Dezembro

Jesu fananiside wupari a nga ba ari nawo ni valandreyi vaye ni edzi muhavisi a pharago khidzo dzinvuta dzaye. (Joh. 10:14) Si ngu pwala gu fananisa silo sesi kholu nvuta yi ngu muti muhavisi wayo nigu yi ngu gira satshavbo yi embedwago khu muhavisi wayo. Muendri moyo a si wonide isoso na si gu girega. Uye a di khuye: “Ethu hi di gu vbweta gu dusa dzifoto ni dzinvuta nyo khaguri, nigu hi di gu vbweta gu dzi gira dzi hidzimeya vbafuvbi gwathu, ganiolu idzo kha dza hidzimeya kholu dzi di si mati malito yathu. Gi di vboha gikhwatana gi nga ba giri muhavisi wadzo. Khu gu basi a dzi rana idzo dzi di mu landra.” Giyeyedzo gegi gya gu hi dundrugisa malito ya Jesu maningano ni dzinvuta dzaye mwendro vapizane vaye. Uye a di khuye idzo “dzi napwa lito langu.” Ganiolu, Jesu womo ndzadzini. Hi nga si kodza kharini gu engisa lito laye? Ha gu engisa lito laye tepo hi girago esi a hi hevbudzago. — Mat. 7:24, 25. w21.12 16 ¶1-2

Mupostoli Pawulo a di gu tshanisa Makristo, ganiolu uye pwisiside gu khuye esi a nga ba a gira si di gu vivbide nigu a di dzi emisede gu vbindrugedza esi a nga ba a gira ni mavbanyelo yaye. (1 Thim. 1:12-16) Khu gu phaswa khu Jehovha, Pawulo khade lidhota li gu na ni lihaladzo, li pweyago wusiwana ni gu dzi nogisa. Uye a di gu tumba gu khuye Jehovha a di hadzi mu divaleya. (Rom. 7:21-25) Uye kha nga ba a vireya gu khuye a khala muthu nyo vbeleye, wulangani nya isoso uye dzi garadzide gasi gu tshukwadzisa mavbanyelo yaye nya Wukristo. Nigu khu gu dzinogisa tumbide giphaso gya Jehovha gasi gu vbedzisa thumo waye. (1 Kor. 9:27; Filp. 4:13) Madhota khandri ma di hathwa khu gu ba ayo na ma vbelede. Jehovha o vireya gu khuye ma dzumeya sihoso ma bwe ma tshukwadzisa mavbanyelo yawe nya Wukristo. (Efes. 4:23, 24) Lidhota li yede gu thumisa gihevbulo gyalo nya Bhibhiliya gasi gu wona omu li yedego gu tshukwadzisa ni gu vbindrugedza silo nyo khaguri. Lo gira isoso, Jehovha a na li phasa gu mana gutsaka ni gu khala lidhota nya ladi. — Jak. 1:25. w22.03 29-30 ¶14-15

Ginani hi yedego gu gira ha gu tugula gu khethu hi ngu lamula ndriyathu? Hi yede gu dundruga gu khethu hi yede gu haladza vandriyathu. (Jak. 2:8) Hi yede gambe gu gombeya ga Jehovha na si gu khugeya monyoni, hi mu lomba gu khethu a hi phasa gu ema gu lamula vambe. Hwane nya nombelo, hi nga gira gipandre gyathu khu gu hi hidzimeleya muthu hi nga ba hi mu lamula hi ya bhula naye. Adzina hi nga mu konvhidhari gasi hi ya thuma naye thumoni nyo tshumayele mwendro gu hodza naye gilogyo. Tepo hi yago hi muti gwadi ndriyathu, hi yede gu pimedzeya giyeyedzo gya Jehovha ni Jesu, khu gu hi vega gupima avba nya silo nya sadi a girago. Khu ndziya yeyi, hi na yeyedza gu khethu ha gu engisa gileletelo gya muhavisi nya wadi nya gu khigyo hi nga lamuli vakwanu. Gufana ni nvuta yi engisago lito la muhavisi wayo, valandreyi va Jesu va ngu engisa lito laye. Gani ha gu gira gipandre nya “tshambi dugwana” mwendro nya “dzimbe dzinvuta,” hongoleni hi simama gu engisa lito la muhavisi nya wadi. — Luka 12:32; Joh. 10:11, 14, 16. w21.12 19 ¶11; 21 ¶17-18

Tepo Robowamu a nga khala pfhumu ya Israyeli vathu va di gu hongola gwaye va ya lomba giphaso. Avo va di mu lomba gu khavo a va vbevbugiseya mithumo va rwegidwego khu babe waye Solomoni. Egi gi tsakisago khu gu Robowamu a diya lomba wusingalagadzi ga vama va dandridego khu tanga va Israyeli gasi gu wona edzi a nga hlamulago khidzo vathu. Vama vale nyo dandre khu tanga va di gengedza pfhumu khavo a gu gira esi vathu va mu lombago, avo tepo yatshavbo va di hadzi gu mu thumeya. (1 Dzipf. 12:3-7) So gira gu khatshi Robowamu kha tsakiswa khu wusingalagadzi wule a ningidwego. Avo va di mu kutsa gu engedzeya gu rwega mithumo vathu. (1 Dzipf. 12:9-11) Robowamu na lombide giphaso ga Jehovha gasi a mu phasa gu mana wusingalagadzi a nga hadzi gu wu thumisa. Wulangani nya isoso, uye a di engisa wusingalagadzi a ningidwego khu vama nya tanga mweyo naye. Kha nga handro wakona, Robowamu gumogo ni vathu Vaisrayeli va thegedwe khu libango. Anethu, khandri tepo yatshavbo hi na tsakiswago khu wusingalagadzi hi na ningwago. Abari gu wusingalagadzi wowo wa gu seketedwa umo nya lito la Nungungulu hi yede gu wu dzumeya. w22.02 9 ¶6

