Nyi si kodzide gu thuma kha nga misiyonariya ambari nyi nga ba nyiri ni dzitshoni

Nyi di velegwa khu 1951 Viena, Áustria, vavelegi vangu va di gu beya tshetshe nya Katolika. Nyi diri ni dzitshoni, ganiolu nyi di gu khodwa ga Nungungulu nigu nyi di gu gombeya gwaye. Tepo nyi nga manega ni 9 myaga, papayi wangu a di pheya gu hevbula ni Dzifakazi dza Jehovha, nigu khu gu gimbiya nya tepo mamayi wangu nuye a di pheya gu hevbula.

Khu gu gimbiya nya tepo hi di pheya gu gira gipandre nya libandla Döbling, Viena. Hi di gira isoso khu ndranga. Hi di hevbula Bhibhiliya, hi manega mitshanganoni ni gu thuma kha nga vavhuluntaryu omu nya dziasembleya. Ga myaga yoyo, papayi wangu a nyi phaside gu haladza Jehovha. Gasi gu ganeya lisine, esi papayi wangu a nga ba a si gombeleya ngudzu khu gu eni ni ndriyangu nya nyamayi hi khala vapiyonera. Ganiolu, ga tepo yile kha nya nga ba nyi vbweta gu gira isoso.

MAPHELO NYA THUMO NYA TEPO YATSHAVBO

Eni nyi bhabhatisidwe khu 1965, na nyiri ni 14 myaga. Ambari ulolo, si di gu nyi garadzeya gu tshumayela vathu nyi nga ba nyi si vati. Eni dzitepo nya dzingi nyi di gu pimisa gu kheni vambe vaphya va diri ni lisima guvbindra eni, nigu nyi di gu vbweta gu kheni va nyi gola. Hwanenyana nya gu ba nyi bhabhatisidwe, nyi di pheya gu vbedza tepo nya yingi ni vathu va gu mba thumeya Jehovha. Ambari olu nyi nga ba nyi gola gu vbedza tepo navo, livhalo langu li di gu nyi garadza kholu nyi di gu vbedza tepo nya yingi ni vathu va gu siri Dzifakazi dza Jehovha. Ganiolu, nyi diri mwalo tshivba nya gu gire guvbindrugedza. Ginani gi nyi phasidego?

Ga tepo yile, gyagadzyana gi nga ba giri ni 16 myaga nyo pwani khu Dorothée gi di pheya gu gira gipandre nya libandla lathu. Sighingi saye nya gu tshumayele khu ndranga ni ndranga si nyi hlamadziside ngudzu. Eni nyi diri khongolo guvbindra uye, ganiolu nyi diri mwalo sighingi thumoni nyo tshumayele nga uye. Eni nyi di pimisa gu kheni: ‘Vavelegi vangu Dzifakazi, ganiolu Dorothée valongo vaye va di siri Dzifakazi. Uye a gu khala ni mamayi waye a dwalago, ganiolu tepo yatshavbo a ngu hongola thumoni nyo tshumayele.’ Giyeyedzo gyaye, gi nyi kutside gu gireya nya singi Jehovha. Nya mba hweya, eni nyi Dorothée hi di khala vapiyonera hatshavbo. Gupheya, hi di thuma kha nga vapiyonera nyo phasedzeye, khu gu landreya hi di pheya gu thuma kha nga vapiyonera nya tepo yatshavbo. Khu kotani nya olu Dorothée a nga ba a tsaka khu gu tshumayela, aneni nyi di pheya gu tsaka ngudzu khu gu tshumayela. Uye a nyi phaside gu pheya gu gimbidzisa gihevbulo nya Bhibhiliya gyangu nyo pheye. Khu gu gimbiya nya tepo, si di nyi vbevbugeya gu pheya mabhulo ni vathu khu ndranga ni ndranga, mudziruwani ni mambe malanga.

