Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
6-12 NYA MARÇO
DZITHOMBA NYA LITO LA NUNGUNGULU | 1 DZIKORONIKA 23–26
“Wukhozeyi wu nga ba wu girwa Tempeleni wu di yede gu sasamedzwa gwadi”
it-2 paj. 223, ndri. 1
Valevhi
Dhavhide a di gu sasamedzide gwadi mithumo yi nga ba yi girwa khu Valevhi. Uye a di emisa vathu gasi va thuma kha nga vawoneleyi, vathangeyi ni valamuli gasi va woneleya mimyanya, gu khathaleya dzithomba ni gu phasedzeya vaprista tempeleni, vbavbandze nya dzinyumba, umo va nga ba hodzeya umo ni yimbe mithumo. Valevhi va nga ba gira thumo nya gu embeleye va di gu sasamedzidwe khu 24 mitsawa nga edzi va nga ba va sasamedzidwe khidzo vaprista. Va di gu thumisa dzisolo gasi gu kabaniseya mithumo gu pata ni vale va nga ba va emiswa gasi va thuma vbamwanyatuno. — 1Dzik 23; 25; 26; 2Dzik 35:3-5, 10 1Ch 23, 25, 26; 2Ch 35:3-5, 10.
it-2 paj. 897, ndri. 1
Vaprista
Vaprista va di gu sasamedzidwe khu dzindziya nya gu hambane-hambane nigu gu di gu thumiswa dzisolo gasi gu kabaniseya mithumo va nga ba va yi gira. Ga 24 mitsawa, mowo ni mowo wu di yede gu thuma semana mweyo, khu mwaga yi di gu thuma guvili. Sa gu wonegisa gu khatshi vaprista va di gu thuma ngudzu ga dzitepo nya mibuzo tepo khiyo vathu va nga ba va gira miningelo nya gu vbiswe nya yingi gufana ni esi va giridego tepo va nga hendzeledza tempele. (1Dzik 24:1-18, 31; 2Dzik 5:11; fananisa ni 2Dzik 29:31-35; 30:23-25; 35:10-19.) Muprista adzina a di gu hunga gu thuma khu dzimbe dzitepo, ganiolu abari gu isoso kha si tsolopeteyi thumo wa vambe vaprista. Guya khu sihevbudzo nya vathangeyi nya wukhongeyi nya Gijudha, tepo Jesu a nga ba a ri omu mafuni, vaprista va diri vangi ngudzu nya gu bwe thumo va nga ba va yede gu wu gira khu semana wu kabaniswa ga dzindranga dzi nga ba dzi gira gipandre nya tsawa mowo ni mowo nigu ndranga ni ndranga yi di gu thuma matshigu nyo khaguri guya khu tengo wawe.
it-2 paj. 430, ndri. 6
Ndzimo
Tepo Dhavhidhe a nga ba a dongiseya silo gasi gu vbaha tempele ya Jehovha, uye a hathide 4000 Valevhi gasi gu gira thumo nya gu embeleye. (1Dzik 23:4, 5) Ga vama vovo 288 va di romo “avo va nga hevbudzwago gu embelela ga PFHUMU Nungungulu.” (1Dzik 25:7) Yatshavbo malulamiselo yoyo ma di gu thangedwa khu vama vararu va nga ba va wuti gwadi thumo wowo a gu Asafe, Hemani ni Etani. Kha nga olu moyo ni moyo nya vama vava va nga ba va ri situgulwana nya gimwegyo nya sanana sa Levhi, Gerisoni, Merari ni Kowate, dzindranga dza dziraru dza na Levhi dzi nga ba dzi thangeya thumo nya gu embeleye Tempeleni. (1Dzik 6:16, 31-33, 39-44; 25:1-6) Sanana sa vama vava va vararu gu di ri 24 nya iso nigu si di gu gira gipandre nya 288 va khumbugidwego gupheyani. Vama vava va di emiswa kha nga vathangeyi nya vaembeleyi khu gu thumiswa dzisolo. Gu diri gambe ni 11 vaembeleyi va nga ba va hathidwe vbakari nya sanana sa Valevhi gasi gu thangeya thumo wowu. Khu kharato, 288 ([1 + 11] × 24 = 288) Valevhi ni vaembeleyi gupata ni Vaprista va di gu kabanisidwe khu 24 mitsawa. Nari khatshi vama vava nya sihevbuli nya 3712 va di gu kabanisidwe, isoso sa gu thula gu khiso gu di hadzi gu manega 155 vama ni guvbindra ga tsawa mowo ni mowo nya eyi nya 24, isoso si gira gu muhevbudzi moyo a hevbudza 13 Valevhi gu embeleya. (1Dzik 25:1-31) Kha nga olu vawombi nya mipundru va nga ba va ri vaprista isoso sa gu thula gu khiso gu di hadzi gu engedzeya tengo nya vaembeleyi nya Valevhi. — 2Dzik 5:12; fananisa ni Mit 10:8.
