Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2025 Watch Tower Bible and Tract Society of Pennsylvania
1-7 NYA SETEMBRO
DZITHOMBA NYA LITO LA NUNGUNGULU | MAVINGU 29
Gu potsa sihevbudzo ni siolovedzo si gu mba tsakisa Jehovha
Mukhedziseyi nya vathu vatshavbo 16 N.° 6 paj. 6, kwadru
Silo sa liphuvboni hi gu mba si kodza gu si wona
Dzimiliyoni nya vathu muhuno vomo wugumbini khu kotani nya madhemoni mwendro khu gu thava maphuvbo nyo vivbe. Gasi va dzi vhikeya ga maphuvbo nyo vivbe, avo va ngu thumisa dzikolari ni simbe silo. Ganiolu, uwe kha wu yeli gu thumisa silo sesi. Nungungulu nya lisine, Jehovha, a na ni tshivba ngudzu guvbindra Sathane. Wa gu tumba Jehovha, uye a na gu vhikeya. Bhibhiliya yi ngu hi tiyisegisa gu khiyo: “Maho ya Pfhumu Nungungulu, ma gu khedza mafuni gwatshavbo gasi gu yeyedza tshivba yaye ga vale va mu vbwetago khu monyo wawe watshavbo.” — 2 Dzikoronika 16:9.
Gu hevbula esi si tsakisago Jehovha ni gu si thumisa, gilo nya lisima gasi gu vhikedwa khuye. Khu giyeyedzo, dziteponi dza Vapostoli, Makristo ya dhoropani ya Efeso ma di dzega yatshavbo mabhuku ma ganeyago khu wudhemoni va ma vbisa. (Mithumo 19:19, 20) Khu ndziya nyo fane, gasi Nungungulu a hi vhikeya hi yede gu dzudzuga ni gevbini gilo gimbileyanago ni wudhemoni. Isoso so pata sifananiso, mabhuku ma ganeyago khu wudhemoni, sihambanu ni dzikolari nya gu “vhikeye.”
Mukhedziseyi 04.19 paj. 17, par. 13
U nga beleyi sihena si gu mba seketedwa khu Bhibhiliya maningano ni gufa
13 Wo ba u kanakaneya sihena mwendro sigiro nyo khaguri khava va fudego, gombeya ga Jehovha, u mu lomba guti gwaye. (Leri Jakobe 1:5.) Khavbovbo u gevisisa omu nya mabhuku yathu. Sa gu lombega, wudzisa madhota ya libandlani gwago. Ayo kha ma na nga gu embeya esi u yedego gu gira, ganiolu ma nga gu phasa gu mana matshina nya milayo nya Bhibhiliya nya yadi, nya nga aya ma tshamusedwego vbatshaniyana vbavba. Tepo u girago isoso, wo dzi olovedza gu thumisa makodzelo yago nyo ‘hambanise’ silo, nigu makodzelo yoyo ma na gu phasa gu “hambanisa esi nya sadi ni esi nya guvivbe.” — Heb. 5:14.
Mukhedziseyi 11.18 paj. 11, par. 12
‘Nyi na gimbiya lisineni’
12 Sigiro ni siolovedzo nyo vivbe. Adzina saye valongo vathu, sithumi khwathu mwendro sihevbuli khwathu va nga zama gu hi kutsedzeya gu patega avba nya festa yi ngu mba tsakisa Nungungulu. Ginani gi nga hi phasago gu pala mikutsedzelo yoyo? Hi yede gu dundruga tepo yatshavbo gu khethu khu ginani Jehovha a gu mba tsakiswa khu dzifesta dzodzo. Hi nga gevisisa omu nya mabhuku yathu omu yi dugeleyago umo feriyadhu yoyo. Tepo hi dundrugago khu sighelo si girago Bhibhiliya yi hi embeya gasi hi si pategi omu nya sigiro soso, hi ngu engedzeya gu tiyisega gu khethu hi ngu gimbiya khu ndziya yi “tsakisago pfhumu.” (Efes. 5:10) Ha gu tumba Jehovha ni Lito laye, kha hi na nga ‘thava muthu.’ — Mav. 29:25.
Kemba dzithomba nya liphuvbo
Mukhedziseyi 10.17 paj. 9, par. 11
“Yeyedza lihaladzo khu mithumo ni lisine”
Ninga wuzundzo wu khugeyago monyoni. Hi yede gu vbwetedzeya mathomo gasi gu ninga wuzundzo. Tepo hi zundzago vandriyathu, avo va na kutsega gu engedzeya gu gira esi nya sadi. (Efes. 4:29) Ganiolu, hi yede gu va zundza na si khugeya monyoni. Ganiolu, wa gu zundza muthu nyo khaguri na si si khugeyi monyoni, u na mu gira a pheya gu manega ni mambapi mahala. (Mav. 29:5) Nigu gambe si vivbide gu ninga wuzundzo muthu nyo khaguri khu gu thava basi gu mana thumo nya gu mu phasi gu tshukwadzisa. Oyu a ningago wuzundzo, ganiolu khu hwane a ganeya gu vivba khu muthu yoyo, mupfhadzedzeyi. Mupostoli Pawulo a di gu ninga wuzundzo wu khugeyago monyoni. Uye a di zundza vandriyaye Korinto khu silo nya sadi va nga ba va gira. (1 Kor. 11:2) Ganiolu, ga simbe siemo avo kha va nga ba va yedwe gu zundzwa. Khu kharato khu ndziya nya yadi, Pawulo a di va yeyedza gu khuye va di yede gu tshukwadzisa. — 1 Kor. 11:20-22.
8-14 NYA SETEMBRO
DZITHOMBA NYA LITO LA NUNGUNGULU
“U nga nyi ningi wusiwana mwendro gughanya”
Mukhedziseyi 01.18 dzipaj. 24-25, dzipar. 10-12
Lihaladzo li gu mba resa litsako
10 Hatshavbo hi ngu dzina dzitsapawu. Kholu idzo dzi ngu hi vhikeya khu ndziya nyo khaguri. (Muh. 7:12) Ina muthu a ngu si kodza gu tsaka khu gu manega ni dzitsapawu nyo dzi vbanyise khidzo basi? Si ngu kodzega! (Leri Muhevbudzi 5:12.) Githumi gya Jehovha gya gale nyo pwani khu Aguri, gi di gombeya gu khigyo: “U nga nyi ningi wusiwana mwendro gughanya, nyi ninge guhodza gu nyi enelelago.” Si ngu vbevbuga gu pwisisa gu khethu khu ginani Aguri a nga ba a si dzini gu khala gisiwana nya gikhongolo. Kha nga edzi a nga tshamuseya khu gu landreya, uye kha nga ba a vbweta gu lingwa guba, kholu Nungungulu a ngu nyenya ava vabago. Ganiolu, khu ginani uye a nga gombeya gu khuye kha nga ba a vbweta gu ghanya? A tshamusede gu khuye: “Gasi gu si giregi gu, nya gu khura ngudzu nyi tshuka nyi gu danga, kheni: ‘Khu mani Uye Pfhumu Nungungulu wakone?’” (Mav. 30:8, 9) Nya mba tsakisa khu gu, vambe va ngu tumba dzithomba khu kharato va divala Jehovha.
11 Oyu a haladzago dzitsapawu kha si kodzi gu gira gugola ga Jehovha. Jesu a di khuye: “Mwalo a si kodzago gu thumeya dzipfhumu dzimbili, kholu a na nyenya yimbe, a gola eyi yimbe. Mwendro a na ninga githawo yimbe, a kanyisa eyi yimbe. Kha si kodzegi gu thumeya Nungungulu ni gu thumeya dzithomba.” Na si ganeye isoso, Jesu a di ninga wusingalagadzi wu gu khuwo: “Mu nga hengeledzeyi dzithomba mafuni omu si kodzegago gu hodzwa khu muhwa ni feruji ni gu beya dzimbafa dziba. Ganiolu, hengeledzeyani dzithomba ndzadzini, omu si si kodzegigo gu hodzwa khu muhwa ni feruji, omu si si kodzegigo gu beya dzimbafa dziba.” — Mat. 6:19, 20, 24.