Ga mwaga nya gu pheye na nyi gu thuma kha nga piyonera, ndriyathu nyo pwani khu Heinz atago khu Áustria a dita wuseya libandla lathu. Uye a hevbude lisine Canadá tepo a nga hongola aya wuseya ndriyaye a nga ba ari Fakazi. Heinz a di rumedwa libandlani gwathu gasi guta thuma kha nga piyonero nyo hathege. Gukhugeya litshigu nyi nga muti nyi di mu gola. Ganiolu, uye a di gu vbweta gu thuma kha nga misiyonariyu narigu kha nya nga ba nyi vbweta gu gira thumo wowo. Khu kharato, kha nya mu yeyedza gu kheni nyi ngu mu gola. Khu gu gimbiya nya tepo, hi di pheya gu namorari, hi tshadha hi bwe hi pheya gu thuma kha nga vapiyonero Áustria.

NYI DI PHEYA GU MANEGA NI MISUWO NYA GU THUME KHA NGA MISIYONARIYA

Heinz a di gu khaleya gu nyi bhuleya khu misuwo yaye nya gu thume kha nga misiyonariyu. Ambari olu a nga ba a si nyi gurumedzi gu gira isoso, uye a di gu nyi gira siwudziso nya nga: “Olu hi gu mwalo sanana, ina hi nga gira nya singi thumoni ga Jehovha?” Khu kotani nya olu nyi gu na ni dzitshoni, nyi di gu thava gu khala misiyonariya. Lisine gu nyi di gu thuma kha nga piyonera ambari olu nyi gu na ni dzitshoni, ganiolu nyi di gu pimisa gu kheni gu thuma kha nga misiyonariya si di hadzi gu nyi garadzeya. Ambari ulolo, Heinz a di simama nari ni misuwo yaye. Uye a nyi phaside gu mba pimisa ngudzu kheni mune, ganiolu nyi pimisa edzi nyi nga hadzi gu phasa khidzo vambe. Wusingalagadzi waye wu nyi phaside ngudzu.

Vbadugwana-vbadugwana, nyi di pheya gu manega ni gudogoreya nya thume kha nga misiyonariya, khu kharato hi di dzi lovedzisa Xikwatuno nya Gileyadhi. Ganiolu, ndriyathu a nga ba a thangeya Bheteli ga tepo yoyo a di nyi lomba gasi nyi tshukwadzisa Gingiza gyangu. Hwane nya 3 myaga na hi gu dzi garadza gasi gu tshukwadzisa Gingiza gyathu, hi di hlamala khu gu hakha thumo nya gu hongole ga libandla la iugoslava eyi Salzburgo, Áustria. Ga 7 myaga yi nga landreya, hi di tshumayela vathu va ganeyago lidimi nya servo-croata. Mwama wangu a di khala muwoneleyi nya sirkwitu nigu khu mwaga mowo hi wusede mabandla nya lidimi leli hatshavbo. Lidimi leli li di gu garadza, ganiolu hi diri ni sihevbuli nya singi nya Bhibhiliya.

Khu 1979, hi di ranwa gasi gu hongola Bulgária, khu “dziferya.” Eyi thumo nya gu tshumayele wu di gu himbedzedwa. Khu kharato, kha ha tshumayela tepo yeyi nya dziferya. Ganiolu, khu gisihaledza hi di dzega mabhuku nyo khaguri gasi guya ninga 5 vandriyathu nya vanyamayi va nga ba va vbanya dhoropani nya gukhongolo, a gu Sófia. Eni nyi di gu thava ngudzu, ganiolu Jehovha a nyi phaside. Gu wona gu tiya-hwambo ga vandriyathu vale ni litsako lawe ambari va nga ba va romo mhangoni nya gu khotedwe pasoni, si nyi tiyiside gasi gu gira ni gevbini gilo hengeledzano ya Jehovha yi nyi lombago.

