Ginani giprofeto?

Hlamulo nya Bhibhiliya

Giprofeto mahungu matago khiyo ga Nungungulu ma yeyedzago mapimiselo yaye ni makungo yaye. Bhibhiliya yari khiyo vaprofeti “va di ganeya esi si tago khiyo ga Nungungulu na va gu thangedwa khu liphuvbo nya guage.” (2 Pedro 1:20, 21) Khu kharato muprofeti, muthu a hakhago mahungu matago khiyo ga Nungungulu a bwe a ma vbindriseya ga vambe vathu. — Mithumo 3:18.

Vaprofeti va di gu hakha kharini mahungu ya Nungungulu?

Nungungulu vbindrisede mahungu yaye ga vaprofeti khu dzindziya dzedzi:

• Khu gu lova mahungu yaye. Nungungulu thumiside ndziya yeyi gumogo. Uye giride isoso tepo a nga lova Likhumi milayo avba nya dzitabwa dzimbili a bwe a ningeya Mosi. — Ekisodha 31:18.

• Khu gu thumisa dzingilozi. Khu giyeyedzo, Nungungulu thumiside ngilozi gasi gu embeya Mosi mahungu a nga hadzi gu embeya Faro, Egipto. (Ekisodha 3:2-4, 10) Dzimbe dzitepo si di gu lombega gu ganeya malito nyo kongome ga mahungu nyo khaguri. Ga tepo yeyi, Nungungulu a di gu thumisa ndzigilozi gasi gu vbindriseya mahungu yaye. Giyeyedzo nya isoso nayo owu Mosi a nga wu hakha: “Lova magana yaya u ma vegisa, kholu nyi hungide khayo gidzumeledzwano nago gumogo ni sanana sa Israyeli.” — Ekisodha 34:27.a

• Khu gu thumisa siwoniso. Dzimbe dzitepo, Nungungulu a di gu gira vaprofeti vaye va wona siwoniso na va sa lala, ganiolu na va gu wona gwadi. (Isaya 1:1; Habhakuka 1:1) Simbe siwoniso si gu gira khatshi silo nya lisine kamo avbo nya gu ava va nga ba va si wona va patega gwaso nawo. (Luka 9:28-36; Gutuledwa 1:10-17) Simbe siwoniso vaprofeti va nga ba va si wona si di gu va gira va si tuguli esi si nga ba si girega vbafuvbi gwawe. (Mithumo 10:10, 11; 22:17-21) Nungungulu a di gu gira gambe vaprofeti vaye va wona siwoniso na va gu lade. — Dhaniyeli 7:1; Mithumo 16:9, 10.

• Khu gu woneleya mapimiselo yawe. Nungungulu wonelede mapimiselo ya vaprofeti gasi va kodza gu vbindriseya mahungu yaye. Khiso lowo wowo wu vbwetago gu ganeya: “Milowo yatshavbo yi lovidwe na yi gu thangedwa khu liphuvbo la Nungungulu.” Lito gu “thangedwa khu Nungungulu” li nga vbindrugedzwa gambe gu pwani “gufurugedzwa khu Nungungulu.” (2 Thimoti 3:16; Novo Testamento Interlinear.) Nungungulu thumiside liphuvbo ni tshivba yaye gasi gu theya mahungu yaye mapimoni nya vaprofeti. Mahungu ma diri ya Nungungulu, ganiolu vaprofeti va di yede gu hatha malito va nga ma thumisago. — 2 Samuweli 23:1, 2.

Ina siprofeto si di gu ganeya basi khu silo si na giregago mindru wa tshigu?

Ahihi, siprofeto kha sa nga ba si ganeya basi khu silo si na giregago mindru wa tshigu. Ganiolu, sipandre nya singi nya mahungu ya Nungungulu, si di gu ganeya khu silo si nga hadzi gu girega mindru wa tshigu. Khu giyeyedzo, vaprofeti va di gu kawuka Vaisrayeli khu gu phindra-phindra khu kotani nya silo nyo vivbe va nga ba va gira. Gu kawuka gogo gu di gu yeyedza makategwa Vaisrayeli nyo tumbege va nga hadzi gu ma mana mindru wa tshigu, ni mihimbo yi nga hadzi gu manega ga vale va gu mba tumbega. (Jeremiya 25:4-6) Esi Vaisrayeli va nga hadzi gu si hatha si di hadzi gu hunga gu khiso va na kategiswa mwendro ne. — Dhewuteronome 30:19, 20.

Siyeyedzo nya siprofeto si gu mba ganeya khu wumindru

• Ga tepo nyo khaguri, Vaisrayeli va di lomba giphaso Nungungulu. Uye a di rumeya muprofeti waye gasi aya va embeya gu khuye kha na nga va phasa kholu kha va engisa Nayo waye. — Valamuli 6:6-10.

• Tepo Jesu a nga bhula ni nyamayi moyo wa Samariya, uye a di mu embeya silo sa gale si nga ba si ganeya khu nyamayi wule. Uye na sa si kodza gu siti silo sesi nari khatshi kha phaswa khu liphuvbo nya Nungungulu. Hwane nya isoso, nyamayi wule ganede gu khuye Jesu a diri muprofeti, ambari olu a nga ne gu ganeya khesi si na giregago mindru wa tshigu. — Johane 4:17-19.

• Tepo Jesu a nga ba a lamula, valala vaye va di mu fenengedza khovbe va mu veta na gu ganeya khavo: “Nga profeta! Khu mani a nga gu veta?” Ga tepo yeyi, avo kha va nga ba va lomba Jesu gasi a profeta silo sa mindru wa tshigu, ganiolu va di gu vbweta gu khavo a thumisa tshivba a nga ningwa khu Nungungulu gasi a tugula khu mani a nga mu veta. — Luka 22:63, 64.