it-2 paj. 683, ndri. 2
Vawoneleyi nya myanya
Tempeleni. Nari vbafuvbi ni gufa, pfhumu Dhavhidhe a sasamedzide vathu va nga hadzi gu thuma tempeleni gupata ni ava va nga ba va thuma umo nya myanya va nga ba vari 4000 nya avo. Avo va di gu thuma khu 7 matshigu. Avo va diri ni thumo nya gu sayise nyumba ya Jehovha ni gu tiyisega gu khavo madimba ma na tudwa ni gu segwa khu tepo yakone. (1Dzik 9:23-27; 23:1-6) Vbavbandze nya gu woneleye myanya, va di gu sayisa miningelo yi nga ba yi reswa khu vathu yi nga hadzi gu thumiswa tempeleni. (2Dzf 12:9; 22:4) Hwane nya tepo nyo khaguri, muprista nya khongolo Joyadha, a nga todza Jowasi kha nga pfhumu gu emisidwe dzigwardha vbamwanyatuno nya tempele gasi gu vhikeya Jowasi ga pfhumugadzi Ataliya. (2Dzf 11:4-8) Tepo pfhumu Josiya a nga fuvisa wukhozeyi nya sifananiso, ava va nga ba va thuma vbamyanyatuno va phasedzede gu dusa iso si nga ba si thumiswa umo nya wukhozeyi wa Bhahali tempeleni si bwe si ya vbiswa vbanvbandze nya lidhoropa. — 2Dzf 23:4.
Kemba dzithomba nya liphuvbo
Gu khozeya Jehovha si na gu ninga gutsaka
10 Ethu ha gu khozeya Jehovha tepo hi embeleyago ni vandriyathu. (Ndzi. 28:7) Vaisrayeli va di gu wona gu embeleya kha nga gipandre nya lisima nya wukhozeyi wawe. Pfhumu Dhavhidhe a di emisa 288 Valevhi gasi gu embeleya tempeleni. (1 Dzik. 25:1, 6-8) Muhuno hi nga yeyedza lihaladzo lathu khu Nungungulu tepo hi embeleyago dzindzimo nya gu mu dhumise. Kha si lombi gu hi khala va embeleyi nya vadi gasi hi gira isoso. Nga wona gifananiso gegi: Tepo hi ganeyago, “hatshavbo hi ngu hosisa,” ganiolu isoso kha si hi himbedzeyi gu ganeya ha gu ba hiri libandlani ni thumoni nyo tshumayele. (Jak. 3:2) Khu ndziya nyo fane, ethu hi nga si kodza gu emba dzindzimo nyo dhumise Jehovha ambari ha gu pimisa gu khethu kha hi si kodzi gu embeleya gwadi.
13-19 NYA MARÇO
DZITHOMBA NYA LITO LA NUNGUNGULU | 1 DZIKORONIKA 27-29
“Papayi a gu na ni lihaladzo a ngu ninga wusingalagadzi gyanana gyaye”
w05 15/2 paj. 19, ndri. 9
Sayisa gukhodwa gwago kha nga Mukristo
9 Tiyisega gu khuwe esi hi si hevbulago umo nya Bhibhiliya lisine. Kha nga sithumi sa Jehovha ethu hi nga tshuka hi vbola ha gu mba thumisa milowo kha nga gisekelo gyathu. (Vafilipi 1:9, 10) Watshavbo Mukristo gani muphya mwendro muthu a dandridego khu tanga a yede gu tiyisega gu khuye esi a si hevbulago umo nya Bhibhiliya lisine. Pawulo a embede Makristo gu khuye: “Khedzani gwadi satshavbo; mu vegisa esi nya sadi.” (1 Vatesalonika 5:21) Vaphya nya Makristo ma girago gipandre nya dzidranga dzi thumeyago Nungungulu va yede gu pwisisa gu khavo va yede gu manega ni gukhodwa gwawo nasiri gu dzi seketeya avbo nya gukhodwa ga vavelegi vawe. Dhavhidhe a embede Solomoni gu khuye: “Gu vbweta uti Nungungulu wa babe wago, u mu thumela khu monyo wago watshavbo.” (1 Dzikoronika 28:9) Kha sa nga ba si eneya basi gu Solomoni a khedziseya papayi waye na gu tiyisa gukhodwa gwaye ga Jehovha uye a di yede guti gwadi Jehovha, nigu khiso khamu a nga gira. Uye a di lomba Nungungulu gu khuye: “Nyi ninge wugengeli ni mapimo gasi nyi kodze gu gimbidzisa vathu vava.” — 2 Dzikoronika 1:10.
