Jehovha a hi phaside gu dzi pwananisa ni ‘gu tsaka ga wevbini wulanga hi nga ba hi romo’

Khu 1979, patwa wowu wu di kursari xikola ya Gileyadhi, nigu hwane nya myaga nyo khaguri wu di rumedwa gasi wuya thuma Irã, Maurício, Mianmar, Tanzânia, Uganda ni Zaire. Khavba nya xikola yeyi ya Gileyadhi va ngapwa muhevbudzi Jack Redford na gu ninga wusingalagadzi wu nga va phasa gu dzi pwananisa ni gevbini giemo tepo yatshavbo. Emani hi mi tshamuseya.

Mats, ho lomba gu hi embeya edzi u nga mana khidzo lisine.

Mats: Papayi wangu a di gu vbanya Polônia ndrani nya nyimbi nya Wuvili ya Mafuni gwatshavbo, nigu a pwide malipha nya mangi omu nya tshetshe ya Katolika. Ambari ulolo, a di gu oloveya gu ganeya gu khuye: “Lisine lomo vbavbandze yeyi, ga wulanga nyo khaguri!” Khu gu gimbiya nya tepo nyi di tugula gu kheni uye a di gu ganeya lisine. Nyi di renga mabhuku nya mangi ma nga ba ma thumisidwe gasi nyi leri. Limwedo nya mabhuku yoyo li diri nya kori azul li gu khilo A Verdade que Leva à Vida Eterna. Hungo wowo nya mahungu wu nyi drindride gupima nigu nyi di leri latshavbo ga wutshigu wule nyi nga li renga. Dzimindrudzile nyi di gu dziti gu kheni nyi di li manide lisine!

Gukhugeya khu Abril nya 1972, nyi di leri mabhuku nya mangi nya Dzifakazi dza Jehovha nyi bwe nyi mana mihlamulo nya Bhibhiliya nya siwudziso nyi nga ba nyiri naso. Nyi di dzipwa nga murengisi nya gipimaniso gya Jesu a nga rengisa satshavbo a nga ba ari naso gasi gu renga perola nya lisima a nga ba a yi manide. Nyi di “rengisa” makungo yangu nya gu hevbule univhersidhadhi gasi nyi khala dhogodheya nigu nyi di gira satshavbo soso gasi nyi renga “perola” nya lisine nyi nga ba nyi li manide. (Mat. 13:45, 46) Nyi bhabhatisidwe khu 10 nya Dezembro nya 1972.

Ndrani nya mwaga wowo, vavelegi vangu ni ndriyangu nya mwama va di dzumeya lisine va bwe va bhabhatiswa. Nigu khu Julho nya 1973 nyi di beleya thumo nya tepo yatshavbo. Vbakari ga vandriyathu va nga ba va thuma kha nga vapiyonero libandlani gwathu, gu diri ni ndriyathu moyo nya nyamayi nyo mbure nyo pwani khu Ann-Catrin a nga ba haladza ngudzu Jehovha. Hi di haladzana hi bwe hi tshadha khu 1975, nigu ga 4 myaga yi nga landreya hi di khala dhoropani ga Strömsund a gu wulanga vathu nya vangi va nga ba va vbweta gu hevbula silo nya singi khu Bhibhiliya.

Ann-Catrin: Papayi wangu hevbude lisine guhegisani nya sihevbulo saye nya univhersidhadhi eyi Estocolmo. Ga tepo yile nyi diri ni 3 migima basi, ganiolu a di gu nyi dzega hi hongola mitshanganoni ni gutshumayelani. Mamayi wangu kha tsakiswa khu isoso, nigu zamide gu yeyedza gu khuye Dzifakazi dza Jehovha dzi di si ganeyi lisine. Ganiolu uye kha si kodza, nigu khu gu gimbiya nya tepo anuye a di bhabhatiswa. Nyi bhabhatisidwe na nyiri nyi 13 myaga nigu nyi di pheya gu thuma kha nga piyonera na nyiri ni 16 myaga. Hwane nya gu ba nyi thumide Umeå a gu wulanga wu nga ba wu vbweta vahuweleyi nya vangi, nyi di khala piyonera nyo hathege.

Hwane nya gu ba eni nyi Mats na hi tshadhide, hi di tsaka ngudzu khu gu phasa vambe gu hevbula lisine. Vbakari nya vandriyathu vovo a di romo muphya moyo nyo pwani khu Maivor a nga diga gu gira mihagano nya gu giri mapalisana gasi gu thuma kha nga piyonera ni ndriyangu nya nandra. Khu 1984, avo va di kursari xikola ya Gileyadhi nigu olu va gu thuma kha nga vamisiyonaryu eyi Equador.

Tepo u nga ba u thuma kha nga misiyonariyu, ginani gi nga gu phasa ‘gu dzi pwananisa ni gu tsaka’ thumoni gwago?

