Khu ginani Dzifakazi dza Jehovha dzi girago Gilalelo gya Pfhumu khu ndziya nyo hambane ni wumbe wukhongeyi?
Ha gu gira esi Bhibhiliya yi ganeyago maningano ni Gidundrugiso gi tidwago gambe gu pwani “Gilalelo gya Pfhumu,” gidundrugiso nya gufe ga Jesu Kristo. (1 Vakorinto 11:20; Versão Rei Jaime) Ya walo khu gu wukhongeyi nya wungi wa gu gira gidundrugiso gegi nya mba landra esi Bhibhiliya yi ganeyago.
Makungo nya Gidundrugiso
Makungo nya Gidundrugiso khu gu hi dundrugisa esi Jesu a hi giredego, hi yeyedza gubonga gwathu khu dzegiso waye. (Matewu 20:28; 1 Vakorinto 11:24) Gidundrugiso, khandri gihena gi girwago gasi gu yeyedza gubonga mwendro gu lomba divalelo nya sighoho sathu.a Bhibhiliya ya gu hi hevbudza gu khiyo sighoho sathu si nga divaledwa ha gu khodwa ga Jesu, ganiolu khandri khu gu thumisa sihena. — Varoma 3:25; 1 Johane 2:1, 2.
Gya gu girwa gungani?
Jesu a di embeya vapizane vaye gasi gu gira Gilalelo gya Pfhumu, ganiolu kha ganeya khu gu kongoma dzitepo va nga ba va yede gu gira isoso. (Luka 22:19) Vathu nyo khaguri va gu pimisa gu khavo va yede gu gira isoso gumogo khu ngima, vambe va gu pimisa gu khavo va yede gu gira gumogo khu semana, tshigu ni tshigu mwendro kamo dzitepo nya dzingi khu litshigu.b Ganiolu, somo silo nyo khaguri hi yedego gu si vegeya gupima.
Jesu a di pheya gu gira Gilalelo gya Pfhumu khu litshigu Vajudha va nga ba va gira Phasika, a gu litshigu a nga songwa. (Matewu 26:1, 2) Isoso khandri si di kotsanisa. Milowo ya gu fananisa dzegiso wa Jesu ni ginvutana nya Phasika. (1 Vakorinto 5:7, 8) Phasika yi di gu girwa gumogo khu mwaga. (Ekisodha 12:1-6; Levhi 23:5) Khu ndziya nyo fane, Makristo nyo pheye ma di gu dundruga gufa ga Jesu gumogo khu mwaga,c nigu Dzifakazi dza Jehovha dza gu dzi seketeya avba nya giyeyedzo gi gomogo omu nya Bhibhiliya.
Litshigu ni ora
Giyeyedzo hi vegedwego khu Jesu, kha gi hi phasa basi gu wona gu khethu gungani hi yedego gu gira Gidundrugiso, ganiolu gya gu hi phasa gambe guti litshigu ni ora yakone. Uye a giride Gidundrugiso hwane nya gu ba li pfhode lidambo, khu 14 nya Nisani khu mwaga nya 33 matshigoni yathu, guya khu kalendharyu nya Bhibhiliya. (Matewu 26:18-20, 26) Ethu ha gu simama gu gira Gidundrugiso gumogo khu mwaga, kha nga edzi ma nga ba ma gira khidzo Makristo nyo pheye.d
Litshigu nya 14 nya Nisani, khu mwaga nya 33 matshigoni yathu, gu diri Sexta feira, ganiolu litshigu leli li nga kotsanisa mambe matshigu omu nya kalendharyu yathu mwaga ni mwaga. Gasi gu tugula litshigu nya 14 nya Nisani, ha gu thumisa kalendharyu ya matshigoni ya Jesu nasiri eyi yi thumiswago khu Vajudha muhuno.e
Pawu ni vhinyu
Avba nya gidundrugiso, Jesu thumiside pawu nya mba na livhirina ni vhinyu, si tshadego avba nya Phasika. (Matewu 26:26-28) Khu gu landra giyeyedzo gegi, ethu ha gu thumisa pawu nya mba na livhirina ni vhinyu yi nga mba patedzedwa ni gilo.