Hwane nya tepo nyo khaguri, hi di pheledza gu dzi lovedzisa gasi gu hongola xikwatuno nya Gileyadhi nigu va hi dzumelede. Hi di gu pimisa gu khethu hi di hadzi gu hongola xikwatuno nya Gingiza eyi Estados Unidos. Ganiolu, khu Novembro nya 1981, dzi di pheya gu manega dziawula nya Gileyadhi bheteli ya Wiesbaden, eyi Alemanha. Khu kharato, hi di kursari xikola khu lidimi nya Gialemão, nigu si di gu nyi vbevbugeya ngudzu gu si pwisisa. Hi di hadzi guya thuma hayi?

GU TSHUMAYELA DHOROPANI GU NGA BA GURI NI WUGHEVENGA NYA WUNGI

Hi di rumedwa Quênia! Ganiolu, bheteli ya Quênia yi di hi wudzisa gu khiyo hi nga dzumeya gu thuma Uganda, a gu litigo li nga ba li khala vbafuvbyana mule. Tanga nya 10 myaga hwane, mufumo wa Uganda wu di gu woneledwa khu muthangeyi nya masotshwa nyo khaguri nyo pwani khu Idi Amin. Ndrani nya mufumo waye, va fude vathu nya vangi ngudzu. Khu 1979, mufumo wa Uganda wu di wugedwa gambe. Adzina u nga nyi pwisisa gu khuwe khu ginani nyi nga ba nyi thava gu fuluga nyi hongola ga limbe litigo nya nga eli li nga ba li tade khu wughevenga. Ganiolu, Gileyadhi yi di hi dongisede gasi gu tumba Jehovha. Khu kharato, hi di dzumeya gu hongola.

Womi Uganda wu di gu garadza ngudzu. Mufumo kha wa nga ba wu si kodza gu ninga mati, maghezi ni simbe silo si vbwetegago gasi gu vbanya. Dzitelefoni kha dza nga ba dzi thuma. Vathu va di gu vbophoseyana ni gu beya vambe ngudzu-ngudzu wutshigu. Khu kharato, gwa gu pfola vathu va di gu khala magaya gwawe va vireya mwendro gu gombeya kamo gasi a siti muthu ata va beya mwendro gu va songa. Ambari olu va nga ba va tshangana ni silo sesi, vandriyathu va di gu simama na va vidzidwe khu liphuvboni.

Khu 1982, eni ni Heinz hi di hongola Kampala, dhoropani nya gukhongolo ga Uganda. Ndrani nya 5 migima, hi di khala gaya ga Sam ni Christina Waiswa ni 5 sanana sawe gumogo ni 4 valongo vawe. Ndriyathu Sam ni Christina ni ndranga yawe va di gu oloveya gu hodza gumogo khu litshigu basi, nigu khu kotani nya isoso hi wonide gu kheni va di gu hakha gwadi vapfhumba. Tepo hi nga ba hi romo ni ndranga yeyi, eni ni Heinz hi hevbude silo nya singi si nga hi phasa thumoni gwathu kha nga vamisiyonaryu. Khu giyeyedzo, ethu hi hevbulede gu hamba khu mati nya madugwana ngudzu ni gu thumisa mati ma tshadego gasi gu theya omu nya sanita. Khu 1983, eni ni Heinz hi di mana ndranga hi nga hadzi gu khala avbo ga wulanga wu nga ba wu vhikelegide vbadugwana eyi Kampala.

Khu lisine hi di gu tsaka ngudzu khu gu tshumayela Kampala. Nyi ngu dundruga gu kheni ga ngima mowo hi ningede guvbindra 4000 dzirevhista. Ganiolu, esi si nga hi tsakisa ngudzu khu gu wona vathu na va gu dzumeya lisine. Avo va di gu ninga githawo Nungungulu nigu va di gu dzina gu ganeya khu Bhibhiliya. Moyo ni moyo wathu a diri ni gipimo nya 10 mwendro 15 sihevbuli nya Bhibhiliya. Hi hevbude nya singi ga sihevbuli sathu. Khu giyeyedzo, ambari olu va nga ba va hongola semana ni semana mitshanganoni khu mawundru, avo va di si nguranguri, ganiolu va di gu tsaka tepo yatshavbo.

