Ina Dhiyabhulosi womo khu lisine?
Hlamulo nya Bhibhiliya
Ina, Dhiyabhulosi womo khu lisine. Uye “mufumeli nya litigo” givangwa gya dzandzini gi nga vbindrugedza gi khala nyo vivbe gi bwe gi wugeya Nungungulu. (Johane 14:30; Vaefeso 6:11, 12) Bhibhiliya yi ngu hi embeya edzi Dhiyabhulosi a khadego khidzo khu gu thumisa malina ni malito ma mu tshamuseyago gwadi nya nga aya:
Sathane si thulago “Muganedzi.” — Joba 1:6.
Dhiyabhulosi si thulago “musengedzi.” — Gutuledwa 12:9.
Nyoga, eyi omu nya Bhibhiliya yi thumiswago gasi gu thula gu uye a ngu “kanganyisa.” — 2 Vakorinto 11:3.
Mulingi. — Matewu 4:3.
Muliphi. — Johane 8:44.
Sathane khandri wuvivbi wu gumogo ndrani nya muthu
Vambe va gu pimisa gu khavo, Sathane Dhiyabhulosi, wuvivbi owu hi gu nawo ndrani gwathu. Ganiolu, omu nya Bhibhiliya gu lovidwe mabhulo ya Nungungulu ni Sathane. Kha nga olu Nungungulu a vbeledego, na sa sa kodzega gu a bhula ni gipandre nyo khaguri nya guvivbe gi gomogo ndrani gwaye. (Dhewuteronome 32:4; Joba 2:1-6) Khu ndziya nya gu fane, Sathane a ligide Jesu, a nga ba ari mwalo gighoho. (Matewu 4:8-10; 1 Johane 3:5) Khu ndziya yoyo, Bhibhiliya nya gu yeyedza gu Dhiyabhulosi womo khu lisine, nasiri basi wuvivbi wu gumogo ndrani nya muthu.
Ina hi yede gu hlamala kholu vathu nya vangi va si khodwigo gu Sathane womo? Ne vbadugwana, kholu Bhibhiliya yo ganeya gu khiyo Sathane a ngu thumisa wukanganyisi gasi gu tadzisa makungo yaye. (2 Vatesalonika 2:9, 10 ) Wukanganyisi waye nya wukhongolo a wu thumisago ngudzu gu sega maho nya vathu nya vangi, gasi va si khodwi gu uye womo. — 2 Vakorinto 4:4.
Mambe malipha maningano khu Dhiyabhulosi
Malipha: Lucifer limbe lina la Dhiyabhulosi.
Lisine: Lito nya gihebheru eli omu nya dzimbe dzi Bhibhiliya li vbindrugedzedwago li khala “Lucifer” la thula “Gugagameya”. (Isaya 14:12) Tshamuselo wari khuwo mongo nya lito leli wa gu yeyedza gu dzipfhumu dza Bhabhiloni dzi di hadzi thedwa dzitshoni khu Nungungulu khu kotani nya olu dzi nga ba dzi dzi khusedza. (Isaya 14:4, 13-20) Lito “gugagameya” li thumisidwe gasi gu theya dzitshoni dzipfhumu dza Bhabhiloni hwane nya gu na thegide.
Malipha:Sathane a gu thumeya Nungungulu gasi a tadzisa makungo yaye nya gu lamule vathu.
Lisine: Dhiyabhulosi nala wa Nungungulu, khandri githumi gyaye. Sathane Dhiyabhulosi a gu wugeya vathu a bwe singedza vale va thumeyago Nungungulu. — 1 Pedro 5:8; Gutuledwa 12:10.