Mats: Dzitepo nya dzingi va di gu hi ninga mithumo nya yiphya. Gu pimedzeya giyeyedzo gya Jesu ngudzu-ngudzu gudzinogisa gu hi phaside gu dzi pwananisa ni gu vbindrugedza. (Kol. 2:6, 7) Vbavbandze nyo vireye gu khethu vandriyathu nya sipandre hi nga ba hi thumeya umo va dzi pwananisa ni mavbanyelo yathu, hi di dzi garadzeya gu dziti gu khethu khu ginani va nga ba va gira silo khu ndziya nyo khaguri. Hi di gu vbweta gu pwisisa mapimiselo yawe ni mavbanyelo yawe. Tepo hi nga ba hi pimedzeya Jesu, hi di gu si kodza gu dzi pwananisa ni gu tsaka mithumoni gwathu. — Ndzi. 1:2, 3.

Ann-Catrin: Gasi simbo wu nga yala wu si kodza gu dandra, wu yede gambe gu mana lihani. Jehovha tepo yatshavbo a khade ‘lihani’ avbo gwathu. (Ndzi. 84:11) Jehovha a hi kategiside ngudzu khu gu hi ninga vandriyathu va gu na ni lihaladzo. Khu giyeyedzo, ga libandla lathu nya lidugwana la Teerã eyi Irã, vandriyathu va hi hakhide gwadi ni gu hi yeyedza wuwadi. Isoso si hi dundrugiside siyeyedzo nya Bhibhiliya si nga ba si hakha gwadi vapfhumba. Hi di gu tsakiswa ngudzu khu gu khala Irã, ganiolu khu Julho nya 1980, mufumo wu di himbedzeya thumo wathu nigu ga litshigu nyo khaguri hi di embedwa gu pwani hi diri ni 48 dziora gasi gu duga khu tigoni mule. Hi di rumedwa guya thuma Zaire (olu gu tidwago kha nga Congo), eyi África.

Nyi di liya tepo nyi nga tugula gu kheni hi di gu rumedwe gasi hiya thumo África. Nyi dipwa na gu ganedwa khu dzinyoga ni madwali ma gomogo África nigu isoso si nyi thurugiside. Ganiolu, dzipari dzathu dzimbili dzi nga thuma eyi khu tepo nya yingi dzi di khidzo: “U nga thavi. U si hongoli África, ganiolu hi ngu dziti gu khethu u na tsaka ngudzu khu gu manega eyi.” Nigu khiso kamo si nga girega! Vandriyathu va eyi va na ni lihaladzo ni wuwadi. Gasi gu ganeya lisine, hwane nya 6 myaga na hi thumide eyi, tepo hi nga ba hi yede gu duga kheyi khu kotani nya olu thumo wathu wu nga ba wu himbedzedwa, nyi di dzi hega kholu nyi di gombeya ga Jehovha kheni: “Nyo lomba hi si dugi khu África.”

Makategwa muni u nga ma mana thumoni ga Jehovha?

Mats: Khu kotani nya thumo wathu hi si kodzide gu manega ni wupari nyo tiye ni vambe vamisiyonaryu va nga ba vata khu mayigo nyo hambane-hambane. Nigu gambe, ga mambe mayigo hi manegide ni litsako khu gu gimbidzisa sihevbulo nya singi nya Bhibhiliya. Gu diga isoso, kha hi na nga divala lihaladzo ni wuwadi hi yeyedzidwego khu vandriyathu va África. Ethu hi di gu lala omu nya movha yathu tepo khiyo hi nga ba hi wuseya mabandla, nigu vandriyathu va di gu tiyisega gu khavo hi na ni satshavbo hi nga ba hi si vbweta ambari olu va nga ba vari sisiwana. (2 Kor. 8:3) Gilo nyo hathege gwathu khu tepo hi nga ba hi kotareyana matimo. Hi di gu gira isoso gu hegisani nya litshigu, tepo khiyo eni ni mwangadzi wangu hi nga ba hi bhula khesi si nga girega ga litshigu lolo ni gu bonga Jehovha khu gu ba ari ni ethu.

Ann-Catrin: Gwangu nyi tsakide ngudzu khu gu tivana ni vandriyathu nya mayigo nya mangi. Ethu hi hevbude malimi nya maphya, nya nga Gifarsi, Gifrancês, Giluganda ni Gisuaíli, nigu hi hevbulede mavbanyelo nyo hambane-hambane. Ethu hi phasedzede gu trenari vandriyathu nya vaphya, gu gira dzipari nya dzadi ni gu tsaka khu gu thumeya Jehovha gumogo navo. — Sof. 3:9.

