha. w20.08 3 ¶4-5

Nga wona giyeyedzo nya wuvili. Jehovha a di khuye Paradhesini mwalo a na ganeyago gu khuye: “Nyi ngu dwala.” (Isa. 33:24) Khu kharato, vale va na wuswago khu gufani va na wuswa na vari mwalo sitshetsheya. Ganiolu kha va na nga wuswa na va vbelede. Kholu va gu wuswa na va vbelede si nga gira hi si vati. So wonegisa gu khiso hi na vbeleya vbadugwanavbadugwana ndrani nya Mufumo nya 1000 myaga wa Kristo. Guvbeyani nya 1000 myaga, Jesu a na ningeya Wufumu ga Papayi waye. Khu tepo yoyo Mufumo wu na ba wu giride satshavbo esi Jehovha a nga ba a si vbweta gupata ni gu gira vathu va vbeleya. (1 Kor. 15:25-28; Gutu. 20:1-3) Nga dundrugeya edzi si na tsakisago khidzo gu hakha muthu u mu golago a wugidego khu gufani. U na hegeleya mwendro u na liya khu gutsaka? Mwendro saye u na embeleya u zundza Jehovha khu gutsaka? Egi hi gitigo khu gu hi na tsaka ngudzu khu gu ba Jehovha ni Jesu va wuside valongo vathu ni dzipari dzathu dzi nga ba dzi fude. w20.08 16 ¶9-10

Mupostoli Pawulo kutside maKristo gu dzi hungeya yabune gu khayo ma na si kodza gu thumeya Jehovha kha nga sikwendra mwendro ne. (1 Kor 7:8, 9) Pawulo kha nga ba a woneya vbavbatshi maKristo ma si gu tshadhigo. Khu kharato, uye hathide lidzaha nya gikwendra Thimoti gasi gu gira mithumo nya lisima ngudzu. (Filp. 2:19-22) Isoso so yeyedza gu khiso si vivbide gu ganeya gu khethu ndriyathu nyo khaguri kha ninganedwi khu gu gira silo nyo khaguri khu gu ba a tshadhide mwendro khu gu ba ari gikwendra. (1 Kor. 7:32-35, 38) Jesu ni Pawulo kha va hevbudza gu khavo muKristo yede gu tshadha mwendro gu khala gikwendra. Ina ka, mahegiso muni hi ma vboheyago khu mahungu yaya? Mukhedziseyi nya 1 nya Outubro nya 2012, wu di khuwo: “Khu lisine vandriyathu va [tshadhidego ni vale va si gu tshadhigo] vatshavbo va gu wonwa kha nga siningwa si tago khiyo ga Nungungulu. . . . Khu kharato, Jehovha kha vbweti gu khuye sikwendra sipwa dzitshoni mwendro si garadzega khu gu ba sa sa tshadha.” Khu gighelo gyogyo gu vbwetega hi ninga lisima vandriyathu va si gu tshadhigo. w20.08 28-29 ¶8-9

Omu nya mayigo nyo khaguri, vathu nya vangi va ngu dzumeya mahungu nya yadi va bwe va vbweta guti nya singi khu Jehovha. Nigu esi hi va hevbudzago khiso kamo esi vathu va si vbwetago. Ganiolu omu nya mambe mayigo vathu va mwalo tepo khu Nungungulu nigu kha va theyi kota khu Bhibhiliya. Ahati vathu va gipandreni u vbanyago umo, va gu ma hakha kharini mahungu nya yadi? Gani va ngu ma hakha gwadi, gani kha va ma hakhi, Jehovha o vbweta gu khuye hi tshumayela kala huye khuye thumo wu vbede. Jehovha hungide litshigu “gu no tago guhegisa.” (Mat. 24:14) Jesu profetide silo si nga hadzi girega matshiguni nyo hegise nigu a di gu dziti gu khuye silo soso si di hadzi va tsolopeteya gu gira thumo nyo tshumayele. Khu gighelo gyogyo, uye a di va gengedza khuye “khalani na mu dongide.” (Mat. 24:42) Matshiguni ya Nowa, vathu va di pharegide ngudzu nyo bwe va si vegi gupima avba nya gigengedzo va ningidwego khu Nowa. Khu gu fana, muhuno nugo vathu va gu khala na va pharegide nyo bwe va si tshaledwi khu tepo nyo engiseye mahungu nya yadi. (Mat. 24:37-39; 2 Ped. 2:5) Ganiolu ethu gu vbwetega hi simama gu vega gupima avba nya thumo hi ningidwego khu Jehovha. w20.09 8-9 ¶1-2, 4