Khu 1985 ni 1986, gu di manega gambe dzinyimbi dzimbili Uganda. Hi wonide sanana si nga ba si thumiswa kha nga masotshwa na siri ni siphisa nya sikhongolo, nigu na si gu woneleya ava va nga ba va vbindra khomu nya dziextradha. Ndrani nya myaga yeyi, hi di gu gombeya ga Jehovha gasi a hi phasa gu manega ni guti ni gu dzi vhikeya gumogo ni gu tshumayela na hi si thavi. Nigu Jehovha hlamude milombelo yathu. Gu tala nya dzitepo hi di gu divala sigaradzo sathu tepo hi nga ba hi mana muthu a nga ba a vbweta gupwa mahungu nya Mufumo.

Hi di gu tsaka gambe khu gu tshumayela vathu va nga ba vata khu mambe mayigo. Khu giyeyedzo, hi tivanide ni gu hevbula ni patwa nyo pwani khu Murat ni Dilbar Ibatullin, wa Tartaristão (Rússia Central). Muart a diri dhogodheya. Vatshavbo va bhabhatisidwe nigu va ngu thumeya Jehovha khu gu tumbega. Khu gu gimbiya nya tepo, nyi manegide ni lithomo nya gu tivani ni nyamayi moyo wa Ucrânia nyo pwani khu Tatjana Vileyska, a nga ba a pimisa gu dzi tshwedza. Hwane nya gu ba Tatjana na bhabhatisidwe, a di bweleya Ucrânia nigu khu gu gimbiya nya tepo a di pheya gu thuma kha nga muvbindrugedzeyi nya mabhuku yathu khu lidimi nya Giucraniano.a

SIGARADZO NYA SIPHYA

Khu mwaga nya 1991, tepo eni ni Heinz hi nga ba hi romo khu dziferya Áustria, hi di ligaredwa khu vandriyathu va Bheteli ya gipandreni mule va hi embeya khu thumo nya wuphya Bulgária. Ndrani nya myaga nya yingi, thumo nyo tshumayele wu di himbedzedwa ga mayigo nya mangi ya Europa. Ganiolu, silo si di vbindrugedza nigu Dzifakazi dza Jehovha dzi di dzumeledwa gu tshumayela ga mayigo yale ni Bulgária. Kha nga nyi nga ganeya, Heinz ni eni hi di gu reside mabhuku nyo khaguri khu gisihaledza ga litigo leli. Ganiolu, olu hi di rumedwa ga litigo leli gasi guya tshumayela.

Vandriyathu va di hi embeya gasi hi si bweleyi Uganda, ganiolu hi dzegeya gu hongola Bulgária. Khu kharato, kha ha bweleya Uganda gasi hi dongiseya silo sathu mwendro gu tshadzisa dzipari dzathu, ganiolu hi di hongola Bheteli ya Alemanha hiya dzega movha hi hongola Bulgária. Hi di rumedwa gasi hiya thuma ga tsawa wu nga ba wuri ni 20 vahuweleyi eyi Sófia.

Hi emisanide si sigaradzo nya singi nya siphya Bulgária. Nyo pheye, ethu kha ha nga ba hi si kodza gu ganeya lidimi la mule. Nya wuvili, mabhuku ma nga ba ma romo khu Gibulgaro khaya basi ma gu khayo A Verdade Que Conduz à Vida ni Meu Livro de Histórias Bíblicas. Nyi di wona na si nyi garadzeya gu tula sihevbulo nya Bhibhiliya. Ambari olu hi nga ba hi emisana ni gigaradzo gegi, tsawa wule nya wudugwana nya Dzifakazi dza Jehovha wu di simama gu dandra. Ganiolu, tshetshe nya Ortodoxa kha ya tsaka khu gu wona gu dandra gwathu, khu kharato yi di pheya gu hi wugeya.