12 Vathu nya vangi va tugude gu khavo va ngu si kodza gu manega ni litsako khu gu vbevbugisa womi wawe. Gu diga isoso, gu vbevbugisa womi si ngu hi phasa gu thumeya Jehovha khu ndziya nya yadi, kholu hi ngu tshaledwa khu tepo nya yingi gasi hi khataleya silo sa liphuvboni. Wona giyeyedzo gya Jack, a vbanyago Estados Unidos. Uye a di rengisa ndranga yaye ni empreza yaye gasi a thuma kha nga piyonero ni mwangadzi waye. Uye a di khuye: “Ethu hi di gu vbanya ga ndranga nyo mbure ngudzu yi nga ba yi romo ga wulanga nya wukhongolo. Kha sa hi vbevbugeya gu diga satshavbo sesi. Ganiolu, ndrani nya myaga nya yingi, eni nyi di gu vboha gaya na nyi garadzegide khu kotani nya sigaradzo. Ganiolu mwangadzi wangu a nga ba ari piyonera nya tepo yatshavbo, a di gu khala na tsakide. A di gu ganeya gu khuye: ‘Eni nyi na ni patrawu nya wadi guvbindra vatshavbo!’ Olu aneni nyo thuma kha nga piyonero. Nigu ha vavili hi na ni lithomo nya gu thumeye Jehovha.”
Mukhedziseyi 15/5/87 paj. 30, par. 8
Ninga githawo Jehovha nigu u na tsaka
◆ 30:15, 16 — Khu yevbini pontu avba nya siyeyedzo sesi?
Iso sa gu tshingisa wudogodogo nya wukhongolo. Dzitshundrwa dzi ngu munyeya novba nya wungi, khu ndziya nyo fane vathu va gu na ni wudogodogo tepo yatshavbo va ngu vbweta dzitsapawu nya dzingi ni gu manega ni wufumo. Khu ndziya nyo fane, lithowo kha li tali, ganiolu la gu simama na li tulegide gasi gu hakha ava vafago. Nyamayi a gu mba velega a gu ‘dileya’ sanana. (Genesi 30:1) Mafu nya gihala ma ngu ndrindra mati nya ndzadzi, khu gu landreya ma banga gambe. Nigu nilo wu vbisago gilo gi rinyidwego ndrani gwawo, wu ngu engedzeya gu khondra nyo bwe wu vbisa simbe silo si gomogo vbafuvbi. Khiso sasimweso si giregago ni ava va gu na ni wudogodogo. Ganiolu, ava va gimbidziswago khu guti ga Nungungulu kha va thegeyi avba nya naphwi wowu.
Mukhedziseyi 1/6/11 paj. 10, par. 4
Hi nga vbanya kharini guya khesi hi si manago?
Vegedzeya dzitsapawu nyo khaguri na wu si rengi gilogyo. Ambari si girago gu khatshi si vbindredwe, gu vegedzeya dzitsapawu na wu si rengi gilo nyo khaguri ndziya nya yadi nya gu potsi gu manega ni sigaradzo nya dzitsapawu. Khu gu gira isoso, vathu nya vangi va ngu potsa gu gira mangava ni gu manega ni sigaradzo si vangwago khu mangava, nya nga dzijuru nya dzingi ngudzu dzi engedzeyago tengo nya dzitsapawu nya egi u nga renga. Bhibhiliya ya gu ganeya gu khiyo wuguhudzi ‘wugengede’ kholu wa gu ‘vegedzeya guhodza khu tepo nya gu vbwere’ gasi gu wu thumisa mindru wa tshigu. — Mavingu 6:6-8; 30:24, 25.
Mukhedziseyi 06.24 paj. 13, par. 18
Simama gu khala pfhumba wa Jehovha kala gupindruga!
18 Si na ba siri sadi gu hi ema hi dundrugeya khu mawonelo hi gu nawo maningano khu dzitsapawu. Dzi wudzise gu khuwe: ‘Ina nyi ngu khaleya gu pimisa khu dzitsapawu ni esi nyi nga hadzi gu renga nya gu dzi mana? A gu tshuka muthu nyo khaguri a nyi lomba dzitsapawu, ina nyi ngu hweya gu mu bweledzeya nyi pimisa gu kheni kha na nga dzi vbweta olu? Ina nyi ngu dzi wona na nyiri ni lisima ngudzu gu vbindra vambe, khu gu ba nyiri ni dzitsapawu nya dzingi? Ina si ngu nyi garadzeya gu yeyedza wuwadi vambe? Ina nya gu wona vandriyangu na va gu landriseya dzithomba khu gu ba vari ni dzitsapawu? Ina nya gu gira wupari ni vathu va nga ghanya, nyi si giri wupari ni vathu nya sisiwana?’ Si na ni lisima gu dzi gira siwudziso sesi, kholu ethu hi na ni lithomo nya likhongolo ngudzu nya gu khale vapfhumba va Jehovha. Ganiolu, hi na si kodza gu simama gu khala vapfhumba va Jehovha ha gu mba gola ngudzu dzitsapawu. Ha gu gira isoso, Jehovha gima kha na nga hi diga. — Leri Vahebheru 13:5.
Kemba dzithomba nya liphuvbo
Mukhedziseyi 15/4/09 paj. 17, dzipar. 11-13
Sivangwa sa gu yeyedza guti ga Jehovha
11 Procávia girengo nya gidugwana ngudzu gi nga hi hevbudzago silo nya lisima. (Leri Mavingu 30:26.) Procávia yi ngu fananyana ni gihulo nya gikhongolo, ganiolu igyo gi na ni dzindzeve nya dzidugwana nya redhondhu nigu mawundru yagyo ma rode. Girengo gegi nya gidugwana gya gu vbanya omu nya siwindri. Igyo gi ngu wona gwadi, nigu gya gu vbanya omu nya dziphago gasi gu dzi vhikeya ga simbe sirengo. Procávia yi di vangwa ni makodzelo nya gu vbanye khu tsawa, nigu isoso si ngu yi vhikeya ni gu yi phasa gu furumeya tepo nya girame.
12 Hi nga hevbula ginani khu girengo gegi? Gupheya, wona gu khuwe girengo gegi gya gu khala na gi gengede gasi gi si vangedwi sigaradzo khu gu vbevbuga. Igyo gya gu thumisa makodzelo yagyo nya gu wone gwadi gasi gu wona simbe sirengo khu hwindzo, ganiolu na gi romo vbafuvbi ni phago yagyo. Anethu hi yede gu gengeya khu liphuvboni gasi hi si kodza gu wona dzimhango dzi gu mba wonega gwadi tigoni momu ga Sathane. Mupostoli Pedro a di gengedza Makristo gu khuye: “Mu nga pfhali khu gilo! Khalani na mu gengede! Nala wanu, Dhiyabhulosi, a ngu mi dzuwulugeya kha nga ngala yi ngurangurago na yi gu vbweta muthu nya gu mu hodze.” (1 Ped. 5:8) Tepo khiyo a nga ba a romo mafuni, Jesu simamide na gengede gasi gu tugula mano Sathane a nga hadzi gu yi thumisa gasi gu mu gira a si tumbegi. (Mat. 4:1-11) Uye a ningide giyeyedzo nya gyadi valandreyi vaye.
13 Mweyo nya dzindziya hi nga simamago khidzo na hi gengede, khu gu wuyedwa khu malulamiselo Jehovha a hi ningago gasi gu hi vhikeya. Hi yede gu hevbula Lito la Nungungulu ni gu hongola mitshanganoni tepo yatshavbo. (Luka 4:4; Hebh. 10:24, 25) Gu diga isoso, gu fana ni procávia yi vbanyago khu tsawa nigu khu wumowo, anethu hi yede gu simama vbafuvbi ga vandriyathu ‘gasi hi tiyisana khu gyathu.’ (Rom. 1:12) Khu gu dzumeya gu vhikedwa khu Jehovha, hi ngu yeyedza gu khethu hi ngu dzumeleyana ni esi muembi Dhavhidhe a lovidego tepo a nga khuye: “Pfhumu Nungungulu, givhikelo gyangu, likhokhola langu, mudzegisi wangu; nyi ngu thavela gwaye.” — Ndzi. 18:2.
