Khu ginani Dzifakazi dza Jehovha dzi gu mba patega umo nya dzifesta nya litigo?

Dzifakazi dza Jehovha dzi ngu ninga githawo mifumu gumogo ni dzi símbolos nacionais. Ethu kha hi kutsedzeyi vambe gu mba gira gitumbiso gyawe nya gu ghwimbe bhandhera mwendro gu embeleya inu.

Ganiolu, Dzifakazi dza Jehovha dza gu hatha gu mba gira silo soso kholu hi ngu dziti gu khethu kha si gimbileyani ni esi Bhibhiliya yi ganeyago. Ha gu vireya gu khethu vambe va hi niga githawo gya gimwegyo hi va ningago khu gu ba va hatha gu gira silo nyo hambane.

Avba nya ndrima yeyi

• Matshina muni nya Bhibhiliya ma pategago?

• Ahati abari gu gilo gyogyo gya gu gimbileyana ni nayo nya litigo?

• Ina Dzifakazi dza Jehovha dza gu zama gu gira milayo yadzo mwendro politika?

Matshina muni nya Bhibhiliya ma pategago?

Matshina nya nayo ya mavili ma landreyago ma ngu khuha ngudzu esi hi si hathago:

• Hi yede gu khozeya Nungungulu basi. Bhibhiliya yari khiyo: “Khozeya Jehovha Nungungulu wago, khuye basi u yedego gu mu thumeya.” (Luka 4:8) Situmbiso si girwago umo nya dzi hinos nacionais gu tala nya dziepo si na ni malito ma ganeyago khu gu khozeya litigo nyo khaguri gu vbindra ni gevbini gilo. Khu kharato, Dzifakazi dza Jehovha khu gu kutswa khu livhalo lawe, kha dzi pategi umo nya sigiro soso.

  Dzifakazi dza Jehovha dzi ngu dziti gambe gu khidzo gu ghwimba bhandera si ngu fana ni gu khozeya sifananiso, a gu silo si himbedzedwago khu Bhibhiliya. (1 Vakorinto 10:14) Wumbe wugevisisi wu ngu ganeya gu khuwo dzibhandera sifananiso nya wukhongeyi. Muganeyi nya matimo Carlton. J. H. Hayesa wari khuye: “Umo nya nacionalismo gifananiso gi thumiswago gasi gu yeyedza gukhodwa, bhandera.” Maningano khu Makristo nya gu pheye Daniel. P. Mannix a di khuye: “Makristo ma di gu bomba gu gireya miphaso liphuvbo la mufumeli, nigu sasimweso khiso si giregago muhuno, ayo ma ngu bomba gu ghwimba bhandhera.”b

  Ambari olu Dzifakazi dza Jehovha dzi gu mba ghwimba bhandhera, kha hi khungumuleyi mwendro gu vbisa ni yevbini símbolo nacional.

• Vathu vatshavbo va ngu fana mahoni ga Nungungulu. (Mithumo 10:34, 35) Bhibhiliya yari khiyo Nungungulu “khu gu thumisa muthu moyo basi, tumbulugiside mafumbo yatshavbo nya vathu.” (Mithumo 17:26) Khu gighelo gegi, Dzifakazi dza Jehovha dza gu khodwa gu khidzo si vivbide gu dhumisa tsawa nyo khaguri mwendro mufumo guvbindra vambe. Ethu ha gu dhumisa vathu vatshavbo, na si si khathadzisegi avba vatago khavbo mwendro lifumbo lawe. — 1 Pedro 2:17.

Ahati abari gu gilo gyogyo gya gu gimbileyana ni nayo nya litigo?

Dzifakazi dza Jehovha kha dzi wugeyi mifumo. Ethu ha gu khodwa gu khethu mifumo ya gu gira gipandre nya ‘malulamiselo ya Nungungulu’ nigu a ngu yi dzumeleya gu yi manega. (Varoma 13:1-7) Ethu ha gu khodwa gambe gu khethu Makristo ma yede gu engisa vale va thangeyago. — Luka 20:25.

Ahati milayo nya mufumo ya gu ba yi dwanisana ni esi Jehovha a si vbwetago? Ga siemo nyo khaguri, adzina saye si nga kodzega gu hi lomba mufumo gasi gu tshukwadzisa milayo yoyo.c Sa gu mba kodzega isoso, Dzifakazi dza Jehovha dza gu hatha “gu engisa Nungungulu kha nga mufumeli, guvbindra vathu.” — Mithumo 5:29.

Ina Dzifakazi dza Jehovha dza gu zama gu gira milayo yadzo mwendro politika?

Ahihi. Dzifakazi dza Jehovha kha dzi dzi bedzedzeyi omu nya politika. Ha gu mba ghwimba bhandhera mwendro gu mba emba inu, kha si thuli gu khiso ha gu wugeya mufumo. Wulangani nya isoso, ethu basi ha gu emeya esi Bhibhiliya yi ganeyago maningano ni sigiro soso.