w12 15/4 paj. 16, ndri. 13
Simama gu thumeya Jehovha khu monyo wago watshavbo
13 Esi hi si hevbulago. Si ngu bongega gu patega avbo nya mithumo yi girago gipandre nya wukhozeyi wa Jehovha nya nga gu wona mitshangano nya libandla ni gu patega avbo nya thumo nyo tshumayele. Ganiolu, gu thumeya Jehovha khu monyo wathu watshavbo sa gu pata nya singi guvbindra esi. (2 Dzik. 25:1, 2, 27) Abari gu Mukristo a ngo gu simama gu gola “esi si tshadego hwane” iso si thulago gu manega ni mavbanyelo nya litigo leli, uye a gu vega mhangoni wupari waye ni Nungungulu. (Luka 17:32) Hi na yedwa basi khu mufumo wa Nungungulu ha gu landrisa wusingalagadzi wu gu khuwo: “Nyenyani guvivba mu gira nya sadi.” (Rom. 12:9; Luka 9:62) Khu kharato, hatshavbo hi yede gu dzi woneya gasi gu ni gevbini gi wonegago nari gya lisima ni gu tsakisa gi si hi gire hi diga gu thangisa mufumo wa Nungungulu. — 2 Kor. 11:14; leri Vafilipi 3:13, 14.
w17.09 paj. 32, dzindri. 20-21
“Tiya hwambo u bwe u gira satshavbo u si kodzago”
20 Pfhumu Dhavhidhe a tiyisegiside Solomoni gu khuye Jehovha a na mu phasa gu vbaha tempele kala a vbedza. (1 Dzik. 28:20) Malito ya Dhavhidhe ma khade mapimoni ni monyoni ga Solomoni, khu kharato Solomoni kha dzumeleya gu khuye khu kotani nya tanga mwendro khu gu ba a mwalo guti si mu himbedzeya gu vbaha tempele. Uye a di tiya hwambo nigu khu gu phaswa khu Jehovha a vbedzide gu vbaha tempele nyo hlamadzise khu 7 myaga ni metadu.
21 Kha nga edzi Jehovha a phasidego khidzo Solomoni, uye a nga gu phasa anuwe gu tiya hwambo ni gu gira gilogyo. (Isa. 41:10, 13) Ha gu tiya hwambo thumoni gwathu ga Jehovha, hi nga tiyisega gu khethu uye a na hi kategisa. Hongoleni hi tiya hwambo hi bwe hi gireya Jehovha satshavbo hi si kodzago.
Kemba dzithomba nya liphuvbo
w17.03 paj. 29, dzindri. 6-7
Khala pari nya lisine abari gu wupari wanu womo mhangoni
Dhavhidhe a diri ni dzimbe dzipari dzi nga simama naye tepo a nga ba a tshangana ni sigaradzo. Mweyo nya dzipari dzodzo khu Husayi, oyu Bhibhiliya yi mu ranago gu khiyo “pari ya Dhavhidhe.” (2 Sa. 16:16; 1 Dzik. 27:33) Sa gu wonegisa gu khiso Husayi a di gu thuma umo nya nyumba nya wufumo, nigu a di gu khathaleya silo sa pfhumu Dhavhidhe.
Tepo gimwegyo nya gyanana gya Dhavhidhe, Abhisalamo, gi nga ba gi vbweta gu wandra wufumo wa pfhumu, Vaisrayeli nya vangi va dzi patide ni Abhisalamo, ganiolu Husayi kha gira isoso. Tepo Dhavhidhe a nga ba a tutuma gasi gu sihaleya Abhisalamo Husayi a diri naye. Dhavhidhe a di gu garadzegide ngudzu kholu gyanana gyaye ni vambe vathu a nga ba a va tumba va nga mu wugeya. Ganiolu, Husayi a simamide gu tumbega ga Dhavhidhe. Uye a vegide womi waye mhangoni gasi gu himbedzeya Abhisalamo gu dzega wulanga wa Dhavhidhe. Husayi kha gira isoso kholu a nga ba a thuma omu nya nyumba nya wufumo, ganiolu a di gira isoso kholu a nga ba ari pari nya lisine. — 2 Sa. 15:13-17, 32-37; 16:15–17:16.