Muthu a dzi nogisago ni gu dzumeya gu hegedwa gwaye, kha vegi gupima avba nya guti ogu vaphya va gu nago, ganiolu avba nya esi va si kodzago gu gira. Uye kha na nga vbweta gu palisana navo, ganiolu a na va wona kha nga sithumi kwanu. Vandriyathu va dandridego khu tanga, va gu wona vaphya kha nga siningwa sitago khiyo ga Jehovha. Nigu, va ngu bonga khu satshavbo esi vaphya va girago. Tepo tshivba ya vandriyathu va dandridego khu tanga yi yago yi vbunguga, avo va ngu tsaka khu gu wona gu khavo libandlani gu na ni vaphya va gu na ni tshivba nigu va dzi emisede gu gira ni wevbini thumo. Umo nya Bhibhiliya, Nowemi a diri giyeyedzo nya gyadi nya muthu a dandridego khu tanga a nga yeyedza gubonga. Uye dzumede giphaso gya gadzamwane waye Rute a nga ba a ri dugwana ngudzu gwaye. Gupheyani Nowemi a di kutsa Rute gu bwelela ga valongo vaye, ganiolu tepo Rute a nga gurumedza Nowemi gu hongola naye bhetlehema, Nowemi a di dzumeya giphaso gya gadzamwane waye. (Rute 1:7, 8, 18) Nigu isoso si reside makategwa ga vanyamayi vava vavavili! (Rute 4:13-16) Vandriyathu va dandridego khu tanga va dzi nogisago va ngu landra giyeyedzo gya Nowemi. w21.09 11-12 ¶9-11

Papayi wathu wa ndzadzini a ngu pwisisa giemo gya moyo ni moyo wathu. Adzina u nga gira nya singi guvbindra vathu nya vangi u va tigo ni gu va gola. Mwendro adzina u mwalo makodzelo nyo gire nya singi gufana ni vambe khu kotani nya tanga yago, mawugelo yago ni rwalo nya gu khathaleye ndranga. Abari kharato u nga vbeyi tshivba. (Gal. 6:4) Jehovha kha na nga divala thumo wago. Wa gu ningeya esi u si kodzago khu gighelo nya gyadi uye a na si tsakeya. Jehovha a ngu siti esi u golago gu gira. Uye a gu vbweta gu khuye u tsaka khesi u si kodzago gu mu gireya. Hi na manega ni gurula kholu hi ngu dziti gu khethu Jehovha a ngu phasa vakhozeyi vaye tepo va emisanago ni sigaradzo. (Isa. 41:9, 10) Nya mba kanakana, hi na ni sighelo nya sadi nya gutsake tepo hi khozeyago Papayi wathu nya lihaladzo, oyu a yedwago khu gu “hakha gidhumo, ni rungudzo” khu satshavbo a si vangidego! — Gutu. 4:11. w22.03 24 ¶16; 25 ¶18

Ethu ha gu vbweta gu pimedzeya Jesu, ganiolu ethu kha hi yeli gu vbeya tshivba ha gu mba si kodza gu pimezeya Jesu khu gu vbeleya. (Jak. 3:2) Muthu nyo khaguri a hevbuleyago gu sona, kha si kodzi gu pimedzeya thumo wa muhevbudzi waye khu guvbeleya. Ganiolu tepo gihevbuli gi hevbuleyago khu sihoso sagyo, gi bwe gi dzi garadza gu pimedzeya muhevbudzi wagyo, gi na simama gu tshukwadzisa. Khu ndziya nyo fane, ha gu thumisa esi hi si hevbulago tepo hi lerigo Bhibhiliya, ni gu simama gu zama gu tshukwadzisa, hi na ba hi pimedzeya giyeyedzo gya Jesu khu vbafuvbi. (Ndzi. 119:59) Ha gu vbanya ga litigo eli vathu nya vangi va khathalago khu silo sawe basi. Ganiolu vathu va Jehovha va hambanide navo. Anethu ha gu kutswa khu giyeyedzo gya Jesu nya gu thangise esi sa vambe guvbindra sathu, nigu hi dzi emisede gu pimidzeya giyeyedzo gyaye. (1 Ped. 2:21) Ha gu gira satshavbo hi si kodzago gasi gu pimedzeya Jesu, khu gu thangisa esi sa vambe guvbindra esi sathu, hi na tsaka kholu hi na ba hi tsakisa Jehovha. w22.02 24 ¶16; 25 ¶18

Muhuno, Jehovha a gu thangeya vathu vaye khu gu thumisa Lito laye a gu Bhibhiliya. Ha gu dzi ninga tepo nya gu dundrugeye khesi Jehovha a hi hevbudzago, hi na si kodza gu landrisa sileletelo saye hi bwe hi tadzisa thumo wathu nya gu tshumayele. (1 Thim. 4:15, 16) Yimbe dziya eyi Jehovha a hi ningago khiyo sileletelo, khu gu thumisa “githumi nya gutumbege ni nya gugengeye.” (Mat. 24:45) Dzimbe dzitepo, sithumi sesi nya gutumbege si nga ningeya sileletelo adzina si nga hi garadzeyago gu si pwisisa. Khu giyeyedzo, adzina hi nga hakha sileletelo nyo kongome nya gu hi dzi dongiseya gasi hi vbuluga ga mhango nya tumbunugo hi pimisago gu khethu kha yi na nga girega gipandreni gwathu. Ginani hi yedego gu gira ha gu pimisa gu khethu sileletelo hi ningwago kha si yeyedzi wugengeyi? Dundrugeya khu matimo nya Bhibhiliya hi ma hevbudego. Dzimbe dzitepo, vathu va Nungungulu va di gu hakha gileletelo gi nga ba gi gira gu khatshi kha gi pwali gwadi ganiolu gi nga vbulugisa womi wawe. — Val. 7:7; 8:10. w22.03 18-19 ¶15-16

