Mitshamuselo yi gomogo omu nya mabhukhu ma khumbugidwego omu nya Gibhukwana nya mitshangano nya thumo ni mavbanyelo
4-10 NYA MARÇO
DZITHOMBA NYA LITO LA NUNGUNGULU | VAROMA 12-14
“Sa gu thula ginani gu yeyedza lihaladzo nya wuKristo”
(Varoma 12:10) Golanani khu lihaladzo nya wundruye, mu palisana khu gu ningana githawo.
it-1 dzipaji. 59-60
Gu haladza
Lihaladzo nya wundruye (Khu giGreki, fi·la·del·fiʹa, si thulago, “lihaladzo nya wundruye”) li yede gu fuma vbakari nya sivbango satshavbo nya libandla nya wuKristo. (Ro 12:10; Heb 13:1; wona gambe 1Pe 3:8.) Khu kharato, libandla li yede gu pwanana khu tshivba ni tshivba, nga khatshi valongo kamo. Ambari olu sivbango nya libandla si yeyedzanago lihaladzo nya wundruye, si ngu kutswa gambe gu engedzeya lihaladzo lolo khu talo ni talo. — 1Tes 4:9, 10.
Lito nya giGreki li gu khilo fi·ló·stor·gos, li thulago ‘gu haladzana ngudzu,’ la gu tshamuseya lihaladzo li fumago vbakari nya vathu vavili va oloveyanago ngudzu. Moyo nya mikhamba nya lito leli, a gu stér·gos, la gu thumiswa ngudzu gasi gu tshamuseya lihaladzo nya wuhengeyi, nya nga lihaladzo nya gilongo. Mupostoli Pawulo kutside maKristo gu haguleya lihaladzo leli. (Ro 12:10) Pawulo gambe ganede gu khuye matshiguni nyo hegise gu na ba guri ni vathu “nyambana lihaladzo ni wuhengeli” (Khu giGreki, á·stor·goi) nigu, vathu vovo va gu fanedwa khu gufa. — 2Tm 3:3; Ro 1:31, 32.
(Varoma 12:17-19) Mu nga bweledzelini guvivba khu guvivba, aholu dzi garadzeni khu gu girela gwadi vathu vatshavbo. 18 Sa gu kodzega, zamani guvbanya khu gurula ni vathu vatshavbo. 19 Vandruye, mu nga dzi phodzelini mwabune, digani Nungungulu a tsayise, kholu Pfhumu a ngu ganela omu nya Milowo nya Guage, khuye: “Eni kheni nyi gu ni fanelo nya gutsayise; kheni nyi na tshatshazelago.”
w09 15/10 paj. 8, ndri. 3
‘Vbanya khu gurula ni vathu vatshavbo’
Leri Varoma 12:17. Pawulo a di khuye ha gu gandrwa ginyalana, kha hi yeli gu bweledzeya khu guvivba. Wusingalagadzi wowu khwa lisima ngudzungudzu omu nya dzindranga va hambanidego khu wukhongeyi. Mukristo a gu potsa liphuvbo nyo vbwete gu bweledzeya guvivba khu guvivba, gani khu malito, gani khu mithumo mwendro simbe silo. Wu mwalo wuwadi avba nya gu ‘bweledzeye guvivba khu guvivba.’ Vbavbandze nya isoso, mavbanyelo yoyo ma nga engedzeya gu ramisa gikatawu.
w07 1/7 dzipaji. 24-25, dzindri. 12-13
“Mu nga bweledzelini guvivba khu guvivba”
Wusingalagadzi wa Pawulo maningano nedzi hi yedego gu phara khidzo maKristo nava va gu siri maKristo khowu wu gu khuwo: “Mu nga bweledzelini guvivba khu guvivba.” Malito yaya ma ngu seketeya gwadi esi a nga nga si ganeya, nyo khuye: “Nyenyani guvivba.” Si nga kodzega kharini gu muthu a ganeya gu khuye a ngu nyenya guvivba, ganiolu na gu bweledzeya guvivba khu guvivba? Isoso si ngu hambana ni “lihaladzo nya lisine.” Pawulo a di khuye: “Dzi garadzeni khu gu girela gwadi vathu vatshavbo.” (Varoma 12:9, 17) Hi nga ma thumisa kharini malito yaya?
