Vaisrayeli va gale va di gu dwana dzinyimbi — Ganiolu khu ginani ethu muhuno hi si dwanigo dzinyimbi?
NDRANI nya Nyimbi nya Wuvili nya Mafu yatshavbo, muthangeyi moyo nya masotshwa nya Vanazi a di embeya tsawa nya Dzifakazi dza Jehovha khuye: “A gu tshuka moyo wanu a bomba gu dwana nyimbi ni França mwendro inglaterra mwatshavbo mu na songwa.” Ambari olu masotshwa nya SS ma nga ba ma emide vbafuvbi vbale, mwalo ni moyo nya vandriyathu a nga fanya milayo ya Jehovha. Esi si di gu yeyedza gu tiya hwambo! Egi giyeyedzo nya gyadi nya edzi Jehovha a wonago khidzo nyimbi. Ethu ha gu bomba gu seketeya mwendro ema ni silo si hungwago mafuni momu gu tadego khu mayunga, ambari vathu va gu hi embeya gu khavo va na hi songa ha gu mba dwana. Ethu ha gu simama gu mba dzi bebedzeya omu nya politika.
Ambari ulolo, khandri vatshavbo va dzi embeyago gu khavo Makristo va dzumeyago mawonelo yaye. Nya vangi va gu khodwa gu khavo Makristo ma yede gu emeya litigo lawe. Si nga gira va pimisa kharati: ‘Vaisrayeli va gale va diri vathu va Nungungulu nigu avo va di gu dwana dzinyimbi, ganiolu khu ginani ethu hi gu mba yela gu dwana dzinyimbi?’ U di hadzi hlamula kharini giwudziso gegi? U di hadzi gu gu tshamuseya gu khuwe giemo gya Vaisrayeli va gale gi hambanide ngudzu ni giemo gya vathu va Nungungulu muhuno. Hi na wona 5 silo si hambanisago mitsawa yeyi ya mivili.
1. VATHU VA NUNGUNGULU VA GU LUMBA LITIGO LIMWEDO
Gale yoyo, Jehovha hathide lihundzu limwedo gasi gu khala vathu vaye, a gu lihundzu la na Israyeli. Uye ranide Vaisrayeli gu khuye “thomba yangu vbakari nya mayigo yatshavbo.” (Ekiso. 19:5) Nigu Nungungulu va ningide litigo nyo khaguri. Khu kharato, tepo Nungungulu a nga ruma Vaisrayeli gasi gu ya dwana nyimbi ni mambe mahundzu avo kha va nga ba va dwana mwendro gu songa vambe vakhozeyi va Jehovha.a
Muhuno, vakhozeyi nya lisine va guta khu ga “mahundzu, mafumbu, malimi yatshavbo.” (Gutu. 7:9) Go tshuka vakhozeyi va Nungungulu va patega omu nya dzinyimbi, avo va na ba va dwana ambari kamo gu songa vakhozeyi-kwawe.
2. JEHOVHA RUMIDE VAISRAYELI GU HONGOLA NYIMBITUNU
Gale, Jehovha a di gu hunga gu khuye lini Vaisrayeli si nga ba si lombega gu va hongola nyimbitunu ni gighelo gi nga ba gi va gira va hongola iyoyo. Khu giyeyedzo, Nungungulu embede Vaisrayeli gu khuye va di yede gu dwana gasi a kodza gu lamula Vakhanani, avo va nga ba va gira wukhozeyi nya mba handzega, wubhayi ni gu ningeya sanana sawe kha nga miphaso. Jehovha leletede Vaisrayeli gu khuye va di yede gu fuvisa vathu va nga ba va gira silo sesi nyo vivbe khu tigoni nya gitumbiso, gasi anavo va si giri silo sesi nyo vivbe. (Levhi 18:24, 25) Hwane nya gu ba Vaisrayeli va bede tigoni nya gitumbiso, Nungungulu ga dzimbe dzitepo a va embede gu khuye avo va di yede gu dwana gasi va vhikeya Vaisrayeli ga valala. (2 Sam. 5:17-25) Ganiolu, Jehovha kha nga ba a dzumeleya Vaisrayeli gu va hunga khu vabune gu hongola nyimbitunu. Tepo avo va nga ba va gira isoso, mihandro yakone yi di siri yadi. — Mite. 14:41-45; 2 Dzik. 35:20-24.