Ethu hi samadzisidwe khu sivangwa nyo mbure sa Jehovha. Tepo yatshavbo hi nga ba hi dzumeya thumo nya wuphya thumoni ga Jehovha, hi di gu dzipwa nga khatshi ha gu endra gumogo ni Jehovha na gu hi yeyedza omu hi yedego gu hongola umo. Uye a hi hevbudzide silo nya gu gima hi di hadzi gu mba si hevbula habune.

Sigaradzo muni u nga tshangana naso nigu u emisanide kharini naso?

Mats: Hi emisanide ni madwali nya mangi, nya nga Malarya. Nigu mwangadzi wangu a giride dzioperasawu nyo khaguri nya mba dzi vireya. Ethu hi garadzegide ngudzu khu kotani nya vavelegi vathu kholu va di gu dandride khu tanga. Hi ngu bonga ngudzu valongo vathu va nga ba va va khathaleya tepo khiyo hi nga ba hi romo thumoni ga Jehovha. Avo va giride thumo wowu khu gu laphisa monyo, khu litsako ni lihaladzo. (1 Thim. 5:4) Ambari olu hi nga ba hi gira satshavbo gasi gu va phasa na hi romo khu hwindzo, dzimbe dzitepo hi di gu dzipwa nandru ni gu vbweta gu gira nya singi gasi gu va phasa.

Ann-Catrin: Khu 1983, tepo hi nga ba hi thuma Zaire, nyi di dwala ngudzu khu kolera. Dhogodheya a di embeya Mats gu khuye: “Mu duse khu tigoni momu muhuno!” Hi di duga ga litshigu li nga landreya gasi gu hongola Suécia, ganiolu si di kodzega isoso kholu hi di beya avhiyawu yi nga ba yi rwaleya silo.

Mats: Hi di gu pimisa gu khethu thumo wathu wu di gu vbede, khu kharato hi di liya ngudzu. Dhogodheya a di gu pimisa gu khuye Ann-Catrin kha na nga tshukhwata, ganiolu uye a hawulugide. Nigu hwane nya mwaga mowo, hi di bweleya Zaire, ga libandla nya lidugwana nya Gisuaíli eyi Lubumbashi.

Ann-Catrin: Tepo khiyo nyi nga ba nyi romo Lubumbashi, nyi di khura mimba ganiolu nyi di dzegeya gu luza na gi si velegwi. Ambari olu hi nga ba hiri mwalo makungo nya gu manegi ni sanana, eni nyi garadzegide ngudzu tepo gyanana gyangu gi ngafa. Ga tepo yeyi nyo garadze, Jehovha a hi ningide giningwa hi nga ba ha sa gi vireya. Ethu hi di pheya gu gimbidzisa sihevbulo nya singi ngudzu nya Bhibhiliya guvbindra gale. Khu gipimo nya mwaga mowo libandla li di dandra, avba nya 35 vahuweleyi gu di engedzeya gu khala 70 nigu mitshanganoni hi diri ni asistensiya nya 40, ganiolu yi di engedzeya yi khala 220. Ethu hi di gu pharegide ngudzu thumoni nyo tshumayele nigu Jehovha a kategiside gudzigaradza gwathu ni gu hi gira hi dzipwa gwadi. Ethu hi nga go simama gu ganeya ni gu pimisa khu gyanana gyathu hi nga gi luza. Ethu ha gu vireya khu maho nyo fuviye tepo Jehovha a na dusago gwatshavbo guvbisa, paradhesini.

Mats: Khu gu gimbiya nya tepo, mwangadzi wangu a di pheya gu dzipwa na garade. Hi di tugula gu khethu nyi diri ni câncer de cólon nigu nyi di yedwe gu gira operasawu. Ganiolu muhuno nyi ngu dzipwa gwadi, nigu mwangadzi wangu a ngu gira satshavbo a si kodzago thumoni ga Jehovha.

Hi di tugula gu khethu khandrethu basi hi emisanago ni sigaradzo. Hwane nya gigaradzo gi nga manega khu 1994 eyi Ruanda, hi diya wuseya vandriyathu va nga ba va romo ga wulanga nya gu tshanise vathu. Tepo hi nga wona gukhodwa, gutimiseya ni gu dzi emiseya gwaye nya gu hakhe gwadi vapfhumba ambari olu va nga ba va emisana ni siemo nyo garadze, isoso si hi phaside gu wona gu khethu Jehovha a ngu phasa vathu vaye ambari va gu emisana ni gevbini gigaradzo. — Ndzi. 55:22.

Ann-Catrin: Gimbe gigaradzo hi emisanide nagyo tepo yi nga ba yi hendzeledzwa Bheteli ya Uganda khu 2007. Hwane nya tshangano, hi di endra khu tsawa nya gipimo nya 25 vamisiyonariyo ni vabhetelita hi hongola Nairobi, Quênia. Na hi si vbohi fronteira ya Quênia, kamiyawu nyo khaguri yi di beya omu nya faxa yathu yi ta hi veta khu frenti. Mugimbidzisi nya movha ni 5 vandriyathu va di dzegeya gufa vbale kamo; nigu moyo nya vandriyathu nya nyamayi a diya feya ospitali. Khu lisine hi si lambede ngudzu gu va wona gambe! — Joba 14:13-15.