Sathane “tade khu likhulo nya likhongolo ngudzu,” khu kharato, yimwalo ndziya nya gu hi vbuluga gu tshaniswa khuye. (Gutu. 12:12) Nugunugu hatshavbo hi na lingwa gukhodwa gwathu. Litigo latshavbo li na emisana ni “tshanisa nya yikhongolo nya gu gima yi si gu manegi, gukhugela Nungungulu na vangide litigo kala matshigu ya muhuno.” (Mat. 24:21) Ndrani nya tepo yoyo, si nga gira vandrangani gwathu va hi wugeya, nigu thumo wathu nuwo si nga gira wu himbedzedwa. (Mat. 10:35, 36) Ina moyo ni moyo wathu, a na pimedzeya Pfhumu Asa khu gu tumba gu khuye Jehovha a na hi phasa ni gu hi vhikeya? (2 Dzik. 14:11) Jehovha o hi phasa gu tiyisa gukhodwa gwathu olu gasi hi dzi dongiseya gu emisana ni esi si tago. Uye o thangeya ‘githumi nya gutumbege ni nya gugengeye’ gasi gi hi ninga guhodza khu “gikhati gi vbwetegago” gasi hi si kodza gu emisana ni esi si tago. (Mat. 24:45) Ganiolu hatshavbo gu vbwetega hi dzi garadza gasi gu tiyisa gukhodwa gwathu.— Hebh. 10:38, 39. w20.09 18-19 ¶16-18

So ba si gimbileyana ni gugola gwaye, Jehovha khu gu thumisa liphuvbo laye nya guage, a nga gira gu dzipfhumu dzi gira esi a si vbwetago. Vathu va nga kemba ndzila gasi mati ma hongola omu va gu vbwetago. Khu gu fana, Jehovha khu gu thumisa liphuvbo nya guage, a nga gira gu dzipfhumu dzi tadzisa gugola gwaye. Tepo gu giregago isoso, dzipfhumu dza gu kutsega gu gira silo si na phasago vathu va Nungungulu. (Fananisa ni Ezira 7:21, 25, 26) Ginani hi yedego gu gira? Hi yede gu gombeleya vafumeli ni vathangeyi nya mifumo tepo va hungago silo si kuhago mitshangano ni thumo nyo tshumayele. (1 Thim. 2:1, 2; Neh. 1:11) Gu fana ni maKristo nyo pheye hi yede gu gombeya ga Nungungulu gasi a phasa vandriyathu va gomogo pasoni. — Mith. 12:5; Hebh. 13:3. w20.11 15 ¶13-14