20-26 NYA MARÇO
DZITHOMBA NYA LITO LA NUNGUNGULU | 2 DZIKORONIKA 1-4
“Pfhumu Solomoni kha hunga makungu khu wugengeyi”
it-1 paj. 900, ndri. 2
Libuthu
Tepo wu nga pheya mufumo wa Solomoni gu di lowa gipimo nya giphya gi ganeyago khu libuthu la Israyeli. Mufumo waye wu di gu rude, ganiolu uye a di tshanganisa dzikavhalu ni dzikareta. (Wona KARETA.) Dzikareta dzedzi dzi nga ba dzi rengwa dzi di guta khu egipito. Gu di yedwe gu vbaha madhoropa nya mangi gasi mitsawa nya masotshwa yi khala umo. (1Dzf 4:26; 9:19; 10:26, 29; 2Dzik 1:14-17) Ganiolu, Jehovha kha kategisa mithumo yeyi ya Solomoni. Tepo solomoni a ngafa mufumo wu di kabanega nigu gu di vboha mahegiso nya libuthu la Israyeli. Khu gu gimbiya nya tepo Isaya lovide gu khuye: “Libango ga avo vayago Egipito guya lomba giphaso, na va gu tumba dzikavhalu; Va gu tumba dzikareta ni va vakhileli vakone, kholu avo vangi, na vari ni tshivba ngudzu, aholu va si theli kota khuye a Agidego wa Israyeli, ambari gu vbweta giphaso ga PFHUMU Nungungulu.” — Isa 31:1.
it-1 paj. 437, dzindri. 2-3
Kareta
Tigoni ga Israyeli gima gu diri mwalo dzikareta nya dzingi dzi nga ba dzi thumiswa gasi gu dwana nyimbi gufana ni teponi ya Solomoni. Isoso si di girega khu kotani nya gileletelo gya Nungungulu gi gu khigyo pfhumu kha ya nga ba yi yede gu dzi garadza khu gu manega ni dzikavhalu nya dzingi kholu gu vhikedwa gwawe gu di guta khiyo gwaye. Gileletelo gegi gi di gu gira gu si thumiswi dzikareta nya dzingi kholu gasi gu ndrindra dzikareta gu di gu thumiswa dzikavhalu. (Dhet 17:16) Tepo Samuweli a nga va gengedza maningano khu rwalo owu pfhumu a nga hadzi gu va rwega uye a di khuye: “A na dzega madzaha yanu ma khala masotshwa nya gugimbidzise dzikareta dzaye.” (1Sa 8:11) Tepo Abhisalamo ni Adhoniya va nga vbweta gu wandra mufumo, avo va di rumisa gu gira kareta ni gu rumisa 50 vama gasi gu tutuma mbeli gwawe. (2Sa 15:1; 1Dzf 1:5) Tepo Dhavhidhe a nga pala pfhumu ya Zobha, uye a di dzega 100 dzikavhalu dza tigoni ga Tiro. — 2Sa 8:3, 4; 10:18.
Tepo Solomoni a nga engedzeya mabuthu ya Israyeli, uye a di engedzeya gambe tengo nya dzikavhalu kala dzi gira 1 400. (1Dzf 10:26, 29; 2Dzik 1:14, 17) Vbavbandze ga Israyeli, gu di romo mambe madhoropa ma nga ba ma tidwa kha nga “madhoropa nya gukhale dzikareta nya nyimbi,” a gu malanga nyo hathege gu nga ba gu sayiswa ni gu khathaledwa esi si nga ba si thumiswa nyimbituno. — 1Dzf 9:19, 22; 2Dzik 8:6, 9; 9:25.
Kemba dzithomba nya liphuvbo
w05 1/12 paj. 19, ndri. 6
Gukhanyiswa ga libhuku la Dzikoronika nya wuvili
1:11, 12. Esi Solomoni a lombidego si yeyedzide ga Jehovha gu khiso si na ni lisima gu Pfhumu yi manega ni guti. Milombelo hi girago ga Nungungulu ya gu yeyedza esi si gomogo monyoni gwathu. Hi na yeyedza wugengeyi ha gu dundrugeya gwadi khesi hi si lombago umo nya milombelo yathu.
