Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2025 Watch Tower Bible and Tract Society of Pennsylvania
5-11 NYA MAIO
DZITHOMBA NYA LITO LA NUNGUNGULU MAVINGU 12
Gu thuma khu gudzigaradza si ngu tangadzisa
Mukhedziseyi 06.16 paj. 30, par. 6
Likhalelo nya lisima ngudzu guvbindra dhiyamanti
Simbe sithumi sa Jehovha, adzina saye sa gu tshangana ni siemo si garadzago gu mana gilo gasi gu dzi vbanyisa. Ganiolu, iso kha si vbwetedzeyi silo nya gu dzi vbanyise khiso khu ndziya nya mba tumbega. Wulangani nya isoso, iso sa gu dzi garadza gasi gu thuma khu ndziya nya yadi. Khu gu gira isoso, sithumi sa Jehovha sa gu yeyedza gu khiso si ngu ninga ngundzu lisima makhalelo nyo mbure ya Nungungulu gupata ni gutumbega guvbindra ni gevbini gilo nya nyama. — Mav. 12:24; Efes. 4:28.
Mukhedziseyi 1/2/15 paj. 5, dzipar. 4-6
U nga gola kharini thumo wago?
Si na ba siri sadi gu dundrugeya khu giwudziso gegi nyo hegise? Khu ginani? Kholu thumo wu ngu tangadzisa tepo hi wonago vambe na va gu wuyedwa khuwo. Jesu a di khuye: “A ngu tsaka oyu a ningago guvbindra oyu a hakhago.” (Mithumo 20:35) Vbavbandze nya vale va wuyedwago khu gu kongoma khu thumo wathu, nya nga vatholi ni dzikliyenti, vomo vambe va wuyedwago. Avo va gu pata valongo vathu mwendro vathu nyo khaguri va tshanganago ni sigaradzo.
Sivbango nya ndranga yathu. Tepo hungo nya ndranga a thumago gasi gu sayisa ndranga yaye, sivbango nya ndranga yaye si ngu wuyedwa khu dzindziya dzimbili. Nyo pheye, uye a gu va ninga esi si vbwetegago, nya nga guhodza, sombo ni wulanga nyo khale. Khu ndziya yeyi, a gu tadzisa thumo a ningidwego khu Nungungulu nya gu ‘sayise valongo vaye.’ (1 Thimoti 5:8) Nya wuvili, hungo nya ndranga a gu ninga giyeyedzo nya edzi si gu na ni lisima khidzo gu thuma khu gu dzigaradza. Shane, a khumbugidwego ga ndrima yi vbindridego wari, khuye: “Papayi wangu giyeyedzo nya gyadi nya muthu a thumago khu gu dzigaradza. Uye muthu nyo tumbege, a thumidego khu sighingi womini waye watshavbo. Uye thumide kha nga muvati khu myaga nya yingi. Khu giyeyedzo gyaye, nyi hevbude lisima nya gu gire mithumo ya mandzani ni gu gira silo si na phasago vambe.
Vale va vbwetago giphaso. Mupostoli Pawulo a di ninga wusingalagadzi Makristo gasi gu ‘thuma khu gudzigaradza va gira thumo nya wadi khu mandza yawe gasi va mana gilo nyo ninge vale va hamugago.” (Vaefeso 4:28) Khu lisine, tepo hi thumago khu gu dzigaradza gasi gu dzi sayisa ni gu sayisa ndranga yathu, hi na ba hiri ni makodzelo nya gu phase vale va vbwetago giphaso. (Mavingu 3:27) Gu thuma khu gu dzi garadza si ngu hi gira hi phasa vambe ni gu tsaka khu mihandro yi manegago khu gu gira isoso.
Kemba dzithomba nya liphuvbo
Siwudziso si girwago khu vaphya ndrima 95, dzipar. 10-11
Nyi nga pala kharini sigaradzo?
● Manega ni mawonelo nya yadi khu sigaradzo sago. Hevbuleya gu hambanisa sigaradzo nya sikhongolo ni esi nya sidugwana. Bhibhiliya yari khiyo: “Gipumbu gya gu dzegela gu yeyedza likhulo laye, aholu muthu nya mapimo a ngu dzi phara, a gu vadwa.” (Mavingu 12:16) Khandri gyatshavbo gigaradzo gi yedego gu hi hira hi garadzega.
“Sihevbuli khwathu sa xikwatuno si di gu oleveya gu ganeya silo nya singi tepo khiyo si nga ba si ganeya khu sigaradzo. Khavbovbo, dzipari dzaso dzi di gu lova mawonelo yadzo omu nya interneti dzi bwe dzi engedzeya silo nya singi ngudzu. Isoso si di gu engedzeya gigaradzo nigu sihevbuli si di gu engedzeya gu wona silo khu ndziya nya mba yadi.” — Joanne.
12-18 NYA MAIO
DZITHOMBA NYA LITO LA NUNGUNGULU MAVINGU 13
U nga dzi digi u sengwa khu “kandriya ya va nya guvivbedwa khu monyo”
Perspicaz-2 paj. 189, dzipar. 2-3
Kandriya
Mambe malito ma thumiswago kha nga sifananiso. Egi muthu a gi thumisago gasi gu wenengedza ndziya yaye gya gu fananiswa ni kandriya. Guya khu gifananiso gegi, mavingu a gu yeyedza gu hambana gu gomogo avba nya muthu nyo lulame ni muthu nyo vivbedwe khu monyo, khu gu khuye: “Mwenge wa va nya gululama wa gu nengedzisa gikhati gyatshavbo, aholu kandriya ya va nya guvivbedwa khu monyo, yi na tshimega.” (Mav 13:9) Guwonegeya ga va nya gululama ga gu engedzeya gu wenengedza, ganiolu ambari kandriya ya va nya gu vivbedwe khu myonyo ya gu wonega gu khatshi ya gu wenengedza mwendro dzindziya dzawe dzi gira gu khatshi dza gu dugeleya gwadi, Jehovha a na gira gu va hegisa mugidemani omu va na tshunganeyago va thega. Esi khiso si na giregeyago wule a valago papayi ni mamayi waye. — Mav 20:20.
Kandriya ya muthu yoyo ya gu tshimega, sa gu thula gu khiso muthu yoyo a mwalo wumindru. Limbe livingu lari khilo: “Kholu va nya guvivbedwa khu myonyo kha va na wona matshigu nya yadi, ni mwenge nya sighohi, wu na tshimega.” — Mav 24:20.