Dzitshetshe nyo khaguri, dza gu thumisa pawu yi nga thedwa livhirina, ganiolu omu nya Bhibhiliya livhirina dzitepo nya dzingi ya gu fananiswa ni gighoho ni wupfhadzedzeyi. (Luka 12:1; 1 Vakorinto 5:6-8; Vagalatiya 5:7-9) Khu kharato, pawu nya mba na livhirina nigu nya mba thedzeledwa simbe silo yi nga thumiswa gasi gu emeya givili gya Jesu gi gu mwalo gighoho. (1 Pedro 2:22) Gimbe gilo Bhibhiliya yi gu mba gi seketeya khu gu thumiswa nya sumu nya dziuvha wulangani nya vhinyu. Dzitshetshe nyo khaguri dza gu gira isoso kholu dza gu himbedzeya gu seya wadwa, a gu silo si ngu mba seketedwa khu Bhibhiliya. — 1 Thimoti 5:23.
Pawu ni vhinyu siyeyedzo
Pawu nya mba na livhirina ni vhinyu nyo fuviye si thumiswago avba nya Gidundrugiso, sa gu emeya nyama ni novba wa Jesu. Siyeyedzo sesi sa sivili, kha si vbindrugedzi si khala nyama ni novba wa Jesu khu lisine mwendro gu si patana kha nga edzi vambe va pimisago khidzo. Wona esi Bhibhiliya yi ganeyago maningano khu isoso.
Nari khatshi Jesu a di ruma vapizane vaye gu seya novba waye, na si gira gu khatshi a di va embeya gasi gu ndraga nayo wa Nungungulu wu ganeyago khu gu mba hodza novba. (Genesi 9:4; Mithumo 15:28, 29) Ganiolu uye kha gira isoso, kholu Jesu gima kha embeyi vambe gasi gu ndraga nayo wa Nungungulu maningano ni novba. — Johane 8:28, 29.
Vapostoli va Jesu na va sa si kodza gu seya novba waye na ngo gu vbanya, kholu novba waye wu di nga si vbaladzwi. — Matewu 26:28.
Dzegiso wa Jesu wu di girwa “gumogo si vbeleya.” (Vahebheru 9:25, 26) Ganiolu, abari gu pawu ni vhinyu sa gu vbindrugedza si khala kamo nyama ni novba wa Jesu tepo hi girago Gilalelo gya Pfhumu, si di hadzi gu gira gu khatshi ha gu phindra dzegiso wa Jesu.
Jesu a di khuye: “Simamani gu gira esi gasi gu nyi dundruga,” nasiri “gu pheledza gu gira dzegiso.” — 1 Vakorinto 11:24.
Ya walo khu gu vambe va ngu khodwa gu khavo pawu ni vhinyu sa gu vbindrugedza kamo si khala givili ni novba wa Jesu, ganiolu va gu khodwa isoso khu gu mba pwisisa gwadi mavhesi nyo khaguri nya Bhibhiliya. Khu giyeyedzo, omu nya wuvbindrugedzeyi nyo khaguri nya Bhibhiliya, Jesu ganede maningano ni vhinyu gu khuye: “Owu novba wangu.” (Matewu 26:28) Ganiolu, malito ya Jesu ma nga vbindrugedzedwa gupwani: “Esi sa gu thula novba wangu,” “Esi sa gu emeya novba wangu” mwendro “Sa gu tshamuseya novba wangu.”f Avba, Jesu a di gu thumisa gipimaniso nga edzi a nga ba a gira khidzo tepo a nga ba a hevbudza. — Matewu 13:34, 35.
Khu mani a hodzago pawu ni gu seya vhinyu?
Tepo Dzifakazi dza Jehovha dzi girago Gidundrugiso, vathu nya vadugwana basi va hodzago pawu ni gu seya vhinyu. Khu ginani?