Nari ni gutumba Jesu a di ganeya malito ma gomogo avba nya lowo wa muhuno. Jesu a di gu dziti gu khuye wumindru waye womo mandzani ga Jehovha, nigu a di gu tiyisega gu khuye Papayi waye a na mu dundruga. Ginani hi nga gi hevbulago khu malito ya Jesu? Simama gutumbega ga Jehovha ambari womi wago na wuri mhangoni. Gasi gu kodza gu gira isoso, u yede gu “tumba PFHUMU Nungungulu khu monyo wago watshavbo.” (Mav. 3:5) Wona giyeyedzo gya Fakazi mweyo ya Jehovha nyo pwani khu Josuwa, nya 15 myaga, a nga ba ari ni madwali nya makhongolo. Uye bombide ni yevbini tratamento yi nga ba yi dwanisana ni milayo ya Nungungulu. Na si gufi, uye embede mamayi waye khuye: “Mamayi, nyi womo mandzani ga Jehovha. . . . Mamayi nyi na ni gutumba nya gu kheni Jehovha a na nyi wusa khu ga vafudego. Uye a ngu mati mapimo yangu ni edzi nyi dzipwago khidzo nigu khu lisine nyi ngu mu haladza.” Moyo ni moyo wathu, yede gu dzi wudzisa gu khuye: ‘Ga gu tshuka gukhodwa gwangu gu lingwa khu gilo gi vegago womi wangu mhangoni, ina nyi na si kodza gu simama gutumbega ga Jehovha, nyi bwe nyi tumba gu kheni uye a na nyi dundruga?’ w21.04 13 ¶15-16

Vathu va Jehovha va ngu tiyiswa khu thumo nyo tshumayele. Hi ngu tsaka khu gu bhuleya vambe mahungu nya Bhibhiliya, gani va ngu tsakeya mwendro kha va tsakeyi. Vambe vandriyathu va gu pimisa gu khavo, khu kotani nya giemo gyawe kha va na nga si kodza gu gira nya singi thumoni nyo tshumayele. Anuwe wo dzipwa kharato, dundruga gu khuwe Jehovha a ngu tsaka khu gu dzi garadza gwago. Adzina u ngu dzina ngudzu gu patega thumoni nyo tshumayele, ganiolu kha wu si kodzi gu khuga khu ndrangani. Tiyisega gu khuye Jehovha a ngu gu wona nigu a ngu pwisisa giemo gyago. Uye a nga gu tuleya lithomo nya gu tshumayele ava va gu sayisago, vaenfermeru mwendro vadhogodheya. Gu diga isoso, u nga fananisi esi u girago muhuno ni esi u nga ba u si kodza gu gira gale kholu isoso si nga gu vbedza tshivba. Zama gu wona esi Jehovha a girago olu gasi gu gu phasa, wa gu gira isoso u na mana tshivba nyo timiseye ni gevbini gigaradzo nya mba vbeledwa khu litsako. Ethu ha gu dzi garadzeya gu yala dzimbewu nya lisine, ganiolu kha hi yiti eyi yi na bugago. — Muh. 11:6. w21.05 24-25 ¶14-17

Gu mba eneledwa khesi hi gu naso gu giride Pfhumu Dhavhidhe a divaledwa khu satshavbo esi Jehovha a nga ba a mu ningide, nya nga dzithomba, ndruma ni gu pala dzinyimbitunu. Dhavhidhe a di gu dziti gu khuye siningwa sa Nungungulu si “tade ngudzu nyamba kodza ni gu sayedwa” nigu uye a di gu bonga ngudzu khu isoso. (Ndzi. 40:5) Ganiolu, ga tepo nyo khaguri Dhavhidhe divade satshavbo esi Jehovha a nga ba a mu ningide. Ambari olu a nga ba ari ni vagadzi nya vangi, Dhavhidhe a di pheya gu dogoreya ngadza vane. Nyamayi yoyu a diri Bheti-Sebha nigu mwama waye gu diri Uriya, Muhiti. Dhavhidhe a di hengeya malawu ni Bheti-Sebha nigu Bheti-Sebha a di khura mimba. Esi Dhavhidhe a giridego si di vivbide ngudzu, ganiolu giride gambe gimbe gilo nyo vivbe. Uye a di gira gu Uriya a songwa. (2 Sam. 11:2-15) Dhavhidhe a di gu pimisa ginani? Ina a di gu pimisa gu khuye Jehovha kha mu woni? Ambari olu Dhavhidhe a nga ba a thumeya Jehovha khu myaga nya yingi, uye thegede omu nya naphwi nyo mba eneledwa khesi a gu naso a bwe a dzi vangeya sigaradzo. Ganiolu, egi gi tsakisago khu gu Dhavhidhe dzumede sighoho saye a bwe a dzi laya. Nya mba kanakana uye bongide ngudzu khu ba a divaledwe khu Jehovha. — 2 Sam. 12:7-13. w21.06 17 ¶10

Adzina hi nga pimisa gu khethu kha hi na si kodza gu gimbidzisa gihevbulo nya Bhibhiliya. Dzimbe dzitepo hi ngu pimisa gu khethu hi yede gu manega ni guti nya gungi hi bwe hi khala vahevbudzi nya vadi na hi si hevbuli ni muthu. Wa gu ba u dzipwa kharato, wona silo siraru si nga gu phasago gu tiyisega gu khuwe u nga si kodza gu hevbula ni muthu. Nyo pheye, Jehovha o gu wona na wuri ni makodzelo nyo hevbudze vambe. Nya wuvili, Jesu ‘a ningidwego wufumu watshavbo ndzadzini ni mafuni’ a gu rumide gu hevbudza vambe. (Mat. 28:18) Nya wuraru, u nga lomba giphaso ga vambe. Jesu a di gu ganeya esi a hevbudzidwego khu Papayi waye, nigu anuwe u nga gira sasimweso. (Joh. 8:28; 12:49) Gu diga isoso, u nga bhula ni muwoneleyi a thangeyago tsawa wago nya thumo nyo tshumayele, piyonero mwendro muhuweleyi a vidzidwego gasi va gu phasa gu pheya ni gu gimbidzisa gihevbulo nya Bhibhiliya. Gasi u si kodza gu khala muhevbudzi nya wadi, dzipate ni vahuweleyi vava tepo va gimbidzisago sihevbulo sawe nya Bhibhiliya. w21.07 5 ¶12