Mukhedziseyi 15/7/12 paj. 13, par. 3
Thumeya Nungungulu a tshulegidego
3 Kha nga edzi Sathane a ndreyisidego khidzo vathu vavili nya gu vbeleye (nya mba pata sivangwa nya singi nya liphuvbo) gu wugeya Nungungulu, uye a nga hi gira sasimweso. Uye a ngo gu thumisa mano ya mamowo. Uye a gu zama gu hi gira hi pimisa gu khethu milayo ya Jehovha yi ngu garadza nigu ya gu hi himbedzeya gu tsaka. (1 Johane 5:3) Ha gu pimisa khu ndziya yeyi, si na hi gira hi pwanana naye. Ndriyathu nya nyamayi a gu na ni 24 myaga a nga ba a giride wubhayi wari, khuye: “Nyi di gu kutsedzedwe khu dzipari nya mba dzadi, kholu nyi di gu thava gu pimisa khu ndziya nyo hambane ni sihevbuli khwathu.” Adzina u di nga emisana ni kutsedzelo nya sihevbuli kwanu.
Mukhedziseyi 15/7/04 paj. 31, par. 6
“Muthu nya mapimo a gu thumisa guti”
Muthu nya gu gengeye ni gu lulama, a girago silo khu wugengeyi a na kategiswa. Solomoni a di hi tiyisegisa gu khuye: ‘Muthu nya gululame a gu hodza a khura, gasi sirumbu nya sighohi si na khala ni ndzala.’ (Mavingu 13:25) Jehovha a ngu siti esi si gu sadi womini wathu, nya nga esi si yelanago ni dzindranga, gu vbanyisana ni vambe, thumoni nyo tshumayele ni tepo hi kawukwago. Nigu ha gu landrisa khu wugengeyi wusingalagadzi wu gu romo omu nya Bhibhiliya, nya mba kanakana hi na mana womi nya wadi.
Kemba dzithomba nya liphuvbo
Perspicaz-1 paj. 117, par. 2
Lihaladzo
Lihaladzo li nga yeyedzwa khu ndziya nya mba yadi. Khu sighelo sesi, sa gu wonega gu lihaladzo nya lisine li yeyedzwago khu ndziya nya yadi, la gu manwa khu gu vbwetedzeya ni gu landrisa liphuvbo la Nungungulu ni guti gu gomogo omu nya Lito Laye. Khu giyeyedzo, papayi nyo khaguri a nga gola gyanana gyaye. Ganiolu, adzina a nga dzumeleya gu khuye lihaladzo lolo li vbeya mwendro a li yeyedza khu ndziya nya mba yadi, khu gu gi ninga satshavbo esi gyanana gyaye gi si vbwetego nya mba gi hiya gilo. Adzina saye a si gire thumo waye kha nga muvelegi khu gu gi kawukwa mwendro gu gi veta. (Mav 22:15) Lihaladzo lolo khu lisine, adzina gudzikhusedza gwawe nigu la gu yeyedza gu khilo va gu dzi gola avo vamune. Bhibhiliya yari khiyo muthu yoyo kha yeyedze lihaladzo, ganiolu livengo, kholu kha landri esi si na vbulugisago womi wa gyanana gyaye. — Mav 13:24; 23:13, 14.
19-25 NYA MAIO
DZITHOMBA NYA LITO LA NUNGUNGULU MAVINGU 14
Dundrugeya gwadi khesi u na girago ya gu dugeleya mhango
Mukhedziseyi 02.23 paj. 23, dzipar. 10-12
Ninga lisima giningwa nya womi
10 Dzimbe dzitepo ethu kha hi na nga si kodza gu vhika dzimbe dzimhango dzi hi dugeleyago. Khu giyeyedzo, dzimhango nya tumbunugo, mitungo ni sitereka. Ambari sa gu girega isoso, sa gu kodzega hi nga zama gu vbulugisa womi wathu khu gu engisa esi vathangeyi va hi embeyago. (Rom. 13:1, 5-7) Dzimbe dzitepo hi ngu embedwa na yi nga si dugeleyi mhango. Khu kharato, ethu hi yede gu engisa vathangeyi a gu iso si na hi phasago gu dzi dongiseya ga mhango nyo khaguri. Khu giyeyedzo, ethu hi yede gu tiyisega gu khethu hi na ni mati ni guhodza gu gu mba vbiredza gu ghoheka mwendro kiti nya emerigensiya.
11Ginani hi yedego gu gira abari gu gu na ni madwali ma thaphedzisanago umo hi vbanyago umo? Ethu hi yede gu engisa sileletelo hi ningwago khu vathangeyi va gipandreni gwathu nya nga gu hamba mandza, distanciamento físico, gu ambala maskara ni quarentena. Tepo hi girago silo sesi, hi na ba hi yeyedza gubonga khu giningwa nya egi Nungungulu a hi ningidwego.
12 Tepo yi giregago mhango nyo khaguri, dzimbe dzitepo ethu hi dzipari dzathu mwendro vavhizinyu na va gu ganeya mahungu ma gu siri lisine. Wulangani nya gu “[dzumeye] satshavbo” hi si pwago, ethu hi yede gu engisa mahungu hi ningwago khu dzipfhumu ni vadhogodheya. (Leri Mavingu 14:15.) Huwo nya guthangeye ni dzibheteli dzi ngu gira satshavbo dzi si kodzago gasi gu mana mahungu nya lisine na va si hi ninge sileletelo maningano khu mitshangano nya libandla ni thumo nyo tshumayele. (Hebh. 13:17) Ha gu landrisa sileletelo hi ningwago, ethu hi na dzi vhikeya ni gu vhikeya vambe ga mhango nyo khaguri. Adzina saye hi nga phasa vambe gu wona Dzifakazi dza Jehovha khu ndziya nya yadi. — 1 Ped. 2:12.
Mukhedziseyi 07.24 paj. 5, par. 11
Tiya hwambo nga Sadhoki
11 Gu fana ni Sadhoki, hi nga tiya kharini hwambo tepo vandriyathu va bwetago giphaso gyathu ga tepo nyo garadze yi vegago womi wathu mhangoni? 1) Landra sileletelo. Ga giemo nyo garadze gi vegago womi wathu mhangoni, si na ni lisima gu manega ni wumowo. Si na ni lisima gambe gu engisa sileletelo si tago khu bheteli. (Hebh. 13:17) Madhota ma yede gu wusedza tepo yatshavbo sileletelo nya hengeledzano si ganeyago khedzi hi nga girago gasi gu dzi dongiseya ya gu tshuka yi girega mhango nya tumbunugo. (1 Kor. 14:33, 40) 2) Tiya hwambo u bwe u dzi woneya. (Mav. 22:3) Pimisa na wu si giri gilogyo. Gira satshavbo u si kodzago gasi gu dzi vhikeya. 3) Tumba Jehovha. Dundruga gu khuwe Jehovha a gu vbweta gu khuye uwe ni vandriyago mu vhikelega. Jehovha a nga gu phasa gu seketeya vandriyago nu vhikelegide.