Muhuno, Jehovha kha dzumeleyi gu khuye vathu va hongola nyimbitunu. Mayigo ma gu dwana khu kotani nya esi vathu va si vbwetago, nasiri esi Nungungulu a si vbwetago. Si nga gira ayo ma dwana dzinyimbi khu gu vbweta gu fumeya mayigo nya mangi, gu mana dzitsapawu nya dzingi mwendro gu andrisa politika. Ganiolu, ahati ava va ganeyago gu khavo ha gu dwana khu lina la Nungungulu gasi gu vhikeya wukhozeyi waye mwendro gasi gu songa valala va Nungungulu ke? Jehovha a na vhikeya vakhozeyi vaye nya lisine nigu a na fuvisa valala vaye nya mba hweya avba nya nyimbi nya Harmagedhoni. (Gutu. 16:14, 16) Ga nyimbi yoyo, Jehovha a na thumisa sivangwa nya liphuvbo nasiri vakhozeyi vaye va mafuni. — Gutu. 19:11-15.
3. VAISRAYELI VA DI GU VBULUGISA VALE VA NGA BA VARI NI GU KHODWA
Ina dzinyimbi dza muhuno dzi ngu vbulugisa ava va tumbegago, nga esi si giregidego Jeriko avbo Jehovha a nga vbulugisa Rahabe ni ndranga yaye?
Gale, mabutho ya Israyeli dzitepo dzatshavbo ma di gu yeyedza wuhindzi ga vale va nga ba va yeyedza gu khavo va di gu khodwa ga Nungungulu. Nigu va di gu songa vale Jehovha a nga ba a hunga gu khuye va di yede gu songwa. Wona siyeyedzo sivili. Ambari olu Jehovha a nga ruma gasi gu fuviswa Jeriko, Vaisrayeli kha va fuvisa Rahabhe ni ndranga yaye kholu va diri ni gukhodwa. (Jos. 2:9-16; 6:16, 17) Khu hwane, latshavbo lidhoropa la Ghibhiyoni kha la fuviswa hwane nya gu ba Vaghibhiyoni va yeyedzide gu khavo va di gu ninga githawo Nungungulu. — Jos. 9:3-9, 17-19.
Muhuno, mabutho nya mafu kha ma thavi gu fuvisa vathu va gu na ni gukhodwa mwendro vale va gu mba dwana nyimbi.
4. VAISRAYELI VA DI YEDE GU LANDRISA MILAYO YA NUNGUNGULU YI GANEYEGO KHU NYIMBI
Gale, Jehovha a di gu ruma mabutho ya Israyeli gu dwana nyimbi guya khu sileletelo saye. Khu giyeyedzo, Nungungulu dzimbe dzitepo a di gu va ruma gu andrisa “gurula navo.” (Dhet. 20:10) Jehovha a di gu vireya gu khuye mabutho ya Israyeli ma simama na ma agide ni gu landriseya milayo nya gu lulame ya Jehovha. (Dhet. 23:9-14) Ambari olu mabutho ya vbafuvbyana mule dzitepo nya dzingi ma nga ba ma pfhinya vanyamayi, Jehovha a di gu himbedzeya Vaisrayeli gu gira isoso. Khu lisine, kha va nga ba va yede gu tshadha ni vanyamayi vovo kala wu vbindra ngima mowo. — Dhet. 21:10-13.
Muhuno, mayigo nya mangi ma giride pwanano nyo dwane dzinyimbi na ma gu thumisa milayo nyo khaguri. Ambari avo va gu na ni thumo nya gu vhikeye vathu, dzitepo nya dzingi milayo yoyo kha va yi landrisi.
5. NUNGUNGULU A DI GU DWANELA VATHU VAYE
Ina Nungungulu a ngu dwanela mayigo nga edzi a giredego Vaisrayeli Jeriko?