Novba wu vbaladzidwego khu Jesu wu di vega “pwanano nya wuphya” wu nga tshikedza pwanano wu giridwego khu Jehovha Nungungulu ni Vaisrayeli. (Vahebheru 8:10-13) Ava va pategago avba nya pwanano nya wuphya, va ngu hodza pawu ni gu seya vhinyu, Gidundrugisotuno. Khandri yatshavbo Makristo ma girago gipandre nya pwanano wowu, ganiolu khu vale basi “va ranidwego” khu ndziya nyo hathege khu Nungungulu. (Vahebheru 9:15; Luka 22:20) Vathu vovo va na fuma ni Kristo, nigu Bhibhiliya ya gu ganeya gu khiyo i 144 000 vathu va nga hakha lithomo leli. — Luka 22:28-30; Gutuledwa 5:9, 10; 14:1, 3.
“Tshambi-dugwana” khu vale va nga ranwa gasi guya fuma ni Jesu dzandzini, ganiolu nya vangi gwathu hi girago gipandre nya “vathu nya vangi” hi na vbanya mafuni kala gupindruga. (Luka 12:32; Gutuledwa 7:9, 10) Ethu hi gu na ni gutumba nya gu vbanye mafuni, kha hi seyi vhinyu ambari gu hodza pawu Gidundrugisotuno, ganiolu hi ngu manega avba nya Gidundrugiso gasi gu yeyedza gubonga khu dzegiso owu Jesu a giredego vatshavbo. — 1 Johane 2:2.
a Referensiya nyo khaguri McClintock ni Strong’s Cyclopedia, Vholume IX, pajina 212, yari khiyo: “Lito Sacramento kha li manegi omu nya N[ovo] T[estamento]; nigu lito nya Gigreki μυστήριον [my·steʹri·on] gima kha li thumiswi mwendro gu gimbileyana ni gu bhabhatiswa, gilalelo gya Pfhumu mwendro wumbe buzo hi si kodzago gu wu wona.”
b Wuvbindrugedzeyi nyo khaguri nya Bhibhiliya, wu ngu thumisa lito “dzitepo dzatshavbo” omu nya referensiya yi ganeyago khu Gidundrugiso, nigu vathu nya vangi va gu pwisisa gu khavo lito leli la gu ganeya khu dzitepo hi yedego gu dundruga gufa ga Jesu. Ganiolu, tshamuselo nya lisine nya lito leli khu lidimi nyo pheye yi nga lowa khiyo Bhibhiliya, khuwo wu gu khuwo “Dzitepo dzatshavbo nya gu” mwendro “tepo yatshavbo.” 1 Vakorinto 11:25, 26; Nova Versão Internacional; Bíblia na Linguagem de Hoje.
c Wona The New Schaff-Herzog Encyclopedia of Religious Knowledge (Nova Enciclopédia de Conhecimento Religioso, de Schaff-Herzog), Vholume IV, dzipajina 43-44, ni Cyclopedia, de McClintock ni Strong, Volume VIII, pajina 836.
d Wona The New Cambridge History of the Bible (A Nova História da Bíblia, de Cambridge), Vholume 1, pajiina 841.
e Guya khu kalendhariyu nya Vajudha ya matshigoni yaya, litshigu nyo pheye nya Nisani ya gu kotsana ni tepo wu wonegago ngima, ganiolu Makristo nyo pheye kha ma nga ba ma thumisa ndziya yeyi. Ngima wu di gu pheya khu litshigu wu nga ba wu wonega ngima khu tepo nyo pheye Jerusalema, iso si thulago gu khiso ngima wu di hadzi pheya hwane nya litshigu limwedo mwendro khu gu gimbiya nya tepo na wu gu wonegide ngima nya wuphya. Egi khigyo gighelo gi girago Dzifakazi dza Jehovha dzi si giri Gidundrugiso khu litshigu lalimwedo Vajudha va muhuno va girago Phasika.
f Wona A New Translation of the Bible, by James Moffatt; The New Testament—A Translation in the Language of the People, ya Charles B. Williams; ni The Original New Testament, ya Hugh J. Schonfield.