Mitshamuselo yi gomogo omu nya mabhukhu ma khumbugidwego omu nya Gibhukwana nya mitshangano nya thumo ni mavbanyelo
1-7 NYA ABRIL
DZITHOMBA NYA LITO LA NUNGUNGULU | 1 VAKORINTO 7–9
“Wukwendra giningwa”
(1 Vakorinto 7:32) Nya gu gola mu vbanye na mu tshulegide sigaradzoni. Kholu oyu a gu mwalo lipango, a gu thela kota khu silo sa Pfhumu, a gu dzi garadza khu gukhuye a na nengedzisa kharini Pfhumu.
w11 15/1 dzipaji. 17-18, ndri. 3
Londrola gwadi wukwendra wago
Gu tala nya dzitepo, gikwendra gi ngu tshaledwa khu tepo nya yingi, nigu gi tshulegide ngudzu guvbindra oyu a tshadhidego. (1 Kor. 7:32-35) Eli lithomo lalimwedo eli muthu a nga li londrolago gasi gu engedzeya thumo waye ga Nungungulu, gu engedzeya lihaladzo khu vambe, ni gu tiyisa wupari waye ni Jehovha. Makristo nya mangi, ma ngu tsakeya makategwa ma manwago khu gu ba uri gikwendra, nigu va gu hunga gu ‘ninga wulanga’ wukwendra khu tepo nyo khaguri. Si ngu kodzega gu vambe va sa hunga gu khala sikwendra, ganiolu, tepo siemo sawe si nga vbindrugedza, khu monyo watshavbo va dundrugede gwadi khiso, va hegisa khu gu tugula gu khavo khu gu phaswa khu Jehovha, anavo va nga si kodza gu khala na va tshulegide myonyoni gwawe. Khu kharato, va di dzi pwananisa ni giemo, va bwe va ninga wulanga wukwendra. — 1 Kor. 7:37, 38.
(1 Vakorinto 7:33, 34) Gasi oyu a gu ni lipango, a gu thela kota khu silo nya mafu, a dzi garadza khu gukhuye a na nengedzisa kharini mwangadzi waye. 34 A gu khala na kabanegide. Khidzo gambe kharato, nyamayi a ngamba dzegwa, ni nyamahegyane nya likendzi va gu thela kota khu silo sa Pfhumu gasi va khale va nya guaga milini ni hefemuloni. Aholu nyamayi a dzegidwego a gu thela kota khu silo nya mafu, a gu dzi garadza khu gukhuye a na nengedzisa kharini mwama waye.
w08 15/7 paj. 27, ndri. 1
Dzithomba dza omu nya libhuku la Vakorinto
7:33, 34 — Sa gu thula ginani “silo nya mafu” esi mwama mwendro nyamayi a tshadhidego a dzi garadzeyago khiso? Pawulo a gu ganeya khu silo nya mafu esi Makristo ma dzegidego ma yedego gu garadzega khiso. Silo soso sa gu pata guhodza, sombo nyo ambale, wulanga nyo lale; ganiolu kha gu patwi silo nyo vivbe nya litigo, esi maKristo ma si nyenyago. — 1 Johane 2:15-17.
(1 Vakorinto 7:37, 38) Aholu, oyu a sambanyidego khu monyo ni mapimo yaye yatshavbo, na gu dzipwa gukhuye a na dzi phara, gwadi a si dzegi nyamahegyane. 38 Khu kharato, Oyu a dzegago nyamahegyane a ngu gira gwadi; gasi oyu a si dzegigo a ngu gira gwadi ngudzu guvbindrisa.
w96 15/10 dzipaji. 12-13, ndri. 14
Wukwendra wu nga gu dzumeleya gu thuma nya mba tsolopetedwa
Mukristo a gu thumisa wukwendra gasi gu landriseya dzithomba nya litigo, kha giri “gwadi ngudzu guvbindrisa,” a ngu padwa khoyu a tshadhidego. Khandri khatshi a gu simama nari gikwendra “khu gufela Mufumo,” ganiolu a gu simama nari gikwendra khu gufeya silo saye. (Matewu 19:12) Mwama mwendro nyamayi a gu gikwendra, yede “gu thela kota khu silo sa Pfhumu,” ni gu bwe a “dzi garadza khu gukhuye a na nengedzisa kharini Pfhumu.” Isoso sa gu thula gu thumeya Jehovha ni Jesu Kristo khu guvbeleya. Mukristo a gu gikwendra a gu gira isoso, khavbo si na thulago gu pwani a ngu “gira gwadi ngudzu guvbindrisa,” guvbindra maKristo ma tshadhidego.
Kemba dzithomba nya liphuvbo
(1 Vakorinto 7:11) A gu khuga pangoni ga mwama waye, a nga dzegwi khu mumbe; a na khongotelane ni mwama waye. Mwama nuye a nga huli mwangadzi waye.
lvs paj. 251
Tshamuselo wa vbavbatshi
Dzimbe dzitepo, mambe maKristo ma ngu hunga gu hambana ni pari yaye nya wugadzi ambari ga gu ba gu si pategi wubhayi. (1 Vakorinto 7:11) Mukristo a nga hunga gu hambana ni pari yaye nya wugadzi khu guya khu siemo sesi.