Kha nga olu gu hegisa nya mafu gu hidzimeyago, hi yede gu engedzeya gutumba edzi Jehovha a girago khidzo silo guvbindra gale. Khu ginani? Kholu ndrani nya tshanisa nya yikhongolo, adzina hi na hakha sileletelo si na garadzago gu si pwisisa mwendro gu si landrisa. Lisine gu Jehovha kha na nga ganeya ni ethu khovbe ni khovbe. Uye a ngu dzina gu hi ninga sileletelo khu gu thumisa ava uye ava emisidego gasi gu hi thangeya. Iyoyo, yi na ba siri tepo nya gu kanakaneye sileletelo mwendro gu wudzisa gu khethu: ‘Ina sileletelo sesi sa guta khiyo ga Jehovha mwendro silo si hungidwego khu vandriyathu va thangeyago?’ Ina u na tumba Jehovha ni hengeledzano yaye ndrani nya tepo yeyi nya lisima? Esi hi si pimisago maningano ni sileletelo hi ningwago khava va emeyago Nungungulu olu si na hi phasa gu mana hlamulo nya giwudziso gegi. Wa gu tumba sileletelo hi ningwago muhuno u dzegeya gu si engisa, u na si kodza gu gira sasimweso ndrani nya tshanisa nya yikhongolo. w22.02 6 ¶15

Jehovha phaside Gidhiyoni ni vama vaye nya 300 gu pala nyimbitunu, nya gu adzina va di hadzi gu dzi khusedza khu isoso. Khavbovbo, vama va na Efrayimi va diya manana ni Gidhiyoni, nasiri guya mu zundza, ganiolu guya ganedzisana naye kholu uye kha va rana gasi guya dwana. (Val. 8:1) Gidhiyoni a di va dundrugisa edzi Jehovha a va phasidego khidzo gu gira silo nya sikhongolo. Kha nga handro wakona, “likhulo lawe li di bosa.” (Val. 8:3) Gidhiyoni a di dzi emisede gu dzinogisa gasi gu vega gurula vbakari ga vathu va Nungungulu. Avba ga va na Efrayimi ha gu hevbula gu khethu, kha hi yeli gu dzi garadzeya gu mana ndruma, ganiolu hi yede gu dhumisa Jehovha. Abari gu hi mihungo nya dzindranga mwendro madhota, hi nga hevbula gilo nya lisima avba ga Gidhiyoni. A gu tshuka muthu a goroga khu kotani nya gilo nyo khaguri hi giridego, hi yede gu zama gu pwisisa gu khethu khu ginani a nga goroga. Hi nga zundza gambe muthu yoyo khu silo nya sadi a giridego. Si na vbwetega gu hi dzi nogisa gasi gu gira isoso. Ganiolu, nya lisima ga satshavbo gu manega ni wupari nyo tiye ni vandriyathu guvbindra guti oyu a gu na ni razawu. w21.07 17 ¶10-12

Jehovha yeyedzide gu khuye hi na ni lisima tepo a nga hi vanga na hi ri ni makhalelo nya nga ayo yaye. Khu kotani nya olu hi vangidwego khu mufananiso wa Nungungulu, hi nga hevbuleya gu yeyedza makhalelo yaye nya yadi. Khu giyeyedzo, hi nga yeyedza lihaladzo, gupweya wusiwana, gutumbega ni gu lulama. (Ndzi. 86:15; 145:17) Ha gu haguleya makhalelo yaya, hi na ninga wuzundzo Jehovha hi bwe hi yeyedza gu khethu hi ngu mu bonga. (1 Ped. 1:14-16) Ha gu vbanya khu ndziya yi tsakisago Papayi wathu wa ndzadzini anethu hi na tsaka. Khu kotani nya olu hi gu na ni makhalelo nya nga aya ya Jehovha, hi nga khala vathu ava Jehovha ava vbwetago ndrangani gwaye. Jehovha a hi dongisede ndranga nyo hathege. Na si gu vangi muthu nyo pheye, Jehovha a di dongiseya mafu gasi gu ninga vathu. (Joba 38:4-6; Jer. 10:12) Khu kotani nya wuwadi ni wuhindzi, Jehovha giride silo nya singi nya sadi gasi gu hi tsakisa. (Ndzi. 104:14, 15, 24) Uye dzi ningide tepo nya gu khedziseye gwadi esi a vangidego a bwe a si “wona gukhuye khyadi.” — Gen. 1:10, 12, 31. w21.08 3 ¶5-6

Hatshavbo hi na ni thumo nyo tshumayele ni gu gira vapizane. (Mat. 28:19, 20; Rom. 10:14) Ina u ngu vbweta gu tshukwadzisa makodzelo yago avba nya thumo wowu nya lisima? Khu kharato, hevbula broxura malerelo ni mahevbudzelo u bwe u thumisa esi u si hevbulago. Tepo u dzi vegeyago misuwo, u nga divali gu khuwe gilo nya lisima ga satshavbo — gu haguleya makhalelo ma tsakisago Jehovha. (Kol. 3:12; 2 Ped. 1:5-8) Khu lisine hatshavbo hi ngu dogoreya gu gireya nya singi Jehovha. Umo nya litigo nya liphya, hi na si kodza gu mu thumeya khu gu vbeleya. Na hi ngo vireya tepo yoyo, hi yede gu londrola ni yavbini mathomo hi gu nawo, ha gu gira isoso hi na mana gutsaka nya gukhongolo, kha hi na nga vbeya tshivba nigu nya lisima ga satshavbo hi na dhumisa ni gu rungudza Jehovha, “Nungungulu wathu nya gutsake.” (1 Thim. 1:11) Khu kharato, hongole hi tsaka khu malungelo hi gu nawo olu! w21.08 24-25 ¶18-20

