Ina Dzifakazi dza Jehovha dzi na ni milayo maningano ni gu namorari?

Dzifakazi dza Jehovha dzo khodwa gu khidzo Bhibhiliya yi nga dzi phasa gu hunga makungo ma tsakisago Nungungulu ni gu ma tsakisa anidzo. (Isaya 48:17, 18) Ethu kha giri milayo nya Bhibhiliya, ganiolu hi ngu vbanya khigyo. Wona edzi dzipontu dzi landreyago dzi pwananago khidzo ni gu namorari.a

• Mutshadho gilo nya gupindruge. (Matewu 19:6) Dzifakazi dza Jehovha dzo wona gu namorari kha nga lizambo li vetwago gasi gu tshadha. Khu kotani nya isoso, idzo dzo wona gu namorari kha nga gilo nya lisima.

• Muthu a yede gu namorari nari ni tanga nyo tshadhe. Uye a yede “vidzidwa givilini ni mapimoni”, mwendro seya a yede gu vbindra ga tanga nya gu gudogoreya nya malaho wukhongolo ngudzu. — 1 Vakorinto 7:36.

• Oyu a namorarigo a yede gu gira isoso na tshulegide gu tshadha. Khu nayo, vambe vathu nga tshulega gu tshadha, ganiolu khu mawonelo ya Nungungulu va si tshulege. Bhibhiliya yari khiyo muthu nyo khaguri a nga tshula basi mutshadho a gu tshuka pari yaye nya wugadzi a gira wubhayi. — Matewu 19:9.

• Bhibhiliya yari khiyo Mukristo a vbwetago gu tshadha a yede gu hatha muthu a gu Mukristo nya lisine. (1 Vakorinto 7:39) Dzifakazi dza Jehovha dzo khodwa gu khidzo nayo wowu kha wu ganeya basi khu muthu nyo khaguri a ningago githawo esi hi si khodwago, ganiolu so thula muthu a vbanyago guya khesi hi si hevbulago nigu Fakazi ya Jehovha yi nga bhabhatiswa. (2 Vakorinto 6:14) Nungungulu tepo yatshavbo embede vakhozeyi waye gasi va tshadha ni vathu va khodwago silo sasimweso navo. (Genesi 24:3; Malakiya 2:11) Nigu vasiyentista nyo khaguri va tugude gu khavo nayo wowu wu ngu phasa ngudzu.b

• Sanana si yede gu engisa vavelegi vaso. (Mavingu 1:8; Vakolosi 3:20) Ga vale va vbanyago ni vavelegi vawe, nayo wowu wo pata gu engisa esi vavelegi va hungago maningano ni gu namorari. Isoso adzina si nga pata tanga sanana si yedego gu pheya khiyo gu namorari ni esi si yedego gu gira tepo va namorarigo.

• Dzifakazi dza Jehovha dzi tshulegide gu hatha gu khidzo dzi na namorari mwendro ne, nigu khu mani va namorarigo naye, ganiolu na dzi gu dundrugeya gambe khu sileletelo sa Bhibhiliya. Isoso si ngu pwanana ni litshina nya nayo li gu khilo: “Muthu ni muthu a na rwala abune rwalo waye.” (Vagalatiya 6:5) Ambari ulolo, vathu nya vangi va vbwetago gu namorari va ngu vbwetedzeya wusingalagadzi ga dzimbe Dzifakazi dza Jehovha dzi nga vidzwa gwadi. — Mavingu 1:5.

• Sigiro nyo khaguri vathu nya vangi va si wonago na si olovelegide ndrani nya namoru, sighoho nya sikhongolo. Khu giyeyedzo, Bhibhiliya yari khiyo hi yede gu potsa wubhayi. Isoso kha si tule basi gu hengeya malawu, ganiolu so pata gambe gu gira silo nya mba handzega, nya nga gu pharaphara sivbango nya wuvelegi sa mumbe muthu, gu hengeye malawu khu kanani mwendro gu hengeya malawu khavba nyo dzi rume khavbo. (1 Vakorinto 6:9-11) Vathu va dzi pharago khu ndziya yi wusago gudogoreya nya malawu, dzimbe dzitepo va ngu hegisa khu gu gira wubhayi mwendro ‘silo nya mba handzega’ si ngu mba tsakisa Nungungulu. (Vagalatiya 5:19-21) Bhibhiliya yo hi gengedza gambe gasi hi si manegi ni ‘mabhulo nya mba handzega.’ — Vakolosi 3:8.

• Monyo wu nga hi senga. (Jeremiya 17:9) Oyu wu nga hi gira hi gira silo si sitigo gu khethu si vivbide. Gasi va si dzumeleyi gu khavo monyo wawe wu va senga, vambe vathu va namorarigo kha va khale vonga ga malanga ma nga va girago va gira silo nya mba handzega. Avo va ngu dzi woneya khu gu lomba vambe vathu va nga vidzwa gasi vava bangaladza. (Mavingu 28:26) Mukristo a nga ne tshadha a ngu wuti mhango nya dzi site oniline nya namoru, a ngu wuti gambe mhango nya wukhongolo wu gomogo avbo nya gu namorari ni muthu a si mutigo gwadi. — Ndzimo 26:4.