Avba nya lidangaliya a nga loveya Vakorinto, Pawulo a di ganeya khu dzitshanisa edzi vapostoli va nga ba va emisana nadzo. A di khuye: “Hi khade [dzimbemba] ga litigo, ga dzingilozi, ga Nungungulu ni ga vathu . . . . Va gu hi vala, ethu ha gu va kategisa; va gu hi tshanisa, ethu ha gu timisela; va gu hi tsorodzela, ethu ha gu va hakha khu gwadi.” (1 Vakorinto 4:9-13) Khu gufana, maKristo muhuno ma ngu khedzisedwa khu vathu nya litigo. Va gu hi wona na hiri ni mavbanyelo nya yadi, ambari ha gu ba hi giredwa guvivba, adzina va na kutsega gu seketeya mahungu yathu nya wuKristo. — 1 Pedro 2:12.
(Varoma 12:20, 21) A engedza gambe, khuye: “Nala wago a gupwa ndzala mu ninge guhodza, a gupwa lidora mu ninge mati a sele. Wa gu gira kharato u na wungedzela magala nya nilo hungoni gwaye.” 21 U nga dzi digi u padwa khu guvivba, aholu, uwe pala guvivba khu wuwadi.
w12 15/11 paj. 29, ndri. 13
Divaleyanani khu gyanu
Adzina womo muthoyo a nga nga gu gorosa, ganiolu u dogoreyago gu mu phasa gu tsakeya matshinya nya milayo nya wuKristo. Mupostoli Pawulo lovide gu khuye: “‘Nala wago a gupwa ndzala mu ninge guhodza, a gupwa lidora mu ninge mati a sele. Wa gu gira kharato u na wungedzela magala nya nilo hungoni gwaye.’ U nga dzi digi u padwa khu guvivba, aholu, uwe pala guvivba khu wuwadi.” (Varoma 12:20, 21) Wa gu khutedzedwa ganiolu u simama gu gira wuwadi, u na tshula dzikhovbe dza ava va hungidego siwombo u bwe u vbwera mihandro nya yadi. Wa gu dzi garadzeya gu pwisisa, ni gu bwe u pweya wusiwana muthu a gu hosedego, si na gu vbevbugeya gu mu hevbudza lisine la omu nya Bhibhiliya. Ganiolu, ambari isoso sa gu mba girega, wa gu hlamula gwadi muthu, si na phasa muthu yoyo gu dundrugeya khu mavbanyelo yago nya yadi. — 1 Ped. 2:12; 3:16.
Kemba dzithomba nya liphuvbo
(Varoma 12:1) Nyi ngu mi lomba vandriyangu khu wuhindzi wa Nungungulu, gukheni mu dzi ningele wurumba wanu mu khale mhamba nya guvbanye, nya gukatege, nya gunengedzise Nungungulu. Eyi khiyo mhamba nya lisine nya maningano yi tsakisago Nungungulu.
lvs dzipaji. 76-77, dzindri. 5-6
Hi nga hatha kharini sivbungadzo
Satshavbo hi girago guvbanyani so gimbileyana ni wupari wathu ni Jehovha. Pawulo si tshamusede gwadi isoso tepo a nga khuye: “Mu dzi ningele wurumba wanu mu khale mhamba nya guvbanye, nya gukatege, nya gunengedzise Nungungulu.” (Varoma 12:1) Jesu a di khuye: “U na gola Pfhumu Nungungulu wago khu monyo wago watshavbo, khu hefemulo wago watshavbo, khu mapimo yago yatshavbo ni tshivba yago yatshavbo.” (Marko 12:30) Tepo yatshavbo ho vbweta gu thumeya Jehovha khavba hi si kodzago khavbo. Israyeli wa gale, muthu a gu vbweta gu ningeya mhamba ga Jehovha, a di yede gu thumisa girengo nyo vbanye gwadi. Jehovha kha nga ba a hakha mhamba yi gu ni gigaradzo. (Levhi 22:18-20) Khu gufana, si ngu kodzega gu wukhozeyi wathu wu si hakhegi mahoni ga Jehovha. Khu ndziya muni?