Kemba dzithomba nya liphuvbo
Perspicaz-2 paj. 780
Makodzelo nyo pimise
Ambari ulolo, oyu a gu na ni makodzelo nyo pimise a nga nyenywa. Malito yaya ma ngu tshamusedwa omu ga Mavingu 14:17: ‘Muthu nya mapimo khwa gu nyenywa khu vathu.’ Dzitepo nya dzingi, ava va gu mwalo makodzelo nyo pimise khu ndziya nya yadi, va ngu wona ava va pimisago gwadi na va handrugide. Nigu gambe, gukhugeya gale, vale va thumisago mapimo yawe gasi gu gira gugola ga Nungungulu va ngu nyenywa. Jesu ganede gu khuye: “Kha nga olu mu si girigo gipandre nya litigo ni olu nyi mi hathidego tigoni, litigo li ngu mi nyenya.” (Joh 15:19) Khu lisine, lito li gu khilo “gu pimisa” khu lidimi nyo pheye yi nga lowa Bhibhiliya, li nga pata mapimo nya mba yadi. Khu kharato, lowo wowu wu nga tshamuseya gambe gu khuwo muthu a girago esi nyo vivbe a ngu nyenywa, nigu wumbe wuvbindrugedzeye wu ngu dzumeleyana ni malito yaya tepo wu gu khuwo: “Muthu a girago basi wuvivbe a ngu nyenywa.” — ALA, VB.
26 NYA MAIO–1 NYA JUNHO
DZITHOMBA NYA LITO LA NUNGUNGULU MAVINGU 15
Phasa vambe gasi va mana litsako
Mukhedziseyi 15/11/10 paj. 31, par. 16
‘Ethu hi na gimbiya khu gutumbega’
16 Joba a di gu hakha gwadi vapfhumba. (Joba 31:31, 32) Ambari na ha sa ghanya, si ngu kodzega gu ‘tepo yatshavbo hi hakha gwadi vapfhumba.’ (Rom. 12:13) Hi nga kabana silo nya sidugwana ni vambe, na hi gu dundruga gu khethu “i tshukwana gu hodza mathapha avbo li gu romo lihaladzo, guvbindra gu hodza nyama nya mombe nya gunone vbakari nya mayunga.” (Mav. 15:17) Ambari gu hodza silo nya sidugwana ni vathu nya vadi, ga wulanga wu gu na ni lihaladzo, si ngu tsakisa nigu hi ngu wuyedwa gambe khu liphuvboni.
Mukhedziseyi 04.18 dzipaj. 23-24, dzipar. 16-18
“Hongoleni hi tiyisana ngudzu-ngudzu olu”
16 Ahati wa gu dzi wona na wu si si kodzi gu tiyisa mumbe? Lisine gu kha si vbwetegi silo nya singi gasi gu tiyisa vambe. Zama gu losa muthu nyo khaguri na wu mwerugeya. Muthu yoyo a gu mba gu hegeya nuye, adzina saye a gu tshangana ni gigaradzo nyo khaguri. Wa gu khala muengiseyi nya wadi, muthu yoyo adzina saye a na dzipwa na tiyisidwe. — Jak. 1:19.
17 Henri, a gu na ni 20 myaga, a di vbeya tshivba. Valongo vaye, gupata papayi waye a nga ba ari lidhota, va di diga lisine. Gasi gu mu tiyisa, muwoneleyi nya sirkwitu a di mu dzega a hongola naye vaya seya tsaya a bwe a engiseya gwadi esi Henri a nga ba a ganeya. Avba nya mabhulo yawe, Henri a di pwisisa gu khuye a di yede gu timiseya gasi gu phasa valongo vaye gu va wuya lisineni. Gimbe gilo gi nga mu phasa khu gu leri Ndzimo 46; Sofoniya 3:17; Marko 10:29, 30.
18 Giyeyedzo gya Marthe ni Henri gya gu yeyedza gu khigyo hi nga tiyisa ndriyathu nyo khaguri a vbwetago gu thaveledwa. Pfhumu Solomoni a di lova gu khuye: “Mahungu ma gu ganedwa khidzo gu vbwetegago khidzo, ma gu tshamba ngudzu. [Maho ma tsakidego], [ma] gu tsakisa monyo, ni mahungu nya yadi, ma gu tiyisa [si]rambo.” (Mav. 15:23, 30) Igyo hi nga girago gasi gu hi gira ndriyathu a tsaka, khu gu hi mu lereya ndrima nyo khaguri omu nya Mukhedziseyi mwendro omu nya sayiti yathu. Mwendro gu embeleya naye ndzimo nyo khaguri. Pawulo ganede gu khuye gu embeleya gu ngu hi tiyisa. Lovide gu khuye: “Simamani gu hevbudza ni gu tiyisana khu dzindzimo, khu gu dhumisa Nungungulu, khu dzindzimo dza liphuvboni dzi embwago khu gubonga, mu embeleya khu myonyo yanu ga Jehovha.” — Kol. 3:16; Mith. 16:25.
Kemba dzithomba nya liphuvbo
Mihlamulo nya siwudziso nya Bhibhiliya ndrima 186, par. 8
Nyi nga hunga kharini makungo nya yadi?
Bhibhiliya yari khiyo: “Avbo wu gu mwalo wusingalagadzi, makungo ma gu bwelela hwane.” (Mavingu 15:22) Khu kharato, na wu si hungi makungo nyo khaguri, bhula ni muthu u mu tumbago. Khu giyeyedzo, wa gu vbweta gu hunga makungo ma yelanago ni mawugelo, si na ba siri sadi gu vbwetedzeya dhogodheya. (Matewu 9:12) Ga siemo nyo khaguri, u nga bhula ni vandriyathu va tshanganidego ni gigaradzo u tshanganago nagyo. Ganiolu, dundruga gu khuwe oyu a yedego gu hunga makungo yoyo khuwe, nigu khuwe u na manago tshatshazelo wakone nasiri ava u nga bhula navo. — Vagalatiya 6:4, 5.
2-8 NYA JUNHO
DZITHOMBA NYA LITO LA NUNGUNGULU MAVINGU 16
Siwudziso siraru si hi phasago gu hunga makungo nya yadi
Mukhedziseyi 15/1/14 dzipaj. 19-20, dzipar. 11-12
Hunga makungo nya yadi wuphyani gwago
11 Litsako nya likhongolo, ha gu li mana khu gu thumeya Jehovha. (Mav. 16:20) Bharuki, sekretaryu wa Jeremiya, so wonegisa gu khatshi a di si divade isoso kholu yomo tepo a nga luza litsako nya gu thumeye Nungungulu. Jehovha a di mu embeya gu khuye: “Ina uwe wa gu dogorela gu mana silo nya sikhongolo, gani? Diga gu dogorela gogo, kholu eni Pfhumu Nungungulu, nyi na resa dzitshanisa ga vathu vatshavbo; . . . nyi na gu vbanyisa malangani yatshavbo u na gu gimbilelago umo. A ngu ganela Pfhumu Nungungulu.” (Jer. 45:3, 5) Khu mawonelo yago, ginani gi nga hadzi gu tsakisa Bharuki? Khu gu vbwetedzeya silo nya sikhongolo mwendro khu gu vbuluga avba nya gu fuviswe ga Jerusalema kha nga githumi nyo tumbege gya Nungungulu? — Jak. 1:12.
