Khu ginani Dzifakazi dza Jehovha dzi nga vbindrugedza silo nyo khaguri va si khodwago?

Tepo yatshavbo ha gu thumisa Bhibhiliya kha nga gisekelo nya esi hi si khodwago. Khu kharato, tepo hi pwisisago milowo nyo khaguri ha gu tshukwadzisa silo nyo khaguri.a

Guvbindrugedza gogo ga gu gimbileyana ni malito ma gu romo omu ga Mavingu 4:18 ma gu khayo: “Ndziya ya va nya gululama ya gu wenengedza kha nga wuronga nya gugye, wu wenengedzago kala gu gira safa nya mihani.” Gu fana ni gu wenengedza nya lidambo gu wenengedzago vbadugwana-vbadugwana kala gu khala mihani, Nungungulu a gu hi gira hi pwisisa lisine nya Bhibhiliya vbadugwana-vbadugwana nigu khu tepo yakone. (1 Pedro 1:10-12) Kha nga edzi Bhibhiliya yi ganedego khidzo, Nungungulu a giride isoso khu gu vbiredza ga ‘tepo nya mahegiso.’ — Dhaniyeli 12:4.

Gu tshukwadziswa gogu kha gu yeli gu hi hlamadzisa mwendro gu hi vbedza tshivba. Vakhozeyi va Nungungulu va gale anavo va di gu yede gu tshukwadzisa mawonelo yawe nya silo.

• Mosi a di dzi ningedza gasi gu ya tshudzisa va na Israyeli na gu ngo tshade 40 myaga gasi Jehovha a mu ninga thumo wowu. — Mithumo 7:23-25, 30, 35.

• Vapostoli kha va nga ba va si kodza gu pwisisa giprofeto gi nga ba gi ganeya khu gufa ni gu wuswa ga Mesiya. — Isaya 53:8-12; Matewu 16:21-23.

• Makristo nyo khaguri nyo pheye ma diri ni mawonelo nyo hosege maningano ni “litshigu la Jehovha.” — 2 Vatesalonika 2:1, 2.

Khu gu gimbiya nya tepo, Nungungulu a va phaside gu pwisisa khu ndziya nya yadi nigu anethu ha gu gombeya gasi a hi gireya sasimweso. — Jakobe 1:5.