Jehovha a gu hi embeya gu khuye: “Enu agani, kholu eni nyi agide.” (1 Pedro 1:14-16; 2 Pedro 3:11) Jehovha a na hakha basi wukhozeyi wathu wa gu ba wu agide. (Dhewuteronome 15:21) Ha gu ba hi gira silo si nyenywago khu Jehovha, nya nga mavbanyelo nya mba handzega, mayunga, mwendro wunyanga, wukhozeyi wathu kha wu na nga hakhwa khu Jehovha. (Varoma 6:12-14; 8:13) Ahati ha gu dzi vbungadza khu silo soso, ina Jehovha a na si gola? Ahihi. Wukhozeyi wathu wu na nyenyeza, nigu wupari wathu ni Jehovha wu nafa.
(Varoma 13:1) Muthu ni muthu gu vbwetega a yingela vathangeli va vegidwego khu nayo, wu mwalo mufumo wu ngamba vegwa khu Nungungulu, kholu wufumu watshavbo wa guta khu ga Nungungulu.
w08 15/6 paj. 31, ndri. 4
Dzithomba dza omu nya lidangaliya la Varoma
13:1 — Mifumo nya mafu yi “emisidwe khu Nungungulu, NM” khu ndziya muni? Mifumo nya mafu “yi emisidwe khu Nungungulu, NM” kholu Nungungulu a gu yi dzumeleya gu fuma, nigu, ga dzimbe dzitepo Nungungulu a di profetide khu wufumo wowo. Isoso sa gu seketedwa khesi Bhibhiliya yi ganedego maningano ni mifumo nyo hambanehambane.
11-17 NYA MARÇO
DZITHOMBA NYA LITO LA NUNGUNGULU | VAROMA 15-16
“Jehovha gifefe nya gutimiseya ni gutiya”
(Varoma 15:4) Kholu satshavbo si guromo omu nya Milowo nya Guage si lovedwe gu khala gihevbudzo gwathu, gasi hi mane gutumba khu kotani nya gutimisele hi gu manago umo nya Milowo nya Guage.
w17.07 paj, 14, ndri. 11
“Lila ni vale va lilago”
Wuvi wu pwidwego khu Jesu tepo Lazaru a ngafa, gimwegyo nya siyeyedzo nya milowo nya Bhibhiliya yi hi thaveleyago. Vbavbandze nyo kanakane, “satshavbo si guromo omu nya Milowo nya Guage si lovedwe gu khala gihevbudzo gwathu, gasi hi mane gutumba khu kotani nya gutimisele hi gu manago umo nya Milowo nya Guage.” (Rom. 15:4) Wa gu ba u garadzega khu kotani nya gufedwe, u nga tiyiswa khu milowo yeyi:
▪ “[Jehovha] womo vbafuvbi ga vale myonyo yawe yi vbisegago, a vbanyisa avo mihefemulo yawe yi khuvekidego” — Ndzi. 34:18, 19.
▪ “Vbakari nya sigaradzo si tadego monyoni gwangu, uwe, [Jehovha] U ngu tangadzisa hefemulo wangu.” — Ndzi. 94:19.
▪ “Uye mune Jesu Kristo, Pfhumu yathu, ni Nungungulu Babe wathu a nga hi haladzago, khu wuwadi waye, a hi ningide tshivba nya gutiye, ni gutumba nya gukhongolo ngudzu. A na tangadzise myonyo yanu khu gutumba.” — 2 Tes. 2:16, 17.
(Varoma 15:5) Uye Nungungulu a gu gifefe nya gutimisele ni gutiya gwatshavbo a na mi ningeni gupwanana moyo ni moyo mu fanana ni Jesu Kristo.
w16.04 paj. 14, ndri. 5
“Aholu gutimisela gu vbwetega gu manega ni mithumo”
Lomba gu khuwe Jehovha a gu tiyisa. Jehovha, “Nungungulu a gu gifefe nya gutimisele ni gutiya gwatshavbo.” (Rom. 15:5) Uye a ngu pwisisa khu guvbeleya sigaradzo hi emisanago naso, nigu, a nguti edzi tumbunugo ni gudzipwa gwathu si hi khuhago khidzo. Khu kharato, uye a nga hi tiyisa khavba si vbwetegago khavbo. Bhibhiliya yari khiyo: “Uye a gu ninga esi va si vbwetago avo va mu thavago; a ngu va yingisa va gu mu lomba giphaso, a va vbanyisa.” (Ndzi. 145:19) Nungungulu a gu hi ninga kharini tshivba nyo timiseye?