15-21 NYA SETEMBRO
DZITHOMBA NYA LITO LA NUNGUNGULU | MAVINGU 31
Esi hi si hevbulago khu wusingalagadzi mamayi a ningago gyanana gyaye
Mukhedziseyi 1/2/11 paj. 19, dzipar. 7-8
Hevbudza sanana sago sihevbudzo si ganeyago khu mavbanyelo
Hevbudza lisine latshavbo maningano ni gu hengeya malawu. Si na ni lisima gu ninga sigengedzo. (1 Vakorinto 6:18; Jakobe 1:14, 15) Bhibhiliya ya gu tshamuseya gu khiyo gu hengeya malawu giningwa gya Nungungulu nasiri naphwi wa Sathane. (Mavingu 5:18, 19; Gizimba 1:2) Wa gu hevbudza sanana sago basi khu dzimhango nya gu hengeye malawu, si nga gira si manega ni mawonelo nya mba yadi khu gu hengeya malawu gu hambana ni esi Bhibhiliya yi ganeyago. Muphya nyo pwani khu Corrina a vbanyago França, wari khuye: “Vavelegi vangu va di gu ganeya ngudzu khu wubhayi nigu isoso si nyi giride nyi wona gu hengeya malawu khu ndziya nya mba yadi.”
Tiyisega gu khuwe gyanana gyago gi nguti satshavbo maningano ni gu hengeya malawu. Nadia, mamayi nyo khaguri a vbanyago México, wari khuye: “Eni tepo yatshavbo nyi di gu zama gu hevbudza sanana sangu gu kheni gu hengeya malawu gilo nyo mbure nigu Jehovha a di vanga vathu ni gudogoreya nyo gire isoso gasi va tsaka. Ganiolu, ava va yedego gu hengeya malawu khu vale va tshadhidego. Edzi hi girago khidzo isoso, si nga resa litsako mwendro sigaradzo.”
Ajuda para a Família ndrima 4, dzipar. 11-13
Edzi u nga ganeyago khidzo ni gyanana gyago khu mahungu ma ganeyago khu wadwa
Pheya khuwe gu ganeya khu mahungu yoyo. Mark, papayi nyo khaguri a vbanyago Grã-Bretanha, wari khuye: “Si ngu garadzeya sanana gu pwisisa mahungu ma ganeyago khu gu seya wadwa. Nyi di wudzisa gyanana gyangu gi gu na ni 8 myaga gu kheni ina si vivbide gu seya wadwa mwendro ne. Nyi di gira isoso khatshi ho hagana, khavbovbo igyo gi di tshulega gu ganeya.”
Wa gu ganeya khu mahungu ma ganeyago khu wadwa ga siemo nyo hambane-hambane, isoso si na khala hungoni ga gyanana gyago. Guya khu tanga yagyo, mahungu ma ganeyago khu wadwa ma nga gira gipandre nya mambe mahungu nya lisima, nya nga gu tshatuga extradha khu wugengeyi ni gu hengeya malawu.
Ninga giyeyedzo. Sanana si ngu fana ni exponja: iso sa gu ndrindra satshavbo si gu romo vbafuvbi gwaso. Nigu wugevisisi nyo khaguri wa gu yeyedza gu khuwo vavelegi khavo vathu nya gu pheye va kutsedzeyago sanana sawe. Isoso so thula gu khiso wa gu wona wadwa nga gilo nyo pheye gasi gu dusa estresse, gyanana gyago gi na dandra na gi gu pimisa gu khigyo wadwa rendre nya sigaradzo. Khu kharato, khala giyeyedzo nya gyadi. U yede gu thumisa wadwa khu wugengeyi.
Khendzugani! 17 N.° 6 paj. 9, par. 5
Hevbudza gyanana gyago gu dzi nogisa
Kutsa gyanana gyago gu yeyedza wuwadi. Yeyedza gyanana gyago gu khuwe “a ngu tsaka oyu a ningago guvbindra oyu a hakhago.” (Mithumo 20:35) Khu ndziya muni? Gumogo nagyo, girani sasamedzo nya vathu va vbwetago giphaso. Vathu nyo khaguri mu vatigo va nga vbweta giphaso gasi gu renga silo, gu lungisa gilo nyo khaguri mwendro gu hongola mambe malanga. Dzega gyanana gyago tepo u hongolago uya phasa vathu vovo. Gira gyanana gyago gi wona litsako u li manago khu gu phasa vambe. Khu kharato, u na si kodza gu hevbudza gyanana gyago gu dzi nogisa khu ndziya nya yadi, a gu giyeyedzo gyago. — Litshina nya Bhibhiliya: Luka 6:38.
Kemba dzithomba nya liphuvbo
Mukhedziseyi 1/11/92 paj. 11, dzipar. 7-8
Mahevbudzelo matshigoni nya Bhibhiliya
7 Israyeli, sanana si di gu hevbudzwa na si ngari sidugwana ngudzu khu papayi ni mamayi waso. (Dhewuteronome 11:18, 19; Mavingu 1:8; 31:26) Omu nya Dicionário da Bíblia khu Gifrancês, gihevbuli nyo pwani khu E. Mangenot gi lovide gu khigyo: “Tepo gyanana gi nga ba gi pheya gu ganeya, gi di gu hevbula sipandre nyo khaguri nya nayo. Mamayi wagyo a di gu phindra-phindra livhesi lalimwedo nigu tepo gi nga ba gi li pwisisa a di gu gi hevbudza limbe. Khu gu landreya, a di gu vega mandzani ga sanana saye lowo si nga ba si wu vegiside hungoni. Khu ndziya yoyo, iso si di gu dandra na si kodza gu leri nigu tepo si nga ba siri sikhongolo si di gu simama gu hevbula Nayo wa Pfhumu ni gu dundrugeya khuwo.”
8 Isoso so yeyedza gu khiso ndziya nya yadi nya gu hevbudze gu diri gu hevbudza sanana gu vegisa silo hungoni. Esi si nga ba si hevbula omu nya Nayo wa Jehovha ni edzi a nga ba a phara khidzo vathu vaye si di yede gu kuha monyo waso. (Dhewuteronome 6:6, 7) Iso gambe si di yede gu dundrugeya khu Nayo. (Ndzimo 77:11, 12) Gasi gu phasa vaphya ni ava va dandridego gu vegisa Nayo hungoni, si di gu thumiswa silo nya singi gasi gu va phasa gu gira isoso. Isoso di gu pata dziletra dzi nga ba dzi sasamedzwa khu alfabético, ganiolu dzi nga ba dzi pheya gu letra nyo hambane (nya nga Mavingu 31:10-31); aliteração (malito ma pheyago khu letra nyo fane); ni gu thumiswa dzinumeru, nga edzi si thumisidwego khidzo omu ga gipandre nya wuvili ga gipimo 30 nya Mavingu. Si ngu samadzisa gu dziti gu khethu sihevbuli nyo khaguri sa gu pimisa gu khiso Kalendharyu ya Gezeri giyeyedzo nya edzi gu nga ba gu lowa khidzo khu Gihebheru gale, nigu iyo yi diri thumo wa xikwatuno.