27 NYA MARÇO–2 NYA ABRIL
DZITHOMBA NYA LITO LA NUNGUNGULU | 2 DZIKORONIKA 5-7
“Monyo wangu tepo yatshavbo wu na ba wuri iyoyo”
w02 15/11 paj. 5, ndri. 1
Mu nga digi gu tshangana
Hwane nya tepo nyo khaguri tepo Dhavhidhe a nga ba ari Pfhumu ya Jerusalema, uye a di gu dogoreya ngudzu gu vbaheya nyumba Jehovha. Ganiolu, kha nga olu Dhavhidhe a nga ba ari muthu nya dzinyimbi, Jehovha a di mu embeya gu khuye: “Khu na vbaha [nyumba] khu lina langu.” Vbavbandze nya gu hathe Dhavhidhe, uye a di hatha Solomoni gasi gu vbaha tempele. (1 Dzikoronika 22:6-10) Dhavhidhe hendzeledzide tempele khu 1026 na ma si vbohi matshigu yathu hwane nya 7 myaga ni metadu na yi gu vbahwa tempele. Jehovha a tsakede tempele yeyi a bwe a ganeya gu khuye: “Nyi agiside nyumba yeyi u nyi giredego, gasi u kodze gu vega umo lina langu kala gupindruga; maho ni monyo wangu, si na khala avbo matshigu yatshavbo kala gupindruga.” (1 Dzipfhumu 9:3) Tepo Vaisrayeli va nga hadzi gu simama gu tumbega ga Jehovha, Jehovha a di hadzi gu kategisa ndranga yile. Ganiolu, avo va gu diga gu gira esi nya sadi Jehovha a di hadzi gu mba simama gu kategisa wulanga wule gu bwe gu khala marumbi.— 1 Dzipfhumu 9:4-9; 2 Dzikoronika 7:16, 19, 20.
it-2 paj. 1093, ndri. 5
Tempele
Matimo. Tempele yeyi yi simamide kala 607 na ma si vbohi matshigu yathu, tepo yi nga pfhunguduswa khu libuthu la Bhabhiloni li nga ba li thangedwa khu Pfhumu Nebhukadhenazari. (2Dzf 25:9; 2Dzik 36:19; Jer 52:13) Khu kotani nya olu Vaisrayeli va nga pheya gu khozeya vanungungulu nya malipha, Nungungulu a di dzumedzisa mayigo gu tshanisa avo va nga ba va romo Judha ni Jerusalema. Nigu dzimbe dzitepo va di gu dzega dzithomba dzi nga ba dzi romo tempeleni. Nigu tempele yi di dzega tepo nya yingi nya mba sayiswa. Hwane nya 33 myaga na yi endzeledzidwe tempele, Sisaki pfhumu ya Egipito yi diba dzithomba dzi nga ba dzi romo tempeleni khu 993 na ma si vbohi matshigu yathu, matshigoni ya Robowamu gyanana gya Solomoni. (1Dzf 14:25, 26; 2Dzik 12:9) Khu 977-937 na ma si vbohi matshigu yathu, Pfhumu Asa yi di gu ninga githawo nyumba ya Jehovha, ganiolu gasi gu vhikeya Jerusalema, iyo yi di surubanya pfhumu Bheni-Hadhadhi nyo pheye wa Siriya khu parata ni oru si nga ba siri dzithomba dza tempeleni, gasi gu fuvisa gidzumeledzwano a giredego ni Bhahasa, mufumeli wa Israyeli. — 1Dzf 15:18, 19; 2Dzik 15:17, 18; 16:2, 3.
Kemba dzithomba nya liphuvbo
w10 1/12 paj. 11, ndri. 7
Uye khuye atigo “myonyo ya sanana nya vathu”
Nombelo wa Solomoni wu nga hi thaveleya. Dzipari dzathu adzina kha dzi na nga pwisisa edzi hi dzipwago khidzo, a gu “wuvi” hi wu pwago monyoni gwathu. (Mavingu 14:10) Ganiolu, Jehovha a ngu siti esi si gomogo monyoni gwathu nigu ethu hi na ni lisima gwaye. Gu mu embeya satshavbo si gomogo monyoni gwathu si nga hi phasa gu timiseya sigaradzo sathu. Kholu Bhibhiliya yari khiyo: “Vegani avbo gwaye sigaradzo sanu satshavbo, kholu uye a ngu mi khathalela.” — 1 Pedro 5:7.
10-16 NYA ABRIL
DZITHOMBA NYA LITO LA NUNGUNGULU | 2 DZIKORONIKA 8-9
“Uye a ningide lisima guti”
w99 1/11 paj. 20, ndri. 4
Gu manega ni wuhindzi nya wukhongolo
Pfhumugadzi ya Sabha yi dzi garadzide ngudzu khu gu thumisa tepo ni dzithomba dzaye gasi guya wuseya pfhumu Solomoni. Sa guwonegisa gu Sabha khavbo olu gu gu República Democrática do Iêmen, nigu sa gu wonega gu pfhumugadzi ya Sabha yi gimbide gipimo nya 1600 dzikilometru ni gu vbindra kala Jerusalema. Kha nga edzi Jesu a ganedego, iyo “yi dzude khu mahegiso nya litigo.” Khu ginani pfhumugadzi ya Sabha yi dzi garadzedego gu gira liendro leli? Iyo yi di hongola gasi gu yapwa “guti ga Solomoni.” — Luka 11:31.