• Gu mba sayisa ndranga: Mwama a gu bonga gu sayisa ndranga yaye khu nyamani, avba nya gu va hamuga ni sikinyetana, mwendro va weleya mafu khu ndzala. — 1Thimoti 5:8.
• Dzitshanisa: Mwama mwendro nyamayi a gu wona gu khuye womi waye womo mhangoni nya gufa ni guvbanya, khu gu ba a tshaniswa khu pari yaye nya wugadzi, a nga hambana naye. — Vagalatiya 5:19-21.
• Gu tsolopetedwa wupari ni Jehovha. Mwama mwendro nyamayi a gu wona gu khuye wupari waye ni Jehovha wu ngu hadzi kanudwa khu pari yaye nya wugadzi, a nga hambana naye. — Mithumo 5:29.
(1 Vakorinto 7:36) Oyu a pwago dzitshoni khu gu wona gyagadzyana gyaye a gi tumbisidego na gi gu vbindredwa khu tanga nya gudzegwe, a na gire esi a golago monyoni gwaye; a gu dzegana nagyo kha ghohi.
w00 15/7 paj. 31 ndri. 2
U nga simama nu tshugide tigoni momu gu tadego khu wuvivbi
Khu kharato, muthu-muphya kha yeli gu tutumeya gu tshadha khu gu ba a phede basi gupwa manyawunyawu nyo hengeye malawu. Lipango la gu vbweta muthu a vidzidwego; a na vbanyago guya khesi lipango li si lombago. (Genesi 2:24) Muphya gu vbwetega gu a ‘dandra gwadi,’ kala yi vbindra tepo eyi manyawunyawu nya gu hengeye malawu ma mu landriseyago khu tshivba ni tshivba. (1 Vakorinto 7:36) Gu na ba guri wupumbu ngudzu ga gu tshuka muthu a dandridego khu tanga, a dogoreyago gu tshadha, a thegeya gighohoni na gu khuye kha mu mani muthu nyo dzegane naye!
8-14 NYA ABRIL
DZITHOMBA NYA LITO LA NUNGUNGULU | 1 VAKORINTO 10-13
“Jehovha tumbegide”
(1 Vakorinto 10:13) Sigaradzo mu si wonago khiso si pimedwego gu padwa khu muthu. Kholu Nungungulu tumbegide, kha na nga dzumedzisa gukhuye mu mane silingo nya guvbindre tshivba yanu. A gu mi rumela gilingo, a na mi tulela gambe dzindzila nya gu gi pale.
w17.02 dzipaji. 29-30
Siwudziso sa valeri
Mupostoli Pawulo lovide gu khuye Jehovha “kha na nga dzumedzisa gukhuye mu mane silingo nya guvbindre tshivba yanu.” (1 Kor. 10:13) Ina esi sa gu thula gu khiso Jehovha a gu khedza gasi a wona egi moyo ni moyo wathu a na gi kodzago gu rwala, khavbovbo a hatha silingo hi na emisanago naso?
▪ Gasi gu pwisisa gwadi esi si pategago avba nya giwudziso gegi, wona giwudziso gegi. Gyanana nya lidzaha la moyo nya ndriyathu gi di tshwedza, khavbovbo ndriyathu a dzi wudzisa gu khuye: ‘Gu kala Jehovha a dzumeleya gu khuye hi emisana ni gilingo gegi, a di wona gu khuye eni ni mwangadzi wangu hi na gi bamba?’ Ina hi na ni gikhelo nyo khethu Jehovha a ngu woneleya satshavbo womini gwathu?
Malito ya Pawulo ma gomogo omu ga 1 Vakorinto 10:13 ma gu hi vbohisa avba nya mahegiso yaya: Bhibhiliya kha yi seketeyi mawonelo nyo khayo Jehovha a ngu hi hatheya silingo hi na kodzago gu si rwala. Hongoleni hi wona silo sina si hi girago hi vboheya avba nya mahegiso yoyo.
Gupheya, Jehovha ningide vathu malungelo nya gu dzi hatheye. A gu vbweta gu khuye hi dzi hatheya ndziya hi na gimbiyago khiyo womini. (Dhet. 30:19, 20; Jos. 24:15) Ha gu hatha ndziya nya yadi, hi nga tiyisega gu khethu Jehovha a na hi thangeya. (Mav. 16:9) Ganiolu, ha gu hatha ndziya nya mba yadi, hi na vbwera mihandro yakone. (Gal. 6:7) Nga dundrugeya: Nari khatshi Jehovha khuye a hi hatheyago silingo hi na emisanago naso, ina hi di hadzi khethu hi nani malungelo nyo dzi hatheye?
Nya wuvili, Jehovha kha hi vhikeyi avba nya esi si hi dugeleyago khu “gikhati” gyaso. (Muh. 9:11) Dzimhango nya dzikhongolo — adzina dzi gu ni mihandro nyo thise ngudzu — dzi nga hi dugeleya adzina khu gu ba hiri ga wulanga ni tepo yi gu siri iyo. Jesu ganede khu mhango yi songidego 18 vathu, nigu si yeyedzide gu khuye mhango yoyo khandri ya gugola ga Nungungulu. (Luka 13:1-5) Ina si ngu pwala ha gu khethu Nungungulu yede gu hunga na yi nga tshade tepo gu khuye khu mani a na fago noyu a na vbanyago ga gu dugeleya mhango nyo khaguri?