Abari gu u moyo nya ava va hevbudego ni mupizane nya muphya kha si kanakanisi gu khiso si gu tsakiside ngudzu gu mu wona na gu bhapatiswa. (1 Tes. 2:19, 20) Vapizane nya vaphya va bhapatisidwego, “malangaliya nya sileletelo” na siri basi ga vale va va hevbudzidego ganiolu ga libandla latshavbo. (2 Kor. 3:1-3) Si ngu tsakisa gu wona gu khethu ndrani nya 4 myaga, ngima ni ngima, gu gimbidzisidwe tanga nya 10 000 000 sihevbulo nya Bhibhiliya mafuni gwatshavbo. Ndrani nya 4 myaga yoyo tanga nya 280 000 vathu va bhapatisidwe mwaga ni mwaga kha nga Dzifakazi dza Jehovha ni vapizane va Jesu Kristo. Hi nga phasa kharini sihevbuli soso nya Bhibhiliya nya singisingi gasi gu si bhapatiswa? Jehovha a ngu ninga lithomo vathu nyo khale Dzifakazi dzaye. Khu kharato, ha gu gira satshavbo hi si kodzago gasi gu va phasa gu dandra khu liphuvboni kala va ya bhapatiswa. Tepo hi tshadego nayo yi dugwana kamo ngudzu! — 1 Kor. 7:29a; 1 Ped. 4:7. w20.10 6 ¶1-2

Pfhumu Sawule kha engisa Jehovha. Tepo muprofeti Samuweli a nga mu khawuka khu gu mba engisa, Sawule a di bomba gu dzumeya gu khuye giride gihoso. Uye a di dzi emeleya, a ganeya khuye kha nga gira gihoso nya gikhongolo, a bwe khuye vathu va nga mu kutsedzeya gu gira isoso. (1 Sam. 15:13-24) Sawule kha nga ba a pheya gu gira silo nya nga esi. (1 Sam. 13:10-14) Khu kharato, uye dzumelede liphuvbo nya gu dzi khusedze li dandra monyoni gwaye. Uye kha vbindrugedza mapimo yaye, esi si giridego gu a si kawukwa a bwe a si tsakedwi khu Jehovha. Ethu kha hi dzini gu fana ni Sawule, khu kharato, hi yede gu dzi wudzisa khethu: ‘Tepo nyi lerigo wusingalagadzi wu gomogo omu nya Lito la Nungungulu, ina nyi ngu zama dzindziya nya gu dzi emeleye gasi nyi si wu landrisi? Ina nyi ngu pimisa gu kheni esi nyi girago kha sa hosega ngudzu? Ina nyi ngu rwega vambe nandru khu kotani nya esi nyi girago?’ Abari gu hlamulo nya siwudziso sesi i ina, hi yede gu vbindrugedza mapimiselo yathu ni mavbanyelo yathu. Kholu ha gu mba gira isoso, hi na khala vathu nya gu dzi khusedze ava Jehovha a si va vbwetigo kha nga dzipari dzaye. w20.11 20 ¶4-5

Vaphya, gu vbwetega mu hatha oyu u na mu thumeyago. Mu yede gu muti gwadi Jehovha, muti satshavbo si pategago omu nya makungo yaye, mu bwe mu gira gugola gwaye womini gwanu. (Rom. 12:2) Khavbovbo mu na kodza gu gira silo nya sasi womini gwanu, a gu gu thumeya Jehovha. (Jos. 24:15) Wa gu simama gu leri Bhibhiliya ni gu yi hevbula, lihaladzo lago khu Jehovha li na simama li dandra nigu gukhodwa gwago gu na tiya ngudzu. Hatha gu thangisa Jehovha womini wago. Litigo la Sathane la gu tumbisa gu khilo wa gu thumisa makodzelo u gu nawo gasi gu gira esi u si vbwetago u na mana gu tsaka. Ganiolu hi ngu dziti gwadi gu khethu ava va vegago gu pima avba nya dzithomba va gu dzi bedza vabune “guvivbani.” (1 Thim. 6:9, 10) Ganiolu wa gu engisa Jehovha u bwe u thangisa uye womini wago u na ‘dugeleya’ u bwe u mana womi nyo tsakise. — Jos. 1:8. w20.10 30-31 ¶17-18