(Varoma 15:13) Uye Nungungulu a gu gibuga nya gitumbo a na mi ninge gunengela, ni gurula khu gukhodwa, gasi gitumbo gyanu gi engedzelana gu dandra khu tshivba nya Liphuvbo nya Guage.
w14 15/6 paj. 14, ndri. 11
“U na haladza Pfhumu Nungungulu wago”
Jehovha a ngu hi ninga ‘gutumba gu hi tadzago khu gutsaka ni gunengeya.’ (Rom. 15:13) Gutumba hi ningidwego khu Nungungulu gu ngu hi phasa gu timiseya silingo. Ava va todzidwego, va gu ‘tumba kala gufani, va na ambagiswa gihugu nya womi nya mba vbeya.’ (Gutu. 2:10) Ava va gu ni guvireya nyo vbanye mafuni, va gu simama na va tumbegide, va na dzibuza khu makategwa nya mba vbeya a gu Paradhesi mafuni gwatshavbo. (Luka 23:43) Ha gu dzipwa kharini khu guvireya gogo? Ina kha hi tali khu gutsaka ni gurula, ni gu bwe hi haladza Muningi nya silo “satshavbo nya sadi”? — Jak. 1:17.
Kemba dzithomba nya liphuvbo
(Varoma 15:27) Va di wona nari gwadi gu gira kharato, gambe a diri fanelo yawe. Kha nga ulo va nya mayigo va hakhidego makategwa nya liphuvbo a gu ya vaJudha, avo navo va na ni fanelo nya gu va phasedzele khu siningwa sawe nya mafu.
w89 1/12 paj. 24, ndri. 3
“Lihaladzo lanu khya lisine gani”
Si nga gira gu vandriyavo va gu siri vaJudha na va kutsegide gu va phasa. Avo va diri ni “mangava” ga maKristo ya Jerusalema. Ina mahungu nya yadi khandri ma di gu khugeya khu Jerusalema kala ma vboheya va nya mayigo? Pawulo a di khuye: “Kha nga ulo va nya mayigo va hakhidego makategwa nya liphuvbo a gu ya vaJudha, avo navo va na ni fanelo nya gu va phasedzele khu siningwa sawe nya mafu.” — Varoma 15:27.
(Varoma 16:25) A na rungudzwe Nungungulu! Khuye a dzi kodzago gu mi tiyisela gukhodwani, kha nga edzi yi hevbudzago khidzo Ivhangeli nyi mi tivisidego, ni mahungu ya Jesu Kristo, khu esi hi nga tuledwa gu siti khu mahungu nya guvbanyise ga Nungungulu. Sihalo wu nga bani wu sihade gukhugela myaga yatshavbo,
it-3 paj. 320, ndri. 2
Guti, gu tshamuseya esi si na giregago
Mesiya, mwendro Kristo, a diri Gitugulwana gi tumbisidwego egi khu kotani gwagyo vathu vatshavbo nyo tumbege nya mayigo yatshavbo va nga hadzi kategiswa. (Ga 3:8, 14) “Gitugulwana” gegi gi khumbugidwe khu tepo nyo pheye hwane nya wuwugeyi wa Edheni, ganiolu, na gu nga si velegwi Abheli. Esi si giregide 4000 myaga hwane, na gu nga si tudwi “sihalo wu nga bani wu sihade” a gu gudziwonegisa guagani nya “gitugulwana” nya wuMesiya. Khu kharato, si di gu “sihade gukhugela myaga yatshavbo.” — Ro 16:25-27; Ef 1:8-10; 3:4-11.
18-24 NYA MARÇO
DZITHOMBA NYA LITO LA NUNGUNGULU | 1 VAKORINTO 1-3
“U muthu nya liphuvbo mwendro nya nyama?”
(1 Vakorinto 2:14) Oyu a tumbago wugengeli waye, kha dzumeli gu hakha mahungu a tiviswago khu Liphuvbo la Nungungulu, a gu mapwa kha nga silo nya wupumbu. Kha dzi kodzi gu si pima, kholu mwalo a si pimago a gumba wenengedzwa khu Liphuvbo.
w18.02 paj. 19, dzindri. 4-5
Sa gu thula ginani gu khala muthu a fumwago khu liphuvbo?