Nya wuraru, moyo ni moyo wathu gu vbwetega a yeyedza gutumbega gwaye. Dundruga gu khuwe Sathane kanakanede gutumbega gwathu. A di khuye watshavbo a thumeyago Jehovha, a gu tshuka a emisana ni gilingo, a na mbangula gutumbega gwaye. (Joba 1:9-11; 2:4; Gutu. 12:10) Nga dundrugeya nari khatshi Jehovha a gu hi vhikeya avba nya silingo nyo khaguri khu gu khuye hi na lemeledwa khiso; ina na siri a gu seketeya malito ya Sathane nyo khuye ha gu thumemeya Nungungulu silo sa gu ba si hi gimbileya gwadi basi?
Nya wuna, Jehovha kha pheyi khu gu khedza satshavbo si na hi dugeleyago. Nari khatshi Nungungulu a gu hi hatheya silingo, a di yede gambe guti satshavbo khu wumindru wathu. Ganiolu isoso kha si seketedwi khu Bhibhiliya. Lisine gu Nungungulu na ni makodzelo nya guti wumindru wathu. (Isa. 46:10) Ganiolu Bhibhiliya yi ngu yeyedza gu khiyo Jehovha a ngu hatha silo a vbwetago gu si wona na si nga giregi. (Gen. 18:20, 21; 22:12) Ambari a gu thumisa tshivba yaye gasi guti silo na si nga si giregi, uye kha divali malungelo yathu nya gu dzi hatheye. Ina khandriso isoso hi yedego gu si vireya ga Nungungulu a ningago githavo gutshulega gwathu ni gu bwe a ninganiseya khu gu vbeleya satshavbo a girago? — Dhet. 32:4; 2 Kor. 3:17.
Hi nga ma pwisisa kharini malito ya Pawulo nya gu khayo: “Nungungulu . . . kha na nga dzumedzisa gukhuye mu mane silingo nya guvbindre tshivba yanu”? Avba Pawulo a gu tshamuseya esi Jehovha a girago ha gu ba hiri ndrani nya gilingo na siri ga gu ba gi nga si giregi. Malito ya Pawulo ma gu hi tiyisa gu khayo, ambari ha gu tshangana ni gigaradzo nyo khale kharini, Jehovha a na hi phasa, ganiolu ha gu mu tumba. (Ndzi. 55:22) Malito nyo tiyise ya Pawulo ma gu seketedwa avba nya silo sivili nya lisima ngudzu.
Nyo pheye, sigaradzo hi tshanganago naso si ‘padwe khu vathu.’ Sigaradzo hi gu naso, vomo va tshanganidego naso navo. Sigaradzo soso kha si garadzi gu emisana nago, ganiolu, gasi si hi vbevbugeya, hi yede gu tumba Nungungulu. (1 Ped. 5:8, 9) Avba nya mongo nya 1 Vakorinto 10:13, Pawulo a gu thula silingo esi vaIsrayeli va tshanganidego naso giwulani. (1 Kor. 10:6-11) Silingo sile na si giregede ni wevbini muthu, nigu vaIsrayeli va na si pade. Ganiolu Pawulo a ganede dzitepo dzina gu khuye “vambe” kha va yeyedza gutumbega. Yawalo khu gu, vambe vaIsrayeli va di landriseya dzindziya dzawe kholu va di si tumbi Nungungulu.
Nya wuvili, ‘Nungungulu tumbegide.’ Ndrani nya matimo nya vathu, Nungungulu yeyedzide lihaladzo nya lisine ga vathu vaye “vale va mu golago ni gu landrisa milayo yaye.” (Dhet. 7:9) Malito yoyo nayo ma gu yeyedza gu khayo Nungungulu a ngu vegisa situmbiso saye. (Jos. 23:14) Khu kharato, ava va haladzago ni gu engisa Jehovha, va gu emisana ni sigaradzo, va ngu tumba gu khavo uye a na tadzisa situmbiso sesi sasivili: 1) Gima kha na nga dzumeleya gu khuye gilingo nyo khaguri gi lemeya avba nya gu gi hi rerekisa, nigu, 2) ‘A na hi tuleya gambe dzindziya’ nya gu si pale.
Ava va tumbago Jehovha va gu tshuka va emisana ni silingo, Jehovha a gu va tuleya kharini dzindziya? Lisine gu, Jehovha a dzina a gu dusa gilingo khu guvbeleya. Ganiolu, hongoleni hi dundruga malito ya Pawulo: “[Jehovha], a na mi tulela gambe dzindzila nya gu gi pale.” Khu kharato gu tala nya dzitepo, Jehovha a gu hi ‘tuleya dzindziya’ khu gu a hi ninga ni gevbini gi vbwetegago gasi gu pala silingo. Wona dzindziya nyo khaguri edzi Jehovha a nga hi tuleyago khidzo dzindziya:
▪ Jehovha a ngu hi ‘thaveleya sigaradzoni sathu satshavbo.’ (2 Kor. 1:3, 4) Jehovha a nga tangadzisa mapimo yathu, myonyo yathu, ni gudzipwa gwathu khu gu thumisa Lito laye, liphuvbo laye nya guage, ni guhodza ga liphuvboni a hi ningago khu gu thumisa githumi nya gutumbege. — Mat. 24:45; Joh. 14:16; Rom. 15:4.