Dziteponi nya maKristo nyo pheye. Mahungu a ya Jesu a tshumayedego ma ningide gu tumba vathu vatshavbo. Jesu rumide va landreyi vaye gu simama ni thumo a wu phedego gasi gu ningeya wufakazi “kala mahegiso nya mafu.” (Mith. 1:8) Khu lisine, avo va di hadzi gu mba si kodza gu gira thumo wowo khu tshivba yawe. Avo va di hadzi vbweta liphuvbo nya guage a gu “muphasedzeyi” oyu Jesu ava tumbisidego. (Joh. 14:26; Zak. 4:6) Valandreyi va Jesu va hakhide liphuvbo nya guage khu Pentekosta nya 33 teponi yathu. Khu gu phaswa khu liphuvbo nya guage va di dzegeya gu pheya gu tshumayela, nigu khu gitepwana basi dzimiliyoni nya vathu va di dzumeya mahungu nya yadi. (Mith. 2:41; 4:4) Tepo va nga pheya gu wugedwa, vapostoli kha va bweleya hwane va diga gu tshumayela ganiolu va di lomba giphaso ga Nungungulu. Va di gombeya khavo “ninga tshivba sithumi sago si huweleya mahungu yago khu gu tiya gwatshavbo.” Avo va di tala khu liphuvbo nya guage va bwe va simama “gu ganeya mahungu ya Nungungulu na va tiyide.” — Mith. 4:18-20, 29, 31. w20.10 21 ¶4-5

Khu ginani hi ga tiyisegago gu khethu Jehovha wuside Jesu? Hwane nyo ba Jesu a wusidwe vathu nya vangi va mu wonide nigu va bhulede vambe khu isoso. (1 Kor. 15:5-7) Fakazi nyo pheye yi khumbugidwego khu mupostoli Pawulo, khu mupostoli Pedro (Khefasi). Tsawa nyo khaguri nya vapizane wu seketede gu khuwo Pedro wonide Jesu na wusidwe khu gufani. (Luka 24:33, 34) Gu diga isoso, Pawulo a ganede gu khuye “ava nya 12,” a gu vapostoli, va wonide Jesu na wusidwe khu gufani. Khavbovbo, Kristo a di “dzi wonegisa gambe ga gikwata nya vathu nya tengo nya guvbindre livbandre mazana (500) vakhodwa khu gomogo.” Si nga gira nari ga tshangano wule nyo tsakise Galileya wu khumbugwago omu ga Matewu 28:16-20. Jesu ‘a di wonega gambe ga Jakobe.’ Jakobe khatshi a diri ndriye wa Jesu oyu gu pheyani a nga ba a si khodwi gu khuye Jesu khuye Mesiya. (Joh. 7:5) Hwane nya gu ba Jakobe a wonide Jesu a wusidwego khu gufani, uye a di khodwa. Si ngu hlamadzisa gu wona gu tepo Pawulo a lovidego lidangaliya leli khu 55 matshiguni yathu, gutala nya vathu va wonidego Jesu a wusidwego khu gufani va di ngo vbanya. Khu kharato, a gu tshuka muthu nyo khaguri a kanakana gu khuye Jesu a di wusidwe, a di hadzi ya wudzisa moyo nya vathu vava. w20.12 3 ¶5, 7-8

Ha gu ba hi si dzipwi gwadi ngudzungudzu ha gu ba hi dwala, si nga hi garadzeya gu pimisa silo nya sadi. Khu kharato lomba giphaso ga Jehovha. Kha nga olu uye a gu mba hi duseya madwali olu, uye a gu hi thaveleya a bwe a hi ninga tshivba hi yi vbwetago gasi gu timiseya. (Ndzi. 94:19) Khu giyeyedzo, uye a nga kutsa vandriyathu gu va ta hi phasa khu mithumo nyo khaguri ndrangani. Uye a nga kutsa vandriyathu gu vata gombeya ni ethu. Mwendro a nga hi phasa gu dundruga malito nyo tiyise ma gomogo omu nya Lito laye, nya nga gitumbiso nya womi nyo vbeleye nya mbana wuvi ni madwali hi na wu manago mafuni nya maphya. (Rom. 15:4) Amabri ulolo, adzina hi nga dzipwa na hi si kodzi gu gira nya singi thumoni wa Jehovha. Laura, ndriyathu moyo nya nyamayi vbedzide 37 myaga na gu lade ndrani nya mutshini wu nga ba wu mu phasa gu dagata. Uye a di gu tshaniseka gambe khu kankro nigu giride dzioperasawu ni dzioperasawu, uye a diri ni gigaradzo gambe nya lidowo. Ganiolu uye gima kha ema gu tshumayela. Uye tshumayede vadhogodheya ni vambe va nga ba va hongola gaya gwaye nigu phaside 17 vathu gu hevbula lisine maningano ni Jehovha. w20.12 24-25 ¶9, 12