12 Ramiro i ndriyathu nyo khaguri a manago litsako khu gu thumeya vambe. Uye wari, khuye: “Eni nya gu dugeya khu ndrangani nya wusiwana, yi khalago avba nya vhila ya Cordilheira dos Andes. Khu kharato, tepo ndriyangu a nga dzi ningedza gasi gu nyi livbeya univhersidhadhi li diri lithomo nya likhongolo. Ganiolu, nyi di ngari gu bhabhatiswa kha nga Fakazi ya Jehovha nigu nyi manide limbe lithomo: Ndriyathu a nga ba a thuma kha nga piyoneru a di nyi rana gasi guya tshumayela naye ga gidhoropana nyo khaguri. Khavbovbo, nyi di hunga gu hongola naye. Nyi di hevbuleya gu piya ndzudzu, nigu nyi di tula wulanga gasi gu gira thumo wowu gasi nyi mana dzitsapawu nya gu dzi sayise khidzo. Tepo hi nga ba hi tula sihevbuli nya Bhibhiliya, vathu nya vangi va di gu dzumeya. Khu gu gimbiya nya tepo, nyi di pheya gu tshangana omu nya libandla li nga ba li ngari gu tudwa nya lidimi nya giindígena. Nyi piyoneru khu tanga nya 10 myaga, nigu wumwalo thumo wu nga hadzi nyi ninga litsako nya likhongolo wu fanago ni gu phasa vathu gu hevbula mahungu nya yadi khu lidimi lawe.”
Mukhedziseyi 15/9/13 paj. 17, dzipar. 1-3
Ina u vbindrugedzidwe?
Edzi hi nga dandriswa khidzo ni omu hi khalago umo si nga hi kutsedzeya ngudzu. Isoso si ngu wonega avba nya edzi hi ambalago khidzo, esi hi golago gu hodza ni mavbanyelo yathu.
2 Gu na ni silo womini si gu na ni lisima ngudzu guvbindra gu hatha sombo nyo hambale ni guhodza. Khu giyeyedzo, gukhugeya na hi ngari sanana, hi hevbudzidwe gu wona silo nyo khaguri nya sadi na si dzumelega ni silo nya mba sadi na si si dzumelegi. Nya singi sakone, sihalo nya muthu ni muthu. Livhalo lathu adzina li nga veta tepo hi vbwetago gu hatha silo nyo khaguri. Bhibhiliya ya gu ganeya gu khiyo dzitepo nya dzingi “va nya mayigo, va gu mwalo nayo, va girago khu tumbunugo silo si lombwago khu nayo.” (Rom. 2:14) Ganiolu, ahati na wuri mwalo nayo nyo kongome wa Nungungulu wu ganeyago khu gilo nyo khaguri? Ina hi yede gu landrisa milayo hi hevbudego na hi ngari sanana mwendro yi olovegidego omu hi vbanyago umo?
3 Gu na ni sighelo sivili nya lisima gasi Makristo ma si pimisi khu ndziya yeyi. Nyo pheye, Bhibhiliya ya gu hi dundrugisa gu khiyo: “Yomo ndzila muthu a yi wonago gukhwatshi yi lulamide, aholu khu guhegisa ya gu mu yisa lufuni.” (Mav. 16:25) Khu kotani nya olu hi nga mba vbeleya, kha hi si kodzi gu gimbidzisa dzindziya dzathu khu gu vbeleya. (Mav. 28:26; Jer. 10:23) Nya wuvili, Bhibhiliya ya gu yeyedza gu khiyo mikhuwo ni milayo nya litigo leli ya gu thangedwa khu Sathane, “nungungulu nya litigo leli.” (2 Kor. 4:4; 1 Joh. 5:19) Khu kharato, gasi gu hakha makategwa ni gu tsakedwa khu Jehovha, hi yede gu landrisa gigengedzo gi gu romo omu ga Varoma 12:2. — Leri.
Kemba dzithomba nya liphuvbo
Perspicaz-1 paj. 708
Gukawuka
Wuyelo hi wu manago khu gu engisa ni gu mba engisa. Va nya gu vivbedwa khu myonyo, sipumbo ni vale nya mba handzega va gu yeyedza gu khavo va ngu nyenya gu kawukwa khu Jehovha, khu gu bomba gu kawukwa khu gu vbeleya. (Ndz 50:16, 17; Mav 1:7) Wuyelo nya mba wadi va na wu manago wukhongolo ngudzu nigu wu na vbisa ngudzu. Guya khu mavingu: “Gipumbu gya gu mana tsayiso khu wupumbu wa[gyo].” (Mav 16:22) Avo va nga dzi vangeya sigaradzo nya nga wusiwana, gu mba wonwa khu ndziya nya mba yadi, madwali ni gufa nya mba gu vireya. Matimo ya Vaisrayeli ma ngu yeyedza gwadi edzi si vbisago khidzo gu mana tsayiso nya nga owu. Avo kha va vega gupima tepo va nga kawukwa khu ndziya nya yadi, khu gu thumisa vaprofeti. Kha va dzumeya gu kawukwa khu Jehovha gasi gu va vhikeya ni gu va kategisa. Khu gu hegisa, vapwide gu vbisa khu gu kawukwa va gu manidego, va tivisidwego gale, a gu gu dzegwa va hongola wugumbini. — Jer 2:30; 5:3; 7:28; 17:23; 32:33; Ho 7:12-16; 10:10; Sof 3:2.
9-15 NYA JUNHO
DZITHOMBA NYA LITO LA NUNGUNGULU MAVINGU 17
Dzi buze khu gurula ndrani nya mutshadho wago
Khendzugani! 9.14 paj. 11, par. 2
U nga vbedza kharini giviti
Dzi gevesisi khu gu tumbega. Bhibhiliya ya gu ganeya gu khiyo vathu nyo khaguri ‘va ngu wusa mayunga’ ni ‘gu vbiredza gu goroga.’ (Mavingu 29:22) Ina u moyo wakone? Dzi wudzise gu khuwe: ‘Nyi ngu oloveya gu vega giviti? Ina nyi ngu khunguvanyega khu gu vbiredza? Ina nyi ngu oloveya gu vbindrugedza gigaradzo nya gidugwana gi khala nya gikhongolo?’ Bhibhiliya yari khiyo: ‘Oyu a khaleyago gu dundruga esi si giregidego a gu ghoha wupari.’ (Mavingu 17:9; Muhevbudzi 7:9) Si nga girega silo sasimweso ndrani nya mutshadho. Khu kharato, wa gu ba u oloveya gu vegedzeya giviti, dzi wudzise gu khuwe: ‘Ina nyi nga laphiseya monyo mwama wangu?’ — Litshina nya Bhibhiliya: 1 Pedro 4:8.