Khu yavbi mavbanyelo nya muthu nya nyama? Litigo la gu vega ngudzu gupima avba nya silo nya nyama. Pawulo tshamusede gu khuye liphuvbo lolo la gu fuma “ga vathu va wugelago Nungungulu.” (Efes. 2:2) Liphuvbo leli li ngu fuma vathu nya vangi. Avo va gu pimedzeya gidzemo. Va gu vega gupima avba nya silo nya nyama. Kha nga handro, gutala nya avo va gu dzipwa na va tshulegide gu gira esi va si wonago na si lulamide mahoni gwawe, nigu kha va dzi garadzeyi gu vbanya khu milayo ya Nungungulu. Muthu nya nyama a gu dzi garadzeya gu mana ndruma, dzithomba ni gu bwe a dzi garadzeya gu emeya dzifanelo dzaye.
Khu yavbi mambe makhalelo nya muthu nya nyama? A gu dzigaradzeya gu gira “mithumo nya tumbunugo nya wuthu.” (Gal. 5:19-21) Avba nya lidangaliya nyo pheye ga Vakorinto, Pawulo sasamedzede mambe makhalelo nya muthu nya nyama, a gu aya: Avo va gu yala mivbingano, va gu khala khu gu wugeyana, kha va seketeyi esi si hungwago libandlani, va gu ketsarana dzitribhulali, kha va yeyedzi gubonga khu wuthangeyi, nigu va gu hodza ni gu seya ngudzu. Muthu nya nyama a gu tshangana ni gilingo, o dzegeya gu gi thegeya. (Mav. 7:21, 22) Judha ganede khu vathu va nga vboheya omu nya gu va si ‘fumwi khu liphuvbo.’ — Judha 18, 19.
(1 Vakorinto 2:15, 16) Muthu a fumwago khu Liphuvbo a ngu kodza gu pima silo satshavbo, aholu, uye kha lamudwi khu gilo. 16 “Kholu, khu mani a matigo mahingigedzo ya Pfhumu? Khu mani a mu ningago wusingalagadzi?” Gasi ethu, hi na ni mahingigedzo ya Kristo.
w18.02 paj. 19, ndri. 6
Sa gu thula ginani gu khala muthu a fumwago khu liphuvbo?
Sa gu thula ginani gu khala muthu a “fumwago khu liphuvbo”? Gu hambana ni muthu nya nyama, muthu nya liphuvbo a gu dzi garadzeya guti mawonelo nya Nungungulu maningano khu gilo nyo khaguri. Muthu nya liphuvbo a gu “[pimedzeya] Nungungulu.” (Efes. 5:1) Isoso sa gu thula gu khiso va gu dzi garadzeya gu pimisa gu manega ni mawonelo ya mamoyo ni Jehovha avba nya silo nyo khaguri. Nungungulu khwa lisima gwawe. Gu hambana ni vathu nya nyama, vathu nya liphuvbo va gu dzi garadzeya gu gimbiya khu milayo ya Jehovha. (Ndzi. 119:33; 143:10) Muthu nya liphuvbo kha vegi gupima avba nya silo nya nyama, ganiolu a gu dzi garadzeya gu manega ni “mithumo nya Liphuvbo la Nungungulu.” (Gal. 5:22, 23) Gasi gu pwisisa tshamuselo nya lito “muthu nya liphuvbo” nga dundrugeya khu gipimaniso gegi: Muthu a golago ngudzu nogosi a nga tidwa pwani nyadzinogosi. Khu gufana, muthu a dzi garadzago ngudzu khu silo nya liphuvbo a gu ranwa pwani muthu nya liphuvbo.
w18.02 paj. 22, ndri. 15
Sa gu thula ginani gu khala muthu a fumwago khu liphuvbo?
Hi nga pimedzeya kharini Kristo? Omu ga 1 Vakorinto 2:16, Bhibhiliya ya gu ganeya khu gu manega ni “mahingigedzo ya Kristo.” Omu ga Varoma 15:5 Bhibhiliya yari khiyo moyo ni moyo gu vbwetega a “fanana ni Jesu Kristo.” Khu kharato, ha gu vbweta gu pimedzeya Jesu, gu vbwetega hiti mawonelo yaye nya silo ni makhalelo yaye. Khavbovbo, hi na landreya mazambo yaye. Jesu a gu vega gupima gwaye gwatshavbo avba nya wupari waye ni Nungungulu. Khu kharato, ha gu pimedzeya Jesu, hi na gira gu wupari wathu ni Jehovha wu dandra. Khya lisima ngudzu gu pimedzeya Jesu.