Mupostoli Pawulo a di gu vbweta giphaso. Khu 56 matshiguni yathu, gitshungu gi di kuruviseya Pawulo khu tempeleni ya Jerusalema gi mu dusa vbavbandze gi bwe gi zama gu mu songa. Ga litshigu li nga landreya, tepo Pawulo a nga yiswa nyumbani nya wulamuli nya giJudha, vbadugwana basi a nga vbweta gu vbadzuledwa khavo. (Mith. 21:30-32; 22:30; 23:6-10) Ga tepo yeyi adzina Pawulo dzi wudziside khuye: ‘Nyi na si kodza gu timiseya dzitshanisa dzedzi kala lini?’ Jesu phaside kharini Pawulo? Ni wutshigu wakona hwane nyo ba Pawulo a kuruvisedwe, “Pfhumu” Jesu a di dzi wonegisa gwaye a mu embeya khuye: “Tiya! Edzi u nga ninga khidzo wukustumunyu khu lina langu Jerusalema, khidzo u na ya girago gambe Roma.” (Mith. 23:11) Gitumbiso gegi gi tiyiside ngudzu Pawulo. Jesu zundzide Pawulo khu wu Fakazi a wu ningedego Jerusalema. Nigu uye tumbiside Pawulo gu khuye a na vboha Roma na vhikelegide omu a nga hadzi ya tshumayela umo. Hwane nya gupwe gitumbiso gyogyo, si nga gira Pawulo na dzi pwide na vhikelegide kha nga gyanana gi wugaredwego khu papayi wagyo. w20.11 12-13 ¶1, 3, 4

Gutumba gwathu nya Mufumo wa Nungungulu go fana ni “giwindri nya gutiye” gi hi ningago gutiya ambari ha gu ba hi tshangana ni sigaradzo mwendro gu garadzega. Dundrugeya khu wumindru owu Jehovha a hi tumbisago, nigu ga tepo yoyo gu mwalo muthu a na garadzegago khu gilo. (Isa. 65:17) Dzi dundrugeye na wu vbanya khu gurula omu nya litigo nya liphya, omu gu na ba guri mwalo silo nya gu vivbe. (Mik. 4:4) U na tiyisa gambe gutumba gwago wa gu bhuleya vambe maningano ni litigo nya liphya. Gira satshavbo u si kodzago thumoni nyo tshumayele ni gu gira vapizane. Wa gu gira isoso, u na “manega ni gutumba nyo tiye kala mahegiso.” (Hebh. 6:11, NM.) nga olu litigo la Sathane li gu romo vbafuvbi ni gu fuviswa, hi na tshangana ni sigaradzo nya singi si na hi girago hi garadzega. Hi na si kodza gu emisana ni sigaradzo hi bwe hi simama ni gurula na siri khu tshivba yathu, ganiolu khu gu tumba Jehovha. Hongoleni hi yeyedza khu mithumo yathu gu khethu, hi na ni gutumba avba nya gitumbiso gya Jehovha gi gu khigyo: ‘Tshivba yanu mu na yi mana gurulani ni gutumbani.’ — Isa. 30:15. w21.01 7 ¶17-18