▪ Jehovha a nga hi thangeya khu gu thumisa liphuvbo nya guage. (Joh. 14:26) Ha gu tshuka hi emisana ni silingo, liphuvbo nya guage li nga hi phasa gu dundruga matimo nya Bhibhiliya ni matshina nya milayo, khavbovbo hi tugula ndziya nya yadi hi yedego gu beya khiyo.
▪ Jehovha a nga thumisa dzingilozi dzaye gasi gu hi vhikeya. — Hebh. 1:14.
▪ Jehovha a nga hi phasa khu gu thumisa vandriyathu ava khu malito ni sigiro va nga kodzago gu hi “phasedzela ngudzu.” — Kol. 4:11.
Ina ka, khu yavbi mahegiso hi ma vboheyago maningano ni tshamuselo nya malito ya Pawulo ma gomogo omu ga 1 Vakorinto 10:13? Jehovha kha hi hatheyi silingo hi na emisanago naso. Ganiolu, ha gu tshuka hi dugeledwa khiso, hi nga tiyisega khu silo sesi: Ha gu tumba Jehovha khu monyo watshavbo, gima kha na nga hi diga hi fekafekana ni silingo nyo garadze gu si rwala; uye a na hi tuleya dzindziya nya gu si pale. Isoso si ngu hi tiyisa ngudzu!
(1 Vakorinto 10:13) Sigaradzo mu si wonago khiso si pimedwego gu padwa khu muthu. Kholu Nungungulu tumbegide, kha na nga dzumedzisa gukhuye mu mane silingo nya guvbindre tshivba yanu. A gu mi rumela gilingo, a na mi tulela gambe dzindzila nya gu gi pale.
(1 Vakorinto 10:13) Sigaradzo mu si wonago khiso si pimedwego gu padwa khu muthu. Kholu Nungungulu tumbegide, kha na nga dzumedzisa gukhuye mu mane silingo nya guvbindre tshivba yanu. A gu mi rumela gilingo, a na mi tulela gambe dzindzila nya gu gi pale.
Kemba dzithomba nya liphuvbo
(1 Vakorinto 10:8) Hi nga dzi ningedzeli wubhayini, kha nga edzi va nga gira nya vangi vawe, va fa khu litshigu limwedo basi gipimo nya magumavili na mararu magumi mazana (23.000) vathu.
w04 1/4 paj. 29
Siwudziso sa valeri
Khu ginani ndrimana yeyi yi ganeyago gu khiyo gu fude 23 000 vaIsrayeli khu litshigu limwedo khu gu gira wubhayi, nari gu libhuku la Mitengo 25:9 lo ganeya gu khilo gu fude 24 000?
Gu na ni sighelo nya singi si girisago gu dzinumeri dzi khumbugidwego avba nya mavhesi mavili dzi hambana. Gighelo nyo pheye adzina hi nga khethu numeri nya lisine yomo vbakari ni vbakari nya 23 000 ni 24 000, a gu numeri yi dzumeyago gu gwedziswa mwendro gu reledzwa.
Wona simbe gambe. Mupostoli Pawulo a di khumbuga matimo ya vaIsrayeli tigoni ga Kitimi, kha nga dziya nyo gengedze maKristo ya Korinto wa gale, lidhoropa li nga ba li tidwa khu mavbanyelo nyo nyenyeze. Lovide gu khuye: “Hi nga dzi ningedzeli wubhayini, kha nga edzi va nga gira nya vangi vawe, va fa khu litshigu limwedo basi gipimo nya magumavili na mararu magumi mazana (23.000) vathu.” Na gu ganeya basi khava va songidwego khu Jehovha khu gu ba va giride wubhayi, Pawulo a di khumbuga tengo nya 23 000 vathu. — 1 Vakorinto 10:8.
Mithumo gipimo 25, wari khuye: “Va na Israyeli va diya dzi tshanganisa ni Bhahali-Peyori, khu guralo [Jehovha] Nungungulu a di ya wugela va na Israyeli.” Khu gu landreya, Jehovha a di ruma Mosi gu ya songa “vathangeli vatshavbo nya vathu.” Khu kharato, Mosi a di ruma valamuli gu khathaleya thumo wowo. Khu gu hegisa, tepo Fineya a nga dzegeya gu gira gilogyo gasi gu songa vaIsrayeli va ngata ni nyamayi nya muMedhiyani lizumbotunu, “tungu wu di vbela.” Matimo mo vbeya khu malito yaya: “Vathu va fudego khu tungu wowo va diri tengo nya magumavili na mana magumi mazana (24 000).” — Mitengo 25:1-9.
Tengo watshavbo si nga gira nari go patwa “vathangeli vatshavbo nya mihungo” va songidwego khu valamuli, nava va songidwego khu Jehovha khu wugulu. Si nga gira valamuli na va songide 1000 vathangeyi nya mihungo, gu vboheya kharato tengo nya 24 000. Gani mihungo yoyo yi pategide avba nya wubhayi wowo, gani yi pategide avba nya mibuzo, gani yi di gu siti esi si giregidego, avo va diri ni nandru kholu va dzi ‘tshanganiside ni Bhahali-Peyori.’