w99 1/7 paj. 30, dzindri. 4-5
Wuyelo a yi manidego khu liendro laye
Pfhumugadzi yi di vboha Jerusalema “ni gikwata nya gingi nya dziphelegedzi, ni dzingameriya na dzi rwade mafura nya gunungele ni ndralama nya yingi ni siwindri nya lisima nya gukhedzige.” (1 Dzipfhumu 10:2a) Vathu nyo khaguri va ri khavo avba nya “gikwata nya gingi nya dziphelegedzi” gu di gu pata masotshwa ma nga ba ma mu vhikeya. Isoso si ngu pwisisega, kholu pfhumugadzi yi di ghanyide ngudzu, yi diri ni ndruma nigu avba nya lipfhumba leli yi diri ni silo nyo dhure kamu ngudzu.
Pfhumugadzi ya Sabha yi di pwide gu ganeya khu guti ga Solomoni ‘gupata ni lina la Jehovha.’ Khu kharato, liendro leli kha la nga ba liri la dzinogosi basi. Satshavbo sa gu yeyedza gu khiso makungo ya pfhumugadzi gu diri gu yapwa guti ga Solomoni adzina gambe gu hevbula khu Jehovha. Kha nga olu adzina uye a nga ba a ri gitugulwana gya Semi mwendro Kami va nga ba vari vakhozeyi va Jehovha, si nga gira uye na vbwetide guti wukhozeyi wa vakoko vaye.
w99 1/7 dzipaj. 30-31
Wuyelo a yi manidego khu liendro laye
Pfhumugadzi ya Sabha yi samadzisidwe ngudzu khu guti ga Solomoni ni edzi a nga ba a dugeleya khidzo umo nya mufumo waye nyo bwe “a vbela tshivba khu gusamala.” (1 Dzipfhumu 10:4, 5) Vambe va gu pimisa gu khavo lito gu vbeya tshivba, so thula gu khiso pfhumugadzi yi di “hamuga phuvbo.” Gihevbuli gimwegyo gi di khigyo pfhumugadzi yi di dzima. Ganiolu, ni gevbini gi nga girega, pfhumugadzi yi di hlamadziswa ngudzu khesi yi nga si wona ni gu sipwa. Nigu iyo yi di bwe yi ganeya gu khiyo sithumi sa Solomoni si di gu tsaka khu gupwa guti ga pfhumu, yi bwe yi zundza Jehovha kholu a nga gira Solomoni pfhumu. Khu gu landreya, iyo yi di ninga pfhumu silo nya singi, nigu oru yakone basi yi di gu vbindra gipimo nya 40 dzimiliyoni nya dzidholari. Anuye Solomoni a ningide pfhumugadzi “satshavbo iso a nga mu lombago.” — 1 Dzipfhumu 10:6-13.
it-2 paj. 917, ndri. 4
Solomoni
Hwane nya gu ba yi wonide wudhumo nya tempele ni gu mbura nya ndranga ya Solomoni, guhodza ga vbamezani gwaye, wadwa, maambalelo nya sithumi saye, miningelo yi girwago tempeleni uye “a di vbela tshivba khu gusamala” Nigu khu gu landreya uye a di khuye: “Kha va nga nyi pwadzela ni sidugwana. Guti gwago, wudhumo ni thomba yago, si ngu vbindra ngudzu ndruma yago nyi si pwidego.” A bwe a ganeya gu khuye si kategide sithumi sa pfhumu. Satshavbo soso, si giride gu a rungudza Jehovha khu gu ba a hathide Solomoni kha nga pfhumu gasi gu lamula khu gu lulama. — 1Dzf 10:4-9; 2Dzik 9:3-8.
Kemba dzithomba nya liphuvbo
it-2 paj. 1159, ndri. 3
Gikhalo
Sa gu yeyedza gu khiso, 12 dzingala dza gu thula 12 mahundzu ya Israyeli adzina saye si emeyago edzi ayo ma seketedego khidzo mufumeli a gomogo gikhalutuno.