Khu 1994 thumo nya Dzifakazi dza Jehovha wu di emiswa va bwe va wonwa kha nga tsawa nya vawugeyi. Vandriyathu nyo khaguri va di khotedwa. Dzinotisya nya malipha maningano khethu dzi di phalalega, nigu dzi di gu ganeya gu khidzo Dzifakazi dza Jehovha kha dza songa basi sanana, ganiolu dzi di kutsa dzimbe Dzifakazi gu dzi tshwedza. Khu kharato, si di gu hi garadzeya gu tshumayela. Tepo hi nga ba hi tshumayela hi di gu tshangana ni vathu va nga ba va hi valeteya, va rana maphoyisa ni gu hi rinyeya silo. Kha sa nga ba si kodzega gu dzega mabhuku hi hongola nawo tigoni mule, nigu si di gu garadza gu mana wulanga gasi gu gira mitshangano. Maphoyisa ma di himbedzeya gu gira kongresu nyo khaguri. Eni ni Heinz kha ha nga ba hi olovede gu wona vathu nya gu vivbedwe khu monyo nga ava, kholu va di hambanide ni vathu va Uganda va nga ba va dzumeya gu hevbula Bhibhiliya! Ginani gi hi phasidego gu dzi pwananisa ni giemo gegi nya giphya?

Hi manide litsako khu gu vbedza tepo ni vandriyathu va mule. Avo va tsakide khu gu mana lisine nigu va bongide khu gu ba hi va phaside. Hatshavbo hi di gu khathaleyana ni gu phasana. Ethu hi hevbude khu matshango yaya gu khethu hi nga tsaka ni ga wevbini thumo ha gu vega gupima ga vambe guvbindra ga sigaradzo sathu.

Hwane nya myaga nyo khaguri si di vbevbuga gu tshumayela. Khu 1998, hengeledzano yathu yi di lovedziswa gambe nigu mabhuku nya mangi ma di vbindrugedzedwa khu lidimi nya Gibulgaro. Khu gu landreya, khu 2004 yi di hendzeledzwa betheli nya yiphya. Muhuno, eyi Bulgária gu na ni 57 mabandla ni 2953 vahuweleyi. Ga mwaga nya gu hegise nya thumo, tanga nya 6475 vathu va manegide Gidundrugisotuno. Gale gu diri basi ni 5 vandriyathu eyi Sófia nigu olu gu na ni 9 mabandla. Eni ni Heinz hi nga ganeya na hi tiyisegide gu khethu hi wonide gu tadzisega nya giprofeto gi gu khiyo lidugwana li na andra kala likhumi mazana. — Isa. 60:22.

GU EMISANA NI SIGARADZO NYA MADWALI

Ndrani nya womi wangu, nyi tshanganide ni sigaradzo nya singi nya madwali. Khu myaga nya yingi nyi popodwe dzitumor nya dzingi, gupata ni hungoni. Eni nyi di gira tratamentu nya yikhongolo gasi gu vbungula tumor yangu nigu nyi di hongola Índia avba dhogodheya a nga nyi gira operasawu khu tanga nya 12 dziora, nigu nyi dusidwe gipandre nya gikhongolo nya tumor hungoni gwangu. Hwane nya operasawu, hi di simama Bheteli ya Índia khu tepo nyo khaguri gasi nyi hawuluga, khu gu landreya hi di bweleya thumoni gwathu Bulgária.

Gu diga isoso, Heinz a di manega ni madwali nya mba olovega nyo pwani Huntington a nga ma mana ga valongo vaye. Khu kotani nya madwali yoyo, si di gu mu garadzeya gu gimbiya ni gu woneleya givili gyaye. Madwali yaye ma di engedzeya, nigu khu kotani nya isoso nyi di yede gu mu phasa tepo yatshavbo a nga ba a vbweta gu gira gilogyo. Dzimbe dzitepo, nyi di gu garala ngudzu ni gu garadzega khu gu kheni ahati nya gu mba si kodza gu simama gu mu phasa ke. Ganiolu, ndriyathu nya muphya nyo pwani khu Bobi, a di gu kovhidhari tepo yatshavbo Heinz gasi a hongola naye gutshumayelani. Ndriyathu Bobi kha garadzega khu kotani nya esi vathu va nga hadzi gu pimisa a gu tshuka Heinz a si si kodzi gu ganeya gwadi mwendro gu mba woneleya mawogo ni mawundru yaye. Ndriyathu Bobi a di gu dzi emisede gu hi phasa tepo yatshavbo. Ambari olu eni ni mwama wangu hi nga ne manega ni sanana, hi dzipwide gu khethu Jehovha a hi ningide Bobi kha nga gyanana gyathu. — Marko 10:29, 30.