Maningano ni lito gu “dzi tshanganisa,” libhuku nyo khaguri li tshamuseyago mahungu nya Bhibhiliya, lari khilo lito lolo li nga thula “gu namareya muthu nyo khaguri.” Vaisrayeli va diri vathu va dzi hendzeledzidego ga Nungungulu, ganiolu, tepo va nga “dzi tshanganisa ni Bhahali-Peyori,” va di fuvisa kharato wupari wawe ni Nungungulu. Hwane nya gu ba gu vbindride 700 myaga, Jehovha a di thumisa muprofeti Hoseya gasi gu ganeya khu vaIsrayeli; a di khuye: “Aholu, avbo va nga vboha Bhahali-Payori, va di dzi ningela va phasela githombe gile nya dzitshoni, va vbindrugedza va nyenyeza kha nga gilo va nga gi gola.” (Hoseya 9:10) Vatshavbo va giridego isoso va di gu yede gu lamudwa khu Jehovha. Khu kharato, Mosi a di dundrugisa sanana sa na Israyeli gu khuye: “Maho yanu ma wonide esi PFHUMU Nungungulu a giridego khu kotani ya Bhahali-Peyori; khu guralo, vathu vatshavbo vale va nga landriseya Bhahali-Peyori, PFHUMU Nungungulu wanu, a va mbembiside vbakari gwanu.” — Dhewuteronome 4:3.
(1 Vakorinto 11:5, 6) Nyamayi a girago nombelo mwendro gu ganela mahungu khu lina la Nungungulu na funungude hungo, a gu thela dzitshoni mwama waye. Khidzosaye ni gu vidwa ndzudzu. 6 Nyamayi a gumba hunga gikhongelo hungoni, a na gaye ndzudzu! Aholu a gu khala dzitshoni gu gaya mwendro gu vbaludwa, a na hunge gikhongelo!
(1 Vakorinto 11:10) “Nari guralo, nyamayi fanede gu vega hungoni gilo gi yeyedzago gupwani a gu fumedwa, khu kotani nya dzingilozi.”
w15 15/2 paj. 30
Siwudziso sa valeri
Ina muhuweleyi nya nyamayi yede gu fenengedza hungo a gu ba a gimbidzisa gihevbulo nya Bhibhiliya nari ni muhuweleyi nya mwama?
▪ Avba nya “Siwudziso sa valeri” sa avba nya Mukhedziseyi nya 15 nya Julho nya 2002, khu giPutukezi, wu di khuwo ndriyathu nya nyamayi yede gu hunga gilogyo hungoni a gu ba a gimbidzisa gihevbulo nya Bhibhiliya a gu ba ari ni muhuweleyi nya mwama, gani bhapatisidwe, gani ne. Ganiolu hwane nya gu ba mahungu yaya ma gevisisidwe gadi, gu wonidwe gu pwani tshukwana gu vbindrugedzwa silo nyo khaguri.
Abari gu ndriyathu nya nyamayi a gu gimbidzisa gihevbulo nya Bhibhiliya nari ni muhuweli nya mwama a bhapatisidwego, so hunga gu khiso ndriyathu nya nyamayi a hunga gilogyo hungoni. Khu ndziya yoyo, a na ba ari o yeyedza githawo khu malulamiseyo ma giridwego khu Jehovha nyo thangeye libandla nya wuKristo kholu ndriyathu nya nyamayi a na ba ari o gira thumo owu khu giolovedzo wu yedego gu girwa khu mwama. (1 Kor. 11:5, 6, 10) Khu ndziya nyo ningedzane, ndriyathu nya nyamayi yede gu lomba ndriyathu nya mwama gu gimbidzisa sihevbulo a gu ba a ninganedwa ni gu bwe ari ni makodzelo nyo gire isoso.
Ganiolu, a bari gu ndriyathu nya nyamayi o hadzi gimbidzisa gihevbulo nari ni muhuweleyi nya mwama a sa bhapatiswago, na siri mwama mwaye, guya khu Milowo, gu mwalo gighelo nyo hunge gilogyo hungoni. Ambari ulolo, si ngu kodzege gu mavhalo ya vambe vandriyathu nya vanyamayi ma va ruma gu hunga gilogyo hungoni.
22-28 NYA ABRIL
DZITHOMBA NYA LITO LA NUNGUNGULU | 1 VAKORINTO 14-16
Nungungulu a na khala “silo satshavbo” ga vatshavbo
(1 Vakorinto 15:24, 25) “Khavbo avbo, gu na vboha mahegiso nya silo satshavbo! Na fuviside mufumo, ni dzitshivba ni valala vatshavbo, Kristo a na ningela mufumo mandzani ga Nungungulu Babe. 25 Kholu gu vbwetega Kristo a fuma kala Nungungulu a khozisa valala vatshavbo khu tshivba yaye.