Ina vavelegi vago Dzifakazi dza Jehovha? Abari gu ina, adzina saye u hevbude lisine na wu ngari gyanana. Vavelegi vago va gu hevbudzide gu khavo Jehovha khuye Muvangi, a na ni makhalelo nyo hlamadzise nigu uye o vbweta gu gira mafu ma khala paradhesi. (Gen. 1:1; Mith. 17:24-27) Ganiolu, vathu nya vangi kha va khodwi gu khavo Nungungulu womo nigu uye khuye Muvangi nya silo satshavbo. Wulangani nya isoso, avo va gu khodwa gu khavo womi wu di dzi tumbunugeya wabune nigu wo dugeya khavbo nya evolusawu. Gu tala nya ava va khodwago esi, va hevbude ngudzu. Avo adzina va nga ganeya gu khavo siyensiya yi yeyedzide gu khiyo Bhibhiliya kha yi ganeyi lisine nigu ava va khodwago gu khavo womo Muvangi kha va hevbula, kha vati nigu sipumbu. Ambari ha gu ba hi ri ni tepo nyo laphe na hi ri Dzifakazi dza Jehovha, hi yede gu simama gu tiyisa gukhodwa gwathu. Ha gu gira isoso, kha hi na nga ndreyiswa khu vathu va ganeyago gu khavo esi Bhibhiliya yi ganeyago malipha. — Kol. 2:8. w21.08 14 ¶1-3

Abheli, Nowa, Abrahama ni Joba, va yeyedzide githawo ni lihaladzo khu Jehovha, khu gu va engisa, va khodwa gwaye va bwe va gira silo nya singi gasi gu mu tsakisa. Avo khu lisine va giride iso va nga si kodza gasi gu dhumisa Jehovha nigu uye a hakhide wukhozeyi wawe. Khu hwane, Jehovha ningide Vaisrayeli nayo khu gu thumisa Mosi. Ga milayo yeyi, yi di gu pata sileletelo nya singi maningano ni edzi Jehovha a nga ba a vbweta gu khozedwa khidzo. Hwane nya gufe ni guwuswa ga Jesu, Jehovha kha vireya gu khuye vathu va mu khozeya na va gu dzi seketeya avba nya nayo wa Mosi. (Rom. 10:4) Makristo ma gu landra nayo nya wuphya a gu “nayo wa Kristo.” (Gal. 6:2) Avo va di yede gu engisa “nayo” wowu khu gu va sasamedza silo va yedego gu gira ni esi va gu mba yela gu gira, ganiolu khu gu pimedzeya giyeyedzo gya Jesu ni gu landrisa sihevbudzo saye. Muhuno gambe, Makristo ma ngu gira satshavbo ma si kodzago gasi gu landreya Kristo ma bwe ma tsakisa Jehovha gasi ma “mana guhefemula.” — Mat. 11:29. w22.03 20-21 ¶4-5

Jehovha a ngu engiseya sanana saye. Nari mafuni, Jesu gombede khu dzitepo nya dzingi ni gu Jehovha engisede milombelo yaye. Jehovha engisede Gyanana gyaye tepo gi nga ba gi gombeya khu silo nya lisima gi nga ba gi vbweta gu hunga. Khu giyeyedzo, gu hatha 12 vapostoli. (Luka 6:12, 13) Ni gu gambe, Jehovha engisede nombelo wa Jesu tepo a nga ba a garadzega. Gitepwana hwane na si gu ningedwi khu Judha, Jesu gombede ga Papayi waye maningano ni gilingo a nga hadzi emisana nagyo. Jehovha kha engiseya basi nombelo wa Jesu, ganiolu rumede dzingilozi gasi dziya tiyisa Gyanana gyaye nyo gigole. (Luka 22:41-44) Muhuno, Jehovha a ngo simama gu engiseya milombelo yathu. A ngu hlamula milombelo yoyo khu tepo yakona nigu khu ndziya nya yadi. (Ndzi. 116:1, 2) Ndriyathu moyo nya nyamayi wa India wonide edzi Jehovha a nga ba a hlamula khidzo milombelo yaye. Uye a di gu tshangana ni gigaradzo nyo khaleye gu garadzega, khu kharato uye a di gombeya ga Jehovha khu monyo waye watshavbo a mu embeya esi si nga ba si girega. Uye lovide gu khuye: “Longoloko nya JW Broadcasting^® nya maio nya 2019, wu ganeyago khedzi hi nga emisanago khidzo ni gu garadzega, wu nyi phaside ngudzu. Longoloko wowu wu diri hlamulo nya milombelo yangu.” w21.09 21-22 ¶6-7