22-28 NYA SETEMBRO
DZITHOMBA NYA LITO LA NUNGUNGULU | MUHEVBUDZI 1–2
Simama gu trenari vaphya
Mukhedziseyi 01.17 dzipaj. 27-28, dzipar. 3-4
Phasa vaphya gu khathaleya yimbe mithumo
3 Nya vangi gwathu va ngu wu gola thumo va gu nawo nigu va ngu dogoreya gu wu gira kala gupindruga. Nya mba tsakisa khu gu, vathu va ngu gumba nigu va yede gu tshikedzwa khu vaphya. (Muh. 1:4) Guvbindrugedza gogo gu ngu garadza matshigoni yathu khu kotani nya olu hengeledzano yathu yi manegago ni guvbindrugedza nya gungi. Kha nga olu thumo wa Jehovha wu dandrago, hi yede gu tshukwadzisa edzi hi girago khidzo silo nyo khaguri, si patago gu thumisa dzitecnologia nya dziphya. Ga vandriyathu nyo khaguri va dandridego khu tanga, si ngu va garadzeya gu dzi pwananisa ni guvbindrugedza gogo. (Luka 5:39) Nigu vale va si kodzago gu dzi pwananisa ni gu vbindrugedza gogo va mwalo tshivba nga gale. (Mav. 20:29) Khu kharato, tepo vandriyathu va dandridego khu tanga va trenarigo vaphya gasi gu gira mithumo nya yingi, isoso khyadi gwawe ni hengeledzano. — Leri Ndzimo 71:18.
4 Vambe va gu na ni mithumo nya yingi hengeledzanoni adzina va nga wona na si va garadzeya gu ninga yimbe mithumo vaphya. Khu ginani? Vambe khu gu kha va vbweti gu diga thumo va wu golago ngudzu. Vambe va gu thava gu diga gu thangeya silo. Vambe gambe va ngu pimisa gu khavo vaphya kha va na nga si kodza gu gira gwadi silo gufana navo. Vambe va ngu pimisa gu khavo va mwalo tepo nya gu trenari vambe. Ganiolu, vaphya anavo va yede gulaphisa-moyo abari gu va si hakhe mithumo va yi vbwetago.
Kemba dzithomba nya liphuvbo
Perspicaz “Muhevbudzi” par. 1
Muhevbudzi
Lina nya Gihebheru, Qo·hé·leth (li tshamuseyago “Muhevbudzi ni Mutshanganisi”), la gu tshamuseya gambe thumo wu nga ba wu girwa khu dzipfhumu nya mufumo wa Israyeli. (Muh 1:1, 12) Wu diri thumo wa oyu a nga ba a fuma gu phasa vathu va Nungungulu gu manega ni wumowo ni gu tumbega gambe ga Pfhumu nya lisine, Nungungulu. (1Dzf 8:1-5, 41-43, 66) Khu gighelo gyogyo, gasi pfhumu yi wonega gu khiyo khyadi mwendro ne, si di gu wonega khu gu phasa vathu va Nungungulu gu simama gu mu khozeya. (2Dzf 16:1-4; 18:1-6) Oyu a nga ba a tshanganisa, a gu Solomoni, a di giride nya singi gasi gu tshanganisa Israyeli, dzipari dzaye ni vambe vathu, tempeleni. Avba nya libhuku leli, uye a di zama gu tshanganisa vathu va Nungungulu gasi a va hambanisa ga sihevbudzo nya gu vivbe sa mafuni momu a bwe a va phasa gu hevbula khu Nungungulu, va nga ba va dzi hendzeledzide gwaye. Lina li thumiswago omu nya Dzibhibhiliya dzathu nya gitsungu li di duswa omu nya wuvbindrugedzeyi nya Qo·hé·leth, nya Septuaginta grega, a gu, Ek·kle·si·a·stés (Muhevbudzi), li tshamuseyago “givbango gya eclésia (libandla, asembleya).”
29 NYA SETEMBRO–5 NYA OUTUBRO
DZITHOMBA NYA LITO LA NUNGUNGULU | MUHEVBUDZI 3–4
Tiyisa mutshadho wago
Ajuda para a Familia ndrima 10, dzipar. 2-8
U nga woneleya kharini edzi mu nga thumisago khidzo tecnologia ndrani nya mutshadho wanu?
● Tepo hi thumisago gwadi tecnologia, isoso si nga tiyisa mutshadho wathu. Khu giyeyedzo, yimbe mipatwa yi ngu oloveya gu rumeyana dzimesaji ndrani nya litshigu. Khu ndziya yoyo, iyo yi ngu si kodza gu bhula ambari na va romo hwindzo.
“Gu rumeya mesaji yi gu khiyo ‘Nyi ngu gu haladza’ mwendro ‘Nyi ngu gu suva’ si nga tiyisa wupari nya patwa.” — Jonathan.
● Ha gu mba thumisa gwadi tecnologia, isoso si nga ghoha mutshadho wathu. Khu giyeyedzo, vathu nyo khaguri va ngu thumisa telefoni tepo yatshavbo. Khu kotani nya isoso, mwama mwendro mwangadzi a nga dzipwa na si khathaledwe kha nga edzi a si vbwetago khidzo.
“Nyi ngu tiyisega gu kheni mwama wangu na bhude ni eni nari khatshi kha nya nga ba nyi thumisa ngudzu telefoni.” — Julissa.
● Vathu nyo khaguri va ngu ganeya gu khavo va ngu si kodza gu bhula ni vama vawe mwendro vagadzi vawe ambari na va thumisa telefoni mwendro thableti. Vathu nya vangi va gu pimisa gu khavo gu gira silo nya singi khu tepo yayimweyo makodzelo, ganiolu isoso khandri lisine. Socióloga Sherry Turkle, wari khuye: “Ha gu dzi pemba ha gu pimisa gu khethu hi nga si kodza gu gira silo nya singi khu tepo yayimweyo.” Uye a ngu engedza gambe gu khuye: “Tepo hi zamago gu gira silo nya singi khu tepo yayimweyo si na hi garadzeya gu gira gwadi mithumo yoyo.”
“Gwadi gu bhula ni mwama wangu, ganiolu na sa pharega khu yimbe mithumo. Tepo uye a thumisago telefoni na nyi gu ganeya naye, so gira gu khatshi o nyi embeya gu khuye o hatha gu thumisa telefoni.” — Sarah.
Malito nyo sege: Ndziya u thumisago khiyo tecnologia yi nga tiyisa mwendro gu ghoha mutshadho wago.
Mukhedziseyi 05.23 dzipaj. 23-24, dzipar. 12-14
‘Lihaladzo li ngu dzura gu fana ni malavbelavbe nya nilo’
12 Mipatwa yi nga pimedzeya kharini Akila ni Prisila? Dundrugeya khesi uwe ni pari yago nya wugadzi mu yedego gu gira. Ina mu nga gira mithumo nyo khaguri gumogo, wulangani nya gu moyo ni moyo a gira enga? Khu giyeyedzo, Akila ni Prisila va di gu tshumayela gumogo. Ina u nga dzi vegeya misuwo nyo gire sasimweso? Akila ni Prisila avo gambe va di gu thuma gumogo. Adzina saye uwe ni pari yago nya wugadzi kha mu giri thumo wa wumowo, ganiolu mu nga gira mwatshavbo mithumo ya ndrangani. (Muh. 4:9) Tepo mu girago mwatshavbo thumo nyo khaguri, mwa gu dzipwa na mu thuma khu tsawa, nigu mwa gu mana lithomo nya gu manege ni mabhulo. Robert ni Linda va na ni 50 myaga ni guvbindra na va tshadhide. Robert wari khuye: “Khu lisine, ethu hi mwalo tepo nya yingi gasi gu hi hagana gumogo. Ganiolu, tepo nyi handzago dziparatu, mwangadzi wangu na gu dzi bangisa mwendro tepo nyi khathaleyago jardim, mwangadzi wangu a duga vbavbandze gasi guta thuma gumogo ni eni, eni nyo tsaka ngudzu. Tepo hi girago mithumo hatshavbo, isoso si ngu tiyisa wupari wathu nigu lihaladzo lathu li ngu simama gu dandra.”
13 Dundruga gu khuwe gu khala mwatshavbo basi, kha si thuli gu khiso mu ngu pwanana. Ndriyathu moyo a tshadhidego wa Brazil wari khuye: “Muhuno, ethu ha gu khala ngudzu na hi gu pharegide, nigu si nga vbevbuga gu pimisa gu khethu hi ngu vbedza tepo hatshavbo kholu basi hi khalago ndranga mweyo. Eni nyi hevbude gu kheni hi yede gu gira nya singi guvbindra gu khala wulanga wumowo basi. Nigu eni gambe nyi tugude gu kheni, nyi yede gu khathaleya mwama wangu.” Wona esi Bruno ni mwangadzi waye Tays va girago gasi gu tiyisega gu khavo va ngu khathaleyana gwadi. Uye wari khuye: “Tepo hi gu romo ha vavili, ethu ha gu diga dzitelefoni dzathu hwindzo gasi hi londrola tepo hi gu romo hatshavbo.”