Nyi hawulugide ga silondra nyi nga ba nyiri naso. Ganiolu, eni ni mwama wangu ni vambe vathu hi di gu simama na hi gu garadzega ngudzu khu kotani nya mhango hi nga girega. Gwangu nyi di gu garadzega ngudzu vbawutshigutunu, nyi di gu dzegeya gu wuga khu gu ba nyi hamuga phuvbo. Isoso si di gu thavisa. Ganiolu, gu gombeya ga Jehovha khu monyo watshavbo ni gu dundrugeya khu milowo hi yi golago si hi phaside gu emisana ni gigaradzo gegi. Nigu gambe hi vbwetide dhogodheya gasi a hi phasa gu emisana ni gigaradzo gyogyo, nigu aniso si ngu hi phasa ngudzu. Nigu olu kha hi garadzegi ngudzu, nigu hi ngu lomba Jehovha gasi gu phasa vambe va tshanganago ni giemo nyo fane.

Tepo u nga ba u tshamuseya edzi u si kodzago khidzo gu emisana ni sigaradzo sago, u di ganeya gu khuwe Jehovha a ngu gu phara nga “mandra.” U di gu vbweta khuwe ginani?

Mats: Malito yaya ma gu dugeya khavbo nya lidimi nya Gisuaíli, ma tshamuseyago gu khayo “Tumebebwa kama mayai mabichi,” mwendro “hi di pharwa gwadi kha nga mandra.” Gufana ni muthu a pharago gwadi mandra gasi ma si pandregi, Jehovha a hi seketede ga mithumo yatshavbo hi giridego. Tepo yatshavbo hi diri ni satshavbo hi nga ba hi si vbweta. Wuwadi hi yeyedzidwego khu Huwo nya Guthangeye wu hi phaside gu wona gu khethu Jehovha a ngu hi haladza ni gu hi seketeya.

Ann-Catrin: Nyo tsakeya gu ganeya khu giyeyedzo nya edzi Jehovha a nga hi seketeya khidzo. Ga litshigu limwedo nyi di ligaredwa nyi embedwa gu kheni papayi wangu a gomogo Suécia a di gu dwala ngudzu. Mwama wangu a di gu dwade ngudzu khu malarya nigu a di ngari gu hawuluga, nigu hi di hadzi gu mba si kodza gu renga dzibhiliyeti gasi hi bweleya gaya. Khu kharato, hi di hunga gu rengisa movha yathu. Khu gu landreya hi di ligaredwa guvili, gupheya hi di ligaredwa khu patwa wu nga tugula giemo gyathu nigu wu di gu vbweta gu livba bhiliyeti mweyo. Hi di ligaredwa gambe khu ndriyathu a dandridego khu tanga a nga ba vegedzede dzitsapawu omu nya kaxa gasi gu phasa “ava va vbwetago giphaso.” Khu dzimeneti nya dzidugwana, Jehovha a hi phaside gu mana dzibhiliyeti hi nga ba hi dzi vbweta. — Hebh. 13:6.

Tepo u dundrugago khu 50 myaga u gomogo thumoni nya tepo yatshavbo, ginani u gi hevbudego?

Ann-Catrin: Nyi hevbude gu kheni hi ngu mana tshivba khu gu “mana gutangala ni gitumbo.” Tepo hi tumbago Jehovha, uye a ngu si kodza gu hi phasa gu pala. (Isa. 30:15; 2 Dzik. 20:15, 17) Khu gu gira satshavbo hi si kodzago ga wevbini thumo Jehovha hi ningago, hi ngu hakha makategwa nya mangi hi nga hadzi gu mba ma mana khu yimbe ndziya.

Mats: Gihevbudzo nya gikhongolo ngudzu nyi nga gi mana khu gu tumba Jehovha ni ga gevbini giemo ni gu wona edzi a na nyi phasago khidzo. (Ndzi. 37:5) Uye tepo yatshavbo a nyi phaside kha nga edzi a tumbisidego khidzo. Hi ngo gu simama gu wona lisine nya isoso olu thumoni gwathu Bheteli, Mianmar.

Ho vireya gu khethu vaphya va vbwetago gu engedzeya thumo wawe vapwa lihaladzo nyo tumbege eli Jehovha a hi yeyedzidego. Hi ngu tumba gu khethu avo va na dzumeya gu khayo Jehovha a va phasa gu dzi pwananisa ga wevbini wulanga va na dzumeyago guya thumeya avbo.