Wo ba u wona gu khuwe i tshukwana ufa
U DI nga tshuka u garadzega nyo bwe u vbweta ni gu dzi songa? Khu kharato adzina u na mu pwisisa Adriana. A di gu khaleya gu garadzega basi ni gu goroga, a bwe a dzipwa nari mwalo gutumba. A di modwa madwali nya depressão clinica.
Nga dundrugeya gambe khu mwama moyo wa Japão nyo pwani khu Kaoru, a nga ba khathaleya vavelegi vaye va dandridego khu tanga va dwalago. A gu tshamuseya gu khuye: “Dzimbe dzitepo, nyi di gu songwa khu mithumo nya yingi nyi nga ba nyi rwegwa thumotunu. Khu gu gimbiya nya tepo, nyi di vbeledwa khu apetiti, nigu nyi di si li mani ligovbe. Nyi pheya gu pimisa kheni ndziya nyo vbedze sigaradzo sangu khu gu nyifa basi.”
Mwama moyo wa Nigéria nyo pwani khu Ojebode, wari khuye, “Tepo yatshavbo nyi di gu goroga nyo bwe nyi liya, khu kharato nyi di vbwetedzeya dzindziya nyo dzi songe.” Egi gi tsakisago khu gu Ojebode, Kaoru, ni Adriana kha va dzi songa. Ganiolu, mwaga ni mwaga mazanazana nya vathu va ngu dzi songa.
HI NA GI MANA HAYI GIPHASO?
Vathu nya vangi va dzi songago vama, nigu gutala nya avo va giride isoso khu dzitshoni nyo lombe giphaso. Jesu a di khuye ava va dwalago gu vbwetega va hongola ga dhogodheya. (Luka 5:31) Khu kharato wo ba u vbweta gu dzi songa khu kotani nya sigaradzo u tshanganago naso, u nga khali dzitshoni gu lomba giphaso. Vathu nya vangi va gu na ni gigaradzo nyo hamuge gutsaka mwendro depressão va tugude gu khavo mirendre nyo khaguri yi ngu kodza gu va phasa gu emisana ni gigaradzo gyogyo. Ojebode, Kaoru, ni Adriana va manide mirendre nya yadi yi phasago, nigu olu va ngu tshukwata.
Gasi gu thuma madwali yoyo, vadhogodheya va nga thumisa mirendre nyo khaguri mwendro gu bhudzisana ni mudwali gasi gu mu ninga wusingalagadzi wu na mu phasago. Avo va gu na ni gigaradzo gyogyo gu vbwetega vari ni valongo nyo pwisise, va na va khathaleyago gwadi ni gu va thaveleya. Pari nya yikhongolo ngudzu eyi nya gu ni wevbini a nga manegago nayo khu Jehovha, a hi ningago giphaso nya gyadi khu gu thumisa Lito laye, Bhibhiliya.
INA YOMO NDZIYA NYA GU GIGARADZO GEGI GI VBINDRA KHU GUVBELEYA?
Ava va gu na ni gigaradzo nyo hamuge gutsaka mwendro depressão, gutala nya dzitepo si ngu lomba gu va khathaledwa khu tepo nyo laphe, nigu va yede gu dzi garadzeya gu vbindrugedza silo nyo khaguri guvbanyani gwawe gasi va emisana ni gigaradzo gyogyo. Ganiolu wa gu ba u tshangana ni gigaradzo nya nga igyogyo, dundrugeya khu silo nya sadi si tago mindru wa tshigu, kha nga Ojebode. Wari khuye, “Nyi virede khu maho nyo fuviye gu wona gutadzisega nya malito ma gomogo umo ga Isaya 33:24, ma ganeyago khu tepo eyi gu na ba guri mwalo muthu mafuni a na gu khuye ‘Eni nyi ngu dwala.’” Kha nga Ojebode, thaveledwa khu gitumbiso gya Nungungulu nya “mafu maphya,” umo gu na gu ba guri mwalo “guvbisa”. (Gutuledwa 21:1, 4) Gitumbiso gyogyo gyo pata gufuviswa nya wuvi nya mapimo ni monyoni. Guvbisega gwatshavbo hi gu pwago muhuno gu na vbeya hugo bhi kala gupindruga. Li mwalo ni litshigu u na wu ‘dundrugago, ambari gu wu alakanyela gambe’ wuvi wago. — Isaya 65:17.