Mukhedziseyi 1/5/08 paj. 10, par. 6; paj. 11, par. 1
Gu lulamisa sigaradzo
1. Vega ora gasi gu bhula khu gigaradzo nyo khaguri. “Satshavbo si dongisedwe gikhati gyaye, . . . gikhati nya gudegule, ni gikhati nya guganele.” (Muhevbudzi 3:1, 7) Guya khesi hi bhudego khiso, sigaradzo nyo khaguri si nga yeyedza gudzipwa gwathu nya mba gwadi. Sa gu girega isoso, dzi phare u bwe u embeya pari yago nya wugadzi gasi gu emanyana, mu ‘si ganeye gilo’ gasi silo si si engedzeye gu vivba. Uwe u nga potsa gu silo si engedzeya gu ghoheka ndrani nya mutshadho wago wa gu engisa wusingalagadzi wu gu khuwo: “Guphela nya guganedzisane gukhwatshi guphusuga nya mati nya tsongo wa guphela gutala; khu guralo, khuga u hongole na mu si gu pheli mayunga.” — Mavingu 17:14, Bhibhiliya khu lidimi la muhuno.
Ganiolu, ‘yomo tepo nya gu ganeye.’ Sigaradzo si ngu fana ni mwasi wu dandrago khu gu ba wu digwa wu dandra. Khu kharato, u nga digi gu lulamisa gigaradzo, na wu gu pimisa gu khuwe gi na mwalalega gyabune. Wa gu ba u lombide tepo gasi gu emanyana gu ganedzisana, yeyedza githawo pari yago nya wugadzi khu gu vega ora gasi gu bhula khu gigaradzo gyanu. Khu gu gira isoso, si na mi phasa gu thumisa wusingalagadzi nya Bhibhiliya wu gu khuwo: “Mu nga pfodzisi lidambo na mu ngo zangaride.” (Vaefeso 4:26) Khu lisine, u yede gu tadzisa esi u nga si tumbisa.
Kemba dzithomba nya liphuvbo
Perspicaz-2 paj. 514, par. 4
Liso
Maho ma ngu yeyedza edzi muthu a dzipwago khidzo. Ayo ma nga yeyedza pweya-wusiwana mwendro ma si gu yeyedzi (Dhet 19:13); ma nga ‘khwavbiya’ khu gu zondra mwendro gu luga silo nya mba sadi. (Ndz 35:19; Mav 6:13; 16:30) Hi nga ganeya gu khethu muthu a gu mba dzina gu khedza mwendro a gu mba dzina gu gireya silo vambe, a gu sega mwendro gu siha maho yaye. (Mt 13:15; Mav 28:27) Ga gu ganedwa gupwani gipumbo gi na ni maho yagyo “tigoni gwatshavbo,” gi gimbiya enu ni enu nya mba na makungo nyo khaguri nigu mapimo yagyo momo gwatshavbo nasiri avba ma yedego gu manega avbo. (Mav 17:24) Edzi maho yathu ma gu idzo ma ngu yeyedza mawugelo, tshivba nya muthu nyo khaguri mwendro gu a tsakide mwendro ne. (1Sa 14:27-29; Dhet 34:7; Job 17:7; Ndz 6:7; 88:9) Pfhumu Josafati, a ganede ni Jehovha khu ndziya yeyi: “Maho yathu ha gu ma vega mbeli gwago.” — 2Dzik 20:12.
16-22 NYA JUNHO
DZITHOMBA NYA LITO LA NUNGUNGULU MAVINGU 18
Ganeya khu ndziya nya gu thaveleye ni vale va emisanago ni madwali
Mukhedziseyi 10.22 paj. 22, par. 17
Guti gwa gu khusa lito
17 Pimisa nu si ganeye. Ha gu mba dzi woneya hi nga vanga gigaradzo khu malito yathu. Bhibhiliya yo ganeya gu khiyo: “Vomo va dusago magana nya gupaye kha nga litshari, aholu lidimi la va nya guti, la gu ninga womi.” (Mav. 12:18) Ethu hi nga andrisa gurula tepo hi potsago gulemba vambe. (Mav. 20:19) Ha gu ba hi vbweta gu khethu malito yathu ma thaveleya vathu nigu ma si va payi, ethu tepo yatshavbo hi yede gu leri ni gu dundrugeya khu Lito la Nungungulu. (Luka 6:45) Tepo hi dundrugeyago khesi Bhibhiliya yi ganeyago malito yathu ma nga fana ni “gifefe nya guti” ma thaveleyago vambe. — Mav. 18:4.
Mais assuntos ndrima 19 kwadru
Ginani u nga girago wa gu tugula gu khuwe u na ni madwali?
Engiseya gwadi. Mweyo nya dzindziya u nga phasago khiyo pari yago, khu gu tepo yatshavbo u mu engiseya gwadi tepo a ganeyago. U nga pimisi gu khuwe u yede gu mu ninga hlamulo nya satshavbo a ganeyago. Dzitepo nya dzingi, egi hi yedego gu gira gu mu engiseya basi. Zama gu dzi vbevbugisa u bwe u si mu lamuli. U nga gire gu khatshi u ngu dziti gwadi edzi pari yago yi dzipwago khidzo, ngudzu-ngudzu sa gu wonega gu khatshi kha yi dwali. — Mavingu 11:2.
Ganeya silo si vbahago. Adzina kha wu na nga siti esi u na ganeyago, ganiolu u nga ganeya malito gasi gu yeyedza gu khuwe u ngu pwisisa gu khuwe giemo gya pari yago gi ngu garadza. Gu gira isoso, si na mu thaveleya guvbindra gu mba ganeya gilo. Sa gu ba si garadza gu mana malito nya yadi, zama gu gu ganeya malito nyo vbevbuge, ganiolu ma khugeyago monyoni, nya nga: “Eni nyi mwalo gilo nyo ganeye, ganiolu nyo vbweta gu kheni u dziti gu khuwe nyi ngu khathala khuwe.” U nga thumisi malito nya nga “na si engedzede gu garadza” mwendro “uwe u mwalo . . . ”
U nga yeyedza gu khuwe u ngu khathala khu pari yago khu gu vbwetedzeya guti maningano ni madwali yaye. Adzina saye, uye a na tsakiswa khu gu wona gudzigaradza gwago nya gu zame gu pwisisa esi si mu giregeyago, nigu esi u na ganeyago si na ba siri ni tshivba. (Mavingu 18:13) Ganiolu, dzi woneye gasi u si ningi wusingalagadzi pari yago na ya sa gu lomba.
Mu ninge giphaso gi vbwetegago. Vbavbandze nya gu pimise gu khuwe u ngu dziti edzi u nga mu phasago khidzo, mu wudzise gu khuwe u nga gira ginani? Si nga gira pari yago na yi si dzumeyi gu khiyo yi ngu vbweta giphaso, kholu iyo kha yi vbweti gu garadza vambe. Sa gu girega isoso, u nga dzi ningedzeya gasi gu mu phasa gu renga-renga silo, gu agisa ndranga mwendro gu gira gimbe gilo. — Vagalatiya 6:2.