w98 1/7 paj. 21, ndri. 10
“Nala nya guhegise a na padwago, khu gufa”
Lito “Mahegiso,” go thudwa mahegiso nya Wufumo wa Kristo nya Likhumi Mazama Myaga, tepo khiyo Jesu khu gu dzi vega vbavbatshi ni gutumbega a na ningeyago Wufumo watshavbo ga Nungungulu ni Babe waye. (Gutuledwa 20:4) Makungo ya Nungungulu nyo ‘tshanganise satshavbo si gu romo mafuni, a emisa Kristo’ ma na ba ma tadzisegide. (Vaefeso 1:9, 10) Gupheya, Kristo a na ba a “fuviside mufumo, ni dzitshivba ni valala vatshavbo” va wugeyago Gugola ga Nungungulu. Isoso kha si thuli basi gu tshungunudwa khu gu thumisa Harmagedhoni. (Gutuledwa 16:16; 19:11-21) Pawulo a di khuye: “Kholu gu vbwetega Kristo a fuma kala Nungungulu a khozisa valala vatshavbo khu tshivba yaye. Nala nya guhegise a na padwago, khu gufa.” (1 Vakorinto 15:25, 26) Khu kharato, dziphandza dzatshavbo nya gighoho gya Adhamu gupata ni gufa si na ba si kudwe khu khamba wakone. Khu ndziya yoyo, Nungungulu a na ba a agiside ‘marowo’ khu gu wusa ava va fudego va vbanya gambe. — Johane 5:28.
(1 Vakorinto 15:26) Nala nya guhegise a na padwago, khu gufa.
Mufumo wu na tadzisa gugola ga Nungungulu mafuni
Ganiolu, ahati handro wu vangwago khu madwali, handro wu vangwago khu gighoho, a gu gufa? Ugo “nala [wathu] nya guhegise,” a gu nala a palago vathu vatshavbo nya gu mba vbeleya. (1 Kor. 15:26) Ganiolu, ina gufa nala a thawago khu Jehovha? Nga wona esi si profetidwego khu Isaya: “A na fuvisa gufa kala gupindruga; Mune PFHUMU Nungungulu a na bavbula marongo dzikhovbeni gwatshavbo.” (Isa. 25:8) Ina u ngu dundrugeya khu tepo yoyo? Gu na ba guri mwalo gambe gudzinga, marowo, ambari marongo nya gutshaniseke! Vbavbandze nya isoso, gu na ba guri ni marongo nya gunengeye khu gu ba Jehovha na tadziside gitumbiso gyaye nya gu wuse ava va fudego! (Leri Isaya 26:19.) Khu guhegisa, dziphadza dzatshavbo dzi vangwago khu gufa dzi na ba dzi fuvisidwe.
(1 Vakorinto 15:27, 28) Nungungulu a mu ningide gufuma silo satshavbo. A gu pwani Nungungulu a Mu ningide gufuma silo satshavbo, gu yeyedza gu pwani Uye Nungungulu kha valedwi avba nya silo satshavbo, kholu khuye a ningago Mwanaye tshivba nya gufume silo satshavbo. 28 Gikhati Nungungulu a na vegago silo satshavbo vbavbatshi nya mufumo wa Mwamana, Mwamana nuye a na dzi vega vbavbatshi nya mufumo wa Babe, a gu uye a mu ningago gu fuma silo satshavbo.
w12 15/9 paj. 12, ndri. 17
Gurula khu gipimo nya likhumi mazana myaga ni guvbindra!
Gumwalo gimbe nya lisima ngudzu gi na giregago gu vbindra gu dziti gu khethu Nungungulu a na khala “silo satshavbo” ga vatshavbo. So thula ginani isoso? Nga dundrugeya tepo khiyo vathu nyo vbeleye, a gu Adhamu ni Evha, va nga ba vari gipandre nya ndranga nyo rule ya Jehovha. Jehovha, Pfhumu nya Yikhongolo, a di gu fuma sivangwa saye satshavbo, a gu dzingilozi ni vathu. Va diri ni makodzelo nyo ganeye naye khu wugulu, gu mu khozeya, ni gu bwe va kategiswa khuye. Uye a diri “silo satshavbo” ga vatshavbo.
Kemba dzithomba nya liphuvbo
(1 Vakorinto 14:34, 35) vanyamayi va nga ningwi wulanga va ganela mitshanganoni. Khandri gwadi vanyamayi gu ganela mu vathuni. Avo va na yingise kha nga edzi wu rumago khidzo Nayo wa Mosi. 35 Va guvbweta guti gambe simbe silo, va na wudzisa vama vawe gaya. Kha gu khali gwadi nyamayi gu khusa lito a ganela vbakari nya tshangano nya vakhodwa.
w12 1/9, kwandru nya pajina 9
Ina mupostoli Pawulo a di gu himbedzeya vanyamayi gu ganeya?
Mupostoli Pawulo lovide gu khuye: “Vanyamayi va nga ningwi wulanga va ganela mitshanganoni.” (1 Vakorinto 14:34) So thula ginani isoso? Ina a di gu kanyisa guti gwawe? Ne, khandriso. Dzimbe dzitepo Pawulo a di gu ganeya khu giphaso nya sihevbudzo nya vanyamayi. (2 Thimoti 1:5; Tito 2:3-5) Avba nya lidangaliya a nga li yisa ga Vakorinto, Pawulo kha ningeya gileletelo gegi ga vanyamayi basi, ganiolu ga vatshavbo va nga ba vari ni giningwa nya malimi ni guprofeta, khu gu khuye va na “degule” tempo mumbe a ganeyago. (1 Vakorinto 14:26-30, 33) Adzina muKristo nyo khaguri nya nyamayi, khu kotani nya gutsaka a gu nago khu gu ba a manide lisine, a di hadzi emisa muganeyi, gasi a feya gu gira siwudziso a gu naso, a gu mavbanyelo ma nga ba ma olovelegide tigoni mule. Gasi gu potsa pfilupfilu yoyo, Pawulo a di va laya gu khuye va gu ba vari ni giwudziso ‘va na wudzise vama vawe gaya.’ — 1 Vakorinto 14:35.
