Wusingalagadzi nya Bhibhiliya kha wu vbindredwi

NGA DZI DUNDRUGEYA na u romo ga muzewu nyo khaguri yi gu na ni silo nya singi si hagadego ni gu pandregeya, nigu si ngu keneleya simbe sipandre. Ganiolu, u wona gilo nyo khaguri gi khadzisegidego gwadi nigu gi gu na ni sipandri satshavbo. Khavbovbo u wudzisa oyu a gu yeyedzago silo omu nya muzewu gu khuwe: “Ina egi gi ngari gu vegwa olu?” Uye a gu hakha gu khuwe: “Ahihi, igyo khya gale ngudzu gu vbindra silo satshavbo si gu romo omu nya muzewu wowu.” Khu gu landreya u mu wudzisa gu khuwe: “Ina gi di vegwa ga wulanga nya gu khadzisegi gwadi?” Uye a gu hakha gu khuwe: “Ne vbadugwana, igyo gi wedwi khu dzindzadzi nya dzingi ni gu tshangana ni dzi mhangu nya dzingi ngudzu. Vbavbandzi nya isoso, vathu nya vangi va zamide gu gi fuvisa.” Na wu hlamala u dzi wudzisa gu khuwe: “Ina igyo gi di hambana ni simbe silo?”

Bhibhiliya yi ngu fana ni gilo gyi gu romo omu nya muzewu khu myaga nya yingi. Ido libhuku la gale ngudzu guvbindra yatshavbo. Lisine gu momu mambe mabhuku ya gale ngudzu, ganiolu gu fana ni silo sile si hagadego ni gu pandregeya mambe mabhuku ma mwalo simbe sipandre ni gu mu ma hagade. Nigu esi ma si ganeyago khu gu gimbiya nya tepo si ngu vbindrugedza. Khu giyeyedzo, esi siyensiya yi nga ba yi si ganeya gale si hambanide ni esi siyensiya yi si ganeyago muhuno. Esi si nga ba si ganedwa maningano ni mathumelo nya madwali, muhuno sa gu wonwa na si gu vega mhangoni womi nya vathu. Mabhuku nya mangi ya gale ma mwalo simbe sipandre, simbe si di dzimeya nigu simbe si hagade.

Bhibhiliya yi hambanide ngudzu ni mabhuku yaya. Yi phedwe gu lowa khu tanga nya 3500 myaga ni gu vbindra, ganiolu yi mwalo ne gipandri gimwegyo gi hagadego. Ambari olu yi tshanganidego ni dzimhango nya dzingi nya nga guvbiswa, gu himbedzedwa ni gu mba ningwa lisima sihevbudzo yi gu naso, yi nga gu romo kala ni muhuno.Vbavbandzi nya gu esi yi si hevbudzago si vbindredwa khu gu gimbiya nya tepo, esi Bhibhiliya yi si hevbudzago so yeyedza guti nya gu khongolo ngudzu. — Wona kwadru “Desatualizada ou à frente do seu tempo?”

WUSINGALAGADZI HI WU VBWETAGO NGUDZU

Adzina u nga dzi wudzisa gu khuwe: “Ina wusingalagadzi nya Bhibhiliya wu nga hi phasa muhuno?” Gasi gu hlamula giwudziso gyegi, dundrugeya khu siwudziso sesi: “Khu sevbini sigaradzo nya sikhongolo ngudzu esi vathu va tshanganago naso muhuno? Khu sevbini si thavisago ngudzu?” Si nga gira na wu dundrugeya khu dziyimbi, gu ghohetedwa nya mafu, wughevenga ni gu kanganyiswa. Wona esi Bhibhiliya yi si hevbudzago. Khu gu landreya dzi wudzisi gu khuwe: “Na ri khatshi vathu va gu vbanya khesi Bhibhiliya yi si hevbudzago ina litigo na li siri wulanga nya gu mburi ni gu tsakisa ngudzu?”

GU GOLA GURULA

“Va ngu tsaka ava va vbwetedzeyago gurula, kholu va na ranwa gupwani sanana sa Nungungulu.” (Matewu 5:9) “Girani satshavbo mu si kodzago gasi gu vbanya khu gurula ni vathu vatshavbo.” —  Varoma 12:18.

YEYEDZA WUHINDZI NI GU DIVALEYA

“Va ngu tsaka va nya wuhindzi, kholu va na giredwa wuhindzi.” (Matewu 5:7) “Simamani gu laphiseyana monyo mu bwe mu divaleyana khu monyo watshavbo, ambari muthu a gu ba ari ni gighelo nya gu sole mumbe, gu fana ni Jehovhaa a mi divaledego khu monyo watshavbo; anenu girani sasimweso.” — Vakolosi 3:13.

GU MBA NA GIHATHEYA

Nungungulu “khu gu thumisa muthu moyo basi, tumbulugiside mafumbo yatshavbo nya vathu, gasi va vbanya mafuni gwatshavbo.” (Mithumo 17:26) “Nungungulu mwalo gihatheya, ganiolu ga mafumbo yatshavbo uye a ngu hakha wule a mu ningago githawo a bwe a gira esi nya sadi.” — Mithumo 10:34, 35.

