Nya mba hweya, Jehovha a na ema gu laphiseya monyo litigu leli

Jehovha, a na fuvisa wukhongeyi nya malipha. Mayigo ma na patana gasi gu wugeya vathu va Nungungulu, nigu Jehovha a na fuvisa wuvivbi watshavbo nyimbini ya Arimagedhoni. Makristo mo lindreya gu wona tepo si na giragago isoso.

Lisine gu, ethu kha hiti satshavbo maningano khu tshanisa nya yikhongolo. Khu giyeyedzo, ethu kha hi dziti gu khethu lini yi na pheyago. Ethu kha hi dziti gu khethu khu sevbini sighelo si na girago vathangeyi nya politika va wugeya wukhongeyi. Kha hi dziti gu khethu tepo muni yi na vbindrago mayigo na ma gu wugeya vathu va Nungungulu ni gu ginani gi na pategago ga isoso. Nigu gambe ethu kha hi dziti gu khethu dzindziya muni edzi Jehovha a na dzi thumisago gasi gu fuvisa wuvivbi nyimbini nya Arimagedhoni.

Ambari ulolo, milowo yi ngu hi ninga yatshavbo mahungu hi ma vbwetago gasi gu emisana ni esi si na giregago mindru wa tshigu khu gu tumba ni gu tiya hwambo. Khu giyeyedzo, ethu hi ngu dziti gu khethu ho vbanya matshigoni nya mahegiso. (2Tm 3:1) Ethu hi ngu dziti gu khethu gu wugedwa nya wukhongeyi gu na ba gu rode, nigu wukhongeyi nya lisine kha wu na nga fuviswa. (Mt 24:22) Hi ngu dziti gu khethu Jehovha a na vbulugisa vathu vaye. (2Pe 2:9) Nigu, hi ngu dziti gu khethu Jehovha, hathide oyu nya gululame ni tshivba gasi gu fuvisa va nyo vivbedwe khu monyo ni gu vhikeya gitshungu nya gikhongolo nyimbini nya Armagedhoni. — Gut 19:11, 15, 16.

Silo si na giregago mindru watshigu si na gira vathu va “dzima khu hwanga.” Khu kharato, tepo hi lerigu ni gu dundrugeya khu edzi Jehovha a vbulugisidego khidzo sithumi saye sa gale ni esi a hi tumbisago khu wumindru hi na “khusedza dzithamo” na hi tumba gu khethu guvbulugiswa gwathu gomo vbafuvbi. — Lu 21:26, 28.