Wona gu khuwe Jakobe 5:11 a gu pwananisa wuwadi wa Jehovha ni limbe likhalelo li hi girago hi hidzimeya gwaye, a gu wuhindzi. (Ekiso. 34:6) Mweyo nya dzindziya eyi Jehovha a hi yeyedzago khiyo wuhindzi waye khu gu hi divaleya sighoho sathu. (Ndzi. 51:1) Omu nya Bhibhiliya, wuhindzi wa gupata silo nya singi gu vbindra basi gu divaleya muthu nyo khaguri a nga hi ghoheya. Wuhindzi wa gu thula gambe gu garadzega ogu muthu a gupwago a gu wona mumbe muthu na gu tshaniseka, khu kharato, a kutsega gu mu phasa. Jehovha a gu ganeya gu khuye gudogoreya ogu a gu nago nya gu hi phase gukhongolo ngudzu gu vbindra ogu mamayi a gu nago khu gyanana gyaye. (Isa. 49:15) Tepo hi garadzegago, wuhindzi wa Jehovha wa gu mu kutsa gu hi phasa. (Ndzi. 37:39; 1 Kor. 10:13) Hi nga yeyedza wuhindzi ga vandriyathu khu gu hi va divaleya tepo va hi ghoheyago hi bwe hi si va vegeyi giviti va gu tshuka va hi gandra ginyalana. (Efes. 4:32) Yimbe ndziya nya lisima hi nga yeyedzago khiyo wuhindzi ga vandriyathu khu gu va phasa tepo va emisanago ni sigaradzo. Ha gu gira isoso, ha gu pimedzeya Jehovha, oyu a yeyedzago wuwadi vathu.— Efes. 5:1. w21.01 21 ¶5

Hungo nya ndranga kha yeli gu pharega ngudzu khu thumo nyo dzi vbanyise nyo bwe a diga gu khataleya ndranga yaye khu liphuvboni ni gu yi gira yi dzipwa gwadi nigu a yede gu yi hevbudza. Jehovha a ngu hi hevbudza ni gu hi kawuka kholu a gu vbweta gu hi phasa. (Hebh. 12:7-9) Khu ndziya nyo fane, Jesu a ngu hevbudza vale a va thangeyago khu ndziya nya lihaladzo. (Joh. 15:14, 15) Uye a ngu ninga wusingalagadzi, ganiolu, khu ndziya nya yadi. (Mat. 20:24-28) Uye a ngu pwisisa gu khuye kha ha vbeleya nigu dzitepo dzatshavbo hi ngu hosisa. (Mat. 26:41) Hungo nya ndranga a pimedzeyago giyeyedzo gya Jehovha ni Jesu a ngu dundruga gu khuye mwangadzi waye ni sanana saye kha va vbeleya, khu kharato uye kha ‘gorogeyi’ mwangadzi waye ni sanana saye. (Kol. 3:19) Wulangani nya isoso, uye a gu landra wusingalagadzi wu gomogo omu ga Vagalatiya 6:1, a zama gu kawuka ndranga yaye “khu gwadi” na gu dundruga gu khuye uye nuye kha vbeleya. Gufana ni Jesu, hungo nya ndranga a ngu dziti gu khuye ndziya nya yadi nyo hevbudze khiyo ndranga yaye khu gu yi vegeya giyeyedzo nya gyadi. w21.02 6-7 ¶16-18