GU NINGA GITHAWO MAFU

“[Jehovha] a di vega muthu thembweni ga Edheni, gasi a li Iima ni gu li sayisa.” (Genesi 2:15) “[Nungungulu a na] tshungunula ava va tshungunulago mafu.” — Gutuledwa 11:18.

GU NYENYA WUDOGODOGO NI WUBHAYI

“Mu dzi woneya ni wudogodogo watshavbo, kholu ambari muthu a gu ba ari ni silo nya singi, womi waye kha wuti khu ga silo soso.” (Luka 12:15) “Wubhayi, gu mba handzega gwatshavbo ni wudogodogo ni gu khumbugwa si nga khumbugwi vbakari gwanu kholu isoso kha si faneyi ga vathu va agidego.” — Vaefeso 5:3.

GUTUMBEGA NI GU GOLA GU THUMA

“Nga olu hi dzi garadzeyago gu tumbega siloni satshavbo.” (Vahebheru 13:18) “Oyu a bago, a ngabi gambe; wulangani nya isoso, a na thume khu gudzigaradza.” — Vaefeso 4:28.

GU PHASA VAMBE

“Mu thaveleya avo va vbedego tshivba, mu tiyisa avo va vbodego khu liphuvboni mu bwe mu laphiseya monyo vatshavbo.” (1 Vatesalonika 5:14) “Sayisa ava va fedwego khu vavelegi ni dzinoni sigaradzoni sawe.” — Jakobe 1:27.

Bhibhiliya kha yi hi embeyi basi esi hi yedego gu gira gasi gu tshukwadzisa womi wathu. Iyo ya gu hi phasa gu ninga lisima wusingalagadzi yi hi ningago ni edzi hi nga wu thumisago khidzo. Na ri khatshi vathu va gu engisa esi Bhibhiliya yi si ganeyago, ina na va si kodzi gu lulamisa sigaradzo hi tshanganago naso? Khu lisine, wusingalagadzi nya Bhibhiliya kha wu vbindredwi! Ganiolu, Bhibhiliya yi nga gu phasa kharini muhuno?

BHIBHILIYA YI NGA GU PHASA KHARINI MUHUNO?

Mwama moyo a gu na ni guti nya gungi ganede gu khuye: “wugengeyi wo yeyedza gululama gwawo khu mithumo.” (Matewu 11:19) Gasi gu tugula gu khethu wusingalagadzi wu ngu phasa mwendro ne, hi yede gu wu thumisa. Khandridzo? Khu kharato, adzina u nga pimisa gu khuwe: “Abari gu Bhibhiliya yi ngu phasa ngudzu muhuno, yi nga tshukwadzisa womi wangu. Ganiolu, iyo yi nga nyi phasa kharini gu emisana ni sigaradzo hi tshanganago naso mahuno?” Wona giyeyedzo nyo khaguri.

Delphineb a di gu pimisa gu khuye a diri ni womi nyo tsakisi. Ganiolu, khu gu kwavbiha nya maho, silo si di vbindrugedza. Gyanana gyaye nya gyagadzana gi difa. Mutshadho waye wu di tshungunuga nigu a diri ni mangava nya mangi ngudzu. Delphine wari, khuye: “Nyi luzide gyanana gyango, mwama wango ni ndranga yango, nyi tshala nya mba na gilo. Kha nya nga ba nyi dziti gu kheni nyi diri mani nigu kha nya nga ba nyi vbweta gambe gu simama gu vbanya.

Delphine ma pwisiside gwadi malito ma gu khayo: “Matshigu nya guvbanye gwathu ma gu dingana livbandre na mavili magumi (70), avo va gu ni tshivba va gu vbohisa livbandre na mararu magumi (80), aholu myaga yoyo yi tade khu sigaradzo ni gu tshaniseka, ya gu vbindra khu guvbiredza, ethu hi mwalalega.” — Ndzimo 90:10.

Delphine a di vbweta giphaso omu nya Bhibhiliya nigu edzi yi mu phasidego khidzo, si mu hlamadziside ngudzu. Vathu nya vangi va tugude gu khavo esi Bhibhiliya yi si ganeyago, khu lisine si ngu phasa. Avo va wonide gu khavo Bhibhliya yi ngu fana ni giyeyedzo hi bhudego khigyo gupheyani nya ndrima yeyi. Iyo yi hambanide ngudzu ni mambe mabhuku aya khu gu gimbiya nya tepo ma vbindredwago. Ina isoso so girega khu kotani nya olu Bhibhiliya yi ganeyago khu silo nya gu hambene ni mambe mabhuku? Ina iyo lito la Nungungulu khu lisine? — 1 Vatesalonika 2:13.

Adzina u tugude gu khuwe womi wu rode ngudzu nigu wu tade khu sigaradzo. Tepo u wonago gu khuwe sigaradzo sago si ngu gu vbedza tshivba, wa gu vbweta hayi wusingalagadzi, guthaveledwa ni giphaso?

Hongoli hi wona 3 dzindziya nya edzi Bhibhiliya yi nga gu phasago khidzo womini wago. Iyo yi nga gu phasa gu:

1. potsa sigaradzo khavbo u si kodzago khavbo.

2. gu lulamisa sigaradzo tepo si dugeleyago

3. gu emisana ni siemo nya gu kha wu si kodzi gu si vbindrugedza