U nga vbeyi tshivba. Dundruga gu khuwe pari yago ya gu emisana ni giemo nyo garadze. Khu kharato, dzimbe dzitepo a na thindreka gu gira esi mu hungidego mwendro kamo gu mba vbweta gu bhula. Laphisa monyo, u mu pwisisa u bwe u simama gu mu ninga giphaso a gi vbwetago. — Mavingu 18:24.
Mukhedziseyi nya vathu vatshavbo 1.23 paj. 14, dzipar. 3-4; paj. 15, par. 1
Hi nga phasa kharini vale va gu na ni gigaradzo nya mapimo
‘Thaveleya.’ — 1 VATESALONIKA 5:14.
Adzina saye pari yago ya gu garadzega mwendro ya gu dzipwa na yi si phasi gilo. Ambari na wuri mwalo gilo nyo ganeye, u nga tiyisa ni gu thaveleya pari yago khu gu yi embeya gu khuwe u ngu khathala khiyo.
“Iyo yi gu pari yi ngu gu gola gikhati gyatshavbo.” — MAVINGU 17:17.
Mu ninge giphaso. Wulangani nya gu pimise gu khuwe u ngu dziti edzi u nga mu phasago khidzo, mu wudzise egi u nga girago. Sa gu ba si garadzeya pari yago gu ganeya edzi a dzipwago khidzo mwendro esi yi si vbwetago, mu embeye gasi gu mu gira gilo nyo khaguri mwatshavbo, nya nga gu pasiyari. Mwendro u nga mu phasa gu renga-renga silo, gu agisa ndranga mwendro gu gira gimbe gilo. — Vagalatiya 6:2.
‘Laphisa monyo.’ — 1 VATESALONIKA 5:14.
Khandri tepo yatshavbo pari yago yi na dzinago gu bhula. Vega guagani gu khuwe a nga gu hidzimeleya gasi gu gu embeya esi a si vbwetago. Khu kotani nya madwali, pari yago yi nga ganeya mwendro gu gira silo si nga gu khunguvanyisago. Dzimbe dzitepo, a nga thindreka gu gira esi mu hungidego mwendro gu vbiredza gu goroga. Tepo u mu phasago, laphisa-monyo u bwe u mu pwisisa. — Mavingu 18:24.
Kemba dzithomba nya liphuvbo
Perspicaz-2 paj. 1057
Dzisolo
Gale yoyo, va di gu thumisa dzisolo gasi gu hunga gilo nyo khaguri va bhulago khigyo. Va di gu thumisa siwindryana, sidherana, va si wungedzeya omu nya panu nyo khaguri, omu nya mandza mwendro omu nya gyombo nyo khaguri, khavbovbo va si kutshunga. Oyu a nga ba a thegedwa khu giwindri gimwegyo khuye a nga ba a hathidwe. Solo, yi fanago ni gu sambanya yi di gu landredwa khu nombelo. Hwane nya gu ba va giride nombelo, va di gu vireya kala Jehovha a gira gilogyo. Lito li gu khilo Solo (Hebr.: goh·rál) la gu thumiswa khu ndziya nya lisine ni gu fananiswa gasi gu tshamuseya “gikombe” mwendro “thomba.” — Jos 15:1; Ndz 16:5; 125:3; Isa 57:6; Jer 13:25.
Edzi dzi nga ba dzi thumiswa khidzo. Mavingu 16:33 wari, khuye: “Vathu va ngu kodza gu wudzisa khu gulola dzisolo, aholu uye a ningago phindrulo khu Pfhumu Nungungulu [enga].” Eyi Israyeli, gu thumiswa nya gwadi nya dzisolo gu di gu hegisa khu gu lulamisa mahungu: ‘Gulola dzisolo gu ngu vbedza mayunga ni gu lamula mahungu ya va nya dzitshivba.’ (Mav 18:18) Dzisolo kha dza nga ba dzi thumiswa ga silo nya mihagano mwendro mapalisana. Kha sa nga ba si pata mapalisana ni gu dhumba, nigu kha sa nga ba si pata gu pala mwendro gu luza. Kha dza nga ba dzi thumiswa gasi gu ghanyisa tempele, vaprista mwendro kamo gasi gu phasa sisiwana. Ganiolu, masotshwa ya Roma ma di thumisa dzisolo khu ndziya nya mba yadi tepo khiyo va nga ba va vbweta gu kabana sombo sa Jesu. — Mt 27:35.
23-29 NYA JUNHO
DZITHOMBA NYA LITO LA NUNGUNGULU MAVINGU 19
Khala pari nya lisine ga vandriyago
Mukhedziseyi 11.23 dzipaj. 12-13, dzipar. 16-17
Hi nga simama kharini gu tiyisa lihaladzo hi gu nalo khu vambe?
16 Vega gupima avbo nya makhalelo nya yadi ya vandriyathu nasiri ga ayo nya mba yadi. Wona gipimaniso gegi. Dzi dundrugeyi na wu romo ni vandriyathu avbo nya tshangano nyo khaguri. Uwe u tsakide ngudzu nigu gu hegisani nya tshangano wa gu dusa fotu ni vatshavbo. Uwe wa gu dusa dzifotu dzimbili kholu eyi nyo pheye kha ya khala. Olu u duside dzifotu dziraru. Ganiolu, u tugula gu khuwe avbo nya fotu mweyo ndriyathu kha hega. Fotu yoyo u na yi rini? Uwe u na yi pfhuta kholu u na ni dzifotu dzimbili u nga dusa ni vatshavbo nigu ndriyathu wule na gu hega.
17 Hi nga fananisa dzifotu dzedzi ni esi hi si dundrugago khu vandriyathu. Khu lisine, ethu hi ngu dundruga dzitepo nya dzadi hi dzi vbedzidego ni vandriyathu. Ganiolu, ga dzitepo dzedzi nga dundrugeya ndriyathu nyo khaguri na ganede mwendro gu gira silo nyo khaguri si nga mba gu tsakisa. Ginani hi yedego gu gira ha gu dundruga silo nya nga isoso? Hi yede gu divala silo sesi gu fana ni edzi hi nga hadzi gu pfhuta fotu yile. (Mav. 19:11; Efes. 4:32) Ethu hi nga dzi garadzeya gu divala silo nya mba sadi si giridwego khu ndriyathu yoyo kholu hi ngu dundruga silo nya sadi a giridego tepo hi nga ba hiri hatshavbo. Esi silo nya sadi hi vbwetago gu simama gu si dundruga.