14 Ganiolu, abari gu uwe ni mwama wago kha mu tsakiswi khu gu dzi ninga tepo nya gu khale mwatshavbo ke? Adzina so girega isoso khu kotani nya olu mu gu mba gola silo nyo fane mwendro mo khaleya gu gorosana. Abari kharato, ginani mu nga girago? Dundrugeyani khu gikho hi gi khumbugidego gupheyani. Tepo u khondrisago nilo, uwo kha wu dzegeyi gu khondra ngudzu, gasi nilo wu si kodza gu khondra u yede gu endzedzeya ni gu thedzeya dzikhuni. Khu ndziya nyo fane, wa gu si wona kharini tshigu ni tshigu mu vbedza tepo nya yidugwana mwatshavbo. Girani silo mu na si golago mwa vavili nasiri gu gira silo si na wusago kudzudzwani. (Jak. 3:18) Mwa gu pheya khu silo nya sidugwana, mu na wona gu khenu lihaladzo lanu li naya li dandra vbadugwana-vbadugwana.
Mukhedziseyi 05.23 paj. 21, par. 3
‘Lihaladzo li ngu dzura gu fana ni malavbelavbe nya nilo’
3 Gasi malavbelavbe ya Jehovha ma simama pangoni gwanu, mwama ni ngadzi mu yede gu tiyisa wupari wanu ni Jehovha. Wupari wanu ni Jehovha wu nga mi phasa kharini omu nya mutshadhu wanu? Tepo patwa wu ningago lisima wupari wawe ni Papayi wawe wa ndzadzini, uwo wu na si kodza gu thumisa wusingalagadzi va ningwago khuye. Wusingalagadzi wowo wu na va phasa, gu potsa ni gu pala sigaradzo si vbodzisago lihaladzo lavo. (Leri Muhevbudzi 4:12.) Vale va gu na ni wupari nyo tiye ni Jehovha, va ngu dzi garadzeya gu pimedzeya makhalelo yaye nya nga wuwadi, gu laphisa monyo ni gu divaleya. (Efes. 4:32–5:1) Tepo patwa wu yeyedzago makhalelo yaya, lihaladzo lawe li ngu dandra. Ndriyathu moyo nyo pwani khu Lena a gu na ni 25 myaga ni gu vbindra na tshadhide wari khuye: “Si ngu vbevbuga gu haladza ni gu yeyedza githawo muthu a gu na ni wupari ni Jehovha.”
Kemba dzithomba nya liphuvbo
Perspicaz “Lihaladzo” par. 39
Lihaladzo
‘Tepo nya gu haladzi.’ Lihaladzo kha li yeyedzwi vale va gu mba tsakedwa khu Jehovha, a gu vale va girago silo nya gu vivbe khu nyagigwenye. Lihaladzo la gu yeyedzwa ga vathu vatshavbo kala vathu vovo va yeyedza gu khavo va ngu nyenya Nungungulu. Khu kharato, yi vboha tepo nya gu va si yeyedzwi gambe lihaladzo. Jehovha Nungungulu ni Jesu va ngu gola gululama nigu va ngu nyenya iso si ngu mba gimbileyana ni nayo. (Ndz 45:7; Heb 1:9) Vale va nyenyago Nungungulu nya lisine khu tshivba, kha va yedwi gu yeyedzwa lihaladzo. Khu kharato, kha hi yeli gu simama gu yeyedza lihaladzo vathu vovo, kholu vale va nyenyago Nungungulu kha va mu haladzi. (Ndz 139:21, 22; Isa 26:10) Gu diga isoso, Nungungulu a ngu nyenya vathu vovo nigu nya mba hweya a na va fuvisa. — Ndz 21:8, 9; Muh 3:1, 8.
6-12 NYA OUTUBRO
DZITHOMBA NYA LITO LA NUNGUNGULU MUHEVBUDZI 5–6
Hi nga yeyedza kharini githawo Nungungulu wathu nya khongolo
Mukhedziseyi 15/8/08 dzipaj. 15-16, dzipar. 17-18
Zundza Jehovha khu gu gira silo khu githawo
17 Hi yede gu yeyedza githawo ngudzu-ngudzu tepo hi khozeyago Jehovha. Muhevbudzi 5:1 wari khuwo: “Khedza ngondro wago umo wu gandrago wa gu bani u bela Nyumbani gwa Nungungulu.” Mosi ni Josuwa va di embedwa gasi va tshula dzisandaliya tepo va nga ba va vbweta gu gandra ga wulanga nya gu age. (Ekiso. 3:5; Jos. 5:15) Gu gira isoso, yi diri ndziya nya gu yeyedzi githawo. Vaprista Israyeli, va di yede gu ambala simolowani nya gu girwe khu linyu gasi gu fenengedza “wumbwiri wawe.” (Ekiso. 28:42, 43) Isoso si di gu va phasa gasi va si khale dzitshoni gya gu dugeleya gilo nya mba gi vireya tepo va nga ba romo giluvelutuno. Vatshavbo va nga ba va gira gipandre nya ndranga nya vaprista, va di yede landra gileletelo gyagimwegyo gi ganeyago khu githawo.
18 Khu kharato, wukhozeyi va nga ba va gira wu di gu pata wuzundzo ni githawo. Gasi hi yedwa khu wuzundzo ni gu ningwa githawo, hi yede gu gira silo khu githawo. Kha hi yeli gu thumisa githawo khu ndziya nyo pfhadzedzeye mwendro gasi gu siha edzi hi gu idzo. Githawo gyathu kha gi yedwi gu wonwa basi khu vathu, ganiolu gi yede gu wonwa khu Nungungulu, oyu a wonago myonyo yathu. (1 Sam. 16:7; Mav. 21:2) Githawo gi yede gu gira gipandre nya womi wathu gi bwe gi kutsedzeya edzi hi girago khidzo silo, edzi hi pharago khidzo vambe ni edzi hi dzi wonago khidzo ethu vabune. Khu lisine, hi yede gu yeyedza githawo ga satshavbo siemo ga esi hi ganeyago ni gu gira. Guya khedzi hi girago khidzo silo ni edzi hi ambalago khidzo hi ngu ninga lisima malito ya mupostoli Pawulo ma gu khayo: “Ethu kha hi tshunganisi muthu gasi thumo wathu wu si manegi ni gisolo, ganiolu ga satshavbo ha gu dzi yeyedza kha nga sithumi sa Nungungulu.” (2 Kor. 6:3, 4) Ethu hi ngu ‘zundza satshavbo sihevbudzo sa Muvbulugisi wathu, a gu Nungungulu.’ — Tit. 2:10.
Mukhedziseyi 15/11/09 paj. 11, par. 21
Tshukwadzisa milombelo yago khu gu hevbula Bhibhiliya
21 Jesu a di gu gombeya khu ndziya nya githawo nigu nari ni gukhodwa nya lisine. Khu giyeyedzo, na si wusi Lazaro khu gufani, “Jesu a di khedza ndzadzini a ganeya, khuye: ‘Papayi, nyi ngu bonga kholu u nga nyipwa. Khu lisine, nyi di gu dziti gu kheni tepo yatshavbo u ngu nyipwa.’” (Joh. 11:41, 42) Ahati milombelo yago ke? Ina iyo yi ngu yeyedza githawo ni gukhodwa? Wa gu gevesisa nombelo nya giyeyedzo wa Jesu, u na wona gu khuwe gu agiswa nya lina la Jehovha, guta nya Mufumo waye ni gu girega gugola gwaye, silo nya lisima avba nya nombelo wowo. (Mat. 6:9, 10) Dundrugeya khu milombelo yago. Ina iyo yi ngu yeyedza gu khiyo u ngu ninga lisima Mufumo wa Jehovha, gu gira gugola gwaye ni gu agiswa nya lina laye? Khu lisine, iyo yi yede gu yeyedza isoso.