Heinz emisanide gambe ni câncer. Nya mba tsakisa khu gu mwama wangu a difa khu 2015. Nyi ngu mu suva ngudzu mwama wangu. Uye a diri muthu a nga ba a nyi phasa gu mba garadzega ngudzu. Si ngu garadza ngudzu gu dundruga gu khethu a mwalo gambe ni ethu. (Luka 20:38) Ndrani nya litshigu, dzitepo dzatshavbo nyi ngu dundruga na ganeya ni eni ni gu nyi ninga wusingalagadzi nya wadi. Nyi ngu bonga ngudzu khu myaga yatshavbo hi nga thuma hatshavbo khu gu tumbega.

NYI NGU BONGA JEHOVHA KHU GIPHASO GYAYE

Jehovha a nyi phaside ga satshavbo sigaradzo nyi nga tshangana naso. Uye gambe a nyi phaside gu khala misiyonariya a haladzago vathu ambari olu nyi nga ba nyiri ni dzitshoni. (2 Thim. 1:7) Nyi ngu bonga Jehovha, kholu eni ni ndriyangu nya nandra olu ha gu gira thumo nya tepo yatshavbo. Muhuno, uye ni mwama waye va gu thuma malanga nyo hambane-hambane Europa gasi gu wuseya mabandla ma ganeyago lidimi nya Gisérvia. Jehovha hlamude milombelo eyi papayi wangu a nga ganeya khiyo na nyiri gyanana!

Gihevbulo gyangu nya Bhibhiliya gi ngu nyi phasa gu rula. Ga dzitepo nyo garadze, nyi hevbulede gu gombeya khu “tshivba ni tshivba” nga Jesu. (Luka 22:44) Nyi ngu wona mihlamulo nya milombelo yangu khu gu wona lihaladzo ni wuwadi dzipari dzangu dza libandlani gwangu la Nadezhda, Sófia dzi gu nadzo kheni. Dzitepo dzatshavbo dzi ngu nyi rana gasi gu vbedza tepo nadzo, nigu tepo yatshavbo dzi ngu nyi embeya gu khidzo dzi ngu nyi haladza. Satshavbo sesi si ngu nyi ninga litsako.

Nyi ngu oloveya gu dundrugeya khu gu wuswa ga ava va fudego. Nyi ngu dundrugeya na nyi wona vavelegi vangu frenti nya ndranga yathu na vari vaphya nga tepo va nga tshadha. Nya gu dundrugeya ndriyangu na gu phula guhodza. Nya gu dundrugeya Heinz nari ni kavhalu yaye. Gu dundrugeya silo sesi si ngu nyi phasa gu dusa mapimo nya mba yadi, ganiolu nyi yeyedza gubonga Jehovha khu satshavbo.

Tepo nyi dundrugeyago khu satshavbo nya sadi Jehovha a nyi ningidego womini wangu ni simbe silo nya sadi a na nyi ningago mindru wa tshigu, nyi ngu ema ni malito ya Dhavhidhe ma gu romo omu ga Ndzimo 27:13, 14 ma gu khayo: ‘Nyi ngu tumba gu kheni nyi na wona wuwadi wa Pfhumu Nungungulu na nyi ngo gu vbanya mafuni. Tumba Pfhumu Nungungulu u tiya, tiyisa monyo wago, u tumba Pfhumu Nungungulu.’