Mukhedziseyi 07.23 dzipaj. 9-10, dzipar. 10-11
Engedzeya lihaladzo lago khu Jehovha ni vambe
10 Ethu hi ngu vbweta dzindziya nya gu phase vandriyathu nya Makristo. (Hebh. 13:16) Olu hongoleni hi wona giyeyedzo gya Anna a khumbugidwego ga ndrima yi vbindridego. Hwane nya gu ba gi giregide gingulo nya gikhongolo, uye ni mwama waye va di ya wuseya vandriyathu nigu va di ya tugula gu khavo gingulo gi di gu ghohetede vbatshani nya nyumba yawe. Kha nga handro wakone ndranga yile yi diri mwalo sombo nya gu tshuge. Anna wari khuye: “Hi di dzega sombo sawe hi ya handza, nigu hi va bweledzede na hi ngomaride ni gu si peteleya. Esi hi nga va gireya hi di si wona nga khatsi sidugwana, ganiolu gu khugeya litshigu lolo kala muhuno hi ngari dzipari nya dzikhongolo.” Lihaladzo eli Anna ni mwama waye va gu nalo li va kutside gu phasa vandriyathu. — 1 Joh. 3:17, 18.
11 Ha gu yeyedza lihaladzo vambe, avo va na si wona gu khavo ha gu zama gu pimedzeya Jehovha. Nigu avo va nga hi bonga ngudzu khu wuwadi hi va yeyedzago. Khanh a khumbugidwego gupheyani, khu lihaladzo dundrugide vale va mu phasidego. Uye wari khuye: “Nyi ngu bonga ngudzu vandriyathu va nga nyi phasa khu gu nyi vbwegedza thumoni. Avo va di guta gaya gwangu va ta nyi rana gasi guya hodza gilogyo ni gu bwe va nyi vbwegedza gaya. Olu nya gu wona gu kheni va giride thumo nya wukhongolo. Nigu avo va giride isoso khu lihaladzo.” Khu lisine, khandri vatshavbo va hi bongago khesi hi va gireyago. Khanh a gu ganeya esi khu vale va mu phasidego: “Nyi ngu dzina gu va bweledzeya watshavbo wuwadi va nyi yeyedzidego, ganiolu kha nyi guti omu vatshavbo va khalago. Ambari ulolo, eni nyi ngu gombeya ga Jehovha gasi a va bweledzeya watshavbo wuwadi va nyi yeyedzidego.” Esi a ganedego Khanh lisine. Jehova a ngu wona satshavbo nya sadi u gireyago vambe, ambari so ba siri sidugwana ngudzu. Uye a gu si wona nga ningelo nya lisima nigu kha nga mangava a na ma livbago. — Leri Mavingu 19:17.
Mukhedziseyi 11.21 paj. 9, dzipar. 6-7
Simamani gu yeyedzana lihaladzo nyo tumbege
6 Ga vathu nya vangi, muthu a thumago khu tepo nya yingi avba nya komponi nyo khaguri, a gu wonwa kha nga githumi nyo tumbege. Ganiolu, ambari gi gu na ni myaga nya yingi na gi gu thuma avba nya komponi yile, si nga gira na gi si vati vathangeyi vagyo. Si nga gira gambe nasiri tepo yatshavbo gi dzumeleyanago ni milayo ya avba nya komponi. Githumi gegi kha gi yi goli komponi yeyi, ganiolu gi ngu tsaka khu gu manega ni thumo ni gu hakha dzitsapawu. Igyo gi na simama gu thuma vbale kala gi reformari mwendro kala gi mana thumo nya tshukwana.
7 Gu hambana gu gomogo avba nya gutumbega gu khumbugwago avba nya ndrimana 6 ni lihaladzo nyo tumbege gomo avba nya egi gi kutsago muthu gu yeyedza makhalelo yaya yamavili. Khu ginani sithumi sa Nungungulu sa dziteponi nya Bhibhiliya si yeyedzidego lihaladzo nyo tumbege? Ava va yeyedzago lihaladzo nyo tumbege kha va giri isoso khu gu gurumedzwa, ganiolu khu gu dzina. Wona giyeyedzo gya Dhavhidhe. Uye a di gu dziti gu khuye Sawule, papayi wa Jonatane a di gu vbweta gu mu songa. Ambari ulolo, monyo wa Dhavhidhe wu mu kutside gu yeyedza lihaladzo nyo tumbege ga pari yaye nya yikhongolo Jonatane. Myaga hwane nya gu ba Jonatane a fude, Dhavhidhe simamide gu yeyedza lihaladzo nyo tumbege ga gyanana gya Jonatane Mefibhoseti. — 1 Sam. 20:9, 14, 15; 2 Sam. 4:4; 8:15; 9:1, 6, 7.
Kemba dzithomba nya liphuvbo
Perspicaz-1 paj. 549
Wusingalagadzi, Oyu a ningago wusingalagadzi
Jehovha khuye mune nya guti. Khuye basi a gu mba vbweta gu ningwa wusingalagadzi. (Isa 40:13; Ro 11:34) Gyanana gyaye, khigyo gi si kodzago gu khala “Singalagadzi nya Guliwugise,” gi ningago sileletelo kholu gi di hakha ni gu landra wusingalagadzi wa Papayi wagyo, nigu gi na ni liphuvbo la Nungungulu. (Isa 9:6; 11:2; Joh 5:19, 30) Isoso sa gu tshingisa gu khiso wusingalagadzi nyo khaguri wa gu wonega gu khuwo wu na phasa, hi yede gu gira isoso na hi gu pimisa gugola ga Jehovha. Ni wevbini wusingalagadzi wu wugeyago oyu a Khugegidego Ngudzu wu mwalo lisima. Uwo khandri wusingalagadzi. — Mav 19:21; 21:30.
30 NYA JUNHO–6 NYA JULHO
DZITHOMBA NYA LITO LA NUNGUNGULU MAVINGU 20
Sihalo gasi gu namorari khu ndziya nya yadi
Mukhedziseyi 05.24 dzipaj. 26-27, dzipar. 3-4
U nga gira kharini gasi gu namorari khu ndziya yi tsakisago Jehovha?
3 Ambari olu gu namorari gu tsakisago, ugo gambe ndziya yi girago gu vathu va vboheya mutshadho. Litshigu nya mutshadho, patwa wa gu tumbisa Jehovha gu khuwo va na haladzana ni gu ningana githawo na va ngo vbanya. Na hi nga si hungi makungo nyo khaguri, hi yede guti gwadi satshavbo si pategago. (Leri Mavingu 20:25.) Isoso si ngu thuma ngudzu avbo nya mutshadho. Tepo nya gu namorari, khiyo tepo vathu vavili va tivanago gwadi ni gu bwe va hunga makungo nya yadi. Dzimbe dzitepo, makungo yayo gu hegisa khu gu tshadha mwendro gu digana. Va gu tshuka vathu vavili va ema gu namorari, isoso kha si thuli gu khiso va di gira gilo nyo vivbe. Wulangani nya isoso tepo nyo namorari, khiyo tepo vathu va hungago gu khavo va na tshadha mwendro ne.