Mukhedziseyi 04.17 paj. 6, par. 12
“Tadzisa situmbiso sago”
12 Ganiolu gu bhabhatiswa maphelo basi. Ha gu vbweta gu tadzisa esi hi tumbisidego, khu gu vbanya khesi hi tumbisidego Jehovha. Khu kharato, khyadi gu hi dzi wudzisa gu khethu: ‘Ina wupari wangu ni Jehovha wu engedzede gu tiya gukhugeya nyi nga bhabhatiswa? Ina nyi ngu simama gu thumeya Jehovha khu monyo wangu watshavbo? (Kol. 3:23) Ina nyi ngu gombeya tepo yatshavbo? Nyi ngu leri Bhibhiliya tshigu ni tshigu? Ina nyi ngu gira satshavbo nyi si kodzago gasi nyi si luzi mitshangano? Ina nyi ngu patega thumoni nyo tshumayele sa gu kodzega? Mwendro nya gu vbungula sighingi sangu ga mweyo nya mithumo yeyi?’ Gasi isoso si si giregi, hi yede gu landra wusingalagadzi wa mupostoli Pedro nya: gu dzi garadzeye gasi gu engedzeya gukhodwa gwathu, guti, gu timiseya ni gudziningedzeya ga Nungungulu. — Leri 2 Pedro 1:5-8.
Kemba dzithomba nya liphuvbo
Mukhedziseyi 09.20 paj. 31, dzipar. 3-5
Siwudziso Sa Valeri
Muhevbudzi 5:8, o ganeya khu mufumeli a tshanisago sisiwana. Mufumeli yoyo yede gu dundruga gu khuye womo muthu nya tshivba ngudzu gu vbindra uye a wonago satshavbo a girago ni gu khu lisine gu ni vambe gambe va girago mithumo nya yikhongolo ngudzu nyo vbindre eyi avo va girago. Ganiolu, egi gi si tsakisigo khu gu dzipfhumu nya mafu vakanganyisi nya vakhongolo ni gu vathu va va fumeyago khavo va livbago khu isoso.
Ambari olu silo si yago si engedzeya guvivba gu na ni gilo gi hi thaveleyago. Dundruga gu khuwe, Jehovha a ngu va wona vafumeli vovo. Hi nga gombeya ga Nungungulu hi lomba giphaso. (Ndzi. 55:22; Filp. 4:6, 7) Ethu hi ngu dziti gu khethu ‘maho ya Jehovha Nungungulu, ma gu khedza mafuni gwatshavbo gasi gu yeyedza tshivba yaye ga vale va mu vbwetago khu monyo wawe watshavbo.’ — 2 Dzik. 16:9.
Khu gu piya, Muhevbudzi 5:8, a gu tshamuseya lisine nya vafumeli nya mafu yaya nyo khuye gu ni oyu a gu ni tshivba guvbindra avo. Gimbe nya lisima ngudzu, livhesi leli la gu hi dundrugisa gu khilo Jehovha khuye a khugegidego ngudzu gu vbindra vatshavbo. Olu a gu fuma khu gu thumisa mwanaye Jesu Kristo. Jehovha a khugegidego a ngu wona satshavbo nigu uye ni mwanaye va lulamide.
13-19 NYA OUTUBRO
DZITHOMBA NYA LITO LA NUNGUNGULU MUHEVBUDZI 7–8
Gu tutumela nyumbani nya gililo
Perspicaz “Guliya” par. 9
Guliya
Tepo nya gu liye. Muhevbudzi 3:1, 4, wari khuye gyomo “gikhati nya gulile, ni gikhati nya guhege; gikhati nya wuvi, ni gikhati nya gughiye khu gutsaka.” Khu kotani nya giemo nya mba gyadi gya vathu, gwa gu ganedwa gupwani myonyo ya va nya guti yomo “nyumbani nya gililo” wulangani nya gu manege nyumbani nya buzo. (Muh 7:2, 4; fananisa ni Mav 14:13.) Khu kharato, muthu a gu na ni guti a gu londrowa lithomo nya gu yeyedze pweya-wusiwana ni gu thaveleya, wulangani nya gu hongole aya vbwetedzeya dzithomba. Isoso si ngu mu phasa gu dundruga gu khuye litshigu limwedo a nafa ni gu bwe a simama na tumbegide ga Muvangi waye.
Mukhedziseyi 06.19 paj. 24, par. 15
Phasa vambe gu pala gu garadzega
15 William, a fedwego khu mwangadzi waye myagana hwane, wari khuye: “Nyi ngu tsaka ngudzu tepo vambe va nyi bhuleyago matshango nyo khaguri ya mwangadzi wangu; isoso so nyi gira nyi tiyisega gu kheni mwangadzi wangu a di gu godwa ni gu ningwa githawo. Isoso si ngu nyi phasa ngudzu. Malito yawe ma ngu nyi tiyisa ngudzu, kholu mwangadzi wangu a diri wa lisima gwangu nigu a di gu gira gipandre nya womi wangu.” Noni mweyo nyo pwani khu Bianca, yari khiyo: “Tepo vambe va gombeyago ni eni ni gu nyi lereya lowo nyo khaguri mwendro milowo nyo khaguri, si ngu nyi thaveleya ngudzu. Si ngu nyi tiyisa gambe tepo va ganeyago khu mwama wangu ni tepo va nyi engiseyago gwadi na nyi gu ganeya khuye.”
Mukhedziseyi 07.17 paj. 16, par. 16
“Liya ni ava va liyago”
16 Mweyo nya ndziya nya gu thaveleye oyu a nga fedwa, khu gu mu gombeleya ni gu gombeya naye. Adzina u nga wona na si gu garadzeya gu gira milombelo ga giemo nya nga egi. Adzina u nga liya mwendro lito lago li ngangameya. Ganiolu u nga divali gu khuwe gu gombeleya oyu a nga fedwa, khu monyo wago watshavbo, giphaso nya gikhongolo ngudzu. Dalene wari khuye: “Dzimbe dzitepo, tepo vandriyathu nya vanyamayi va nga ba vata va ta nyi thaveleya, nyi di gu va lomba gasi gu gombeya ni eni. Dzitepo nya dzingi va di gu garadzega, ganiolu va di gu gira satshavbo gasi gu woneleya lito lawe gasi va si kodza gu ganeya. Nigu vbadugwana-vbadugwana, malito yawe ma di gu engedzeya gu tiya va bwe va gira milombelo yi khugeyago monyoni. Lihaladzo, gu khathala ni gukhodwa nya gu tiye ga vandriyathu vava si nyi phaside ngudzu.”
Mukhedziseyi 07.17 paj. 16, dzipar. 17-19
“Liya ni ava va liyago”
17 Muthu ni muthu a na ni tepo nyo khaguri gasi a dzipwa gwadi hwane nya gu ba a fedwe khu muthu a mu golago. Vathu nyo khaguri va ngu dzi ningedzeya gasi gu phasa vathu va gu romo ga giemo gegi, ganiolu khu gu gimbiya nya tepo va yede gu bweleya gasi gu gira mithumo yawe. Omu ga Mavingu 17:17, Bhibhiliya yari khiyo: “Iyo yi gu pari yi ngu gu gola gikhati gyatshavbo, nuri gikhatini nya wuvi, ya gu khala ndriyago.” Khu kharato, kha si khatadzisegi tepo muthu a na vbedzago gasi a dzipwa gwadi hwane nya gu ba a fedwe, ethu hi yede gu dzi emiseya gu mu thaveleya. — Leri 1 Vatesalonika 3:7.