17-23 NYA ABRIL
DZITHOMBA NYA LITO LA NUNGUNGULU | 2 DZIKORONIKA 10-12
“Hi ngu wuyedwa khu gu thumisa wusingalagadzi nya guti”
Adzina na khade pari ya Nungungulu
Gilombo gegi kha gya nga ba gi vbevbugide. Nari khatshi Robhowamu a di dzumede gilombo gegi, uye, ndranga yaye ni ava va nga ba va thuma nyumbani nya wufumo va di yede gu diga gu khadzisega nya gwadi ni gu mba ninga mithumo nya yingi vathu. Ganiolu, nari khatshi Robhowamu kha nga ba dzumede, vathu va di hadzi gu mu wugeya. Ginani a giridego? Robhowamu a di hunga gu ya lomba wusingalagadzi ga vathu va nga ba va dandride khu tanga va nga ba va thumede Solomoni. Avo va di embeya Robhowamu gasi a dzumeya gilombo gyawe. Khu gu landreya a ya lomba mawonelo ga vaphya a dandridego navo, vaphya vava va mu kutsa gu mba dzumeya gilombo. Nya mba tsakisa khu gu, Robhowamu a di dzumeya wusingalagadzi wa vaphya vava a bwe a hunga gu tshanisa vathu vaye. Uye a di ganeya khuye: “Babe wangu a gu bani a mi rwegide nyandra nya gulemele, eni nyi nga na gu mi engedzela nyandra nya gulemele nya guvbindre yile; babe wangu a di mi tsayisa khu gu mi kwamula, eni nyi na mi tsayisa khu dzihume.” — 2Dzik 10:6-14.
w01 1/9 dzipaj. 28-29
Edzi u nga hungago khidzo makungo nya yadi
Jehovha a emiside vathu nya gu vidzwe khu liphuvboni libandlani hi nga bhulago navo maningano khu makungo yathu. (Vaefeso 4:11, 12) Tepo hi vbwetago wusingalagadzi kha hi yeli gu pimedzeya giyeyedzo gya vale va wudziseyago vathu nya vangi kala vapwa esi va vbwetago gu sipwa gasi va landrisa wusingalagadzi wawe. Ethu hi yede gu dundruga gambe khu giyeyedzo gya Robhowamu. Tepo a nga ba a yede gu hunga makungo nya yadi, uye a di hakha wusingalagadzi nya wadi a ningidwego khu madhota ma nga ba ma thumide ni papayi waye. Ganiolu, wulangani nya gu landrise wusingalagadzi wowo uye a di wudzisa vaphya a nga dandra navo a bwe a landrisa wusingalagadzi wawe, khavbovbo a hunga makungo nya mba yadi. Khu kotani nya isoso, uye a luzide gipandre nya gikhongolo nya mufumo waye. — 1 Dzipfhumu 12:1-17.
Wa gu ba u vbweta wusingalagadzi, lomba vale va dandridego khu tanga, va vidzidwego khu liphuvboni ni gu ninga githawo matshina nya milayo nya Bhibhiliya. (Mavingu 1:5; 11:14; 13:20) Sa gu kodzega, tepo yatshavbo dusa tepo gasi gu dundrugeya khu matshina nya milayo ma pategago ni satshavbo u embedwego. Wa gu wona silo nga edzi Jehovha a si wonago khidzo si na gu vbevbugeya gu hunga makungo nya yadi. — Vafilipi 4:6, 7.
it-2 paj. 863, ndri. 3
Robhowamu
Makhalelo yaya nya gu vivbe a nga ba a ri nawo Robhowamu ma mu giride a luza vathu nya vangi. Ndranga ya Dhavhidhe yi di simama gu seketedwa khu mahundzu ya Judha ni Bhejami gupata ni vaprista, valevhi nya mifumo ya mivili ni vathu va nga ba va gira gipandre nya 10 mahundzu.— 1Dzf 12:16, 17; 2Dzik 10:16, 17; 11:13, 14, 16.
Kemba dzithomba nya liphuvbo
it-1 paj. 668, ndri. 1
Dziphongo nya madhemoni
Ethu kha hi siti gwadi esi si nga ba si tshamuseya malito “Dziphongo” avba nya mahungo yaya. Ganiolu, mapimoni ya vale va nga ba va khozeya sifananiso soso va di gu si wona na si gu fana ni dziphongo, mwendro saye lito “dziphongo” avba nya mahungo yaya, li di gu yeyedza gu kanyiswa ga satshavbo si nga ba si thumiswa avbo nya wukhozeyi nya sifananiso.
24-30 NYA ABRIL
DZITHOMBA NYA LITO LA NUNGUNGULU | 2 DZIKORONIKA 13-16
“Tepo muni hi nga tumbago Jehovha?”
Madzaha—mu nga gira kharini gasi va mi tumba libandlani?