Kemba dzithomba nya liphuvbo
(1 Vakorinto 1:20) Vomo hayini va nya guti? Vomo hayini va nya sihevbulo? Vomo hayini vale va yitigo misihalo yatshavbo ya mafuni momu? Ina Nungungulu kha yeyedza gukhuye guti nya vathu va mafuni wupumbu, gani?
it-3 paj. 480, ndri. 1
Guti
Khu kharato litigo na li gu dzi seketeya avba nya guti gwalo, li bombide malulamiselo aya Nungungulu a ma giridego khu gu thumisa Kristo; dzipfhumu dzakone, ambari adzina dzi nga ba dzi gengede, idzo dzi khokhotede “Pfhumu nya wudhumo watshavbo.” (1Ko 1:18; 2:7, 8) Ganiolu, Nungungulu a di yeyedza gu khuye guti nya dzipfhumu dzodzo khwa wupumbu. A di poyila va nya guti khu gu a thumisa esi va nga ba va khavo, ‘wupumbu ga Nungungulu,’ gumogo ni vathu va nga ba va khavo ‘sipumbu, va mwalo tshivba, ni gu mba phasa gilo’ gasi gu tadzisa Makungo yaye. (1Ko 1:19-28) Pawulo dundrugiside maKristo ya Korinto gu khuye “guti ga mafuni momu, mwendro ga vale va fumago khu tshivba mafuni” kha gu hongoli danga; khu kharato guti gogo kha ga nga ba gu gira gipandre nya mahungu ma nga ba ma tiviswa khu vapostoli. (1Ko 2:6, 13) Pawulo gengedzide maKristo ya Kolosi gu mba ndrindrwa khu “sihevbulo nya wugengeli nya mahala, nya gutiyiswe khu mikhuwo nya vathu.” — Kol 2:8; wona gambe mavhesi 20-23.
(1 Vakorinto 2:3-5) Nyi di khala nanu khu gu dzi sodzisa ni githawo, nyi ndrendremela ngudzu khu hwanga. 4 Tshumayelo ni mahungu nyi mi hevbudzidego, kha nya si tiyisa khu magana nya wugengeli ni guti nya wuthu, aholu nyi si tiyiside khu siwonegiso nya tshivba nya Liphuvbo nya Guage. 5 Khu kharato, gukhodwa gwanu kha gu tiyiswi khu guti nya vathu, aholu gwa gu tiyiswa khu tshivba ya Nungungulu.
w08 15/7 paj. 27, ndri. 6
Dzithomba dza omu nya lidangaliya la Vakorinto
2:3-5. Adzina tepo Pawulo a nga ba a tshumayela Korinto tsindza nya filozofiya nya giGreki, a di gu dzi wudzisa gu khuye ina kamo va na mu engiseya gani. Ambari ulolo, uye kha dzumeleya gu khuye hwanga wu tsolopeteya thumo a nga ba a ningidwe khu Nungungulu. Khu gu fana, kha hi yeli gu dzumeleya ni gyevbini gi tsolopeteya thumo wathu nyo tshumayele mahungu nya yadi nya Mufumo wa Nungungulu. Kha nga Pawulo, hi nga lomba gipaso ga Jehovha.
25-31 NYA MARÇO
DZITHOMBA NYA LITO LA NUNGUNGULU | 1 VAKORINTO 4-6
“Melana wudugwana wu ngu gugumugisa wuguvbi watshavbo”
(1 Vakorinto 5:1, 2) Gu pwade ndruma khu mahungu nya wubhayi wu guromo vbakari gwanu, wubhayi nya guthise wu si tidwigo ambari khu va nya mayigo; gupwani moyo wanu dzegide mwangadzi wa babe waye. 2 Ambari ulo mu tade khu matshandza, wulanga nya gugaradzegeni khu silo soso, mu tutumisa muthu a girago ndzilo nya nga iyoyo.