18 Dzimbe dzitepo, muthu a nga suva oyu a fudego ga matshigu nyo hathege. Adzina saye tepo apwago ndzimo, a wonago fotu, gu nungeya nya gilo nyo khaguri mwendro wulanga nyo khaguri gu mu dundrugisago oyu a ngafa, khavbovbo a garadzega. Nigu gambe si nga garadzeya muthu yoyo gu hongola Asembleya mwendro Gidundrugisotuno na dziti gu khuye mwama waye mwendro mwangadzi waye a na ba ari mwalo. Ndriyathu moyo nya mwama a nga fedwa, ganede gu khuye: “Eni nyi di gu dziti gu kheni gu dundruga litshigu nya mutshadho wathu na mwalo mwangadzi wangu si na nyi garadzeya. Ganiolu, ga litshigu lolo vandriyathu va di gira gifestana va bwe va rana dzipari dzangu. Avo kha va nga ba va vbweta gu nyi diga nyonga ga litshigu leli nyo hathege.”
19 Lisine gu oyu a nga fedwa kha vbweti basi gu thaveledwa ga matshigu nyo hathege. Junia wari khuye: “Si ngu tsakisa ngudzu gu tumba giphaso gya vandriyathu ambari ga matshigu nyo olovelege. Gu manega ni pari si ngu thaveleya ni ga gevbini giemo.” Lisine gu kha si kodzegi gu tshikedza wulanga ga oyu a fudego mwendro gu dusa guvbisa ga muthu a nga fedwa. Ganiolu, hi yede gu gira satshavbo hi si kodzago gasi gu thaveleya muthu yoyo. (1 Joh. 3:18) Gaby, a khumbugidwego gupheyani a di khuye: “Nyi ngu bonga ngudzu Jehovha khu gu ba a nyi ningide madhota nya lihaladzo ma nga nyi phasa tepo yatshavbo. Eni nyi di dzipwa nga khatshi Jehovha a gu nyi wugareya.”
Kemba dzithomba nya liphuvbo
Mukhedziseyi 03.23 paj. 31, par. 18
“Khavbo vathu va na dzitigo nya gukhavo mu vapizane vangu”
18 Dzimbe dzitepo, hi ngu dogoreya guya bhula ni ndriyathu a hi khunguvanyisidego. Ganiolu, gupheya hi yede gu dzi wudzisa gu khethu: ‘Ina nyi ngu siti satshavbo si pategago?’ (Mav. 18:13) ‘Ina uye a di nyi khunguvanyisa khu nyagigwenye?’ (Muh. 7:20) ‘Ina nyi di nga tshuka nyi gira gihoso gyagimwegyo?’ (Muh. 7:21, 22) ‘Nya guya ganeya ni ndriyathu yoyo, ina nyi na engedzeya gu thedzeya petroli?’ (Leri Mavingu 26:20.) Ha gu dzi gira siwudziso sesi, nigu kutswa khu lihaladzo hi na hunga gu mu divaleya.
20-26 NYA OUTUBRO
DZITHOMBA NYA LITO LA NUNGUNGULU MUHEVBUDZI 9–10
Manega ni mawonelo nya yadi khu sigaradzo sago
Mukhedziseyi 15/8/13 paj. 14, dzipar. 20-21
Gima u nga ‘wugeyi Jehovha’
20 Ninga nandru oyu a yedwego gu ningwa nandru. Khu ginani hi yedego gu gira isoso? Adzina saye hi na ni nandru khu gu ba hi dugeledwa khu sigaradzo sathu nyo khaguri. Sa gu ba si girega kharato, hi yede gu dzumeya isoso. (Gal. 6:7) U nga zami gu ninga nandru Jehovha khu sigaradzo u tshanganago naso. Khu ginani hi gu mba yela gu gira isoso? Wona giyeyedzo gegi: adzina saye movha nyo khaguri yi na ni makodzelo nya gu vhuli ngudzu. Hongoleni hi khethu mugimbidzisi a gu vbindrisa vhelosidhadhi yi nga vegiswa avba nya kurvha, khavbovbo yi girega mhango. Ina oyu a nga gira movha a yede gu ningwa nandru khu mhango yi nga girega? Khu lisine ahihi! Khu ndziya nyo fane, Jehovha a hi vangide ni gutshulega nya gu dzi hatheyi esi hi si vbwetago. Ganiolu, uye a hi ningide gambe sileletelo nya edzi hi nga hungago khidzo makungo khu wugengeyi. Khu kharato, hi mwalo gighelo nya gu ningi nandru Muvangi wathu khu sihoso sathu.
21 Khu lisine, khandri satshavbo sigaradzo hi tshanganago naso si vangwago khu kotani nya sihoso hi giridego mwendro olu hi nga gira silo khu gu phazama. Simbe sa gu girega khu ‘tepo hi nga mba hi vireya.’ (Muh. 9:11) Gu diga satshavbo, kha hi yeli gu divala gu khethu Sathane, Dhiyabhulosi, khuye muvangi nyo pheye nya sigaradzo. (1 Joh. 5:19; Gutu. 12:9) Uye khuye a gu nala nasiri Jehovha! — 1 Ped. 5:8.
Mukhedziseyi 09.19 paj. 5, par. 10
Jehovha a ngu ninga lisima sithumi saye nyo dzinogise
10 Gudzinogisa gambe gu ngu vbevbugisa womi wathu. Khu lisine, adzina hi ngu wona silo guvbanyani gwathu si si wonegigo na si lulamide. Mwama nyo gengeye, Pfhumu Solomoni, a di khuye: “Nyi di wona dzikhumbi dzi gimbila khu dzikavalu, aholu, vafumeli va gimbila khu migondro nga dzikhumbi.” (Muh. 10:7) Dzimbe dzitepo vale va gu ni makodzelo mwendro wusikodzi nyo khaguri kha va ningwi wuzundzo. Ganiolu ava va gu mwalo makodzelo yoyo va nga ningwa ngudzu wuzundzo. Ganiolu, Solomoni a di tugula gu khuye gwadi ngudzu gu hi dzumeya edzi womi wu gu idzo, wulangani nyo khaleye gu garadzega khedzi silo si gimbiyago khidzo guvbanyani gwathu. (Muh. 6:9) Ha gu dzi nogisa, si na hi vbevbugeya gu dzumeya edzi womi wu gu idzo, wulangani nyo zame gu gurumedzeya gu khethu wu na khale khu yimbe ndziya.
Mukhedziseyi 15/10/11 paj. 8, dzipar. 1-2
Ina u ngu wuyedwa khu gu dzi buza khu womi nyo tsakise?
OMU nya Bhibhiliya yatshavbo, momo malito ma yeyedzago gu khayo Jehovha kha vbweti gu khuye hi vbanya basi, ganiolu a gu vbweta gu khuye hi tsaka womini. Khu giyeyedzo, Ndzimo 104:14, 15 wari khuye Jehovha a gu dusa “guhodza marembweni gwawe. Mafu ma ngu ninga vbinyu yi tsakisago myonyoni nya vathu, mafura ma nyelugisago dzikhovbe, ni guhodza gu wusedzago tshivba.” Khu lisine, Jehovha a ngu gira gu mafu ma dusa guhodza, mafura ni vhinyu gasi hi dzi vbanyisa khiso. Ganiolu vhinyu gambe yi ngu ‘tsakisa monyo.’ Iyo kha yi hi phasi basi gasi gu dzi vbanyisa, ganiolu yi ngu hi engedzeya litsako. (Muh. 9:7; 10:19) Ina, Jehovha a gu vbweta gu khuye hi mana “gutsaka nya gukhongolo.” — Mith. 14:16, 17.
2 Khu kharato, kha hi yeli gu dzipwa nandru ha gu hunga gu dusa tepo gasi gu ‘khedza gwadi sinyoni sa ndzadzini’ ni “sifilori nya likhabi” mwendro gasi gu gira yimbe mithumo yi hi tsakisago ngudzu. (Mat. 6:26, 28; Ndzi. 8:3, 4) Womi nyo tsakise ni gupwa gu tshamba “giningwa gya Nungungulu.” (Muh. 3:12, 13) Gu wona gu dzi buza khu womi kha nga giningwa, isoso si na hi kutsa gu gi thumisa khu ndziya hi na tsakisago Oyu a nga hi ninga giningwa gyogyo.