(1 Vakorinto 15:53) Kholu gu vbwetega givili gegi nya guhine gi hakhe gumba hina, ni givili gegi nya gufe gi hakhe gumba fa.
it-2 dzipaji. 392-393
Gu mba hina
Ava va todzidwego, gu fana ni Jesu, va gu wuswa khu gufani khu ndziya nyo fane, ganiolu khandri basi vo wusedwa gasi gu vbaya kala gupindruga nga sivangwa nya liphuvbo, ganiolu avo kha vafi gambe nigu kha va hini. Khu gu ba va vbanyide, va thuma khu gutumbega, va bwe vafa na vari ni givili gi kodzegago gu hina, avo va gu hegisa khu gu hakha givili nya gu mba hina gambe guya khesi Pawulo a lovidego omu ga 1 Vakorinto 15:42-54. Khu kharato, gu mba fa sa gu thula womi va dzi buzago khuwo, giemo va gu nagyo nya gu mba vbeya gambe. Gu mba hina sa gu wonega nari so thula givili va ningwago khu Nungungulu, givili gi si kodzegigo gu hina, gu ghoheka ambari gu fuva. Khu kharato, sa gu wonega gu khiso Nungungulu va ningide tshivba nya gu va dzi vbanyisa vabune, na va si vireyi gu phaswa gufana ni simbe sivangwa sa Jehovha si vireyago gu phaswa gasi si veya gu simama gu vbanya. So dzegeya gu wonega gu agani gu khiso Nungungulu a ngu va tumba ngudzu. Ganiolu, kha si thuli gu khiso khu gu ba vari ni makodzelo yoyo, kha va ngu thangedwa gambe khu Nungungulu; avo gufana ni Hungo wawe, Jesu Kristo, va ngu gu simama gu dzi vega vbavbatshi nya gugola ga Babe wawe ni gu bwe va thangedwa khuye. — 1Ko 15:23-28; wona gipandre gi gu khigyo imortalidade; alma.
29 NYA ABRIL–5 NYA MAIO
DZITHOMBA NYA LITO LA NUNGUNGULU | 2 VAKORINTO 1-3
Jehovha — “Nungungulu nya guthavelele gwatshavbo”
(2 Vakorinto 1:3) A na rungudzwe Nungungulu Babe wa Pfhumu yathu Jesu Kristo, Babe nya wuhindzi, Nungungulu nya guthavelele gwatshavbo,
w17.07 paj. 13, ndri. 4
“Lila ni vale va lilago”
Babe wathu nya guthaveleyi gwatshavbo, a ngu wuti wuvi nyo fedwe, a garadzegide ngudzu khu gufa ga Abrahama, Isaki, Mosi, ni Pfhumu Dhavhidhe. (Mite. 12:6-8; Mat. 22:31; Mith. 13:22) Bhibhiliya ya gu si vega gu agani gu khiyo Jehovha virede khu maho nyo fuviye gu wusa khu gufani sithumi saye nyo tumbege. Uye a ngu va suva. (Joba 14:14, 15) Uye o vbweta gu va wona na va tsakide ni gu bwe vari ni womi nyo vbeleye. Nga dundrugeya tepo Nungungulu a nga wona Mwanaye nyo golege na gufa; a gu Jesu. Bhibhiliya yari khiyo “litshigu ni litshigu” Jesu a di gu tsakisa Babe waye. (Mav. 8:22, 30) Wuvi owu Jehovha a wu pwidego, kha wu fananiswi ni gilo. — Johane 5:20; 10:17.
(2 Vakorinto 1:4) a gu uye a hi thavelelago sigaradzoni sathu satshavbo gasi hi kodza gu thavelela nethu vale va guromo gusanisekani khu guthaveledwa gogu hi gu manago ga Nungungulu.
w17.07 paj. 15, ndri. 14
“Lila ni vale va lilago”
14 Khu lisine, kha si vbevbugi gu thaveleya muthu a gomogo omu nya sigaradzo nya nga gufedwa. Ganiolu Bhibhiliya yari khiyo: “Lidimi la va nya guti, la gu ninga womi.” (Mav. 12:18) Omu nya bruxura Quando Morre Alguém que amamos, gu na ni wumeseri nya wungi owu nya vangi va wu thumisago gasi gu thaveleya khuwo vambe. Gu na ni gimbe gilo nya lisima ngudzu egi khu ga dzimbe dzitepo u nga girago, a gu gu “lila ni vale va lilago.” (Rom. 12:15) Moyo nyo pwani khu Gaby a nga fedwa khu mwama waye, a di khuye: “Marongo ma khade lidimi nya monyo wangu. Muthu a gu liya ni eni, nyi ngu mana thavelelo nyo khaguri. Khu ga tepo yoyo, kha nyi dzipwi na nyi rwade nyonga gigaradzo.”