Nga dundrugeya khedzi si garadzedego khidzo Makristo ya lizana myaga nyo pheye gu diga satshavbo ma nga ba mari naso ma bwe ma ya pheya womi wavo ga wumbe wulanga! Si lombide gu va manega ni gu khodwa gasi va tiyisega gu khavo Jehovha a di hadzi gu va phasa gu mana esi va nga ba va si vbweta. Ganiolu, gu diri ni gilo gi nga hadzi gu va phasa. 5 myaga hwane, Varoma na va si dhumeyi Jerusalema, mupostoli Pawulo a di ningide wusingalagadzi nya wadi Vahebheru. Uye a di khuye: “Guvbanyani gwanu mu nga dzi digi mu gu fumwa khu makolo nya dzitsapawu; nengelani khu esi mu gu naso, kholu Nungungulu ganede, khuye: ‘Eni gima kha nyi na mi diga.’ Khu guralo, hi ngu tiya longo hi ganela, khethu: ‘Pfhumu khuye muphasedzeli wangu, eni kha nyi thavi gilo. A nga nyi gira ginani muthu?’” (Hebh. 13:5, 6) Isoso si vbevbugede ava va nga thumisa wusingaladzi wa Pawulo, nya gu tsake khu silo nya sidugwana va nga ba vari naso ga ndranga yawe nya yiphya. Avo va di gu tiyisega gu khavo Jehovha a na va ninga esi va nga ba va si vbweta. w22.01 4 ¶7, 9

Ha gu dundregeya khu muthu nya wuhindzi, ha gu wona muthu a gu na ni wuwadi, pweya-wusiwana ni gu gola gu ninga. Muthu nya makhalelo yaya a gu hi gira hi dundruga gipimaniso gya Jesu maningano ni Musamariya nya wadi. Mwama wule a di siri Mujudha, ganiolu girede “mithumo nya wuhindzi” Mujudha a nga ba a bedwe ni gu vetwa khu sighevenga. Musamariya pwede “gisiro” Mujudha wule a bwe a mu khataleya. (Luka 10:29-37) Gipimaniso gegi gya gu hi hevbudza maningano ni wuhindzi, a gu likhalelo nyo mbure la Nungungulu. Tshigu ni tshigu Jehovha a ngu hi yeyedza wuhindzi, nigu uye a gu gira isoso kholu a ngu hi haladza. Ha gupwa lito wuhindzi, adzina hi nga dundrugeya gambe khu gimbe gilo. Muthu a gu na ni wuhindzi, adzina a nga hunga gu mba tsayisa muthu a nga ba a yede gu tsayiswa. Khu ndziya yoyo, hi nga ganeya gu khethu Jehovha na ni wuhindzi. Libhuku la Ndzimo lari khilo Jehovha “kha hi tsayisi gupima khu sighoho sathu.” (Ndzi. 103:10) Ganiolu, ga siemo nyo khaguri Jehovha adzina a nga tsayisa muthu a giridego gighoho. w21.10 8 ¶1-2

Kha nga si ganedwego gupheyani, Jehovha a ngu yeyedza basi lihaladzo laye nyo tumbege ga sithumi saye, a gu vale va gu na ni wupari nyo tiye naye. Hi nga si wona isoso avba nya esi Pfhumu Dhavhidhe ni muprofeti Dhaniyeli va ganedego. Khu giyeyedzo Dhavhidhe a di khuye: “Thawuludza wuwadi wago ga vale va gutigo.” “Wuhindzi wa PFHUMU Nungungulu, wu ngu simama kala gupindruga ga vale va mu ningago githawo.” Nigu Dhaniyeli a di khuye: “Oh! Pfhumu! Nungungulu nya khongolo nya guthavisege, khu lihaladzo Iago nya gutumbege, u vegedzago gidzumeledzwano ni avo va gu golago ni gu vegedza milayo yago.” (Ndzi. 36:10; 103:17; Dhan. 9:4) Guya khu mavhesi yaya nya Bhibhiliya, Jehovha a gu yeyedza lihaladzo laye nyo tumbege ga sithumi saye kholu iso si ngu muti, si ngu mu ninga githawo, si ngu mu haladza nigu si ngu vegedza milayo yaye. Jehovha a gu yeyedza lihaladzo laye nyo tumbege ga vakhozeyi vaye nya lisine basi. Na hi nga si pheyi gu mu thumeya, Jehovha a di gu hi yeyedza lihaladzo eli a yeyedzago ga vathu vatshavbo. (Ndzi. 104:14) Ganiolu, gu khugeya hi nga khala vakhozeyi vaye, Jehovha a gu hi yeyedza lihaladzo laye nyo tumbege. w21.11 4 ¶8-9

Ambari vathu va gu zama gu gira ni gevbini, ethu hi dzi emisede gu engisa malito ya Jesu. Muhuno vathu nya vangi va ngu gola gu landreya vathangeyi nya dzitshetshe, a gu vathu va tidwago ngudzu. Khu kotani nya olu va golago ngudzu vathangeyi vava nya dzitshetshe, dzimbe dzitepo si ngu va gira va va khozeya. Vathu nya vangi va ngu hongola dzitshetsheni dzavo, va renga mabhuku yawe ni gu ningeya dzitsapawu nya dzingi gasi gu seketeya hengeledzano yawe. Vathu vo khodwa satshavbo esi vathangeyi va ganeyago. Kha hi dziti ni gu khethu edzi vathu vava va tsakago khidzo khu vathangeyi nya dzitshetshe va di hadzi tsaka khu ndziya yamweyo a gu tshuka Jesu a va vboheya. Ganiolu, ava va khozeyago Nungungulu kha va landri mavbanyelo nya vathu. Lisine gu hi ngu ninga githawo ava va thangeyago, ganiolu tepo yatshavbo ho dundruga esi Jesu a hi hevbudzidego. Uye a di khuye: “Enu mu va na ndriye ni ndriye.” (Mat. 23:8-10) Ethu kha hi khozeyi vathu, ambari nari vathangeyi nya dzitshetshe mwendro dzipfhumu. Nigu ethu kha hi seketeyi esi va girago. Gu diga isoso, ethu kha hi dzi bedzedzeyi umo nya politika nigu ho simama gu mba gira gipandre nya litigo leli. Ga satshavbo silo sesi, somo guagani gu khiso ethu hi hambanide ni wumbe wukhongeyi wu dzi thulago gu khuwo Makristo. — Joh. 18:36. w21.10 20 ¶6-7