Kemba dzithomba nya liphuvbo
Perspicaz “Milembo” dzipar. 4, 8
Milembo
Gu ganeya ngudzu si nga gira gu si hegisa khu milembo, a gu silo nya mba sadi ga oyu a phalalegisago malipha. Guti gu gomogo omu nya malito ya Muhevbudzi 10:12-14 ma ngu vega guagani gu khayo: “Magana ya gipumbu ma gu gi tshipisa. Guphela nya magana yaye khya wupumbu, ni ayo nya guhegise khya gu handruga. Gipumbu gya gu laphisa magana.”
Ga siemo nyo khaguri gu ganeya khu vambe vathu kha sa vivba ngudzu (ganiolu isoso si nga gira gu mahegiso yakone si khala milembo), milembo tepo yatshavbo khandri yadi nigu yi ngu vanga sigaradzo ni gu mba pwanana. Muthu a nga lemba mumbe khu gighelo nya gyadi mwendro nya mba gyadi. Na si si khatadzisegi gighelo gyakone, oyu a lembago a gu gira gu a si wonwi khu ndziya nya yadi khu Nungungulu, kholu Jehovha a ngu nyenya oyu “a wusago mayunga vbakari ga vandriyaye.” (Mav 6:16-19) Lito nya Gigreki gasi gu tshamuseya “mulembi” mwendro “musingedzi” la gu thula di·á·bo·los. Lito leli li ngu thumiswa gambe omu nya Bhibhiliya kha nga Sathane, “Dhiyabhulosi,” muliphi nya khongolo. (Joh 8:44; Gut 12:9, 10; Ge 3:2-5) Isoso so yeyedza avba ma dugago avbo malipha.
27 NYA OUTUBRO–2 NYA NOVEMBRO
DZITHOMBA NYA LITO LA NUNGUNGULU | MUHEVBUDZI 11–12
Simama na wuri ni womi nya wadi nigu nu tsakide
Khendzugani! 3.15 paj. 13, dzipar. 6-7
Lihani ni phuvbo — mirendre nya tumbunugo
Wenengedzo nya lihani wu na ni silo si phasago gu songa dzimicróbio. Journal of Hospital Infection ya gu tshamuseya gu khiyo “dzimicróbio nya dzingi hi dzi manago khu kotani nya phuvbo dzi vangago madwali, tepo dzi wenengedzwago khu lihani dza gufa.”
U nga londrowa kharini “mirendre” yeyi nya tumbunugo? Wa gu si wona kharini gu duga vbavbandze, uya wora lihani ni gu ndrindra phuvbo? Isoso khu lisine si na gu phasa.
Mukhedziseyi 02.23 dzipaj. 2-22, dzipar. 6-7
Ninga lisima giningwa nya womi
6 Ambari olu Bhibhiliya yi gu siri libhuku li ganeyago khedzi hi nga sayisago khidzo womi wathu mwendro esi hi yedego gu hodza, iyo yi ngu ganeya khu silo nya singi maningano khesi Jehovha a si pimisago khu silo sesi. Khu giyeyedzo, iyo yi ngu hi kutsa gu “hambana niso si na tshanisago [givili]” kholu si nga vega womi wathu mhangoni. (Muh. 11:10) Bhibhiliya yi ngu hi embeya gu khiyo kha hi yeli gu hodza ngudzu ni gu seya ngudzu wadwa kholu silo sesi si nga vega womi wathu mhangoni mwendro gu hi songa kamo. (Mav. 23:20) Jehovha o vireya gu khuye hi dzi woneya tepo hi hathago esi hi hodzago ni gu seya. — 1 Kor. 6:12; 9:25.
7 Ethu hi nga hunga makungo ma yeyedzago gu khayo hi ngu ninga lisima giningwa hi ningidwego khu Nungungulu, khu gu thumisa womi wathu khu ndziya nya yadi. (Ndzi. 119:99, 100; Leri Mavingu 2:11.) Khu giyeyedzo, hi nga hunga makungo nya yadi maningano khesi hi hodzago. Abari gu hi ngu gola guhodza nyo khaguri, ganiolu hi dzitigo gu khethu gu na hi gira hi dwala hi yede gu potsa gu hodza guhodza gogo. Ethu gambe hi yede gu yeyedza gu khethu hi na ni wugengeyi khu gu hi zama gu lala khu tepo nyo eneye, gu gira mihagano nyo tiyise givili, hi simama gu agisa givili gyathu ni gu agisa ndranga yathu.
Mukhedziseyi 09.24 paj. 2, dzipar. 2-3
“Khalani valandrisi nya mahungu”
2 Kha nga vakhozeyi va Jehovha hi vathu va tsakidego. Khu ginani? Ethu hi na ni sighelo nya singi, ganiolu egi nya lisima ngudzu khu gu ha gu leri Lito la Nungungulu tshigu ni tshigu hi bwe hi dzi garadzeya gasi gu thumisa esi hi si hevbulago. — Leri Jakobe 1:22-25.
3 Gu na ni dzindziya nya dzingi hi wuyedwago khidzo khu gu khala “valandrisi nya mahungu.” Khu giyeyedzo, tepo hi thumisago esi hi si hevbulago umo nya Lito la Nungungulu, ethu ho tsakisa Jehovha nigu anethu ho tsaka. (Muh. 12:13) Tepo hi thumisago esi hi si hevbulago umo nya Lito la Nungungulu, ho tshukwadzisa womi wathu kha nga ndranga ni gu manega ni wupari nyo tiye ni vandriyathu. Khu lisine, isoso si yeyedzide gu khiso lisine womini gwago. Gu diga isoso, ethu gambe ha gu potsa sigaradzo si manwago khu vale va gu mba engisa milayo ya Jehovha. Khu lisine, ethu hi ngu dzumeleyana ni esi Pfhumu Dhavhidhe a ganedego hwane nya gu ba a khumbugide nayo, sileletelo ni gu lamula ga Jehovha omu nya dzindzimo. Uye a di hegisa khu gu ganeya gu khuye: “Oyu a ma landrisago, a na mana tshatshazelo.” — Ndzi. 19:7-11.
Kemba dzithomba nya liphuvbo
Perspicaz “Khu gu phaswa khu liphuvbo nya guage” par. 10
Khu gu phaswa khu liphuvbo nya guage
Sa gu yeyedza gu khiso, vama va nga thumiswa khu Nungungulu gasi gu lova Milowo va di siri dzirebhoti dzi nga ba dzi lova basi esi dzi nga ba dzi embeledzedwa. Ha gu leri maningano ni mupostoli Johane gu khethu, Gutuledwa ‘a ningidwego khu Nungungulu’ a di yeyedzwa khu ngilozi “khu gu thumisa siwoniso,” khavbovbo Johane a di ninga “wufakazi nya malito a embedwego khu Nungungulu ni wufakazi a ningidwego khu Jesu Kristo, wufakazi nya silo satshavbo a nga si wona.” (Gut 1:1, 2) Khu gu phaswa khu liphuvbo nya guage, Johane “wonide silo si na giregago khu litshigu la Pfhumu’ a bwe a embedwa gu pwani: “Lova esi u si wonago avba nya libhuku.” (Gut 1:10, 11) Khu ndziya yeyi, so wonegisa gu khatshi Nungungulu a di dzumeleya valovi nya Bhibhiliya gu thumisa makodzelo yawe nya gu pimise gasi gu hatha malito ni maganelelo gasi gu tshamuseya siwoniso va nga si wona (Hab 2:2), ganiolu a di gu va woneleya ni gu va ninga sileletelo, gasi gu esi va nga lova si tumbega, nari malito nya lisine ni gu gimbileyana ni gugola ga Jehovha. (Mav 30:5, 6) Gudzigaradza gu nga ba gu girwa khu mulovi gu ngu yeyedzwa omu ga Muhevbudzi 12:9, 10, avo va di yede gu pimisa gwadi, va gevesisa ni gu landra sileletelo, gasi gu lova ‘magana nya yadi, va lova khu gululama mahungu nya lisine.’ — Fananisa ni Lu 1:1-4.