(1 Vakorinto 5:5-8) hi ningele mwama yoyo ga Sathane, gifela gu pfhungumudwa givili gyaye, mwendro saye wu na vbanyiswa hefemulo waye, litshigu Pfhumu a natago. 6 Gu dzi zundza gwanu khandri gwa gilo. Ina mwa gu hangwa khu gukhenu melana wudugwana wu ngu gugumugisa wuguvbi watshavbo, gani? 7 Dzudzugani hwindzo mela wa gale nya gighoho, mufela gu khala vathu vaphya, nya guvbelele khu wuwadi; mu na khala sibaba nyambana mela, kholu Kristo, Nvutana yathu nya Phasika, songidwe. 8 Khavbo avbo, hongoleni hi gire buzo yoyu, nasiri khu mela wa gale, nasiri khu mela nya livengo ni guvivba, aholu khu mela nya ndruda ni lisine.
(1 Vakorinto 5:13) Aholu Nungungulu khuye a na va lamulago ava va guromo vbavbandze nya libandla. Muthu yoyo nya guvivbe mu duseni vbakari gwanu.
it-2 dzipaji. 116-117
Mela
Mupostoli Pedro thumiside gifananiso gegi tepo a nga embeya libandla nya wuKristo la Korinto gu dusa khu vbakari gwawe gighohi; a di khuye: “Ina mwa gu hangwa khu gukhenu melana wudugwana wu ngu gugumugisa wuguvbi watshavbo, gani? Dzudzugani hwindzo mela wa gale nya gighoho, mufela gu khala vathu vaphya, nya guvbelele khu wuwadi; mu na khala sibaba nyambana mela, kholu Kristo, Nvutana yathu nya Phasika, songidwe.” Khavbovbo uye si vegide guagani gu khuye sa gu tshamuseya ginani “mela”: “Khavbo avbo, hongoleni hi gire buzo yoyu, na siri khu mela wa gale, nasiri khu mela nya livengo ni guvivba, aholu khu mela nya ndruda ni lisine.” (1Ko 5:6-8) Pawulo a di thumisa tshamuselo nya Buzo nya giJudha nya Sibaba nya mba na Mela, wu nga ba wu landrendwa khu Phasika. Gu fana ni mela wududwana wu gugumugisago tirigu, anilo libandla nya wuKristo, li di gu wonega na li gu nyenyezide mahoni ga Jehovha la gu fuya gighohi. Li di yede gu dusa “mela” khu vbakari gwawe, gu fana ni vaIsrayeli va nga ba va si khali ni mela vbakari nya phasika.
it-3 dzipaji. 545-546
Sathane
Sa gu thula ginani ‘gu ningela muthu ga Sathane, gifela gu pfhungumudwa givili gyaye’?
Tepo Pawulo a nga ningeya sileletelo libandla la Korinto maningano nesi va nga ba va yede gu gira ni givbango nya libandla gi giridego silo nya mba pwala ni mwangadzi wa babe waye, Pawulo a di lova gu khuye: ‘Ningelani mwama yoyo ga Sathane, gifela gu pfhungumudwa givili gyaye.’ (1Ko 5:5) Gu diri gu dusa muthu yoyo libandlani, a gu gu piya pwanano ni muthu yoyo. (1Ko 5:13) Gu ningeya muthu yoyo ga Sathane, si di hadzi vega muthu yoyo vbavbandze nya libandla; a di hadzi vegwa omu nya litigo li fumedwago khu Sathane. “Melana wudugwana” omu nya “wuguvbi watshavbo,” wa gu fananiswa ni “givili,” mwendro givbango nya libandla; nigu khu gu dusa gighohi vbakari gwawe, libandla li gu ni mawonelo nya yadi ya liphuvboni li di gu tshungunula “givili” khu vbakari gwawe. (1Ko 5:6, 7) Khu gu fana, Pawulo a di ningeya Heminewu ni Alesandre ga Sathane, kholu va di dzegide gukhodwa ni livhalo lawe nya ladi va vega khu bambe; avo va di gu vbode khu liphuvboni. — 1Tm 1:20.