Watshavbo Mukristo a yede gu tiyisega gu khuye gi mwalo gilo mwendro muthu a na tsholopeteyago wupari waye ni Nungungulu. Kha nga olu hi gu na ni lina nya Dzifakazi dza Jehovha hi dzi emisede gu mba tsundzisa lina nya guage la Jehovha. (Levhi 19:12; Isa. 57:15) Vaisrayeli va di gu yeyedza gu khavo va ngu dzumeya Jehovha kha nga Nungungulu wawe khu gu engisa milayo yaye. Levhi 18:4 wari khuye: “Mu na landrisa sileletelo sangu, mu sayisa milayo yangu, mu vbanya khiyo. Eni kheni Pfhumu Nungungulu wanu.” Umo nya gipimo 19 yomo milayo nyo khaguri yi khumbugidwego umo nya livhesi leli yi ningidwego va na Israyeli. Khu giyeyedzo, mavhesi 5-8, 21, 22 ma gu ganeya khu miphaso nya sirengo. Vaisrayeli va di yede gu gira miphaso yeyi, ganiolu ‘khu ndziya yi nga ba yi si nyenyezisi esi si phasidwego Jehovha.’ Gu leri mavhesi yaya, si yede gu hi kutsa gu tsakisa Jehovha ni gu mu ninga miphaso yi mu tsakisago kha nga edzi Vahebheru 13:15 a hi kutsago gu gira. w21.12 5 ¶14-15

Muhuno, mipatwa yi ngarigo gu tshadha yi nga phasega khu gu hevbula matshango ya vambe ava va hevbuledego gu tumba Jehovha. Mipatwa nyo khaguri adzina yi na ni myaga nya yingi na yi gu thumeya Jehovha thumoni nya tepo yatshavbo. Va lombe wusingalagadzi abari gu wa gu dundrugeya khu misuwo u dzi vegedego. Eyi ndziya nya gu yeyedze gu khuwe u ngu tumba Jehovha. (Mav. 22:17, 19) Dundruga gu khuwe mutshadho giningwa gitago khiyo ga Jehovha. (Mat. 19:5, 6) Uye a gu vbweta gu khuye mipatwa yi tsaka khu giningwa gyogyo. Enu mu ngarigo gu tshadha, ina mu di nga ema mu pimisa mu wona esi mu girago khu womi wanu? Ina mu ngu gira satshavbo mu si kodzago gasi gu yeyedza Jehovha gu khenu mu ngu bonga khu ginigwa a mi ningidego? Gombeyani ga Jehovha. Gevisisani omu nya Lito laye matshina ma nga mi phasago ga giemo mu gomogo ga igyo. Khavbovbo, landrisani wusingalagadzi owu Jehovha a mi ningago. Tiyisegani gu khenu mu na manega ni womi nya gu tsakise mwa gu vega gupima avba nya gu thumeye Jehovha. w21.11 19 ¶16, 18

Jakobe kha nga ba a dzi wona nga muthu nya lisima guvbindra vambe. Jakobe kha nga ba a pimisa gu khuye uye a diri ni lisima guvbindra mambe Makristo khu kotani nya olu a nga ba ari ndriye wa Jesu mwendro kholu a nga ningwa thumo nya lisima. Uye ranide mambe Makristo gu khuye “vandriyangu nya sigodwa.” (Jak. 1:16, 19; 2:5) Uye kha gira vambe va pimisa gu khavo uye vbelede. Ginani hi gi hevbulago? Dundruga gu khuwe hatshavbo hi ngu ghoha. Ethu kha hi yeli gu pimisa gu khethu hi na ni lisima gu vbindra sihevbuli sathu. Khu ginani? Ha gu gira gihevbuli gyathu gi pimisa gu khigyo ethu kha hi hosisi, igyo adzina gi nga vbeya tshivba kholu gi na pimisa gu khigyo kha gi na nga si kodza gu engisa Nungungulu khu gu vbeleya. Ha gu bhuleya sihevbuli sathu gu khethu khandri tepo yatshavbo si hi vbevbugeyago gu thumisa matshina nya Bhibhiliya hi bwe hi si tshamuseya edzi Jehovha a hi phasidego khidzo gu pala sigaradzo nyo khaguri womini gwathu, hi na si phasa gu wona gu khiso aniso si nga si kodza gu thumeya Jehovha. w22.01 11-12 ¶13-14

Tepo hi simamago gu pimisa nga Jesu, hi na gira silo nga uye nigu hi na si kodza gu yeyedza makhalelo yaye. (Hebh. 1:3) Adzina hi nga pimisa gu khethu: ‘Jesu vbelede. Eni gima kha nyi na nga si kodza gu fana naye khu gu vbeleya!’ Wa gu ba u dzipwa kharato, dundrugeya khu sigiro sesi. Nyo pheye, uwe u giridwe gasi gu fana ni Jehovha ni Jesu. Khu kharato, wa gu hatha gu va pimedzeya u nga fana navo khu ndziya nyo khaguri. (Gen. 1:26) Nya wuvili, liphuvbo nya guage la Nungungulu khilo li gu tshivba nya yikhongolo mafuni gwatshavbo. Khu gu phaswa khilo, u nga si kodza gu gira silo nya gu gima u di hadzi gu mba kodza gu gira wabune. Nya wuraru, Jehovha, kha vireyi gu khuye u yeyedza mihandro nya liphuvbo khu gu vbeleya olu. Ndrani nya 1000 myaga, Papayi wathu nya lihaladzo a na ninga guvbeleya vale va gu na ni gutumba nya gu vbanye mafuni kala gupindruga. (Gutu. 20:1-3) Igyo Jehovha a gi vbwetago olu khu gu hi zama gu gira satshavbo hi si kodzago ni gu hi tumba giphaso gyaye. w22.03 9 ¶5-6