Khu gu thumisa dzegiso, Jehovha rengide womi wa moyo ni moyo wathu libandlani ni wa vatshavbo vale va khodwago ga Jesu. (Marko 10:45; Mith. 20:28; 1 Kor. 15:21, 22) Khu kharato, si ngu pwala gu ba Jehovha a hathide Jesu, oyu a ningedego womi waye khu kotani yathu, gu khala hungo nya libandla. Khu kharato, Jesu a na ni fanelo nya gu vege milayo eyi vathu, dzindranga ni libandla latshavbo va yedego gu yi landrisa a bwe a tiyisega gu khuye ina milayo yoyo yi ngu landriswa gani. (Gal. 6:2) Ganiolu Jesu a ngu gira nya singi gu vbindra gu vega milayo basi. Uye a ngu khatala ni gu haladza moyo ni moyo wathu. (Efes. 5:29) Vandriyathu nya vanyamayi va nga yeyedza gu khavo va ngu ninga githawo Kristo khu gu engisa sileletelo va ningwago khu ava uye a va hathidego gasi gu thangeya. Vandriyathu nya vama, va gu yeyedza gu khavo va ngu pwisisa malulamiselo nya wuthangeyi khu gu ninga githawo ni gu zundza vandriyathu nya vanyamayi. Tepo vatshavbo libandlani va ningago githawo malulamiselo aya Jehovha a ma giridego nya gu vambe va manega ni wuthangeyi, libandla li na manega ni gurula. Nigu nya lisima ga satshavbo khu gu hi na dhumisa Papayi wathu nya lihaladzo wa ndzadzini, Jehovha. w21.02 18-19 ¶14-17

Tepo Dhavhidhe ni vama vaye va nga ba va khaleya gu tutumatutuma, si lombide gu va diga dzindranga dzawe gasi va ya dwana nyimbi. Na vari nyimbitunu, valala va di dhumeya dzindranga dzawe va dzega vagadzi vawe ni sanana sawe. Kha nga olu Dhavhidhe a nga ba ari lisotshwa li nga ba li kodza gwadi gu dwana, adzina na lugide mano gasi gu lulamisa gigaradzo gile. Dhavhidhe a di wudzisa Jehovha, khuye: “Nyi ngu yela gu landra tsawa yoyu nya sighevenga, gani?” Jehovha a di hlamula Dhavhidhe khuye a na wu landre a bwe a mu tumbisa khuye a na dugeleya. (1 Sam. 30:7-10) Ginani u gi hevbulago khu matimu yaya? Lomba giphaso ga vambe. Lomba wusingalagadzi ga vavelegi vago. Lomba gambe giphaso ga madhota ma vidzidwego. Jehovha a ngu ma tumba madhota nigu anuwe gu vbwetega u ma tumba. Jehovha a gu wona madhota kha nga “siningwa” libandlani. (Efes. 4:8) Wo pimedzeya gukhodwa gwawe u bwe u dzumeya wusingalagadzi wawe, silo sago si na gu gimbileya gwadi. w21.03 4-5 ¶10-11

Jesu a di khuye oyu a gu mba thumisa esi a si hevbulago a gu fana ni mwama a vbahago nyumba yaye mulipfuleni. Satshavbo a girago a gu thumeya giburwana. Khu ginani? Khu gu gyo veta gingulu ni talo nya mati, nyumba yi na thega. (Mat. 7:24-27) Khu ndziya nyo fane, ha gu mba si thumisa esi hi si hevbulago, hi na ba hi thumeya giburwana. Khu kharato, tepo hi emisanago ni sigaradzo mwendro guwugedwa, gukhodwa gwathu kha gu na nga tiya. Ganiolu, ha gu thumisa esi hi si hevbulago, hi na kodza gu hunga gu gira silo nya sadi, hi mana gurula nigu gukhodwa gwathu gu na engedzeya gu tiya. (Isa. 48:17, 18) Gasi gu hi simama gu tumbega ga Jehovha ambari ha gu tshangana ni sigaradzo, hi yede gu simama gu gombeya gwaye ni gu leri Bhibhiliya tshigu ni tshigu. Nigu kha hi yeli gu divala gu khethu gilo nya lisima ngudzu gu ninga wuzundzu Jehovha. Hi nga tiyisega gu khethu Jehovha gima kha na nga hi diga. Nigu mwalo muthu a na si kodzago gu hi hambanisa ni lihaladzo la Jehovha. — Hebh. 13:5, 6. w21.03 15 ¶6; 18-19 ¶20