(1 Vakorinto 5:9-11) Nyi mi embede khu lidangalila nyi nga mi lovela gukheni mu nga thangi wupari ni vathu nya sibhayi. 10 Kha nyiri kheni mu hambane ni vathu vatshavbo va gu sibhayi mafuni, mwendro va nya lidiwo, ni dzimbafa, ni va nya guphasela sithombe nya vanungungulu nya malipha; nari guralo mu di hadza gu rura mafuni momu. 11 Gasi eni nyi mi lovede gukheni mu si thangini wupari ni wule a gukhuye mukhodwa ga Kristo nari muthu nya wubhayi, nya lidiwo, nya guphasele vanungungulu nya malipha, nya guvale, ni guleva ni guba. Muthu nya nga yoyo mu nga hodzelani naye, ambari gu khala naye meza mweyo.
lvs 241, tshamuselo wa vbavbatshi
Guduswa libandlani
Ga gu tshuka muthu a gira gighoho nya gikhongolo, ganiolu a si dzi soli mwendro gu mba vbanya guya khu milayo ya Jehovha, muthu yoyo kha yeli gu lumba gambe libandla. Yede gu duswa libandlani. Ga gu tshuka muthoyo a duswa libandlani, kha hi hengeyi gambe naye omu nya silo sa tshigu ni tshigu mwendro gu bhula naye. (1 Vakorinto 5:11; 2 Johane 9-11) Malulamiselo nyo duswe libandlani ma ngu vhikeya lina ni libandla la Jehovha. (1 Vakorinto 5:6) Guduswa libandlani gu ngu phasa muthu gu dzi sola a bwe a wuya ga Jehovha. — Luka 15:17.
▸ Gipimo 3, ndrimana 19
Kemba dzithomba nya liphuvbo
(1 Vakorinto 4:9) Kholu nya gupimisa gukheni Nungungulu vegide ethu vapostoli gu khala wulanga nya mahegiso, khwatshi hi vathu va lamuledwego gufa; hi khade [dzimbemba] ga litigo, ga dzingilozi, ga Nungungulu ni ga vathu.
w09 15/5 paj. 24, ndri. 16
Dzingilozi — “Maphuvbo yatshavbo ya Nungungulu”
Makristo ma gu ba ma lingwa, mo khala ‘dzimbemba ga dzingilozi.’ (1 Kor. 4:9) Dzingilozi dza gu tsaka ngudzu dza gu wona mavbanyelo yathu nyo tumbege, ni gu bwe va wona gighohi na gi gu dzi sola. (Luka 15:10) Mavbanyelo nya guage ya vandriye nya maKristo, ma ngu wonwa khu dzingilozi. Bhibhiliya yari khiyo “nyamayi fanede gu vega hungoni gilo gi yeyedzago gupwani a gu fumedwa, khu kotani nya dzingilozi.” (1 Kor. 11:3, 10) Vbavbadze nyo kanakane, dzingilozi dzi ngu tsaka dza gu wona vandriyathu nya vanyamayi gupata ni satshavbo sithumi sa Nungungulu na si gu vbanya guya khu wuthangeyi nya libandla nya wuKristo. Gu engisa gogo gidundrugiso nya gyadi nya sanana sa Nungungulu sa dzandzini.
(1 Vakorinto 6:3) Kha mu dzitini nya gukhenu, ambari dzingilozi dza Nungungulu hi na dzi lamula ethu, gani? Ha gu tandrega kharini gu lamula silo sa mafuni?
it-2 paj. 674
Nayo
Nayo wu ningidwego dzingilozi. Dzingilozi, ambari dzi gu ni giemo nyo khugege gu vbindra vathu, dza gu fumedwa khu milayo ni silelelo sa Nungungulu. (Heb 1:7, 14; Ndz 104:4) Ambari kamo Sathane nala wa Nungungulu, ningidwe sileletelo ni mivbingano khu Jehovha. (Job 1:12; 2:6) Tepo Jesu a nga embeya Sathane gu khuye: “Pfhumu a na gu kawuke,” a di gu yeyedza gu khuye a ngu ninga githawo gikhalo nya Wulamuli nya Wukhongolo wa Jehovha. (Judha 9; wona gambe Zak 3:2.) Jehovha Nungungulu emiside Pfhumu Jesu Kristo gasi gu fumeya dzingilozi dzatshavbo. (Heb 1:6; 1Pe 3:22; Mt 13:41; 25:31; Flp 2:9-11) Jesu rumide ngilozi guya vbohiseya mahungu nyo khaguri ga Johane. (Gut 1:1) Ambari ulolo, 1 Vakorinto 6:3 ganede khu vandruye va liphuvboni va Kristo, va nigidwego thumo nyo lamule dzingilozi; adzina kholu va na pategago khu ndziya nyo khaguri avba nya gu fuvise maphuvbo nyo vivbe.