Gale, Jehovha a di gu dwanela Vaisrayeli nigu gutala nya dzitepo Uye a di gu va phasa gasi va pala. Khu giyeyedzo, Jehovha phaside kharini Vaisrayeli gasi gu khungumula lidhoropa la Jeriko? Kha nga Jehovha a ganedego, tepo Vaisrayeli va nga womba “huwa nya yikhongolo, makhokhola ma di khungumuga,” si vbevbuga gu dzega lidhoropa. (Jos. 6:20) Va pade kharini Vaamori? “Pfhumu Nungungulu a di va thesela maralala nya siwindri nya sikhongolo na si gu thega khu ndzadzini . . . avo va ngafa khu gu thegedwa khu ndzadzi nya siwindri vangi ngudzu, guvbindra avo va nga songwa khu matshari khu va na Israyeli.” — Jos. 10:6-11.
Muhuno, ma mwalo mayigo ma dwanedwago khu Jehovha. Mufumo waye ni Jesu Kristo kha nga Pfhumu, “khandri wa mafuni momu.” (Joh. 18:36) Gu hambana ni Sathane, a gu uye a fumago yatshavbo mifumo nya vathu. Dzinyimbi dzi giregago mafuni momu dza gu yeyedza mavbanyelo yaye nyo vivbe. — Luka 4:5, 6; 1 Joh. 5:19.
MAKRISTO NYA LISINE MA NGU ZAMA GU ANDRISA GURULA NI VAMBE
Kha nga hi si wonidego, giemo gyathu muhuno gi hambanide ni giemo gya Vaisrayeli va gale. Gu hambana gogo khandrugo basi gu hi girago hi si hongoli nyimbitunu, ganiolu gu na ni simbe sighelo. Khu giyeyedzo, Nungungulu ganede gu khuye masthigoni nya gu hegise vale va nga hadzi gu hevbula maningano khuye kha va yeli gu “hevbula gu dwana nyimbi,” ambari gu patega gwadzo. (Isa. 2:2-4) Gu diga isoso, Kristo ganede gu khuye valandreyi vaye kha va na nga ‘lumba litigo,’ nigu avo va di hadzi gu simama gu mba seketeya mwendro gu ema ni silo si hungwago mafuni momu gu tadego khu mayunga.— Joh. 15:19.
Kristo gambe gengedzide valandreyi vaye ga simbe silo. Gu potsa gu manega ni likhulo, lidiwo ni gu dwana nyimbi. (Mat. 5:21, 22) Ni gu gambe a hevbudzide valandreyi vaye gu andrisa “gurula” ni gu gola valala vawe. — Mat. 5:9, 44.
Hi nga gira kharini esi? Khu lisine, ethu kha hi vbweti gu dwana nyimbi. Ganiolu, ina hi ngu wona muthu nyo khaguri libandlani kha nga nala wathu? Hongoleni hi dzi garadzeya gu fuvisa yatshavbo mipimiso nya nga eyi. — Jak. 4:1, 11.
Ethu kha hi pategi omu nya dzinyimbi, wulangani nya isoso ethu ha gu dzi garadzeya gu andrisa gurula ni gu haladzana. (Joh. 13:34, 35) Hongoleni hi simama gu mba dzi bedzedzeya omu nya politika, na hi gu vireya litshigu eli Jehovha a na fuvisago nyimbi khu gu vbeleya. — Ndzi. 46:9.
a Ga dzimbe dzitepo, mambe mahundzu ya na Israyeli ma di gu dwana khu gyawe ambari olu dzinyimbi dzodzo dzi nga ba dzi si tsakise Jehovha. (1 Dzipf. 12:24) Ganiolu, ga siemo nyo khaguri uye a di gu dzumeleya mayunga yoyo kholu mambe mahundzu ya Israyeli ma di si tumbegi gwaye nigu ma di gu giride sighoho nya sikhongolo. — Val. 20:3-35; 2 Dzik. 13:3-18; 25:14-22; 28:1-8.