4 Khu ginani si gu na ni lisima gu manega ni mawonelo nya yadi khu gu namorari? Vale va si tshadhigo va gu manega ni mawonelo nya yadi, kha va na nga namorari ni muthu nyo khaguri va gu mba vbweta gu tshadha naye. Ganiolu, khandri ava va si tshadhigo basi va yedego gu manega ni mawonelo nya yadi khu gu namorari, ganiolu hatshavbothu. Khu giyeyedzo, vathu nyo khaguri va gu pimisa gu khavo vathu vavili va gu pheya gu namorari va yede gu tshadha. Mapimo yoyo ma gu kuha kharini Makristo ma si tshadhigo? Ndriyathu nya nyamayi a vbanyago Estados Unidos nyo pwani khu Melissa wari, khuye: “Tepo ndriyathu nya mwama ni ndriyathu nya nyamayi va pheyago gu namorari, vandriyathu nyo khaguri va gu vireya gu khavo va tshadha. Kha nga handro wakone, vandriyathu nyo khaguri va gu potsa gu ema gu namorari ambari silo so ba si si gimbiyi gwadi. Nigu vambe kha va vbweti ni gu si khuta kholu isoso si nga va gira va garadzega.”
Mukhedziseyi 05.24 paj. 22, par. 8
U nga yi mana kharini pari nya yadi gasi gu tshadha nayo?
8 Mitshanganoni nya libandla mwendro tepo u vbungadzago, u nga si kodza gu wona gu khuwe muthu yoyo a vidzidwe khu liphuvboni, makhalelo ni mavbanyelo muni a gu nawo. Khu dzevbini dzipari dzaye nigu a gu gola gu bhula khu ginani? (Luka 6:45) Misuwo yaye yi ngu fana ni eyi yago? U nga bhula ni madhota ya libandlani gwaye mwendro Mukristo a vidzidwego a mutigo gwadi. (Mav. 20:18) U nga wudzisa maningano khu mavbanyelo ni makhalelo yaye. (Rute 2:11) Tepo u hevbulago muthu yoyo, tiyisega gu khuwe khandri wa gu gira silo si na mu girago a si dzipwi gwadi. Ninga lisima edzi a dzipwago khidzo u bwe u mu yeyedza githawo.
Mukhedziseyi 05.24 dzipaj. 28-29, dzipar. 7-8
U nga gira kharini gasi gu namorari khu ndziya yi tsakisago Jehovha?
7 Hi ngati kharini edzi muthu a gu idzo khu ndrani? Mweyo nya dzindziya nyo gire khiyo isoso khu gu ganeya naye nu tshulegide, u si mu lipheyi, u mu gira siwudziso ni gu mu engiseya gwadi. (Mav. 20:5; Jak. 1:19) Gasi gu gira isoso, mu nga gira silo nyo khaguri gumogo nya nga guhodza, gu gimbiya malanga gu gu na ni vathu ni gu tshumayela gumogo. Mu nga tivana gwadi gambe khu gu vbedza tepo nyo khaguri ni dzipari dzanu ni valongo vanu. Vbavbandze nya isoso, girani silo si na yeyedzago edzi a gu idzo moyo ni moyo wanu ga siemo nyo hambane ni ga vathu nyo hambane. Wona esi Aschwin ndriyathu wa Holanda a zamidego gu gira. Uye a gu ganeya khesi a nga gira ni Alicia. Uye wari, khuye: “Hi di vbwetedzeya mithumo yi nga hi phasa gu tivana gwadi. Dzitepo nya dzingi hi di gu gira mithumo nyo vbevbuge, nya nga gu phula hatshavbo mwendro gu gira yimbe mithumo ya ndrangani. Tepo hi nga ba hi gira mithumo yoyo hi di gu tugula makhalelo nya yadi ya moyo ni moyo wathu ni sihosohoswana nyo khaguri.”
8 Mu nga tivana gambe khu gu hevbula mwatshavbo silo nya liphuvbo. Wa gu tshadha u na ba u yede gu dzi ninga tepo gasi gu gira wukhozeyi nya ndranga gasi gu Nungungulu a gira gipandre nya mutshadho wanu. (Muh. 4:12) Khu kharato, khu ginani mu gu mba dzi ninga tepo nyo hevbule mwatshavbo olu mu namorarigo? Lisine gu ava va namorarigo va si gu khali ndranga nigu ndriyathu nya mwama a si gu khali hungo nya ndranga. Khu kharato, mwa gu hevbula gumogo tepo yatshavbo mu nati edzi moyo ni moyo wanu a vidzidwego khidzo khu liphuvboni. Max ni Laysa a gu patwa wu vbanyago Estados Unidos wu wuyedwe khu gilo nyo khaguri, uwo wari khuwo: “Tepo hi nga pheya gu namorari hi di dzegeya gu hevbula mabhuku ma nga ba ma ganeya khu gu namorari, gu tshadha ni ndranga. Mabhuku yoyo ma hi tulede lithomo nyo hevbule mahungu nya lisima ma nga hadzi gu hi garadzeya gu pheya gu bhula khayo.”
Kemba dzithomba nya liphuvbo
Mukhedziseyi 03.16 dzipaj. 4-5, dzipar. 4-5
Ina u dongide gasi gu bhabhatiswa?
4 Bhibhiliya kha yi ganeyi gu khiyo ava va yedego gu bhabhatiswa khava va gu va khongolo mwendro va dandridego khu tanga. Khu giyeyedzo, Mavingu 20:11 wari, khuye: “Ambari gyanana gi ngu dzi yeyedza khu mithumo ya[gyo], mavbanyelo ya[gyo] ma gu bani ma agide ni gululama.” Khu kharato, ambari muphya a nga hatha gu gira esi nya sadi a bwe a pwisisa esi si thulago gu dzi hendzeledza ga Muvangi. Khu ndziya yeyi, gasi gu muphya a yeyedza gu khuye a vidzidwe nigu a dzi hendzeledzide ga Jehovha, uye a yede gu bhabhatiswa. — Mav 20:7.
5 So thula ginani gu khala muthu a vidzidwego? Gu vidzwa so pata nya singi guvbindra gu dandra givili. Bhibhiliya yari khiyo muthu a vidzidwego khoyu a “thumisago makodzelo ya[ye] nyo pimise gasi gu hambanisa silo nya sadi ni silo nya mba sadi.” (Hebh. 5:14) Vathu va vidzidwego va ngu siti esi si gu sadi mahoni ga Jehovha nigu va dzi emisede tepo yatshavbo gu gira isoso. Kha si vbevbugi gu va kutsedzedwa gu gira silo nyo vivbe. Nigu gambe kha si vbwetegi gu muthu a khaleya gu va dundrugisa gasi va gira silo nya sadi. Khu kharato, muphya a vbwetago gu bhabhatiswa a yede gu engisa Nungungulu ambari nari mwalo vbafuvbi ni vavelegi vaye mwendro vambe va gu va khongolo, khandridzo? — Wona Vafilipi 2:12.