Dzifakazi dza Jehovha dzo tshungunula dzindranga mwendro dzo pwananisa?

Kha nga Dzifakazi dza Jehovha, ethu ho dzi garadzeya gu dzindranga dzathu ni edzi dza vambe dzi pwanana. Ethu hi ngu ninga githawo Nungungulu Muvangi nya dzi ndranga. (Genesi 2:21-24; Vaefeso 3:14, 15) Bhibhiliya yi na ni wusingalagadzi wu nga phasa vathu mafuni gwatshavbo gasi va manega ni mutshadho nyo dugeleyi ni gu tsakisa.

Dzi Fakazi dza Jehovha dzo phasa kharini dzindranga gasi dzi pwanana

Ethu ha gu dzi garadzeya gu landra wusingalagadzi nya Bhibhiliya. Wu ngu hi phasa gu khala vama, vagadzi ni vavelegi nya vadi. (Mavingu 31:10-31; Vaefeso 5:22–6:4; 1 Thimoti 5:8) Guti hi gu manago omu nya Bhibhiliya gu nga phasa gambe dzindranga dzi gu na ni Wukhongeli nya gu hambane. (1 Pedro 3:1, 2) Wona esi vambe vathu va ganedego tepo pari yawe nya wugadzi nyi nga khala Fakazi ya Jehovha:

• “Ndrani nya 6 myaga nya mutshadho wathu ethu hi di gu khaleya gu dwana, Ganiolu, hwane nya gu Ivete a khade Fakazi ya Jehovha, gu laphisa monyo ni gu dzi nogisa gwaye gu nyi drindride gupima gu bwe gu nyi tsakisa.” — Clauir, wa Brazil.

• “Tepo mwama wangu chansa a nga pheya gu hevbula Bhibhiliya ni dzifakazi dza Jehovha nyi di mu wugeya, kholu nyi di gu pimisa gu kheni dzifakazi dza Jehovha dzi di gu hambanisa dzindranga.” Olu nyi ngu wona gu kheni Bhibhiliya yi vbulugiside mutshadho wathu. — Agness wa Zambia.

Thumoni gwathu nyo tshumayele hi ngu yeyedza vatshavbo gu khethu gu thumisa esi Bhibhiliya yi hi hevbudzago si na hi phasa:

• Gu hatha muthu nya wadi nya gu tshadhi naye

• Gu dugeleya gwadi ga mwaga nya gu pheye nya mutshadho wathu

• Gu vbanyisana gwadi ni vavelegi vathu

• Gu thumisa gwadi dzitsapawu

• Gu mba khaleya gu ganedzisana

• Gu hevbuleya gu divaleyana

• Gu hevbudza sanana

Ina guvbindrugedza Wukhongeyi si nga resa sigaradzo pangoni gwathu?

Dzimbe dzitepo, ina. Khu giyeyedzo, khu 1998, instituto de investigação Sofres yi giride wugevisisi nyo khaguri nya gu avba nya patwa, moyo e Fakazi ya Jehovha. Khu landreya va tugude gu khavo avbo nya vinte mitshado moyo wakone wu diri ni sigaradzo nya sikhongolo.

Jesu a di khuye ava va engisago sihevbudzo sangu dzimbe dzitepo va na tshangana ni sigaradzo pangoni gwawe. (Matewu 10:32-36) Mwama moyo a gu na ni guti nya gungi a gu pwani khu Will Durant a di wona gu khuye ga tepo nya mufumo wa Roma “ Makristo ma di gu singedzwa kha nga va tshungunuli nya mapango,”a Muhuno dzifakazi dza Jehovha dzi ngu singedzwa khu silo sa simweso. Ina lisine gu oyu a khadego Fakazi ya Jehovha khuye a vangago guhambana pangoni?

Tribunal Europeu dos Direitos Humanos hwane nya gu ba yi gevesiside mahungu nya gu khayo dzifakazi dza Jehovha dzi ngu hambanisa mapango iyo yari khiyo: Gu tala nya dzitepo vale nya gu khandri dzifakazi dza Jehovha khavo va vangago sigaradzo khu gu mba “dzumeya gu givbango nya ndranga yawe gi dzi hatheya wukhozeyi wagyo.” Yi engedzede yi ganeya gu khiyo: “Isoso si ngu girega ga mipatwa yatshavbo yi hambanidego khu wukhongeyi, ambari ni ga dzifakazi dza Jehovha.”b Ambari sa gu girega isoso Dzifakazi dza Jehovha dzi ngu landrisa wusingalagadzi nya Bhibhiliya wu gu khuwo: “Mu nga bweledzeyi guvivba khu guvivba. . . .Sa gu kodzega, zamani guvbanya khu gurula ni vathu vatshavbo.” — Varoma 12:17, 18.

Khu ginani Dzifakazi dza Jehovha dzi khodwago gu dzi yede Gu tshadha ni muthu oyu nuye a gu Fakazi ya Jehovha?

Dzifakazi dza Jehovha dzi ngu landreya nayo nya Bhibhiliya nya gu ‘tshadhe Pfhumuni’, si thulago gu khiso hi yede gu tshadha ni muthu nya wukhozeyi nya gu fane ni owu wathu. (1 Vakorinto 7:39) Nayo wowu nya Bhibhiliya wu ngu phasa. Khu giyeyedzo, Ndrima yi dusidwego omu nya Journal of Marriage and Family khu 2010 yi di khiyo: “Mipatwa nyi lumbago wukhongeyi nya gu fane, va gu na ni mavbanyelo ni gukhodwa nya gu fane gu tala nya dzitepo va na ni mutshadho wu tiyidego”.c

Ambari lolo, Dzifakazi dza Jehovha kha dzi kutsedzeyi vandriyawe gu khodwani gu tshula mutshadho a gu ba nari gu moyo khandri Fakazi ya Jehovha. Bhibhiliya yari khiyo: “Ganiolu, ga vambe nyi ngu va embeya kheni, esi kheni nyi ganeyago, nasiri Pfhumu, Ndruye nyo khaguri a gu ba ari ni nyamayi, ganiolu nyamayi yoyo na siri mukhodwa, uye kha yeli gu mu diga. Nigu anuye nyamayi a gu ba ari ni mwama a sirigo mukhodwa nigu uye na dzi emisede gu vbanya naye, uye kha yeli gu diga mwama waye.” (1 Vakorinto 7:12, 13) Dzifakazi dza Jehovha dzi ngu wu ninga githawo nayo wowu.