12 Na ngari lidzaha, Pfhumu Asa a diri muthu nya gu dzinogise ni gu tiya-hwambo. Khu giyeyedzo, hwane nyo ba papayi waye Abhiya na fude, a di khala pfhumu nigu a di pheya thumo nyo fuvise vanungungulu nya malipha tigoni. Uye gambe “a di laya vana Judha, gu khuye va vbweta PFHUMU Nungungulu wa vababe vawe, ni gu landrisa Nayo ni sileletelo saye.” (2 Dzik. 14:1-7) Tepo Zera, Muetiyopiya a nga dhumeya Vajudha nari ni 1000 000 masotshwa, Asa a di lomba giphaso ga Jehovha, khuye: “PFHUMU Nungungulu, vbavbandze gwago, mwalo mumbe a kodzago guphasedzela avo va gu mwalo tshivba, va gu wugedwa khavo va gu ni tshivba. Hi phase Uwe PFHUMU Nungungulu wathu, kholu ethu ha gutumba Uwe.” Malito yaya mo yeyedza gu khayo Asa a di gu tumba gu khuye Jehovha na ni tshivba nyo mu vbulugise gumogo ni vathu vaye. Asa a di tumba Papayi waye wa ndzadzini nigu “Nungungulu a di sasela Vaetiyopiya.” — 2 Dzik. 14:8-12.
Madzaha—mu nga gira kharini gasi va mi tumba libandlani?
13 Kha sa mu vbevbugeya Asa tepo a nga tedwa khu 1000 000 masotshwa gasi ma ta dwana naye, ganiolu khu gu tumba Jehovha a si kodzide gu pala nyimbi yeyi. Ya walo khu gu tepo Asa a nga tshangana ni gigaradzo nya gidugwana, kha lomba giphaso ga Jehovha. Tepo a nga thurugisedwa khu Bhahasa, Pfhumu ya Israyeli, Asa a di lomba giphaso ga pfhumu ya Siriya. Isoso si mu resede mihandro nya mba yadi. Khu gu thumisa muprofeti Hanani, Jehovha a di embeya Asa, khuye: “Kha nga olu u tumbidego mufumeli wa Siriya, u si tumbi PFHUMU Nungungulu wago, khu guralo, nyimbi ya mufumeli wa Siriya, yi tshitimugide mandzani gwago.” Gukhugeya avbovbo kala mbeli, Asa a di khaleya gu dwana basi. (2 Dzik. 16:7, 9; 1 Dzipf. 15:32) Ginani hi gi hevbulago?
Madzaha—mu nga gira kharini gasi va mi tumba libandlani?
14 Simama gu dzi nogisa ni gu tumba Jehovha. Tepo u nga bhabhatiswa, u yeyedzide gu khuwe u ngu khodwa ngudzu ni gu mu tumba ngudzu Jehovha. Jehovha nuye tsakide ngudzu kholu a gu ningidego lithomo nyo gire gipandre nya ndranga yaye. Khu kharato, egi gi tshadego gu gira olu, khu gu u simama gu tumba Jehovha. Si nga vbevbuga gu tumba Jehovha tepo u vbwetago gu hunga silo nya sikhongolo guvbanyani, ganiolu, ahati tepo u hungago gu gira silo nya sidugwana ke? Khya lisima gu tumba Jehovha tepo u vbwetago gu hunga gu gira silo, nya nga gu hatha sivbungadzo, thumo nyo dzi vbanyise ni misuwo nya liphuvbo. U nga tumbi guti gwago. Ganiolu, khedza matshina nya milayo ma na gu phasago gu hatha silo nya sadi, khavbovbo u ma thumisa. (Mav. 3:5, 6) Wo gira isoso, Jehovha a na tsaka ngudzu nigu vandriyathu libandlani va na gu ninga githawo. — Leri 1 Thimoti 4:12.
Kemba dzithomba nya liphuvbo
w17.03 paj. 19-20 ndri. 7
Thumeya Jehovha khu monyo wago watshavbo
7 Ndziya nya yadi nya gu pimedzeye Pfhumu Asa khu gu thumeya Nungungulu khu monyo wathu watshavbo ambari so ba si garadza. Hi nga dziti kharini gu khethu ethu hi ngu gira isoso? Dzi wudzise gu khuwe: ‘Ina nyi dzi emisede gu tumbega ga Jehovha nyi bwe nyi gira satshavbo nyi si kodzago gasi gu libandla li si manegi ni mikutsedzelo nya mba yadi?’ Asa a di yede gu tiya-hwambo gasi gu dusa vhovho waye avbo nya gikhalo nya wu “Pfhumugadzi.” Dzimbe dzitepo, u nga vbweta gu tiya-hwambo nga Pfhumu Asa. Khu giyeyedzo, dundrugeya a gu tshuka nongo mwendro pari yago yi duswa libandlani kholu yi nga ghoha yi bwe yi si dzi laye. Ina u na ba u dzi emisede gu ema gu bhula mwendro gu hengeya gilo nyo khaguri ni muthu yoyo? Ginani egi monyo wago wu na gu kutsago gu gira ga giemo gegi?