Gu gombeya khandriyo basi ndziya hi nga yi thumisago gasi gu tiyisa wupari wathu ni Jehovha. Gu hevbula Lito la Nungungulu ni gu manega mitshanganoni nya libandla aniso si nga hi phasa gu tiyisa wupari wathu ni Nungungulu. Ina gyomo gilo u nga girago gasi u londrola gwadi tepo u yi hathidego gasi gu hevbula ni gu wona mitshangano nya libandla? Dzi wudzise gu khuwe: ‘Ginani gi nyi tsolopeteyago nya gu ba nyiri mitshanganoni mwendro tepo nyi zamago gu hevbula?’ Egi adzina gi nga hi tsolopeteyago gu hakha dzixamadha, dziemeyili mwendro dzimesaji omu nya telefone yathu mwendro wumbe mutshini. Wa gu tugula gu khuwe wa gu pheya gu pimisa khu simbe silo tepo u girago gihevbulo gyago nya muthu enga mwendro tepo u gomogo mitshanganoni, lomba giphaso ga Jehovha gasi u vega gupima. Adzina si nga gu garadzeya gu vega gupima avba nya silo sa liphuvboni, ganiolu khya lisima ngudzu gu vega gupima gwaso. Khu kharato, gombeya u lomba gurula ogu gu na sayisago nasiri basi monyo wago, ganiolu ni “mapimo” yago gambe. — Filp. 4:6, 7. w22.01 29-30 ¶12-14

Pfhumu Uziya bombide wusingalagadzi. Uye a di beya tempeleni ya Jehovha umo basi gu nga ba gu dzumeledwa gu beya vaprista. Nigu a di zama gu vbisa libani. Vaprista va Jehovha va di mu embeya gu khavo: “Uwe Uziya u mwalo fanelo nya gu vbise libani mbeli ga Pfhumu Nungungulu, vbavbandzi basi ga vaphasi nya mhamba.” Ginani igyo Uziya a nga gira? Nari khatshi a di dzi nogiside a dzumeya wusingalagadzi a bwe a dzegeya gu duga khu tempeleni, adzina Jehovha na mu divalede. Wulangani nya isoso “Uziya a di goroga.” Khu ginani a nga bomba wusingalagadzi? Kha nga olu a nga ba ari pfhumu adzina pimiside gu khuye a na gira ni gevbini a nga ba a gi vbweta. Ganiolu, Jehovha kha nga ba a si wona kharato. Kha nga handro wakona, Uziya “a di dwala khu sokono kala litshigu nya gufe gwaye.” (2 Dzik. 26:16-21) Giyeyedzo gya Uziya gya gu hi hevbudza gu khigyo, gani hi vathu nyo khale kharini, ha gu bomba wusingalagadzi wa omu nya Bhibhiliya kha hi na nga tsakedwa khu Jehovha. w22.02 9 ¶7

Muthu a fumwago khu mavbanyelo nya muthu wa gale, tepo yatshavbo a gu pimisa ni gu gira mithumo nya nyama. (Kol. 3:9) Uye adzina a nga khala magundrele, muthu nya mba hweya gu goroga, nya mba bonga ni gu dzi gugumugisa. Uye adzina a nga gola gu sistiri pornografia, dzifilmi dzi kutsedzeyago wubhayi ni wughevenga. Kha si kanakanisi gu khiso uye a na ni makhalelo nyo khaguri nya yadi. Nigu uye a nga dzipwa nandru khesi a ganeyago ni gu gira. Ganiolu, gimwalo gi mu kutsago gu vbindrugedza mapimiselo ni mavbanyelo yaye. (Gal. 5:19-21; 2 Thim. 3:2-5) Ethu kha ha vbeleya. Khu kharato, kha hi na nga si kodza gu vbedza khu gu vbeleya mapimo nya mba yadi, gudogoreya nya monyo wathu ni edzi hi dzipwago khidzo. Dzimbe dzitepo hi nga gira mwendro gu ganeya silo si na hi girago hi dzi laya. (Jer. 17:9; Jak. 3:2) Ganiolu, tepo hi tshulago muthu wa gale, mithumo nya nyama ni sigiro sathu kha si na nga hi fuma. Nigu ethu ha gu khala muthu muphya. — Isa. 55:7. w22.03 3 ¶4-5

Madhota vbwetedzeyani makhalelo nya yadi ga vandriyanu. Hatshavbo kha ha vbeleya, ambari ulolo moyo ni moyo wathu na ni makhalelo nyo samadzise ngudzu. Lisine gu madhota dzimbe dzitepo ma yede gu ninga wusingalagadzi vandriyathu, gu fana ni mupostoli Pawulo tepo ma girago isoso, ayo ma yede gu dzi garadzeya gu mba vega gupima avba nya silo nya mba sadi esi ndriyathu a nga ganeya ni gu gira. Khu kharato, ayo ma yede gu vega gupima gwawe avba nya lihaladzo laye khu Jehovha, gutimiseya gwaye tepo a thumeyago Nungungulu ni gudzigaradza a gu girago gasi gu gira silo nya sadi. Madhota ma vegago gupima avba nya makhalelo nya yadi ya vambe ma ngu phasa vandriyawe gu dzipwa na va haladzwa khu vatshavbo libandlani. Dundrugani gu khenu Jehovha kha vbweti gu khuye mi vbeleya, ganiolu o vbweta gu khuye mu tumbega. (1 Kor. 4:2) Khu kharato, tiyisegani gu khenu Nungungulu a ngu tsaka khu thumo wanu mu mu gireyago. Jehovha gima kha na nga divala “thumo mu wu giridego enu, ni lihaladzo mu li yeyedzidego, ni giphaso mu giridego ni olu mu nga gu girago ga vandriyanu nya vakristo.”— Hebh. 6:10. w22.03 31 ¶19, 21