Kemba dzithomba nya liphuvbo
(2 Vakorinto 1:22) khuye a nga hi Iova khu gifungo Gyaye a vega gitumbiso nya Liphuvbo myonyoni gwathu.
w16.04 paj. 32
Siwudziso sa valeri
Ginani “gitumbiso” ni “gifungo” egi maKristo matozidwedo ma hakhago khu ga Nungungulu? — 2 Kor. 1:21, 22.
▪ Gitumbiso: Guya khu tshamuselo nyo khaguri, lito nya giGreki li vbindrugedzedwego pwani “gitumbiso” omu ga 2 Vakorinto 1:22, lo thula “lito li gimbeleyanago ni milayo, ni dzinogosi” si tshamuseyago “gipandre nyo pheye, dhepozitu, dziprexitasawu, gupharisa. [Gitumbiso gyogyo,] gi di gu livba gipandre nyo pheye nya tengo watshavbo nyo renge khuwo; iso si nga hadzi thula gu khiso u ngu lumbwa khu gilo gyogyo, mwendro gu tiyisa kontratu.” Maningano nava va todzidwego, va na ni tshatshazelo wu gomogo omu ga 2 Vakorinto 5:1-5 owu wu patago gu ambala givili nya gu mba hina ndzadzini. Tshatshazelo wowo nuwo wa gu pata gu hakha giningwa nya gu mba fa gambe. — 1 Kor. 15:48-54.
Guya khu giGreki gya matshigwanaya, lito li gu ni tshamuselo nyo fane ni “gitumbuso” la gu tshamuseya phera nya gutumbise mutshadho. Isoso so dzegeya gu pwanana gwadi ni gipimaniso gya mwangadzi wa Jesu nyo fananise. — 2 Kor. 11:2; Gutu. 21:2, 9.
▪ Gifungo: Gale yoyo, gu di gu thumisa gifungo gasi gu muthu a funga gu khuye gilo nyo khaguri gi di gu mu lumba, gu sinari. Maningano nava va todzidwego, khu gu fana, va “fungidwe,” mwendro khu ndziya nyo fananise va fungidwe khu liphuvbo nya guage nga vathu va lumbago Nungungulu. (Efes. 1:13, 14) Ganiolu muthu a gu hakha basi gifungo nya gu mba vbeya hwaniyana nya gu ba a nga si gufi na tumbegide mwendro hwaniyana nya gu ba yi si pheyi tshanisa nya yikhongolo. — Efes. 4:30; Gutu. 7:2-4.
(2 Vakorinto 2:14-16) A na rungudzwe Nungungulu, a endredzago mithumo yathu yi gimbila gwadi khu ga Kristo. Khu thumo wathu Nungungulu a ngu phalalegisa malangani yatshavbo mahungu nya gutivise Jesu kha nga mahema nya gunungele gwadi. 15 Ethu, ga Nungungulu hi mahema nya yadi ga vale va vbanyiswago ni ga vale va mbembago. 16 Ga vale va mbembago, mahema nya lufu ma vangago gufa, ga vale va vbanyiswago mahema nya womi ma vangago guvbanya. Khu wevbini muthu a yedwago khu thumo wowu?
w10 1/8 paj. 23
U di gu dziti
Pawulo a di gu thula ginani tepo a nga khuye “tsawa nyo ghiye, NM”?
▪ Pawulo lovide gu khuye: “Nungungulu . . . [‘a ngu hi thangeya omu nya tsawa nyo ghiye, NM’]. Khu thumo wathu Nungungulu a ngu phalalegisa malangani yatshavbo mahungu nya gutivise Jesu kha nga mahema nya gunungele gwadi. Ethu, ga Nungungulu hi mahema nya yadi ga vale va vbanyiswago ni ga vale va mbembago. Ga vale va mbembago, mahema nya lufu ma vangago gufa, ga vale va vbanyiswago mahema nya womi ma vangago guvbanya. Khu wevbini muthu a yedwago khu thumo wowu?” — 2 Vakorinto 2:14-16.
Pawulo a di gu thula giolovedzo gi nga ba gi girwa khu vaRoma nyo kulungeleye muthangeyi nya masotshwa khu gu ba a pade valala nya Litigo. Avba nya gigiro gegi, vatshavbo va nga ba va vbuluga nyimbini gupata ni sibotshwa si di gu yeyedzwa vathuni, nigu va di gu gira ningelo khu gu thumisa dzimombe; gitshungu na gi gu kulungeleya muthangeyi nya masotshwa ni libuthu laye. Hwane nyo ghiye, gu dzi gu songwa dzimombe dzi nga thumisedwa nombelo, adzina ni sibotshwa nya singi niso.
Enciclopédia nya giNgiza nya gu pwani The International Standard Bible Encyclopedia, ya gu ba yi tshamuseya malito ma gu khayo “mahema nya yadi” ya Kristo ga vambe si thulago guvbanya, ni ga vambe si thulago gufa yari khiyo: “Si nga gira na si gu thula gihena nya vaRoma nyo vbise libani tepo gu ghiywago.” “Mahema, si thulago gughiya ga ava va padego, ma di gu dundrugisa ava va modwego maningano ni gusongwa gu nga ba gu va vireya.”